Inap 80 Yia Pinis Ol i Wok Long Bungim na Nau Ol i Gat Bikpela Amamas
INDIA! Long kantri India i gat kain kain man i stap na kain kain lotu na kain kain pasin bilong ol man, na sampela hap i ples kol na sampela hap i ples hat. Long tingting bilong planti man dispela kantri i narapela kain na ol i laik save long en.
Em bikpela kantri tru na i gat 775 milion manmeri i stap long en. Tasol long Sande, Janueri 20, 1985, lain bilong Jehova long India ol i tingim wanpela bikpela samting i kamap long wanpela liklik tesin ol i kolim Lonavla, long ples maunten Westen Gats long provins Maharastra.
Bilong wanem long dispela de ol i gat bikpela tingting long dispela gutpela liklik tesin i stap longwe long biktaun Bombe Inap 110 kilomita? As bilong dispela i olsem: Inap 80 yia pinis long India ol i bin bungim ol gutpela samting bilong Jehova—em ol manmeri bilong em—na nau ol i gat bikpela amamas. Ol 7,000 Witnes Bilong Jehova long India ol i amamas long dispela samting, na lain bilong Jehova long olgeta hap ol i amamas long dispela samting.
Tasol pastaim yumi mas save olsem wanem tok i tru i bin kamap strong long India insait long dispela etpela ten yia i go pinis, na bai yumi inap save bilong wanem dispela samting i kamap long Janueri 20 em i bikpela samting.
Lait Bilong Tok i Tru i Kamap long India
Long yia 1905 wanpela man bilong India em i skul long saiens, em S. P. Davey, em i go raun long hap bilong Amerika. Taim em i stap long Amerika em i go harim wanpela tok long Baibel em C. T. Russell, namba wan presiden bilong Sosaiti Was Taua, i mekim. Davey i laikim tru ol tok em i harim. Em i go bek long ples bilong em long Madras long India, na bihain em i kirapim 40 liklik lain o grup bilong stadi long Baibel.
Long wankain taim wanpela yangpela man bilong India i wok long painim bekim bilong ol askim bilong em long sampela tok bilong lotu, olsem tok bilong God Triwan na givim baptais long ol liklik pikinini. Long dispela taim, dispela man, em A. J. Joseph, em i insait long lotu bilong Englan ol i kolim Sios ov Englan, tasol em i kisim wanpela buk bilong Russell (At-One-Ment Between God and Men). Dispela buk i helpim Joseph long save Jehova em i God tru na em i Nambawan Bikpela. Joseph wantaim papa bilong em na kasen-brata bilong em ol i kirap long autim dispela tok i tru long ol liklik ples long dispela hap nau ol i kolim Kerala, em hap i gat ol gaden rais na ol plantesen kokonas long en. Long yia 1912 Brata Russell i go long India na nau Joseph i kamap wanpela painia na autim tok bilong Kingdom long olgeta de. Long yia 1924 em wanpela i kirap i go raun inap 5,800 kilomita long planti hap bilong India na mekim planti pablik-tok. Long dispela rot planti man i harim tok i tru. Brata Joseph i wok strong long wok bilong Jehova i go inap long taim em i dai long yia 1964.
Namba tu presiden bilong Sosaiti Was Taua, em J. F. Rutherford, em i go long Englan long yia 1926. Taim em i stap long Englan em i toktok wantaim wanpela painia, em Edwin Skinner. Em i askim em: “Yu laik i go long India?” Brata Skinner i tok: “Wanem taim yu laik bai mi go?” Tripela wik bihain em wantaim wanpela poroman bilong em tupela i go long India!
Inap 50 yia Edwin Skinner i stap wasman bilong brens long India, em dispela brens i lukautim wok long India na Silon na Pesia na Afganistan na Bema. Em i raun long tren long olgeta hap bilong India. Sampela taim em i raun na autim tok na dispela poroman bilong em i wok long ofis, na sampela taim em i wok long ofis na poroman i go raun. Bihain ol i kisim wanpela ka i olsem “haus-ka” na dispela i helpim ol long i go autim tok long ol hap em tren i no i go long en. Nau Brata Skinner i gat 91 krismas na em i wok strong yet long brens-ofis bilong India na long autim tok.
