Ol i Go Helpim Ol Manmeri Long Ol Ailan Bilong Maikronisia

SAPOS yu harim nem olsem Trak, Yap, Ponape, Guam, Saipan, ating yu save long ol dispela ailan. Tasol olsem wanem long ailan Belau, na Rota, na Kosre, na Nauru, na Kiribati? Ol dispela ailan na planti ailan moa, winim 2,000 olgeta, ol i stap nabaut long bikpela hap (8 milion skwea kilomita) bilong Solwara Wes Pasifik na ol i kolim olsem Maikronisia; insait bilong dispela nem i olsem ‘ol liklik ailan.’

Long dispela bikpela hap, em i bikpela inap olsem Australia o Amerika, ol Witnes Bilong Jehova i wok strong long autim dispela gutpela tok bilong Kingdom. (Mak 13:10) Long dispela taim nau i gat 740 manmeri ol i autim tok bilong Kingdom na ol i stap long 13 kongrigesen. Ol i sot tru long ol man bilong helpim ol long autim tok long ol dispela ailan i stap longwe longwe.−Lukim Jeremaia 31:10.

Insait long 22 yia i go pinis, sampela manmeri bilong Hawaii, na Filapin, na Kanada, na Amerika, na Australia, ol i bin i go helpim ol manmeri i stap long ol dispela ailan bilong Maikronisia. Ol i go mekim wok misineri. Long yia 1965 ol i kirap long i go, na long dispela taim i gat 76 manmeri tasol ol i autim tok bilong Kingdom long dispela bikpela hap teritori. Tasol long yia 1987 inap olsem 4,510 manmeri ol i bung long taim bilong tingim i dai bilong Krais. Tru tumas, God i bin blesim gutpela wok ol dispela brata i bin mekim insait long 22 yia i go pinis.

Long nau i gat 49 misineri i stap long 14 haus misineri long narapela narapela ailan na ol i autim tok long dispela hap. Brens-ofis bilong Sosaiti Was Taua long Guam i save lukautim wok bilong ol. Ol dispela misineri i laikim tumas Jehova na ol manmeri bilong Maikronisia, na dispela samting i kirapim ol long mekim wok misineri na i go helpim ol. Wanem samting i bin painim ol long ol dispela ailan i stap longwe longwe? Ol i mas kisim save long ol nupela tok ples na long pasin bilong ol manmeri bilong dispela hap, olsem na wanem ol hevi i bin painim ol long dispela? Na wanem samting i bin helpim ol na ol i no lusim ples wok bilong ol? Orait, nau sampela i ken stori long ol wok ol i mekim long ol dispela ailan.

Hatwok long Lainim Ol Nupela Tok Ples

I gat 8-pela o 9-pela bikpela tok ples long ol ailan bilong Maikronisia. Tasol ol i no raitim ol dispela tok ples, olsem na i hatwok tru long ol nupela misineri i kisim sampela buk bambai ol i ken lain long mekim ol dispela tok ples. Tasol ol i wok strong long lainim. Ol man i tokim ol, wanpela gutpela rot bilong lainim nupela tok ples, em olsem: Taim yu kisim save pinis long wanpela tok na yu go autim tok, orait mekim wok long dispela tok yu lainim pinis. Ol i mekim olsem na kain kain samting i kamap−sampela samting i mekim ol i lap na sampela samting i mekim ol i sem pipia!

Roja (Roger), em bilong Hawaii, em i tingim wanpela samting i bin kamap taim em i kam nupela long ailan Belau inap 13 yia bipo, em i tok. “Mi go autim tok long ol haus na wanpela meri i tok, ‘Mi Katolik.’ Mi save long wanpela tok tasol bilong tok ples Palau, em olsem: ‘Bilong wanem?’ Mi kolim dispela tok na nau dispela meri i kirap bekim tok long mi na em i mekim bikpela stori. Mi no save long wanpela tok em i mekim. Tasol taim em i pinis long toktok, mi kolim dispela wanpela narapela tok mi save long en, em ‘Tenkyu.’ na mi lusim em i go!”

Inap 10-pela yia bipo, Salvador i kam long ailan Trak wantaim meri bilong em, Helen. Em i stori long taim em i kam nupela na em i tok, ‘Mi laik askim wanpela meri bilong Trak, “Yu laik i stap amamas [tok Trak, pwapwa]?” Tasol mi tok, “Yu laik kisim bel [tok Trak, pwopwo]?” Na Senet (Zenette), em i bilong Kanada na em i kam wantaim man bilong em Devit (David), em i stori long taim em i laik tok ‘Tenkyu’ (tok Trak, kilisou) long wanpela man, tasol em i tok, ‘Lang’ (tok Trak, kiliso). Nau ol i save gut tru long ol dispela tok.

Jems (James) i autim tok long ailan Ponape inap 4-pela yia pinis na bihain ol i salim em i go autim tok long ailan Kosre na em i mas lainim nupela tok ples gen. Em i laik mekim gutpela pasin pren long wanpela man bilong haus na em i laik tok, ‘Yu stap i orait?’ Tasol em i tok, ‘Yu narapela kain olgeta’! Nau, 10-pela yia bihain, em i tok: “Pastaim i hatwok long kolim sampela tok long tok ples Kosre, long wanem sampela tok, taim yu kolim i olsem yu mekim tok swea long tok Inglis.”

