Gutnius i Go Kamap Long Ol Liklik Ples Long Saut Afrika
BIKPELA lain i bung bung na i kros, na i gat rait-skwot, na ol i pairapim ol smok-bom, olsem tia-ges. Dispela samting i bin kamap planti taim long ol liklik na bikpela taun long hap bilong Saut Afrika long nau. Long ol liklik ples long bus tu—inap olsem 40 pesen bilong ol manmeri bilong Saut Afrika i stap long ol dispela hap—long ol dispela ples tu, ol man i bung na pait, long wanem ol i gat kros long gavman. Maski dispela samting i kamap planti, tasol ol Witnes Bilong Jehova i wok strong yet long “autim gutnius bilong God i laik wanbel wantaim ol manmeri.”—Efesus 6:15.
Inap planti yia pinis ol Witnes long hap bilong Saut Afrika ol i save makim 3-pela mun long olgeta yia bilong i go autim tok long ol liklik ples long bus bilong ol. Olsem: Long 1990, inap olsem 12,000 pablisa, em ol i bilong 334 kongrigesen, ol i bin insait long dispela wok. Ol i mas winim planti hevi bambai ol inap autim tok long ol dispela liklik ples i stap nabaut long hap bilong saut bilong Afrika.
Ol manmeri bilong dispela hap ol i gat kain kain tok ples na pasin, na em wanpela hevi ol Witnes i mas winim bambai ol inap autim tok long ol. Sampela fama i save long tok Inglis na sampela i save long tok Afrikans, tasol i gat planti ol narapela tok ples tu, olsem tok ples bilong ol Pedi, Sotos, Songa, Swana, Venda, Kosa, Sulu. Olgeta wan wan lain i gat tok ples na pasin bilong ol yet, na olgeta i narapela narapela kain. Ol Witnes i mas wokabaut longwe long ol rot nogut bilong i go kamap long ol dispela hap. Olsem na taim ol Witnes i go long ol dispela hap, ol i no ken tingim laik bilong ol yet tasol, long wanem ol i mas lusim sampela samting bilong ol bilong inapim dispela wok, olsem taim na mani bilong ol. Tasol Jehova i blesim tru wok ol i mekim. Nau mipela laik stori liklik long ol hevi ol i mas karim na sampela gutpela samting i bin kamap long wok autim tok ol i bin mekim.—Lukim Malakai 3:10.
Wanpela “Sande-Skul” Long Hap Bilong Ol Sulu
Bikpela ples daun bilong Wara Umvoti i stap long hap bilong ol Sulu. Sapos yu sanap long arere bilong maunten na lukluk i go, bai yu lukim ol haus lain bilong ol Sulu. Long wanpela Sande long 1984, tupela pablisa i kam long dispela ples. Ol i bihainim rot i baut baut na das i pulap long en. San i hat nogut tru long dispela hap, olsem na ol man i givim nem Kwa-Sathane (olsem Ples bilong Satan) long dispela ples—ating ol i tingim dispela bilip giaman long paia bilong hel em Satan i save bosim na em i mekim dispela paia i go bikpela moa!
Maski tuhat i bagarapim skin bilong ol brata, tasol ol i go toktok long wanpela meri, nem bilong em Doris. Doris i lukautim wanpela “Sande-Skul,” em skul bilong lotu bilong ol pikinini. Em i harim tok bilong ol Witnes, na wantu em i tokim ol long givim dispela tok long ol 40 yangpela i sindaun long “Sande-Skul.” Wanem samting i kamap? Long wik antap ol brata i go bek long dispela hap, na ol i karim 70 buk nem bilong en Baibel Stori Buk Bilong Mi bilong mekim wok long en long dispela skul. Insait long sampela wik tasol, na ol samting long dispela “Sande-Skul” i senis—nau ol i stadi wantaim long ol tok bilong Baibel. Ol i no mekim moa ol singsing bilong lotu, ol i mekim ol singsing bilong Kingdom long pasin bilong ol Afrika. I no longtaim, na inap olsem 60 ol i sindaun na stadi wantaim. Wanpela brata i tok: “Bel bilong mipela i amamas tru, long wanem mipela i bin helpim dispela lain i go long ‘Sande-Skul’ na nau ol i save long lotu tru.”
Long Ples Bus
Ol lotu i insait long ol samting ol man i mekim bilong daunim gavman, olsem na planti fama waitskin i tingting nogut long ol man i kam toktok wantaim ol long tok bilong Baibel. Wanpela lain bilong Johanisbek i go longwe long hap bilong Trensval bilong autim tok, ol i stori long samting i painim ol, olsem:
“Inap olsem 4-pela aua mipela i raun long ka bilong i go long hap bilong not, na mipela brukim bikpela ples kunai i gat wan wan liklik diwai long en. Nau rot i senis na i no gat kolta moa long en, na rot i gat planti hul na i bagarap olgeta. Bihain mipela kamap long wanpela liklik rot na mipela i bihainim i go olgeta long wanpela fam.
“Mipela tok, ‘Moning,’ long papa bilong dispela fam.
