Askim
Taim Noa i stap long sip, bilong wanem em i salim wanpela kotkot i go na bihain em i salim wanpela pisin ol i kolim balus i go?
Baibel i no stori gut long dispela, tasol i mas i gat as na Noa i mekim olsem.
Inap long 40 de na 40 nait bikpela ren i pundaun long graun na bikpela tait i kamap na karamapim ol maunten inap long 5-pela mun. Bihain “sip i pas long wanpela maunten long ples maunten bilong Ararat.” (Stat 7:6–8:4) Sampela mun bihain “ol het bilong maunten i kamap,” na Noa “i lusim wanpela kotkot i go. Dispela pisin i flai i go na i no kam bek. Nogat. Em i raun raun.”—Stat 8:5, 7.
Bilong wanem Noa i salim kotkot i go? Dispela pisin em inap flai strong na em i save kisim kain kain kaikai—em i save kaikai bodi bilong ol man o ol animal i dai pinis tu. Ating Noa i salim kotkot i go, long wanem, em i laik save dispela pisin bai kam bek long sip o em bai go olgeta, na ating em bai kaikai ol hap mit bilong bodi bilong ol man na animal i sting pinis na i kamap ples klia taim wara i go daun na graun i kamap. Kotkot i raun raun. Em i no kam bek long Noa, tasol ating sampela taim em i kam bek long sip bilong sindaun na malolo na kisim kaikai i trip long wara taim wara i no go daun yet.
Bihain Noa i salim wanpela pisin ol i kolim balus i go. Baibel i tok: “Balus i no painim wanpela ples bilong sindaun na malolo long en. Olsem na balus i kam bek.” (Stat 8:9) Taim yumi skelim dispela tok, yumi ken ting olsem dispela pisin em i rot bilong Noa i ken save wara i slek pinis o nogat. Ol balus i no save pret tumas long ol man, olsem na Noa i ken save, dispela pisin bai kam bek, i no bilong sindaun na malolo tasol long sip. Nogat. Em bai kam bek long Noa yet.
Wanpela buk i tok, ol balus i save malolo tasol long graun i drai, olsem long ples i no gat wara. Ol i save flai klostu long graun long ol ples daun na kaikai ol pikinini bilong diwai samting. (Esekiel 7:16) Wanpela buk (Grzimek’s Animal Life Encyclopedia) i tok: “Yumi save ol balus i save kaikai ol pikinini bilong diwai, na long taim ais o ren i pundaun na karamapim graun winim wanpela de, i hatwok long ol balus i painim kaikai, long wanem, kaikai bilong ol i stap long graun. Olsem na ating balus bai karim sampela samting i kam bek long Noa na bai Noa inap save, balus i painim pinis sampela hap graun i drai o sampela kain gras o sayor samting i kru. Namba wan taim Noa i salim balus i go, balus i kam bek nating long Noa. Long namba 2 taim, balus i kam bek na long maus bilong en i holim wanpela lip bilong diwai oliv. Long namba 3 taim, balus i go na em i no kam bek moa, olsem na Noa i save, nau em i ken lusim sip na i orait em i mekim olsem.—Stat 8:8-12.
Ating sampela i ting ol dispela samting i no bikpela samting, tasol dispela stori i kolim stret ol samting i bin kamap, na dispela i kamapim klia olsem ol tok bilong Baibel i tru na yumi ken bilip long en. Ol dispela liklik hap bilong stori i helpim yumi long save, dispela stori i no stori nating wanpela man i bin giaman na kamapim—dispela stori i stret na i tru. Dispela stori bilong Baibel i no kolim o stori long olgeta liklik liklik samting i bin kamap, olsem na yumi ken save, i gat planti gutpela samting ol Kristen i stap gut long God inap askim Noa long en taim em i kirap bek, na bai em yet inap stori long ol long as bilong ol samting em i bin mekim.—Hibru 11:7, 39.