Sampela Askim Bilong Ol Man Long Dring
WANPELA pasto bilong Naijiria i tok: “Ol man i gat gutpela tingting ol i no save dring wain liklik.” Bipo ating bai ol man i tok, dispela pasto i no tingim laik bilong ol narapela man na em i laik putim strongpela lo tumas long ol. Tasol long nau, long sampela hap bilong graun, planti man i kirap long sakim pasin bilong dring wain na bia samting.
Long dispela taim wanpela nius (Readerˈs Digest) i tokim wanpela lain (Gallup) long skelim dispela samting long Amerika na ol i tok, “Long nau ol Amerika i no dring planti wain na bia samting olsem bipo.” Na wanpela nius (Time) i mekim wankain tok, olsem: “Long nau ol Amerika i wok long lusim kwik pasin bilong [dring wain na bia samting], winim olgeta taim bipo kirap taim gavman i tambuim dring long yia 1920 na i kam inap long nau.” Long kantri Frans tu ol i no dring planti wain olsem bipo.
Wanem samting i mekim na nau ol man i no laik dring planti? Sampela man i kros long wanem ol draiva i dring ol i kilim i dai planti man long rot. “Ol man bilong dring i save lusim taim bilong wok na ol i no inap mekim gut wok bilong ol; na pasin bilong dring i nogutim skin bilong ol; na ol i save bagarapim samting bilong ol yet na bilong ol narapela man; na planti ol i mekim pasin nogut, olsem brukim haus na stil; na pasin bilong dring i save bagarapim tru sindaun bilong ol famili. Long ol dispela rot, “long yia 1983” long [Amerika], bikpela mani tru (inap 89.5 bilion dola) i lus nating. (Nius Reader’s Digest i tok olsem.) Olsem na wanpela lain bilong Yunaitet Nesen (Wol Helt Oganaisesen) i tok, ‘gutpela sapos ol gavman i putim sampela tambu long dring bambai i hatwok long ol man i kisim, na long dispela rot bai ol i helpim gut skin na sindaun bilong ol manmeri long kantri bilong ol.’−Nius New Nigerian, bilong Mas 16,1983.
Sampela man i tok, ol man i mas lusim dring olgeta. Dispela pasto bilong Naijiria i tok: “Provep 20:1 i tok, ol man i dring wain ol i no bihainim gutpela tingting.” Na narapela pasto i tok: “Long hap bilong Aisaia, Baibel Holi i tambuim dring.” Em i tingim tok bilong Aisaia 5:11, 12, 22 na em i tok olsem.
Olsem na sampela man i gat askim olsem: Wanem insait bilong ol dispela tok bilong Baibel? Tru Baibel i tambuim yumi long dring wain na bia samting o nogat? Olsem wanem? Jisas i dring wain, o em i dring wara bilong grep tasol? Planti samting nogut inap painim man i dring, olsem na ating i gutpela ol Kristen i no ken dring wain na bia samting? Baibel tasol inap bekim ol dispela askim.