Autim Tok Long Kantri i Gat 700 Tok Ples
I GAT wanpela kantri i no bikpela tumas—em i liklik long kantri Spen—na ol manmeri bilong dispela kantri ol inap olsem 3 milion samting, tasol i gat planti handet tok ples long dispela kantri. Yu save long dispela kantri? Yu save long nem bilong dispela kantri i stap long wanpela ailan em i namba tu bikpela ailan long graun? Nem bilong dispela ailan em Niugini, na nem bilong kantri i stap long dispela ailan, em Papua Niugini, na i gat 700 samting tok ples long en! Olsem wanem ol manmeri bilong dispela kantri i gat planti tok ples olsem?
Kain Kain Man
Papua Niugini em i stap antap long Australia na em i ples hat. I gat olsem 600 ailan long dispela kantri na ol i stap nabaut long solwara inap olsem 1,600 kilomita. Tasol bikpela hap graun bilong Papua Niugini em i stap long bikpela ailan tru, ol i kolim Niugini. Wanpela hap bilong dispela bikpela ailan, long hap bilong wes, em i bilong Indonesia.
Ol stori bilong bipo i tok ol tumbuna bilong ol lain bilong Papua Niugini ol i bin i kam long hap bilong Esia, na i kam long Indonesia na i kamap long Papua Niugini. Bihain ol lain bilong Melanisia na Polinisia ol tu i kam sindaun long Papua Niugini. Ol lain bilong Papua Niugini ol i gat kain kain skin—sampela i skin ret na sampela i blak liklik na sampela i blak tru. Sampela i sotpela man na skin i patpela liklik, na sampela lain ol i longpela na bun nating. Bikpela hap graun bilong Papua Niugini em ol bikpela bikpela maunten na bikbus. Olsem na narapela lain i no bung wantaim narapela lain. Ol i stap narapela narapela na ol i marit insait long lain bilong ol yet. Ol dispela 700 samting tok ples bilong Papua Niugini i narapela narapela kain na i hatwok long lainim ol dispela tok ples!
Long yia 1975 Papua Niugini i kisim indipendens, tasol em i insait yet long Komonwel. Em i gat palamen na ol man i save eleksen na makim ol memba bilong en, na Kwin bilong Englan i stap olsem het bilong en, tasol i gat praim minista i stap. Long ol skul samting ol i save mekim tok Inglis, tasol planti manmeri insait long ol dispela 700 tok ples ol i save mekim tok Hiri Motu o tok Pisin.
Narapela Tok Ples i Kamap
Tasol bipo liklik i gat wanpela tok ples i no stap long dispela kantri i gat 700 tok ples long en. Wanem dispela tok ples? Em “gutpela tok ples” olsem Baibel i stori long en—em tok i tru bilong Baibel i toktok long God na Kingdom bilong em. (Sefanaia 3:9, NW ) Dispela nupela tok ples i kamap long Papua Niugini long yia 1935 samting.
Long yia 1935 wanpela bot i gat mota na sel, nem bilong en Lightbearer, em i lusim Australia na bihain em i kamap long Pot Mosbi. Ol boskru bilong dispela bot em ol Australia na bihain em i kamap long Pot Mosbi. Ol boskru bilong dispela bot em ol Witnes Bilong Jehova. Dispela em i namba wan taim bilong ol Papua Niugini long harim dispela “gutpela tok ples”—ol boskru i autim gutpela tok bilong Kingdom bilong God long ol long rot bilong wanpela masin olsem spika o bikmaus i stap long bot.
Long dispela taim i no planti man i harim dispela “gutpela tok ples.” Tasol kirap long yia 1951 planti Witnes bilong Australia, Kanada, Amerika, Jemani, Englan, Nu Silan, ol i wok long i kam long Papua Niugini bilong autim dispela “gutpela tok ples” long ol man—em dispela gutpela tok bilong Kingdom. Long hap bilong Papua Niugini, pastaim ol i autim tok long ol waitskin, tasol bihain liklik ol i painim rot bilong autim tok long ol asples. Ol i go long haus bilong ol man na autim tok bilong Kingdom, tasol i hatwok long ol i mekim olsem, long wanem sampela haus i gat longpela pos na ol i sanapim long solwara o long graun.
