Ol Ailan Bilong Solwara India i Harim Tok Bilong Kingdom

KLOSTU long ailan Madagaska long hap bilong wes long Solwara India, sampela ailan i stap, em ailan Rodriges, Morisas, Reyunion, na ol ailan Sesel, na ailan Mayot, na ol ailan Komoros. Ol dispela ailan i stap long bikpela hap bilong solwara, inap 1.5 milion skwea mail, tasol sapos yu bungim graun bilong ol dispela ailan wantaim, em inap olsem 7,300 skwea kilomita tasol. Planti manmeri tru i save stap long ol dispela ailan, inap olsem 2.3 milion, olsem na ol i pas pas, winim ol ailan long ol narapela hap bilong graun.

Inap olsem 2,900 Witnes Bilong Jehova i stap long ol dispela ailan, na ol i save wok strong long tokim ol manmeri bilong ol dispela ailan long Kingdom bilong God. Ol dispela Witnes i stap longwe long ol narapela Witnes, olsem na ol i save amamas tru taim ol wasman bilong raun i kam lukim ol, na ol i save amamas long bung wantaim long ol kibung em brens-ofis bilong Sosaiti Was Taua long Vakoas, Morisas, i save redim bilong ol. Taim ol i bung wantaim, ol inap pilim tru tok bilong Aisaia 42:​10, olsem: “Yupela olgeta manmeri bilong graun, yupela i mas singim nupela song bilong litimapim nem bilong [Jehova]. Yupela ol man i raun long sip na yupela ol abus bilong solwara, yupela i mas litimapim nem bilong em. Yupela ol manmeri bilong ol kantri i stap longwe, yupela i mas singim nupela song.”

Inap sampela mun i go pinis, sampela brata bilong brens-ofis i bin i go long ol dispela ailan bilong lukim ol kongrigesen na lukautim ol bikpela de kibung long dispela hap. Nem bilong dispela kibung, “Stap Holi Long Olgeta Wokabaut Bilong Yu,” em ol i kisim long 1 Pita 1:15. Ol i mas raun long bikpela hap solwara, olsem na planti taim ol i mas raun long balus​—⁠sampela taim ol i raun long ol bikpela balus, tasol sampela taim ol i raun long ol liklik balus. Na ol i mekim wok long ol bikpela na liklik sip tu. Nau bai mipela stori long raun bilong mipela, na long rot bilong dispela stori yu inap raun wantaim mipela, na lukim ol dispela ailan i stap long wanpela longwe hap bilong Solwara India, em ol manmeri bilong dispela hap i harim tok bilong Kingdom!

Pastaim Mipela i Go Long Ailan Rodriges

Mipela lusim Morisas na raun long balus inap wanpela aua hap, na nau mipela lukim rip. Dispela rip i makim arere bilong wanpela bikpela rip i raunim wanpela ailan long Solwara India. Em namba wan ples mipela i laik i go long en, em ailan Rodriges.

Ol i wokim ples balus antap long hap rip ol i kolim Poin Korel. Long dispela hap, rip i bikpela, na ol inap katim long so na mekim wok long en bilong wokim haus samting. Mipela kalap long wanpela liklik bas na mipela i bihainim rot i baut baut i go kamap long namba wan biktaun bilong dispela ailan, em Pot Maturan. Taim mipela raun long dispela rot, mipela kamap long wanpela hap em mipela inap lukluk i go na lukim ol rip i stap long narapela hap bilong ailan na naispela solwara na ol bikpela ston long arere bilong solwara. Nau tasol taim bilong ren i pinis, olsem na kunai i karamapim olgeta maunten, na ol bulmakau na sipsip na meme i stap long ol maunten.

