Ol Kristen i Ranawe i Go Long Pela

LONG yia 33 C.E. Krais Jisas i toksave long ol disaipel bilong em olsem taim ol i lukim “ol ami i kam raunim Jerusalem” ol i mas “ranawe i go long maunten.” (Luk 21:20-24) Ol i ranawe i go we? Wanpela man bilong raitim stori bilong bipo em Joseph Ernest Renan bilong Frans na em i save gut long hap bilong is, em i tok olsem: ‘Ol hetman bilong dispela lain [Kristen] ol i makim taun Pela i olsem ples ol i mas ranawe i go long en. Dispela taun i stap long hap bilong Dekapolis, klostu long Wara Jodan, long han kais. Em gutpela ples bilong ol i ranawe i go long en, long wanem dispela taun i stap antap long maunten na ol inap lukim olgeta hap long ples stret ol i kolim Gor, na long narapela hapsait bilong maunten i go daun tru na i gat bikpela wara long as bilong en. Long hap bilong Judia na Idumia na Peria na Galili ol man i pait long gavman; long Sameria na long hap bilong nambis tu ol man i no i stap isi . . . Tasol Skitopolis na Pela i stap klostu long Jerusalem na ol i no insait long pait. Pela i stap long narapela hapsait bilong Wara Jodan na ating ol inap sindaun isi long dispela taun, winim Skitopolis, long wanem ol Rom i pulap long Skitopolis. Taun Pela i stap fri olsem ol narapela taun long hap bilong Dekapolis . . . Man i ranawe i go long dispela taun em i kamapim long ples klia olsem em i no wanbel wantaim ol Juda ol i bikhet na pait wantaim ol Rom . . . Long dispela taun i birua long ol Juda, Sios Bilong Jerusalem i painim ples hait long taim nogut bilong ami i banisim Jerusalem.’