“Em i bekim tok, ‘Moning,’ long mipela, na em i tok, ‘Yupela laikim wanem samting na yupela i kam?’
“Mipela tokim em long nem bilong mipela, na nau mipela tokim em bilong wanem mipela i bin kam painim em. Mipela pinis toktok, na kwiktaim em i singaut bikmaus na em i tok: ‘Pasto (dominee) bilong mi i tokim mi pinis long lain bilong yupela! Yupela bilong lain Komyunis na yupela i birua bilong Krais. Yupela lusim banis bilong mi na i go, nogut mi . . . !’
“Mipela lukim dispela fama, na mipela save sapos mipela i no lusim em, em bai mekim nogut long mipela. Mipela i no gat narapela rot, olsem na mipela i lusim dispela man na ‘rausim pipia graun i stap long lek bilong mipela.’ (Matyu 10:14) I gat planti das, olsem na i no hatwok long mipela mekim tru dispela samting.
“Mipela i go long narapela fam, na wankain samting i kamap. Nau mipela kisim save olsem pasto bilong Lotu Dutch Reform long dispela hap em i bin telefon long ‘lain’ bilong em na tokim ol, ol i no ken harim tok bilong mipela. Bihain mipela bungim wanpela fama, tru em i no laik harim tok bilong mipela, tasol em i tok mipela i ken toktok wantaim ol wokboi bilong em.’
“Mipela i bin wetim wanpela man i tok olsem, na nau dispela samting i kamap pinis. Inap olsem 10-pela liklik haus i stap em ol i bin wokim long graun malumalum. Ol dispela haus i stap klostu long sampela diwai wotel. Mipela wok long putim ol buk bilong mipela antap long ka, na mipela save ol man i stap long ol haus ol i wok long lukluk long mipela. Mipela bungim ol Baibel long wanpela hap, na ol buk Yu Inap i Stap Oltaim Long Paradais Long Graun long narapela hap, na ol buk Baibel Stori Buk Bilong Mi long narapela hap, na mipela putim tu sampela buklet. Wanpela manki bilong dispela hap i ran i go tokim ol manmeri long mipela i kam i stap. I no longtaim na inap olsem 30 manmeri i kam bung klostu long ka bilong harim tok bilong mipela.
“Mipela opim kaset i gat ol tok bilong Baibel long tok ples Swana. Ol dispela manmeri i amamas tru long harim dispela tok long tok ples bilong ol yet, na kisim save long Kingdom bilong God na long ples Paradais bai kamap bihain! Taim mipela laik tilim ol buk long ol, ol i amamas na toktok wantaim. I no longtaim na planti tru i kam bilong kisim ol buk na i hatwok tru long mipela givim long ol. Wanpela lapun i tok em i laik baim kaset bilong mipela. Mipela i amamas tru, long wanem, taim mipela lukim pes bilong ol na ol i tok tenkyu, mipela save ol i pilim tru dispela tok mipela givim long ol.
“Taim mipela laik lusim dispela hap, ol pikinini i sanap long lain na ol i mekim wanpela singsing bilong ol bilong tok gutbai long mipela. Mipela amamas tru, olsem na mipela i no tingim moa dispela rot nogut mipela i mas raun long en na ol man i no laik harim tok bilong mipela. Maski mipela i bin hatwok long i go long dispela hap, gutpela samting i bin kamap na mipela i no tingim moa ol hatwok bilong mipela!”
Bikman i Putim Lo!
Wanpela kongrigesen long hap bilong Soweto ol i gat wok long autim tok long ol man bilong bus long wanpela hap klostu long taun Pet Retef. Taim wanpela man i go long dispela taun, pastaim em i mas i go lukim induna o bikman bilong dispela ples na tokim em bilong wanem em i kam long dispela ples. Ol brata i bihainim dispela pasin. Ol i kirap nogut taim dispela bikman i mekim gutpela pasin long ol na em i tok ol i ken i stap long haus bilong em! Na em i raitim pas bambai ol pablisa i ken soim long ol man bilong haus taim ol i autim tok long dispela ples, na em i putim mak bilong em yet long dispela pas. Pas i tok: “Ol dispela man i autim tok long Kingdom bilong God. Singautim ol i go insait long haus bilong yupela na harim tok bilong ol.”
Planti man tru i harim tok, olsem na ol Witnes i stretim rot long mekim pablik-tok long Sande long belo bek long banis bilong dispela bikman. Planti manmeri i kam bung na ples i pas, na taim ol i kirapim na pinisim dispela miting ol i mekim singsing na beten. Kain gutpela samting olsem i kamap long sampela ol narapela hap bilong bus tu.