Ol dispela samting i kamap i no mekim ol misineri i bel hevi−ol i wok strong i go long lainim ol dispela nupela tok ples. Wanpela misineri i tok, “Sapos yu no save long tok ples bilong ol man, bai yu no inap helpim ol. Dispela samting i kirapim mipela na mipela i wok strong long kisim save long ol dispela tok ples.”

Ol Pasin na Bilip Giaman

Sampela pasin bilong ol man bilong ol dispela ailan i mekim ol misineri i lap. Olsem: Devit i bungim wanpela man em i gat tripela pikinini man na em i kolim nem bilong tripela olsem Talai na Atun (em nem bilong sampela kain pis), na Spam (em wanpela kain kona mit). Na bihain em i bungim tripela man nem bilong ol em Laik Nogut na Sin na Tanim Bel. Senet i kirap nogut long wanem ol i save kolim tumbuna bilong ol olsem Papa na Mama, na papamama bilong ol, ol i save kolim nem tru bilong ol. Taim Seri (Sheri) i lusim Hawaii i kam, em i save lap long pasin bilong ol man bilong makim rot long nus, i no long han. Na pastaim em i kirap nogut long wanpela pasin bilong ol meri, em olsem: Taim wanpela meri i laik go insait long bung bilong ol manmeri, em i mas brukim skru na wokabaut long skru i go painim ples bilong sindaun long plua. Dispela i bilong makim olsem meri i daun long ol man.

I gat planti bilip giaman tu i stap. Long ol Ailan Masal, taim wanpela long famili i dai, orait ol i save putim kaikai na smok (ol sigaret) na plaua long matmat bilong em. Na taim wanpela pisin i flai klostu long haus na em i singsing na raunim haus, ol i tok samting nogut i laik kamap long ol o wanpela long famili bai dai.

Sampela manmeri long ol dispela ailan ol i insait tru long wok bilong ol spirit nogut, olsem ol wok marila na posin samting. Bipo Jon tu em i insait long en. Bipo em i stap wanpela hetman bilong lotu Talatala, na em i save kisim wel bilong kokonas na wokim wanpela kain marasin na mekim beten na long dispela rot em inap rausim ol spirit nogut.

Jon i stori olsem: “Wanpela taim pes nogut bilong wanpela spirit nogut i kamap long dua bilong rum bilong mi. Pes bilong em i bikpela inap olsem dua.” Pastaim Jon i ting olsem em i driman, tasol bihain em i save, em i no driman; ai bilong em i op na em i lukim tru dispela samting.

Jon i tok: “Dispela spirit nogut i tok em yet i givim strong long mi na mi inap mekim dispela narapela kain wok mi mekim. Mi kirap nogut long dispela tok, long wanem mi wanpela dikon long misin na pasto yet i save singautim mi long rausim ol spirit nogut, olsem na bilong wanem ol spirit nogut i givim strong long mi bilong mekim dispela wok?” Liklik taim bihain sampela misineri bilong lain Witnes ol i bungim Jon, na ol i kirap long stadi wantaim em na lainim em long ol tok bilong Baibel.

Jon i tingim dispela samting na em i tok: “Taim mi kisim save long tok i tru na mi save long ol spirit nogut na long rot bilong save long lotu i tru, long dispela taim mi pilim bikpela amamas tru.” Em i lusim misin bilong em na em no mekim moa ol wok bilong ol spirit nau em i save autim tok na toksave long ol man bambai ol i sakim olgeta wok bilong ol spirit nogut.−Diuteronomi 18:9-13; Revelesen 21:8.

Autim Tok long Ol Liklik Ailan

I hatwok tru long i go autim tok long ol manmeri i stap long ol liklik liklik ailan. Planti taim i gat wanpela rot tasol, em olsem: Yu mas kalap long sip bilong kisim kopra na i go. Sip i save sua long ol dispela liklik ailan inap sampela aua o de bilong kisim kago na ol misineri na ol narapela brata i lusim sip na wok strong long autim tok long ol manmeri i stap long ailan. Redio tu em i wanpela rot bilong autim dispela gutpela tok long ol manmeri i stap long ol dispela liklik liklik ailan.

Sampela manmeri bilong ol dispela liklik ailan i save kam long ol biktaun bilong kisim kaikai o lukim dokta o bilong kisim skul. Taim ol i stap long bikpela taun, ating ol i bungim ol Witnes Bilong Jehova, na ating ol i kisim sampela buk o nius bilong Baibel long ol. Na taim ol i go bek long ples, ol brata i save raitim pas long ol o taim ol brata i go autim tok long ailan ol i stap long en, ol i go lukim ol. Wanpela man wantaim meri bilong em, tupela i bungim ol Witnes olsem long biktaun Majuro, long ol Ailan Masal, na bihain ol i go bek long ples bilong ol long ailan Ailuk, em i longwe inap 400 kilomita. Tupela i wok long kisim save long ol tok bilong Baibel, na liklik taim bihain tupela i rausim nem bilong ol long misin, na tupela i stretim marit bilong ol bambai i stret wantaim lo bilong gavman, na tupela i kisim baptais. Nau tupela i save wok strong long autim tok long ples bilong ol, long dispela ailan i stap longwe. Planti taim tupela i mekim wok painia haptaim.

