Ating Yu God Bilong Yu Yet?

Sampela man i mekim na ol i kamap olsem god bilong ol yet, tasol ol i no save ol i mekim olsem. Long Efesus 5:5 Baibel i tok, olsem: “Yupela i mas save gut olsem, ol manmeri bilong mekim pasin pamuk na olkain pasin doti, na ol manmeri bilong mangal, em wankain pasin olsem pasin bilong lotuim ol giaman god, ol dispela lain i no inap i kam insait long kingdom bilong Krais na God.” (Kolosi 3:5; lukim tu Galesia 5:​19-21.) Ol laik bilong skin inap mekim na bai man i no givim bel tru long God. Pol i stori long ol kain man olsem na em i tok: “Ol i save bihainim ol laik bilong bodi bilong ol yet, na ol dispela laik i stap olsem god bilong ol.” (Filipai 3:​18, 19) Ol dispela man i gat narapela god bilong ol, i no Jehova. Ol laik bilong skin i nambawan samting long tingting bilong ol. Man i mekim kain pasin olsem, dispela inap pasim rot bilong em na bai em i no inap insait long Kingdom bilong God. (1 Korin 6:​9, 10) Olsem na i gat gutpela as na yumi mas bihainim tok bilong aposel Pol, em i tok: “Ol pren tru bilong mi, yupela i mas i stap longwe long pasin bilong lotu long ol giaman god.”​—⁠1 Korin 10:⁠14.