Wanpela man i gat gutpela bel olsem, em Nataniel. Em i stap long wanpela liklik ples nem bilong en Petsedesoleyang, long Bophutaswana. Dispela hap i drai olgeta na inap planti yia i no gat ren. Em i mekim wok didiman long dispela hap na em i helpim ol manmeri long save long rot bilong wokim gaden na lukautim. Em i tingting long mekim wok na bai dispela ples nogut i no gat wara bai kamap gutpela ples paradais. Tasol taim em i harim tok olsem klostu nau na graun olgeta bai kamap wanpela gutpela ples paradais, em i amamas tru. Taim ol pablisa i kolim wanpela tok bilong Baibel, wantu em i raitim dispela tok long hap pepa. Ol pablisa i tokim Nataniel long wanpela kongrigesen i stap longwe long em inap olsem 30 kilomita.
Amamas Long Helpim Ol Man i Laik Kisim Save Long Tok i Tru
Wanpela painia, nem bilong em Monika, em i tok: “Mipela kisim save olsem, maski man i stap rabis tru, sapos em i laik kisim save long tok i tru, em inap kisim dispela save.” Monika i wok wantaim sampela painia ol i autim tok long ol fam long ol ples kunai long hap bilong wanpela provins long namel bilong dispela kantri, ol i kolim Orens Fri Stet. Ol painia i ting olsem wanem long wok bilong autim tok long ol dispela manmeri? Ol i tok: “Mipela kisim planti blesing tru na mipela i no inap kaunim namba bilong ol dispela samting.” Tru tumas, ol painia i kisim planti blesing bilong spirit.
Sapos wanpela man i laik kisim save long tok bilong Baibel, em inap kisim dispela save, maski em i no inap rit rait. Ol manmeri i no save rit rait, o ol i save liklik tasol, ol i amamas tru long dispela buklet i gat planti piksa, nem bilong en Stap Amamas Oltaim Long Graun! Ol yangpela na ol lapun i laikim tru ol gutpela piksa bilong ples Paradais i stap long dispela buklet. Wanpela man i save wok long ples bilong wokim ol kain buk samting olsem, em i tok: “Dispela buklet i helpim ol manmeri na ol i ken kisim save olsem Paradais bai kamap tru, na em i helpim ol long pilim tru ol tok bilong Baibel, na ol i ken save, em i buk bilong God.”
I gat wankain as na planti man i laikim tu buk Baibel Stori Buk Bilong Mi. Taim ol Witnes i go long wanpela longwe hap long Lebowa, tupela sista ol i kirap nogut, long wanem, wanpela lapun em i aipas liklik wantaim meri bilong em, ol i gat buk Baibel Stori long tok ples Sepedi. Tupela i save mekim wok long dispela buk bilong lainim ol pikinini bilong ples. Ol i bin kaunim dispela buk planti taim na katim ol tok bilong en, na buk i laik bruk. Tupela i amamas tru long kisim wanpela nupela buk!
Olsem na ol dispela buk bilong ol Kristen tru i helpim ol man i laik kisim save long tok i tru. Ol i wokim planti buk na buklet long tok ples bilong ol Saut Afrika, na klostu olgeta, em Sosaiti Was Taua yet i wokim. Long hap bilong Saut Afrika, long wanpela yia tasol, olsem long 1990, ol Witnes i bin tilim inap olsem 113,529 buk na buklet na magasin em Sosaiti Was Taua yet i bin wokim.
Kaikai i Kamap Long Hatwok Bilong Ol
Olsem wanem? Ol dispela gutpela samting i bin kamap long ol liklik ples bilong Saut Afrika, na ol dispela buk samting ol i bin tilim, dispela samting i bin karim gutpela kaikai? Tru tumas gutpela kaikai i kamap long dispela wok ol i mekim. Kirap long 1989 na i kam inap nau, 4-pela kongrigesen na 9-pela liklik grup i kamap long ol dispela liklik ples long Saut Afrika. Ol painia salim na painia oltaim i go pas long mekim bikpela wok long ol dispela hap.
Yu tingim stori bilong Doris na dispela “Sande-Skul” em i lukautim long longwe hap bilong ol Sulu? Doris i kisim baptais pinis na em i kamap wanpela Witnes Bilong Jehova. Nau i gat 9-pela pablisa long dispela hap, na ol i wok long kamap strong. Planti nupela man i kam long ol miting long haus bilong Doris, na 7-pela manmeri em i bin stadi wantaim ol, ol i bin kisim baptais long kibung distrik i kamap long Deben long Disemba 1990.
Gutpela kaikai i kamap, na dispela i strongim bel bilong ol man bilong autim tok bilong Kingdom long Saut Afrika. Ol i bihainim tok bilong aposel Pol, olsem: “Taim yumi inap mekim gutpela pasin long ol arapela, yumi mas mekim. Na yumi mas strong tru long mekim gutpela pasin long ol arapela manmeri i bilip long Bikpela.” (Galesia 6:10) Lain bilong Jehova i strong long painim olgeta man i gat gutpela bel, maski ol i stap long ol liklik ples long “olgeta hap bilong graun.”—Aposel 1:8.
[Ol Mep/Ol Piksa long pes 24]
(Bilong save ol dispela rait i stap we long pes, lukim buk o magasin)
Lebowa
TRENSVAL
Soweto
Pet Retef
Bophutaswana
ORENS FRI STET