“Bihain Em i Givim Sampela Long Man Bilong Em”
TAIM snek i toktok long Iv na giamanim em na Iv i mekim pasin bikhet long God, Adam i stap wantaim Iv o nogat? Baibel i no makim olsem Adam i stap. Long Baibel New World Translation, Stat 3:6 i tok, Iv i “kirap kisim pikinini bilong dispela diwai na i kaikai. Na bihain em i givim sampela long man bilong em, na man tu i kaikai.” Tasol sapos yumi lukim dispela tok long sampela Baibel bai yumi ting olsem Adam i bin stap wantaim Iv long dispela taim. Wanpela Baibel (King James Version) i raitim dispela tok olsem: “Olsem na meri i kisim pikinini bilong dispela diwai na i kaikai, na em i givim sampela tu long man bilong em i stap wantaim em, na man i kaikai.”
Long dispela ves, dispela tok “na” ol i kisim long wanpela tok Hibru (waw) na long laspela tok bilong ves, dispela tok i wok wantaim tok Hibru ol i tanim olsem “givim.” Dispela tok em i wanpela liklik tok bilong skruim namba wan hap tok long namba 2 hap tok, na i makim olsem ol samting namba 2 hap tok i stori long en i kamap bihain long ol samting namba wan hap tok i stori long en. Olsem na long Stat 3:6 i stret Baibel New World Translation i tanim dispela tok, olsem “bihain,” o “olsem na,” na ol i no raitim “na” tasol.
Sapos Adam i bin i stap wantaim Iv long dispela taim, yu ting em bai sanap nating na harim tasol ol tok meri bilong em na snek i mekim? Wanpela ensel i bikhet em i as bilong ol tok bilong snek na yu ting Adam bai pasim maus na harim tasol ol tok dispela ensel i tromoi long maus bilong snek, em ol tok giaman na ol tok i bagarapim nem bilong God? Wanpela man bilong Jemani em i gat save long Baibel (em J. P. Lange) em i tok, Adam i no inap mekim olsem. Em i tok, “Yumi no ken ting Adam i bin i stap wantaim Iv long taim snek i traim Iv, o em i bin i stap, tasol em i no toktok. Nogat tru.” Na wanpela Juda i gat save long Baibel (B. Jacob) em i stori long dispela tok “i stap wantaim em” na em i tok, dispela tok “i no [makim olsem] man i bin sanap wantaim meri (taim meri i mekim namba wan samting, olsem kisim pikinini bilong diwai, o long taim em i kaikai). Nogat.”
Ol tok Iv i mekim long snek i kamapim klia olsem man bilong em i bin tokim em long lo bilong God, em God i tambuim tupela long kaikai pikinini bilong dispela diwai. (Stat 3:3) Adam i bin mekim wok bilong em, olsem het bilong Iv, na em i bin tokim Iv long dispela lo. Tasol Satan i kalapim dispela pasin God i bin kamapim, olsem God i bin putim man i stap het bilong meri, na Satan i kamap long meri taim meri i stap wanpela tasol. Satan i save moa yet long pasin bilong grisim na giamanim ol man. Bihain Iv i tok: “Snek i grisim mi na mi kaikai pikinini bilong dispela diwai.” (Stat 3:13) Iv i bilipim tok giaman bilong snek na dispela samting i grisim em long brukim lo bilong God. Tru Satan i giamanim em, tasol em i mekim rong. Dispela samting i mas givim tingting long yumi, olsem: Maski wanem wanem samting i pulim yumi na yumi brukim lo bilong Jehova, yumi mekim rong na i no gat rot bilong yumi tok, yumi no gat asua.—1 Timoti 2:14.