Ol Kaikai i Redi Pinis Long Brasil

“YUPELA i mas lukluk nabaut na lukim gut ol gaden. Ol kaikai i redi pinis. Man i wok long kisim kaikai, em i kisim pe bilong en na em i bungim kaikai bilong laip i stap gut oltaim oltaim.” (Jon 4⁠:​35, 36) Dispela tok profet bilong Krais Jisas i kamap tru long nau, long ol longwe longwe hap bilong kantri Brasil, long Saut Amerika.

Inap sampela yia nau lain Witnes Bilong Jehova long Brasil i wok long i go bikpela. Long Epril 1991, inap olsem 308,973 manmeri i bin autim tok bilong Kingdom, em bikpela lain tru, winim olgeta taim bipo. Na ol i mekim 401,574 Baibel-stadi. Long Mas 30, 1991, inap olsem 897,739 manmeri i bung bilong tingim i dai bilong Jisas, em man i bin kirapim dispela wok bilong bungim kaikai, olsem wok bilong autim tok.

Ol Witnes Bilong Jehova long dispela hap i bin wok strong na planti man i bin harim tok, tasol bikpela wok i stap yet. Winim 5 milion manmeri i stap long ol hap bilong Brasil em ol Witnes Bilong Jehova i no bin autim tok long en o wan wan taim tasol ol i autim tok long en. Ol Witnes long Brasil i mekim wanem bambai ol inap autim tok long ol dispela hap tu?

Ol Painia i Insait long Wok Bilong Bungim Kaikai

Long dispela taim, inap 6-pela mun brens-ofis bilong Sosaiti Was Taua long Brasil i bin salim sampela painia i go long 97 taun bilong mekim wok long ol dispela hap​—⁠inap 100 ol i mekim wok painia salim inap liklik taim, na 97 i mekim wok painia oltaim. Klostu olgeta dispela taun i stap long hap bilong is bilong Brasil, em hap i no gat planti man i stap long en. Sampela pablisa bilong ol kongrigesen tu i tok ol i laik i go long ol dispela taun na autim tok inap liklik hap taim. Ol dispela Witnes i mas winim sampela hevi bambai ol inap autim tok long ol dispela hap, tasol gutpela samting i bin kamap.

Olsem: Ol painia i bin i go autim tok long taun Sau Jau da Ponte, long provins Minas Gerais, na ol i bin toktok wantaim wanpela katekis bilong skul i stap long dispela taun. Em i harim pinis tok bilong ol na em i tok em i laik kisim 50 buk, nem bilong en Rot Bilong i Stap Amamas Taim Yu Yangpela Yet. Em i laik mekim wok long ol dispela buk taim em i lainim ol manki. Taim ol painia i laik lusim dispela hap, narapela tisa bilong skul i tokim ol: “Yupela i no ken lusim mipela, long wanem, yupela i mekim gutpela wok. I no gat narapela lain i bin helpim mipela long save gut long tok bilong Baibel olsem yupela i mekim.”

Tasol sampela i no amamas long dispela gutpela wok. Wanpela man i raitim pas na ol i putim long niuspepa bilong dispela hap (Diário de Montes Claros). Long namba wan pes bilong niuspepa, ol i raitim het-tok olsem: “Wanpela Man i Sutim Tok long Pris na i Tok, Pris i Kirapim Ol long Birua long Ol Man Bilong Narapela Lain.” Dispela pas i tok: “Long haus lotu [pris] i save toknogutim ol man i bihainim ol narapela lotu, tasol ol pris yet i no save lainim gut ol manmeri long bilip Katolik na pasin Kristen. Taim pris i mekim Misa, em i toknogutim ol Witnes Bilong Jehova i kam autim tok long taun bilong yumi, tasol ol i no bin mekim nogut long ol Katolik.” Man bilong raitim dispela pas, em wanpela saveman bilong lotu, tasol em i no birua long ol Witnes olsem pris i mekim. Em i bin i go harim wanpela pablik-tok ol painia i bin mekim, na em i kisim sampela man moa i go wantaim em, em ol i laik harim tok. Olgeta i amamas long ol tok ol i harim long dispela miting.