Bilong lainim ol Papua Niugini long dispela “gutpela tok ples,” ol dispela Witnes bilong ol narapela kantri ol i mas lainim tok Pisin o tok Motu. Tasol dispela tu i no inap, long wanem em i no tok ples tru bilong ol Papua Niugini—ol i gat tok ples bilong ol yet. Na i no olgeta man i save long tok Pisin na tok Motu. Olsem na sampela taim ol dispela Witnes i mas autim tok long wanpela man i save long tok Pisin o tok Motu na nau em yet i tanim dispela tok long tok ples bilong em na ol narapela man i ken harim.
Na long dispela taim ol Witnes i tingim wanpela rot bilong lainim ol man long tok bilong Baibel—ol i wokim ol piksa long blakbot o plang samting. Bihain ol i gat ol nius na buk samting long tok Motu na tok Pisin bilong tilim long ol man. Wanpela liklik buk ol i tanim long tok Motu na tok Pisin ol i kolim Stap Amamas Oltaim long Graun! na em i mekim bikpela wok bilong lainim ol Papua Niugini long dispela “gutpela tok ples.”
Pikinini Bilong Kwin i Harim “Gutpela Tok Ples”
Jisas Krais i bin tokim ol disaipel, ‘bai ol i sanapim yupela long ples bilong ol gavman na ol king. Olsem na bai yupela i ken autim tok long ol.’ (Mak 13:9) Long de namba 9 long mun Ogas, 1984, sampela misineri bilong ol Witnes Bilong Jehova long ailan Manus ol i gat rot bilong autim tok long wanpela bikpela man bilong graun. Long dispela de, namba wan pikinini bilong Kwin bilong Englan em Prins Sals (Charles), em i kam raun long Manus.
Ol asples i bilasim gut ol kanu na ol i go bungim Prins Sals long sip bilong em, na ol i go pas na bringim em i kam long nambis, klostu long bikrot. Long hapsait bilong rot em haus misineri bilong ol dispela Witnes i stap. I gat 100 man ol i bilas na i mekim singsing bilong amamas long Prins Sals i kam, na nau ol i makim em olsem wanpela “hetman bilong ples.” Long belo em i go long wanpela kaikai, na Premia bilong Manus i singautim ol dispela misineri tu i go. Prins Sals i askim ol misineri, ol i mekim wanem wok long Ailan Manus. Ol i amamas long tokim em long wok ol i mekim, na ol i tokim em olsem God Jehova i gat sampela Witnes bilong em long Ailan Manus tu.
Dispela bikmeri bilong gavman em i bin kisim tupela misineri i go sekanim Prins Sals, em yet i bin kaunim buk Yu Inap i Stap Oltaim long Paradais long Graun. Sampela taim em i bin i go lukim tupela long haus misineri bilong ol na dring kopi na kaikai kek.
Wanpela Man Bilong Politik i Kisim Nupela Tok Ples
Wanpela man bilong bisnis em i bilong lotu Luteran, em i insait long wok politik tu. Tasol misin bilong em long ples bilong em i no stap wanbel. Ol i bruk na tupela pasto i stap birua birua, na lain i pait long banara na spia inap wanpela yia samting. Inap 9-pela man i dai long dispela pait na planti ol i kisim bagarap long skin. Em nau, dispela man bilong bisnis i skelim dispela samting na em i tingting long lusim misin Luteran. Em i laik painim wanpela lain Kristen ol i stap wanbel tru, tasol em i no save long wanpela lain ol i stap olsem. Em i tingting, ‘Ol Witnes Bilong Jehova ol i profet giaman, olsem mi no ken i go long ol.’