Ol misineri long Ponape na Trak na Belau ol i gat bot bilong ol yet bilong i go autim tok long ol ailan. Planti taim i no gat bris samting bilong i go sua, na ol i mas lusim bot na kalap i go daun long wara na wokabaut long graun malumalum i kam antap inap long skru bilong lek. Planti man long ol dispela ailan ol i amamas long lukim ol na ol i save kisim mat na putim long plua na ol i save givim kulau long ol. Ol i save singautim famili olgeta i kam bung na ol i putim gut yau long ol tok. Planti ol i no gat mani, olsem na sampela taim ol brata sista i go autim tok inap tupela o tripela de, na taim ol i kam bek kaikai i pulap long bot bilong ol. Ol i givim ol buk na nius bilong Baibel long ol man na ol man i givim kain kain kaikai long ol, olsem senis.

Hatwok na Amamas

Sindaun bilong ol misineri long ol dispela ailan i no wankain olsem long ples bilong ol. Ol i gat hevi na hatwok liklik, long wanem sampela taim i no gat paua, o wara i sot. Ol i save wetim ren bilong kisim wara. Long sampela ailan i no gat paua o wara o toilet o rot kolta o ka. Tasol ol misineri i lainim skin bilong ol long i stap long kain ples olsem. Julian em i bin i stap gut long wok inap 17 yia long Guam na long ol Ailan Masal, na em i tok: “Taim mi lukim haus bilong ol brata bilong ol dispela ailan, em ol i wokim long ol olpela plang bilong plua samting, mipela save sori long ol, na dispela i save helpim mipela long bihainim stretpela tingting na mipela i no tingting long kisim planti samting bilong skin.”

Rodni (Rodney) na Seri i lusim Hawaii na i go i stap long ailan Trak. Rodni i tok: “Pastaim mi pilim olsem olgeta samting i narapela kain tru.” Nau, 10-pela yia bihain, em i tok: “Mipela i amamas long wok mipela inap mekim hia. I gat sampela hevi na hatwok i painim mipela; sampela taim mipela i bel hevi liklik na pilim olsem mipela i stap wanpis. Tasol mipela laik mekim yet dispela wok mipela i tingting pinis long mekim, em wok misineri.” Na Seri i amamas na em i tok: “Ol manmeri i lusim sampela samting bilong ol yet bambai ol i ken helpim ol narapela man, ol dispela manmeri i stap amamas.”

Tru tumas, hatwok bilong ol i no lus nating; ol i kisim gutpela pe. Klemen (Clemente) wantaim meri bilong em Yunis (Eunice) tupela i kam i stap long ol Ailan Masal inap 10-pela yia bipo na nau tupela i save mekim 34 Baibel-stadi long olgeta wik. Klemen i tok: “Inap olsem 14 Baibel-stadi bilong mipela ol i dediket long Jehova na ol i baptais pinis, na sampela moa ol i wok long redi long baptais. Long ai bilong mipela, dispela wok bilong helpim ol man long kisim laip, em i gutpela samting tru.” Jems, em i mekim wok misineri inap olsem 10-pela yia pinis, em i tok: “Taim mipela i lukim ol brata bilong mipela long Kosre ol i stap gut long Jehova i go i go, mipela pilim olsem mipela i kisim gutpela blesing.” Long Belau, Roja i tok: “Mipela i kisim bikpela blesing, long wanem mipela i gat nupela Haus Kingdom na ol brata sista i stap gut long wok bilong autim tok.” Plasido (Placido) i tingim ol yia em i bin mekim wok misineri na em i tok: “Jehova i bin soim rot long mipela na givim spirit holi long mipela. Dispela samting i helpim mipela long i stap klostu tru long em.”

Ol dispela gutpela samting i bin painim ol misineri em i strongim ol na ol i no laik lusim ples wok bilong ol. Planti ol inap tingim taim namba wan kongrigesen i bin kamap long hap ol i wok long en. Ol i kisim amamas wankain olsem bilong aposel Pol, long wanem ‘ol i no wokim haus antap long pos bilong narapela man.’ (Rom 15:20) Wanpela misineri i kamapim tingting bilong olgeta misineri long dispela hap, em i tok: “Bikpela wok i stap yet. Mi ting Jehova bai opim rot na bai planti sipsip moa long ol dispela ailan ol i kam insait long lain bilong Em. Gutpela tru mipela inap insait long dispela wok.”

Long Provep 10:22, Baibel i tok: “Sapos Bikpela yet i givim yumi planti gutpela samting, em i no larim ol dispela samting i givim hevi long yumi.” Ol manmeri i mekim wok misineri na ol i go helpim ol Maikronisia, ol i kisim dispela kain blesing, na ol i stap belgut na amamas, long wanem ol i mekim wok bilong Jehova.