Wanpela naispela liklik Haus Kingdom i stap namel long taun Pot Maturan, na bikpela de kibung bilong mipela bai kamap long dispela hap. Ol Witnes i go long ailan Rodriges long namba wan taim long 1964. Inap olsem 37,000 manmeri i stap long dispela ailan, na 36 pablisa i autim tok long dispela hap. Mipela amamas tru long lukim 53 manmeri ol i kam bung long kibung, na wanpela yangpela man i gat 18 krismas em i kisim baptais. Mama bilong dispela man em i no save rit rait, tasol long 1969 em i kisim save long tok i tru, na em i mekim wok bilong Jehova, maski famili bilong em i mekim nogut long em. Nau tupela pikinini bilong em i dediket pinis long Jehova.

Kibung i pinis, na mipela i stap inap wanpela wik moa bilong autim tok. Mipela mekim tok Kriol bilong mipela ol Morisas, na em i olsem tok ples bilong ol man bilong ailan Rodriges tu. Mipela kalap long bas na bihain mipela wokabaut i go long teritori bilong mipela​—⁠em wanpela naispela ples daun i go olgeta long solwara. Em naispela ples tru​—⁠gutpela blupela solwara na waitpela rip. I gat gutpela klinpela win long dispela hap, olsem na mipela i redi long mekim wok.

Mipela bihainim ol liklik rot i stap namel long ol gaden na planti taim mipela mas brukim wanpela liklik wara i gat tais, bambai mipela inap kamap long planti liklik haus i stap long dispela ples daun. Ol manmeri i amamas long toktok wantaim mipela, na mipela inap tokim ol long ol gutpela samting Kingdom bai mekim liklik taim bihain. Mipela autim tok na wokabaut i go daun tru long dispela ples daun, tasol nau em i taim bilong i go bek long haus. Olsem na mipela i mas wokabaut inap planti aua bilong i go antap gen long maunten na i go bek long ples, tasol ol manmeri bilong dispela hap i mekim gut long mipela, na ol i tokim mipela long kalap long wanpela ka na ol i kisim mipela i go bek long ples mipela slip long en.

Bikpela strong bilong mipela i lus long dispela raun bilong mipela, olsem na mipela i amamas long i go bek long naispela Haus Betel bilong mipela long Vakoas. Ol i makim tupela bikpela de kibung i mas kamap long wanpela bikpela haus bung. I gat 12-pela kongrigesen long dispela ailan. Long namba wan de, inap olsem 760 manmeri i kam bung. Ol i bilong 6-pela kongrigesen i stap long dispela ailan. Long de bihain, inap olsem 786 manmeri i bung, ol i bilong ol narapela 6-pela kongrigesen i stap long dispela ailan. Long dispela Sarere Sande, 4-pela nupela man i kisim baptais. Inap olsem 30 painia salim na 50 painia oltaim i wok long autim tok bilong Kingdom long ol manmeri bilong dispela hap.

Ol Ailan Sesel i Stap Longwe

I no longtaim na mipela mas kalap long balus na i go long narapela hap. Mipela mas raun i go inap 1,600 kilomita long hap bilong not. I no gat sampela ailan long dispela hap solwara inap long mipela i kamap long ailan Mahe, em wanpela bilong ol ailan Sesel. Dispela ailan i stap longwe tru, olsem na brens-ofis i save salim wanpela brata i go long dispela hap inap tupela taim tasol long yia. Olsem na ol i mekim bikpela de kibung na kibung sekit long wanpela taim tasol, insait long tripela de long kirap bilong yia. Ol i mekim kibung distrik klostu long pinis bilong yia. Nau em namel long mun Oktoba, na mipela i stap long dispela ailan bilong mekim kibung distrik, na bihain bai mipela stap wantaim kongrigesen inap wanpela wik. Long dispela taim tu mipela mekim wok long tok Kriol bilong Morisas.

