‘Ol i No Lusim Nating Taim’ Long Itali
TAIM Pol i stap long Rom, long Itali, long tupela pas em i raitim long ol brata Kristen, em i tok ol i “no ken lusim nating taim bilong wok.” (Efesas 5:15, 16; Kolosi 4:5) Ol brata Kristen i kaunim dispela tok na ol i kirap long wok strong. Ol i wok long painim rot bilong autim “dispela gutnius bilong kingdom” na helpim ol narapela man long kamap man bilong lotuim God tru.—Matyu 24:14.
Ol wokboi bilong Jehova long Itali long nau, ol tu i bihainim gut dispela tok Pol i bin givim long ol brata. Olsem ol Kristen bilong pastaim, ol tu i no lusim nating taim; ol i wok strong long painim rot bilong mekim bikpela wok moa bilong autim tok bilong Kingdom. Ol i mekim wanem na ol i no “lusim nating” taim?
Tokim Ol Man Yu Wanpela Witnes
Jisepi (Guiseppe) em wanpela lapun painia long lain Witnes Bilong Jehova long Rom. Em i stori long taim em i bin mekim wok mani. Em i laik bai ol wanwok bilong em i mas save em i wanpela Witnes Bilong Jehova, olsem na em i tokim ol. Dispela i givim rot long em bilong autim tok bilong Baibel long wanpela man. Wanpela taim bos i givim wok long em bilong lainim wanpela man long wok, nem bilong em Jiani (Gianni). Kwiktaim ol wanwok i tokim Jiani, tisa bilong em i wanpela Witnes Bilong Jehova. Taim ol i go pinis na Jiani tasol i stap wantaim Jisepi, Jiani i tokim Jisepi: “Nau yumi mas toktok long ol samting bilong wok, tasol long belo mi laik kisim sampela save long Jehova.”
Long taim bilong belo, tupela i save toktok wantaim na Jisepi i lainim Jiani long God. Em i tokim Jiani, God i gat nem, em Jehova, na em i stori long Jiani long ol samting God i laik kamapim long graun. Taim em i lainim Jiani pinis long mekim dispela wok, wanem samting i kamap? Jisepi i tok: “Mi givim namba bilong telefon bilong mi long em na sampela buk bilong Baibel. Em i kisim ol dispela buk na em i tok, ‘Sapos insait long ol dispela buk mi lukim sampela tok i no stret wantaim tok i tru bilong Baibel, orait bai mi kam bek hia na long ai bilong ol wanwok bilong yu bai mi kamapim long ples klia olsem tok bilong yu i kranki.’”
Planti mun i lus na Jiani i no i kam lukim Jisepi. Tasol bihain em i telefon long Jisepi na tokim Jisepi em i laik toktok wantaim em. Jisepi i stori olsem: “Mitupela i bung na em i gat lista bilong ol askim—mitupela i toktok wantaim inap 10-pela aua! Mi tokim em, mi laik stadi wantaim em na lainim em long ol tok bilong Baibel, na em i orait long dispela.” Orait, wanem samting i kamap? Jisepi i tok: “Jiani i kirap senisim pasin bilong em, na meri bilong em wantaim mama bilong em i pilim tru dispela samting, olsem na tupela tu i kirap long stadi. Long nau, Jiani wantaim meri bilong em, na mama bilong em tu, olgeta i gutpela wokboi bilong Jehova.”
Ol i Subim Em long Kukim Baibel Bilong Em
Sapos yumi bihainim gutpela pasin Kristen, dispela tu inap givim rot long yumi bilong autim tok i tru bilong Baibel long narapela man. Olsem aposel Pol i tok, gutpela pasin bilong yumi inap “kirapim biknem bilong dispela tok yumi save autim long ol man.”—Taitas 2:10
Pietro em i wanpela Witnes i gat 28 krismas, na taim em i stap manki yet, gutpela pasin Kristen bilong wanpela wanskul bilong em i kirapim em long laikim “dispela tok yumi save autim long ol man.” Pietro i tok, ‘Mi tingim yet pasin bilong dispela wanskul bilong mi long Gret 5. Taim ol i skulim mipela long lotu, em wanpela i save lusim klas i go ausait.’
