Ol i Kamapim Ol Laspela Olpela Rait Bilong Detsi
INAP planti yia ol saveman i bin wok long skelim ol olpela rait ol man i bin kisim klostu long Detsi, tasol ol dispela saveman yet i bin kros kros na ol i no bin kamapim ol tok bilong ol dispela rait long ol man. Long Septemba 1991 i olsem dispela kros bilong ol i pinis, tasol ating nupela kros i bin kirap.
Ol i bin kisim ol dispela olpela rait long sampela hul ston long ol maunten klostu long Detsi long yia 1947 na long sampela yia bihain. Em ol gutpela rait tru bilong helpim ol man long save ol tok bilong Olpela Testamen long ol Baibel bilong nau i stret olsem ol man i bin raitim long pastaim, na ol dispela olpela rait i givim save long ol man long ol samting bilong lotu long Palestain long taim bilong Jisas. (Aisaia 40:8) Sampela bilong ol dispela rait, em kwiktaim ol saveman i bin putim ol tok bilong en long ol buk na ol man inap lukim na save long en. Tasol long yia 1991, i gat 400 i stap em ol i no bin kamapim yet ol tok bilong en. Planti man i wanbel wantaim wanpela profesa (em Ben Zion Wacholder) em i tok, ‘Mi les, long wanem, sapos ol i kamapim ol tok isi isi olsem, bai ol i no kamapim yet olgeta tok bilong en na yumi dai pinis.’
Tasol long Septemba 1991, senis i kamap. Dispela profesa na wanpela man i wok wantaim em (em Martin Abegg), tupela i tokaut olsem ol i bin mekim wok long kompyuta na kamapim olgeta tok bilong ol dispela olpela rait, em ol saveman i was gut tru long em na i olsem ol i laik haitim. Bihain, wanpela bikpela haus buk (Huntington Library) long San Marino, Kalifonia, long Amerika, i tokaut olsem ol i holim pinis ol poto bilong ol tok bilong ol dispela olpela rait, na ol saveman i gat gutpela nem ol i ken lukim, no gat tambu. Ol man i bin wokim planti poto o piksa bilong olgeta wan wan rait, na sapos sampela i lus o bagarap, i gat narapela i stap. Ol i bungim long narapela narapela buk na putim long narapela narapela hap, na wanpela buk olsem i stap long dispela bikpela haus buk.
Wanpela saveman i tok, dispela senis i kain olsem bikpela senis i bin kamap ‘taim ol man i brukbrukim banis long Belin.’ Tasol ol saveman i gat wok long lukautim ol dispela olpela rait ol i no amamas. Ol i tok, ol man i wokim ol buk bilong ol dispela olpela rait long kompyuta na ol man i wokim ol piksa bilong en long ol buk, ol i ‘stil.’ Ating dispela nupela kros bai stap planti yia. Tasol maski, nau bai planti saveman moa inap skelim ol tok bilong olgeta dispela Olpela Rait Bilong Detsi.
[Piksa long pes 32]
Piksa bilong wanpela Olpela Rait Bilong Detsi, em stori bilong Buk bilong Profet Habakuk