Fopela brata bilong Fotalesa ol i kalap long balus na i go long wanpela ailan, nem bilong en Fernando de Noronha, em i stap longwe long bikples inap 400 kilomita. Inap olsem 1,500 manmeri i save stap long dispela ailan, na inap 15 yia pinis ol Witnes i no bin autim gut tok long ol dispela manmeri. Insait long 10-pela de tasol dispela 4-pela brata i bin tilim 50 buk na 245 magasin na buklet, na ol i kirapim 15 Baibel-stadi. Taim dispela 4-pela brata i stap long dispela hap ol i mekim bung bilong tingim i dai bilong Krais, na 12-pela manmeri bilong dispela ailan i kam long dispela bung. Ol painia i laik bai Jehova i helpim ol, na bai wok bilong em inap kamap strong long dispela hap. Sampela brata i tingting pinis long i go i stap long dispela ailan.

Ol Pris i Mekim Nogut long Ol Man i Laik Harim Tok

Sampela pablisa bilong kongrigesen i stap long Apoado long Rio de Janero i tok ol i laik autim tok inap tupela wik long sampela taun long provins Minas Gerais, em ol taun i stap longwe inap 200 kilomita. Ol i amamas tru, long wanem ol manmeri bilong dispela hap ol i mekim gut long ol. Taim ol i toktok wantaim ol man bilong dispela hap na ol i kolim tok “God” o ol i kolim nem bilong God, em Jehova, ol man i save apim hat i stap long het bilong ol na putim gen. Ol i save bilip tru long God, olsem na ol i save bihainim tok bilong pris.

Long wanpela taun, pris i tokim ol manmeri ol i no ken harim tok bilong ol Witnes Bilong Jehova, na ol i no ken i go long wanpela miting ol Witnes i laik putim. Na em i tok em bai wokim Misa long wankain taim stret olsem ol Witnes i laik mekim miting bilong ol, na em i putim traipela spika bambai ol manmeri i stap ausait long haus lotu ol tu inap harim ol tok em i mekim. Maski em i mekim olsem, tasol 29 manmeri bilong dispela taun ol i go long miting bilong ol Witnes.

Tasol samting i kamap long narapela taun klostu i narapela kain olgeta. Pris long dispela taun em i tokim ol manmeri, taim ol Witnes i kam, ol i mas harim tok bilong ol. Olsem na taim ol Witnes i mekim namba wan miting bilong ol, inap olsem 168 i go long dispela miting. Bihain dispela pris i tokim ol manmeri bilong dispela taun, ol i mas lukim pasin bilong ol Witnes long mekim bung bilong tingim i dai bilong Jisas, long wanem “ol i mekim stret dispela bung.” Ol Witnes i autim tok long dispela hap inap tupela wik, na insait long dispela hap taim, ol i tilim 1,014 buk na 1,052 magasin na buklet.

Ol i Wok Strong na Gutpela Samting i Kamap

Inap olsem wanpela mun bihain, 34 pablisa i bin i go bek long dispela hap bilong lukautim ol manmeri em ol i bin kirapim Baibel-stadi wantaim ol long namba wan taim ol i raun long dispela hap. Wanpela elda Kristen i go pas long lukautim dispela wok, na em i bin raitim pas na i tok, “Mipela amamas tru long lukim gen ol dispela manmeri. Ol i amamas tru long lukim mipela na sampela i amamas tru na aiwara i kamap long ai bilong ol.” Wanpela sista i tok, em i sindaun kaikai wantaim sampela Witnes, na wanpela meri i kam long em. Sista i tok, “aiwara i kamap long ai bilong dispela meri na em i strong long mipela mas i kam stadi wantaim em.” Ol Witnes i stap long dispela hap inap wanpela wik, na insait long dispela hap taim wanpela meri i stadi inap 3-pela taim. Taim ol i go bilong stadi wantaim em, em i redim pinis ol tok bilong stadi na em i wetim ol i stap. Dispela meri i tok em i kirap pinis long beten long God tru, em Jehova, na em i tok: “Mi bin wet tasol long kisim dispela save nau mi wok long kisim.”