Kirap long yia 1947 ol i salim sampela misineri bilong Skul Giliat i go long India. Richard Cotterill, em bilong Englan, em i go long India wantaim namba wan lain misineri na nau 38 yia bihain em i stap yet mekim wok bilong Jehova long India. Nau gavman bilong India i putim tambu na i tok, ol nupela misineri bilong narapela ples ol i no ken i kam long India. Tasol i gat 17 brata sista ol i bin mekim wok misineri inap olsem 30 yia samting ol i mekim wok yet long India.
Ol brata bilong India ol yet i bin kamap strong long spirit na nau planti ol inap long mekim wok painia salim na wok sekit na distrik samting. Long yia 1983 brens—ofis i putim tupela skul inap 10 wik 10 wik, ol i kolim Wastaua Baibel Skul. Inap 46 painia bilong India ol i insait long dispela skul na dispela i helpim ol long mekim gut wok bilong bungim ol man long India, em ol i laik harim tok i tru. Ol i go long sampela hap ol Witnes i no bin autim tok long en bipo na ol i kirapim wok bilong Jehova long ol dispela hap.
Maski Hevi, Wok i Karim Kaikai
I gat planti samting long India em inap putim hevi long ol man i wok long bungim ol sipsip bilong Jehova—em bikpela kantri tru, na i gat ol bikpela bikpela taun ol man i pas pas long en, na planti lain ol i stap rabis nogut tru, na lotu bilong ol i bosim olgeta samting ol i mekim kirap long taim mama i karim ol i go inap long taim ol i dai. Tasol maski ol dispela hevi, wok bilong lain bilong Jehova i karim kaikai. Sampela man namel long ol milion milion manmeri long India ol i laik save long rot bilong stretim hevi bilong ol man, na ol i laik save gut long God.
Wanpela man olsem em Dadu. Taim Dadu i yangpela yet em i lukim planti planti man ol i lotuim planti planti god na em i pilim olsem dispela i no stret. Olsem na em i kirap long kaunim Baibel, tasol planti tok bilong en i hatwok long save long en. Bihain em i go long ol haus lotu bilong ol Hindu na em i kaunim ol buk bilong lotu Hindu.
Dadu i tok: “Ol i tokim mi Bikpela Krisna em i bosim olgeta lotu na ol wan wan bis long nek bilong em i makim olgeta wan wan lotu. Mi ting olsem: Sapos dispela tok i stret, orait bilong wanem narapela lotu i birua long narapela lotu na planti taim ol i pait na kilim i dai man?”
Bihain Dadu i go long lotu Muslim na em i kisim tingting olsem em inap toktok wantaim sampela tumbuna bilong em ol i dai pinis. Tasol taim Dadu wantaim meri bilong em i kirap long stadi wantaim ol Witnes Bilong Jehova na lainim ol tok bilong Baibel, nau ol i kisim save tru long as bilong ol planti planti lotu i kamap long graun, na ol i kisim save olsem ol dispela “spirit” ol i bin toktok wantaim ol em ol spirit nogut. Dadu i tok: “Mipela tenkyu long Jehova, long wanem mipela kisim dispela save na mipela i no kalabus moa long strong bilong ol spirit nogut.” Nau Dadu wantaim meri bilong em i mekim wok painia.
Sevenpela yia bipo wanpela mama i kisim wanpela Baibel na sampela buk bilong Baibel long ol Witnes Bilong Jehova. Bihain em i go i stap long wanpela hap i no gat ol Witnes long en. Tasol em yet i save stadi na lainim ol tok bilong Baibel na ol dispela buk bilong Baibel. Nau ol Witnes i bungim em gen na em i tok: “Tru, inap planti yia mi no bin lukim yupela, tasol mi no inap lusim tingting long ol tok i tru mi bin lainim. Mi no inap i go bek gen long olpela lotu bilong mi.”
