Wanem Samting Bai Kamap Long Ol Ples Holi Bilong Ol Misin?
OL MAN bilong wokim wanpela buk i stori long ol ples holi bilong ol misin (Holy Places of Christendom, bilong Stewart Perowne) na ol i tok: ‘Sapos man i sanap insait long Haus Lotu bilong Matmat Holi long ples Golgota, maski em i bilong wanem misin Kristen, em i mas pilim olsem em i stap long wanpela ples i holi tru, long wanem, dispela ples hia, em inap planti handet yia ol man i bin litimapim nem bilong en na ol i bin pait bilong kamap bos bilong en, em i as ples tru bilong ol misin i gat nem Kristen.’
No gat wanpela as tru na man inap tok ol i wokim dispela haus lotu long ples stret Jisas i bin i dai long en. Taim King Konstantin bilong Rom i no tingting yet long wokim wanpela haus lotu long dispela ples, i gat wanpela haus lotu bilong ol haiden i stap long en. Na Jisas i tok: “God em i Spirit. Na ol man i lotu long em, ol i mas lotu long strong bilong Holi Spirit na long pasin i tru.” (Jon 4:24) Ol man i lotu long God olsem, ol i no save litimapim nem bilong ol ples “holi” bilong graun.
Bipo, haus lotu bilong God i stap long Jerusalem, olsem na Jerusalem i as ples bilong lotu i tru. Tasol ol man i stap long Jerusalem ol i no stap gut long God, olsem na God Jehova i lusim pinis dispela ples holi bilong ol, olsem Jisas i tok bai kamap. (Matyu 23:37, 38) Jisas i tok profet tu olsem bagarap bai painim dispela ples, em planti man i wok long tingim i olsem wanpela ples holi. Truim bilong tok bilong Jisas i kamap taim ol Rom i bagarapim Jerusalem wantaim haus holi bilong en long yia 70.—Matyu 24:15, 21.
Klostu nau bikpela truim bilong dispela tok profet bilong Jisas bai kamap long olgeta misin i holim nating nem Kristen, em ol i tok ol i olsem wanpela ples holi. Bagarap i laik painim ol dispela misin wantaim ol ples holi bilong ol long rot bilong wanpela samting i birua long ol lotu, em Baibel i kolim “dispela samting nogut tru.” (Daniel 11:31) Ol Witnes Bilong Jehova bai amamas long tokim yu long sampela samting moa bilong dispela bagarap em bai kamap.
[Piksa long pes 32]
Ples lotu insait long Haus Lotu bilong Matmat Holi
[Kredit Lain]
Pictorial Archive (Near Eastern History) Est.