Bihain, Sosaiti i salim tupela sista i go mekim wok painia long dispela hap bambai ol inap stadi wantaim ol manmeri i laik harim tok. Wankain samting i bin kamap long dispela hap olsem i bin kamap long taim bilong ol aposel. Ol manmeri em “bel bilong ol i gutpela tru” na ol inap long kisim laip oltaim, “dispela ol manmeri i bilip.” (Aposel 13⁠:48) Na ol i mekim wankain pasin olsem meri bilong Samaria em Jisas i bin autim tok long em long hul wara bilong Jekop. Ol i kirap tokim ol narapela man long ol samting ol i wok long kisim save long en. (Jon 4⁠:​5-30) Long nau tupela painia i stap long dispela hap, na 6-pela pablisa moa i autim tok wantaim ol, na inap olsem 20 manmeri i save kam long ol miting.

Ol pablisa i amamas tru long ol gutpela samting i bin kamap long dispela wok, olsem na 29 pablisa bilong kongrigesen long Apoado ol i go autim tok long taun Mutum, em wanpela taun i stap longwe inap olsem 500 kilomita. Wanpela elda i lukautim wok ol dispela brata i mekim, na em i tok: “Taim mipela kamap long dispela hap, klostu olgeta manmeri i mekim gut tru long mipela. Klostu olgeta i harim gut tok bilong mipela, na mipela kirapim 170 Baibel-stadi, na ating klostu olgeta bai i wok yet long stadi.” Insait long tupela wik tasol olgeta wan wan pablisa i bin autim tok inap olsem 90 aua, na ol i tilim inap olsem 1,100 buk na buklet na magasin samting wantaim ol manmeri. Inap 181 manmeri i bin i kam long ol pablik-tok ol brata i bin kamapim.

Sampela mun bihain, kongrigesen i baim long mun wanpela haus long hap bilong Mutum, bambai dispela haus inap kamap Haus Kingdom na haus bilong ol painia i ken i stap long en. Tupela sista i mekim wok painia long dispela hap, na long namba wan ripot ol i bin salim i go long Sosaiti, ol i tok: “Mipela kirapim pinis planti Baibel-stadi, olsem na mipela i laik bai sampela painia moa i ken i kam helpim mipela. Wanpela taim long olgeta mun ol brata bilong Rio de Janero i save kam helpim mipela, tasol i gat bikpela wok i stap yet. Long olgeta 10-pela 10-pela manmeri mipela i autim tok long ol, inap olsem 9-pela i tok mipela i mas i kam bek lukim ol gen. Mipela i laik bai sampela i kam helpim mipela long lukautim ol miting.” Sosaiti i salim pinis wanpela painia moa i go long dispela hap.

Pasin Bilong Ol i Senis

Mipela amamas tru, long wanem planti manmeri i harim tok i tru na gutpela samting i kamap. Wanpela man i bin harim tok em i raitim pas na i tok: “Mi kisim save long tok bilong Baibel, na em gutpela samting tru, winim olgeta narapela gutpela samting i bin painim mi long bipo. Pasin bilong mi i senis, na nau mi no gat wok long kisim ol strongpela marasin bilong mekim isi bel bilong mi. . . . Jehova i mas blesim yupela, long wanem yupela i bin helpim mi gut tru.”

Narapela meri i tok: “Mi amamas tru, long wanem Jehova i bin helpim mi tru. Long dispela wik tasol bubu mama bilong mi i bin i dai, tasol nau mi bilip olsem bihain bai mi inap lukim em gen. Mi tingting long kisim baptais, tasol mi laik redi gut pastaim. Jehova i mas blesim yupela, long wanem yupela i bin i kam lukim mipela na helpim mipela long save long rot bilong kisim laip oltaim.” Na narapela meri i tok: “Mi laik tokim yupela, inap wanpela mun pinis mi lusim pasin bilong smok. Mi laikim tru dispela nius yupela salim i kam long mi. I gat planti gutpela tok i stap long en, na ol dispela tok i bin helpim mi long lusim pasin bilong smok.” Tru tumas, long dispela hap planti “kaikai” i redi pinis na ol i bungim. Yumi ken amamas long dispela samting!