Ol brata i stap long ol ailan klostu, em ailan Pralin na La Deg, ol i kamap pinis. Mipela amamas tru, long wanem ol manmeri bilong 12-pela lain ol i kam bung! Mipela bai mekim kibung long Haus Kingdom long dispela hap, em wanpela haus i stap baksait long haus bilong wanpela Witnes. Inap olsem 6-pela brata tasol ol i gat save long mekim tok, olsem na insait long 4-pela de, sampela bilong dispela 6-pela brata ol i mekim planti tok. Inap olsem 81 pablisa i stap long dispela hap, na ol i amamas tru long 216 manmeri i kam bung long laspela de bilong kibung.

Kibung i pinis, na mipela kalap long sip na i go long Pralin, em i stap long hap bilong not-is bilong ailan Mahe inap olsem 40 kilomita. Dispela sip i longpela inap 18 mita, na ol i bin wokim long diwai takamaha. Inap olsem 50 manmeri inap kalap long dispela sip, na ol inap putim 36 ton kago samting. Mipela lusim bris long Mahe, na sip i tanim i go long mak bilong ailan Pralin i stap longwe. Mipela pilim strong bilong ensin na mipela pilim tu win i subim tupela bikpela sel bilong sip.

Mipela raun inap tupela aua pinis, na mipela raunim hap bilong ailan na kam long wanpela hap em wara i stap isi, em Be Sen An. Taim mipela kalap long bris, mipela lukim ol brata i sanap wetim mipela. Inap 13 pablisa i stap long dispela liklik ailan, na 8-pela moa i kam long ol narapela hap. Olsem na mipela amamas tru long lukim 39 manmeri i bung long liklik haus bung bilong harim bikpela pablik-tok. Mipela save, wok bai kamap bikpela long dispela hap!

Taim mipela i stap long Pralin, mipela i go long naispela Vale de Ma. Em i as ples bilong wanpela diwai pam, ol i kolim Koko-de-me. Pikinini bilong dispela pam i traipela tru na i winim pikinini bilong olgeta narapela diwai, na hevi bilong en em inap 20 kilo. Mipela stap long ples kol namel long ol diwai, na mipela lukim ol dispela diwai pam, sampela i bikpela na sampela i liklik. Ol bos bilong dispela hap i bin makim rot bilong wokabaut, na ol i raitim stori bilong ol diwai pam. Wanpela diwai i antap tru, na ol i tok taim ol i metaim dispela diwai long 1968, em i go antap inap 31 mita. Ol i tok sampela bilong ol dispela longpela diwai ol i bilong bipo yet, na ol i bin i stap inap olsem 800 yia samting bipo. Dispela diwai i save stap inap 25 yia na bihain em i karim kaikai, na pikinini bilong en i stap inap 7-pela yia na nau em i redi. Olsem na i stret pepa bilong gavman i tok: “Kisim piksa tasol, no ken kisim narapela samting. No ken larim wanpela samting i stap​—⁠mak bilong lek tasol”!

Long de bihain, long 7 klok moning, mipela kisim liklik sip na go long liklik ailan La Deg. Planti liklik sip i stap long bris. Em rot bilong ol 2,000 manmeri bilong dispela ailan ol inap i go i kam long ol narapela ailan. Long dispela hap, mipela bungim tupela lapun bilong Swiselan, em ol i bin i kam long ol dispela ailan long 1975. Teksi bilong ol man bilong dispela hap, em wanpela ka ol bulmakau i save pulim, tasol mipela i no kalap long “teksi” bilong ol, mipela wokabaut long nambis na lukim ol retpela ston em solwara na ren i bin mekim i kamap naispela. Mipela sindaun long nambis na kaikai, na bihain mipela wokabaut namel long bus i go long haus bilong sampela man i laik harim tok. Long rot mipela lukim wanpela blakpela pisin. Inap olsem 13 manmeri i bung bilong harim wanpela tok long tok Kriol. Mipela bungim wanpela man na meri, em ol i stretim pinis ol samting bambai ol i ken rejestaim marit bilong ol na bai ol inap mekim moa yet ol wok bilong spirit. Tru tumas, Jehova i bungim ol gutpela samting bilong ol dispela ailan tu.