Ol i Wokim Ol Buk na Nius long Planti Tok Ples
I gat 15 bikpela tok ples long India na 9-pela kain rait. I hatwok long redim kaikai bilong spirit long ol dispela tok ples. Tasol long pastaim tru, olsem long yia 1912, Brata Russell i bin stretim rot bilong wokim ol liklik buk bilong Baibel long tok Hindustani, tok Gujarati, tok Malayalam, tok Marati, tok Telugu, tok Tamil. Bihain ol i wokim long sampela tok ples moa bilong India. Planti bilong ol dispela buk na nius ol i wokim long narapela kantri na salim i go long India. Tasol long yia 1960 samting gavman bilong India i putim tambu na i tok, ol buk samting long ol tok ples bilong India, em ol i wokim long narapela kantri, ol i no ken kisim i kam insait long India.
Brens i liklik na i no inap ol yet i wokim ol buk na nius, olsem na ol i kontrak wantaim sampela bisnis na bisnis i wokim. Ol i makim sampela painia bilong lukautim dispela samting long hap ol i stap long en. Long dispela taim ol i wokim ol buk na nius bilong Baibel long 16 tok ples long 11-pela hap long India, na ol i wokim Wastaua long 9-pela tok ples. Liklik taim nau na bai ol i kisim ol masin komputa bilong Sosaiti (MEPS) na bai ol inap redim ol buk na nius long brens-ofis na bai ol painia inap lusim planti aua moa long mekim wok bilong bungim ol man.
Kaikai i Kamap Insait long 80 Yia
Lain bilong India i planti tru; ol i namba tu bikpela lain long olgeta hap bilong graun. Olsem na i gat bikpela wok yet bilong autim tok long ol dispela planti planti man. Inap long nau ol brata i bin autim tok long liklik hap lain tasol (inap olsem 6.6 pesen). Lain bilong Jehova long India i no bin i go bikpela kwiktaim olsem long sampela kantri. Ol i wok long bungim ol man i go inap 53 yia na lain bilong ol i kamap inap olsem 1,000. Tasol ol misineri na ol brata sista bilong India ol i no les; ol i wok strong i go long mekim laik bilong Papa bilong ol. (Aisaia 60:22) Nau mipela i amamas long wanem long 1985 lain pablisa i go bikpela inap 10 pesen na long namba wan taim i gat 7,410 manmeri ol i autim tok long India long 340 kongrigesen na liklik grup.
Isi isi lain bilong Jehova long India i wok long i go bikpela, olsem na ol i mas kisim bikpela haus moa bilong putim brens-ofis long en. Tasol ol i no inap skruim haus ofis bilong ol long Bombe. Na i hatwok tru long kisim liklik hap graun long dispela biktaun na pe bilong graun i antap tumas. Na tu win long Bombe i no gutpela; i no klinpela na em inap givim sik long man. Olsem na long yia 1978 ol brata i kisim wanpela hap graun long taun Lonavla long ples maunten. Ol rot na tren tu i go long dispela taun. Taun i stap antap long maunten (inap 610 mita) na i gat gutpela klinpela win.
Ol i Wok Inap 6-pela Yia
Taim ol i kirap long sanapim haus brens long dispela hap graun, pastaim ol i mas wokim ol strongpela banis i go antap inap 4.6 mita na long taim bilong ren bai graun i no ken pundaun long maunten na bagarapim haus bilong ol man i stap klostu. Ol i klinim bikpela bus planti snek nogut i pulap long en. I gat sampela olpela haus i stap long dispela hap graun na ol i mas stretim bambai ol brata i gat ples slip na haus ofis inap liklik taim.