Wanpela taim Pietro i askim dispela manki bilong wanem em i save lusim klas long taim bilong skul long lotu. Dispela manki i tok, em i kisim tok orait long mekim olsem, long wanem em i wanpela Witnes Bilong Jehova. Pietro i laik save moa na em i tokim dispela manki long kisim wanpela Baibel i kam long em. Pietro i tok, ‘Mi kaunim sampela tok bilong Baibel na kwiktaim mi save, dispela tok em tok i tru, na mi laik bihainim. Mi kisim Baibel i go long skul na mi tokim olgeta man mi wanpela Witnes Bilong Jehova. Long dispela taim mi gat 10-pela krismas tasol.’
Nau hevi i kamap. Pietro i stori olsem: “Wanpela pris i save lainim mipela long ol samting bilong lotu long skul. Em i tokim papamama mi mekim wok long Baibel long skul na gutpela sapos tupela i bagarapim dispela Baibel. Taim mi go bek long haus, mama i laik pulim Baibel long han bilong mi, tasol mi holim strong. Nau mama i kirap long paitim mi na rausim Baibel long han bilong mi. Bihain em i subim mi long kukim dispela Baibel bilong mi long paia.” Baibel bilong Pietro i lus, tasol bilip bilong em i no lus. Em i pasim tok long bel bilong em, olsem: ‘Taim mi bikpela pinis mi mas baim nupela Baibel, na bai mi autim tok bilong en long ol narapela man.’
Tupela yia bihain Pietro i kisim save olsem ol i save mekim Baibel-stadi long haus bilong wanpela poroman bilong em. Em i save hait na i go long dispela stadi. Pietro i tok, “Wanpela taim mi tokim papamama, ‘Tingting bilong mi i kirap pinis na nau i no gat wanpela samting inap senisim tingting bilong mi—mi laik kamap wanpela Witnes Bilong Jehova!’” Long dispela taim Pietro i gat 12-pela krismas. Papamama i lukim pikinini i bilip strong na tupela i orait long em. Pietro i kirap long i go long ol miting long Haus Kingdom. Fopela yia bihain em i kisim baptais. Na nau 18 yia bihain long taim em i kirap long kisim save long tok i tru long rot bilong gutpela pasin bilong wanpela wanskul bilong em, em i “no lusim nating taim”; em i mekim wok bilong God long Itali na autim tok long olgeta de, olsem wanpela painia.
Em i Gat 70 Krismas, Tasol Em i Wok Strong Yet
Mafalda em wanpela meri Kristen i stap long Livono. Em wanpela painia. I gat planti painia long Itali, winim 22,000, na ol i wok strong. Mafalda i kirap mekim wok painia taim em i gat 56 krismas. Em i tok: “Ol painia i mas lusim 1,000 aua long yia long mekim wok bilong autim tok. Tasol dispela tok yumi autim em i bikpela tok tru, olsem na mi save lusim 2,000 aua long olgeta yia long autim dispela tok.” Nau Mafalda i gat 70 krismas. Em i tingting long mekim wanem wok long bihain? Em i tok, ‘Namel long ol Kristen bilong pastaim i gat planti meri ol i wok strong long mekim ol wok bilong ol long haus na ol i save autim tok tu. Olsem ol, mi tu mi tingting long wok i go yet long autim tok bilong Kingdom bilong God. Em nambawan wok mi tingting long mekim.’
Kirap long ples maunten long hap bilong not na i go inap long ailan Sisili long Biksolwara Mediterenian long hap bilong saut, ol witnes bilong Jehova long Itali long nau i wok strong wankain olsem ol wanlotu bilong ol i bin mekim long taim bilong ol aposel. Long olgeta de ol i save lusim 100,000 aua long autim tok bilong Kingdom. Na wanem samting i kamap? Long yia 1986 klostu 12,000 nupela manmeri i bin kisim baptais na kamap wokman bilong Jehova. Ol dispela nupela witnes bilong Jehova wantaim ol narapela 131,000 witnes long Itali, ‘ol i no lusim nating taim.’