Tasol hevi i bin painim sampela manmeri em ol i laik stadi. Olsem: Wanpela meri wantaim pikinini meri bilong em ol i kirap long stadi. Pris i tokim tupela, sapos tupela i go long ol miting bilong ol Witnes, bai em i rausim ol long misin. Tasol ol i no pret, na ol i go long ol miting. Na nau ol pren bilong ol bilong pastaim i givim baksait long ol, na sampela i tok ol i longlong, long wanem Baibel Katolik i no stori long “dispela Jehova.” Dispela meri i no inap painim nem bilong Jehova long Baibel Katolik bilong em, olsem na em i tokim ol manmeri i stap klostu long em long i kam long haus bilong em taim ol painia i kam bilong stadi wantaim em. Wanpela meri i kam na em i kisim Baibel Katolik (Paulinas) bilong em i kam wantaim em. Taim em i opim Baibel bilong em long Kisim Bek 6⁠:​3 na kaunim ol tok i stap daunbilo, em i lukim nem bilong God, olsem na em i tok em i laik bai wanpela Witnes i kam stadi wantaim em long haus bilong em.

Insait Moa Yet long Wok Bilong Bungim Kaikai

Olsem wanem long ol pablisa i bin i go autim tok long ol hap em ol i save autim tok wan wan taim tasol long en? Dispela i bin helpim ol yet o olsem wanem? Wanpela pablisa i tok: “Dispela wok i strongim bilip bilong mipela, na i helpim mipela long i go klostu moa long Jehova, na i helpim mipela long tingim gut ol bikpela wok mipela i mas mekim.” Narapela pablisa i tok: “Ol samting i kamap long dispela tupela wik i helpim mi long laikim moa yet ol brata, em mipela i wok wantaim olsem wanpela famili long mekim wanpela wok tasol, em wok bilong painim ol manmeri i gat gutpela bel. Dispela samting i kirapim mi long laikim moa yet ol manmeri i harim tok bilong mipela, em sampela taim ol i amamas tru long ol tok ol i harim na aiwara i kamap long ai bilong ol, long wanem ol i laik tru long kisim save long tok i tru. Na bikpela samting tru em olsem, mi pilim tru olsem Jehova i laikim tru mipela na em i givim dispela wok long mipela.”

Wanpela elda i bin insait long dispela wok na em i stori long sindaun bilong ol manmeri long ol dispela liklik taun i narapela kain long sindaun bilong ol man long ol biktaun. Em i tok: “Mi pilim olsem sapos sampela brata i go long ol dispela longwe hap, bai ol i stap gutpela. Pasin bilong pait na bagarapim man i no kamap planti long ol dispela hap. Pe bilong ol samting long ol dispela taun i liklik, olsem na liklik mani ol i kisim em bai inap long ol, na bai ol i gat bikpela hap taim moa bilong bung wantaim ol brata sista na mekim wok autim tok samting. Olsem wanem? Ol brata i ritaia pinis, o ol yangpela brata sista i no gat bikpela wok long lukautim famili bilong ol, o sampela brata em ol inap lusim wok bilong ol na i go long ol dispela hap, ol inap i go i stap long ol dispela liklik ples? Sapos ol i mekim olsem, bai ol i kisim bikpela amamas, na Jehova na ol manmeri i stap long dispela hap tu bai amamas.”

Dispela ripot i kam long Brasil na i stori long wok ol brata i mekim taim ol i autim tok long ol hap em wan wan taim tasol ol inap autim tok long en. Ol samting i kamap i helpim yumi long save, ol kaikai i redi pinis long Brasil. Insait long tupela yia tasol, ol i bin kamapim 191 nupela kongrigesen na liklik grup. Bikpela wok i stap yet, tasol mipela i save Jehova bai wok yet long blesim ol planti nupela man i kamap pablisa na em bai blesim ol wok ol i mekim bilong bungim kaikai. Olsem wanem? Yu inap insait moa yet long wok bilong bungim kaikai?

[Piksa/Mep long pes 25]

Ol Witnes long Rio de Janero i amamas long autim tok

[Mep]

(Bilong save ol dispela rait i stap we long pes, lukim buk o magasin)

BRASIL

[Piksa long pes 26]

Ol i autim tok long longwe hap bilong Minas Gerais