Go Bek Long Ailan Reyunion

I gat planti wok bisnis samting long ailan Reyunion, winim ol narapela ailan mipela i bin i go long en. Taim mipela i kam klostu long dispela ailan, mipela lukim wanpela bikrot i gat 4-pela rot bilong en, na planti ka samting i pulap long dispela rot, em ol i lusim biktaun Sen-Denis. Ol traipela haus i go antap inap planti plua ol i pulap long dispela hap namel long solwara na ol maunten. Inap olsem 580,000 manmeri i stap long dispela ailan, na planti man bilong dispela hap ol i laik harim tok bilong Kingdom. (Matyu 9:​37, 38) Inap olsem 2,000 pablisa i stap long dispela ailan na ol i mekim wok long 21 kongrigesen.

Mipela bung long wanpela bikpela stediam i gat karamap bilong en bilong mekim bikpela de kibung. Mipela amamas tru long 3,332 manmeri i kam bung, na mipela amamas moa yet long 67 nupela man i bin kisim baptais! Mipela i bin amamas long i stap wantaim ol misineri long dispela ailan, tasol nau mipela lusim ol na i go long narapela hap.

Mayot​—⁠Ailan i Gat Gutpela Smel

Inap tupela aua mipela i bin sindaun long balus em inap karim 40 pasindia, na nau balus bilong mipela i laik pundaun long ples balus bilong Pamanse. Dispela ples balus i stap long wanpela liklik ailan, na i gat wanpela longpela hap graun i skruim dispela ailan wantaim Soadse, em namba wan biktaun bilong Mayot. Skai i blupela, na ol klaut i waitpela, na gras i kamap planti long ol maunten, na solwara tu i blupela, na mipela ting em i kain olsem wanpela gutpela ples paradais. Ol i givim nem “Ailan i Gat Gutpela Smel” long ailan Mayot, long wanem i gat wanpela diwai long dispela ailan, em diwai ilang-ilang, na plaua bilong en i gat gutpela smel. Ol i bin kisim gris bilong ol plaua bilong dispela diwai na salim i go long Frans na ol i wokim sanda i gat gutpela smel.

Sapos yu laik i go long bikpela ailan, bai yu raun long wanpela sip inap 15 minit. Mipela kisim liklik kaikai long haus misineri, na ol i singautim mipela i go long wanpela Buk-Stadi i stap longwe inap 19 kilomita, long narapela hapsait bilong ailan. Mipela ting bai mipela i kisim liklik malolo, tasol nogat! Mipela kalap long wanpela ka na bihainim ol liklik rot i go. I olsem klostu mipela bamim sampela man na bulmakau na ol narapela ka. Tasol draiva bilong mipela em i bilong ples Frans, na em i save long hap mipela bai go long en. I no longtaim na mipela kam kamap long Sikone, na mipela sekanim famili i save stap long dispela haus mipela laik mekim Buk-Stadi long en.

Pastaim papa bilong dispela famili em i bilong lotu Muslim. Em i tokim mipela long nem bilong ol 8-pela pikinini bilong em na mipela sekanim ol. Laspela pikinini man bilong em i gat 4-pela krismas, na em i givim gude long mipela, na bihain mipela save em i bihainim pasin bilong ol na mekim. Em i opim wanpela han na putim baksait bilong narapela han antap long en na holim tupela han i stap olsem long ai bilong mipela. Mipela traim sekanim em, tasol nogat. Meri bilong mi i laik putim han bilong dispela pikinini antap long het bilong em (meri), tasol nogat. Liklik pikinini i sanap isi i stap, na bikpela ai bilong em i wok long lukluk long mipela, na ating em i tingting planti long samting mipela i mekim. Bihain mipela putim han bilong pikinini antap long het bilong pikinini yet​—⁠em nau, mipela mekim stret. Taim mipela kirapim stadi, inap olsem 14 manmeri i bung i stap, tasol bihain liklik narapela man i kam, em tu i laik harim tok, na em i raun sekanim olgeta man i sindaun harim tok. Dispela tu em i wanpela pasin bilong ol.