Ol i kontrak wantaim sampela bisnis bilong wokim nupela haus brens, tasol ol brata i gat save ol i bosim dispela wok, na planti brata i helpim ol. Wanpela man ol i baim em bilong putim kolta long rot insait long banis bilong haus brens, em i tok ol i mas wet inap 6-pela mun, long wanem em i no inap putim wara na wokim rot. Orait, olgeta brata sista bilong Betel ol i wok long karim ol baket wara i go kapsaitim long graun, mekim mekim i go inap planti apinun na nau man hia em inap pinisim kwik wok bilong em long taim stret olsem ol i bin makim!
I no gat ol bikpela masin buldosa i pairap, long wanem long India ol man i save mekim ol wok long han. Orait, ol i putim gut as bilong haus na ol i wokim haus i go inap long namba wan plua na nau ol i no inap kisim moa simen; olgeta man long dispela hap i sot long simen. Tasol brens-ofis long Korea i kisim 10,000 bek simen na salim i go long ol, na ol inap wokim pinis haus long taim stret olsem ol i bin makim. Olsem na long 1984 i gat gutpela nupela haus brens i sanap pinis—dispela samting i litimapim nem bilong Jehova.
Ol Haus Ol i Sanapim
Ol i sanapim 8-pela haus long dispela hap graun bilong Sosaiti (em bikpela inap 1.9 hekte ). Ol i planim ol stik banana na diwai fik na mango na popo, na ol gutpela plaua na purpur tu.
Bikpela haus i gat tupela plua na long as bilong haus i gat ples bilong wasim laplap na haus ka i stap. Namba wan plua i gat faktori long en bilong wokim ol buk. I gat tripela liklik masin bilong wokim ol buk i stap na sampela masin bilong pasim ol lip bilong buk wantaim. Na long dispela plua ol i putim sampela rum bilong ol masin komputa. I gat ples bilong salim ol buk i go tu. Ol buk na nius samting ol i wokim hia ol i salim i go long 56 kantri. Ol ofis na laibreri na rum slip i stap long namba tu plua.
Nupela Haus Kingdom i stap paslain. Haus Kingdom i gat pletfom long kona ol i bin bilasim long gutpela diwai ol i sapim. Inap 250 manmeri inap bung long dispela haus. Klostu i gat ol olpela haus ol i bin stretim na long ol dispela haus i gat sampela rum slip bilong ol 31 brata sista i wok long Brens na haus kuk na ples bilong kisim kaikai. I gat hap graun i stap nating na sapos bihain ol i laik wokim sampela haus moa o skruim sampela haus ol i ken.
Taim Bilong Bikpela Amamas
Olsem na long Janueri 20 taim ol i dediketim nupela haus brens bilong India, em taim bilong bikpela amamas. Inap 80 yia pinis ol i wok long bungim ol gutpela samting bilong Jehova long India na nau ol i gat bikpela amamas.
Taim ol i dediketim nupela haus brens ol i stori long ol wok bilong autim tok ol i bin mekim insait long dispela 80 yia. Na ol i stori long sampela gutpela samting i bin kamap taim ol i wokim haus. Wasman bilong son, em Günter Künz, em i mekim tok bilong dediketim haus na em i tok, insait long 5-pela yia i go pinis, long olgeta hap bilong graun, lain bilong Jehova i go bikpela inap 30 pesen. Tasol long India, lain bilong Jehova i go bikpela inap 34 pesen. Em i tokim ol brata, sapos ol i wok strong i go bai planti moa i kam insait yet long lain bilong Jehova long India.
Olgeta brata sista i harim dispela tok ol i amamas, long wanem ol i save Jehova i bin blesim wok bilong ol. Ol brata sista long India i tingting strong long wok i go yet bambai ol inap helpim planti moa long harim gutpela tok bilong Kingdom.
[Piksa long pes 24]
Edwin Skinner (em namba tu long han sut) wantaim dispela “haus-ka”
[Piksa long pes 25]
Nupela haus brens i stap klostu long Bombe