Ripot long Wok Bilong Kingdom
‘Ol i Kisim Ol Gutpela Samting i Kam’
LONG yia 520 paslain long Krais, profet Hagai i raitim sampela tok bilong Jehova, em Jehova i tok: “Bai mi mekim ol gavman bilong olgeta kantri tu i guria. Na ol manmeri bai i kisim planti [gutpela] samting bilong ol na bringim i kam long dispela ples, na pulimapim long haus bilong mi.” (Hagai 2:7) Ol dispela ‘gutpela samting’ i kam pulap long haus bilong Jehova, em ol manmeri i lotuim em. Long Itali ol dispela kain manmeri i gat stretpela bel ol i harim gutnius na ol i bilip, olsem na long nau i gat 166,000 Witnes ol i wok long lainim ol man long ol tok bilong Baibel long dispela kantri. Lain Witnes i go bikpela tru kwiktaim, olsem na ol bikpela man bilong lotu Katolik long Itali “i tingting planti” long dispela samting. Wanpela meri long Itali em i bin wok long painim tok i tru, em i stori olsem:
“Inap 10-pela yia mi wanpela katekis na mi bilip tru olsem dispela wok mi mekim em i rot bilong kamapim bel bilong mi olsem mi laikim tumas God na ol manmeri. Wanpela gutpela pren bilong mi em i wanpela Witnes Bilong Jehova, tasol mi no bin putim yau long tok bilong Baibel. Tasol wanpela yia samting bipo, taim ol Witnes i kam long haus bilong mi, mi singautim ol i kam insait. Mi laik tokim ol; ol i no ken i go lukim tambu mama bilong mi moa, long wanem ol i paulim tingting bilong em. Mi tokim ol, ‘Yupela i no ken i go lukim ol lapun; yupela i mas toktok wantaim ol manmeri kain olsem mi.’ Kirap long dispela taim ol i wok long i kam long haus bilong mi, Tasol taim ol i laik toktok wantaim mi long wanpela tok em misin i lainim ol man long en, mi save tokim ol, ‘Bihain yumi ken toktok long dispela samting; mi mas skelim gut na kisim save long en pastaim.’
“Mi go askim ol pris, tasol taim ol i bekim tok long mi ol i no kamapim sampela tok bilong Baibel. Na wanpela pris, em i mekim wok misineri, em i tok i no bikpela samting long i go long lotu na mekim Misa. Em i tok, ‘Long ol kantri kain olsem Brasil, planti man ol i no mekim Misa, ol i save mekim ol narapela wok. Bikpela samting em olsem: Yu mas mekim wok bilong God long wanem wanem rot yu yet yu ting i gutpela.’ Dispela tok bilong em i strongim mi na mi lusim Misin Katolik. Man bilong mi tu em i bilong lotu Katolik na wanpela pris i bin tokim em, sapos mi laik kamap wanpela Witnes Bilong Jehova em i mas larim mi i mekim, long wanem ol Witnes Bilong Jehova i popaia long wanpela samting tasol, em ol i save givim bel tumas long lotu. Nau tasol mi wantaim wanpela pikinini man bilong mi mipela i kisim baptais. Man bilong mi tu i wok long stadi na lainim ol tok bilong Baibel na em i laikim tok bilong Kingdom.”
Jehova i salim lain bilong em i go tokim ol man long strafe bilong em bai painim ol man nogut, na dispela i mekim ol lain man na ol gavman tu i guria, na planti man, em ol i laik bihainim stretpela pasin, ol i kirap bihainim ol lo bilong Baibel na ol i lusim ol pasin i no stret bipo ol i bin mekim. Wanpela man bilong Itali, taim em i no kisim save yet long tok i tru, em i gat bikpela dinau. Em i ting pe em i kisim long wok mani bilong em na ol “gris” mani em i kisim inap helpim em long bekim dispela dinau. Taim em i kisim save long tok i tru, em i kirap mekim wanpela samting i hatwok tru long em i mekim—em i no kisim moa ol “gris” mani. Em wantaim meri bilong em i kisim baptais na tupela i kirap stret long mekim wok painia. Em i wok long haus sik, na planti taim em i mas rausim klos long skin bilong man i dai pinis. Planti taim em i painim pinis bikpela mani long poket samting bilong klos. Wanpela taim em i painim pinis K100, na wanpela taim em i painim pinis K400. Tasol em i save bihainim stretpela pasin, olsem na em i go givim dispela mani long ol lain i gat wok long bosim haus sik na ol i ken bekim long famili bilong dispela man. Long dispela rot em inap autim tok long ol dispela bos bilong haus sik na long ol dokta samting. Ol bos bilong haus sik i raitim pas long em na tok tenkyu long em, na ol i litimapim nem bilong em, long wanem em i bihainim gutpela stretpela pasin.
Ol dispela stori i kam long Itali i soim yumi olsem wanem sampela gutpela man, olsem ‘ol gutpela samting bilong ol lain man,’ ol i wok long lusim dispela pasin nogut bilong nau, na ol i kam insait long lain bilong Jehova, em ol i stap stret na ol i stap wanbel. Klostu nau bai Jehova i mekim olgeta gavman bilong graun, olsem lain politik bilong Satan, i guria olgeta na bai ol i bagarap long Armagedon.