Em i holim dispela tingting i stap na bihain sampela Witnes Bilong Jehova i laik baim bas bilong em bilong i go long wanpela kibung distrik bilong ol. Em i tingting long mani em bai kisim, olsem na em i orait long ol i baim bas, na em yet i draivim bas i go bringim ol long kibung. Long Sande em tu i go harim ol tok i kamap long kibung bilong ol, na em i kirap nogut long pasin bilong dispela lain, ol i stap isi tru na ol i putim gut yau na harim ol tok i kamap—ol manmeri na ol pikinini tu—na taim man bilong mekim tok i kolim wanpela hap tok bilong Baibel ol i opim Baibel na lukim ol dispela tok. Long belo ol i malolo na kisim kaikai, na dispela man i kirap nogut long pasin ol i mekim bilong kisim kaikai—ol i amamas na ol i lain—ol waitskin na ol man bilong mekim tok ol i lain wantaim ol narapela man na ol i wet long kisim kaikai, na ol i kisim wankain kaikai olsem ol narapela i kisim. Em i lukim dispela samting na em i kirap nogut long en. Bihain kibung i pinis na ol i kalap long bas na em i bringim ol i go bek long ples. Bas i ron inap 6-pela aua, na ol Witnes i mekim ol singsing bilong Kingdom na ol i amamas. Em i tingting, ‘Dispela lain i narapela kain tru long ol Luteran em ol i save pait na kros wantaim!’
Wanpela Witnes long ples bilong em i tok long lainim em long Baibel na em i orait long dispela. Tasol em i mekim hait, nogut sampela wanlotu Luteran i save na ol i bel nogut long em. Tasol kwiktaim em i kisim save long Baibel na dispela i strongim em na em i rausim nem bilong em long misin na long wok politik. Em wantaim meri bilong em i lainim pinis dispela “gutpela tok ples” na tupela i kirap long “kolim nem bilong Jehova na singaut long em” bambai ol i ken “wok gut wantaim” ol witnes bilong Em, em ol i stap wanbel.—Sefanaia 3:9, NW.
Bikpela Wok i Stap Yet Bilong Lainim Ol Man
Ol misineri na sampela Witnes moa ol i bin mekim gutpela wok. Long laik bilong ol dispela Witnes yet ol i lusim ol narapela kantri na ol i kam long Papua Niugini na bai ol i ken lainim ol man long “gutpela tok ples”! Long 1951 i gat tupela tasol ol i autim tok long Papua Niugini, tasol lain Witnes i wok long i go bikpela, na nau i gat planti man bilong autim tok na skulim ol man, winim 1,900, na klostu olgeta i bilong Papua Niugini.
Ol dispela Witnes bilong narapela kantri ol i amamas long lukim ol Witnes bilong Papua Niugini i stap. Wanpela brata bilong Englan i stap long ailan Boganvil, na em i tok: “Ol brata bilong mipela, ol i bilong Papua Niugini, ol i stap gut long mekim wok bilong Jehova, na dispela i mekim mipela i amamas na i kirapim mipela long i stap yet long Papua Niugini na wok wantaim ol long mekim wok bilong Jehova. Sampela taim ol i hatwok long mekim dispela wok. Sampela i no gat haus na ol i mas slip wantaim ol wantok. Na sampela taim ol i mas wokabaut longwe long bikpela san long i go long miting o autim tok, na sampela taim, ren i wasim ol. Wanpela sista i stap long bus, na taim em i laik kam wantaim mipela long autim tok long taun em i mas brukim wanpela wara, na man bilong em i save putim em wantaim tupela liklik pikinini long wanpela taia o gumi bilong ka na man i subim gumi na bringim ol i go long narapela hapsait bilong wara.”
Tasol i gat bikpela wok i stap yet long lainim ol man. Planti man i laik harim tok. Inap 10,235 man i bin bung long Memorial long 1987. I mas i gat sampela brata moa bilong lainim ol dispela manmeri long “gutpela tok ples.” Wanpela Witnes bilong narapela kantri em i bin kam long Papua Niugini bilong helpim wok bilong Jehova na em i tok: “Mi tingim ol manmeri hia long Papua Niugini ol i stap long ol ples longwe long ol taun; mi tingim ol na mi sori long ol na mi bel hevi. Yumi sot long man bilong helpim ol. Long dispela hap bilong graun bikpela wok i stap, tasol yumi sot long wokman. Jehova i save long dispela na em bai mekim sampela samting bilong helpim ol dispela manmeri i hangre long harim tok i tru.”
Olsem wanem long yu? Yu laik helpim dispela wok na lainim ol man long “gutpela tok ples” hia long dispela kantri i gat 700 tok ples?
[Mep long pes 23]
(Bilong save ol dispela rait i stap we long pes, lukim buk o magasin)
AUSTRALIA
PAPUA NIUGINI
Manus
Pot Mosbi
Boganvil