Taim mipela laik i go bek long haus, em i tudak pinis, na mipela lukim sampela bikpela blakbokis em ol i go painim kaikai. Na mipela harim smel bilong wanpela kain prut i bin pundaun long rot, na mipela harim smel bilong ol mango na popo na yambo tu. Dispela hap em i as ples bilong wanpela liklik animal kain olsem monki, em ol i kolim lemu. Pes bilong ol i kain olsem wanpela dok ol i kolim foks, na ol i gat longpela tel. Mipela raunim maunten na mipela lukim wanpela gutpela samting tru. Mun i retpela na i wok long i kam antap, olsem na lait bilong em i stap long naispela solwara. Draiva bilong mipela tu i amamas long lukim dispela samting. Mipela bihainim dispela rot i go, na mipela wok long lukim dispela mun.

Long de bihain mipela raun autim tok wantaim ol misineri. Pastaim mipela i go lukim wanpela yangpela man i mekim wok tisa na em i save long tok Frans. Em i sindaun long plua, na mipela sindaun long bet bilong em. Bihain mipela i go stadi wantaim narapela yangpela man, na em i tokim mipela long sindaun long matres bilong em long plua bilong liklik rum em i stap long en. I no longtaim na lek bilong mipela i pen na mipela tanim tanim, na tuhat i kam daun long skin bilong mipela. Long haus klostu, redio i wok long pairap strong, olsem na i hatwok long putim gut yau long dispela stadi, na tu, ol i mekim sampela tok bilong stadi long tok ples Frans na sampela long tok ples Mahoria.

Laspela hap mipela i go long en, em mipela i go lukim wanpela yangpela man bilong ailan Komoros, em wanpela ailan i stap klostu. Em i tok sori long wanem em i no save gut long tok ples Frans, na em i kisim liklik buk bilong em na em i redi long stadi. Brata misineri i wok long tokim mi long wanpela samting, na dispela yangpela man i kirap na tok em bai kaunim paragraf. Em rot bilong em long tokim mipela long pinis long toktok. Olgeta manmeri long dispela ailan ol i bilong lotu Muslim, tasol ol i amamas tru long gutpela save ol i wok long kisim long Baibel.

Mipela kirap nogut, long wanem planti yangpela man i wok long stadi, tasol wan wan yangpela meri tasol i stadi. Ol i tokim mipela, pasin bilong ples na pasin tumbuna em i as bilong dispela samting. Ol man long dispela hap i save maritim planti meri, na long ai bilong lotu na lo bilong ples, i no gat tambu long dispela samting. Olgeta wan wan meri marit i stap long haus bilong ol yet, olsem na papa i no bos bilong famili; mama em i bosim ol samting famili i mekim. Na mipela kisim save olsem ol yangpela meri i save stap long haus bilong mama bilong ol i go inap long taim ol i marit. Tasol ol pikinini man, taim ol i gat 13 krismas samting ol i wokim haus o banga bilong ol yet, o ol i go i stap wantaim ol narapela pikinini man long banga bilong ol. Olsem na i no gat wanpela samting i pasim ol yangpela man long stadi, tasol i hatwok long ol yangpela meri long stadi.

Sande em i taim bilong mekim bikpela de kibung. San i lait gutpela, tasol long belo ol klaut i bung bung na i no longtaim na bikpela ren i kam daun. Ol manmeri i bung ol i no tingim dispela samting, long wanem ren i mekim na olgeta samting i kamap kol liklik. Long dispela kibung tu mipela amamas long ol gutpela samting i kamap. I gat 36 pablisa na painia long dispela hap, na ol i amamas, long wanem 83 i kam bung na 3-pela i kisim baptais.

Long dispela kibung ol i amamas tru long kisim liklik buk, nem bilong en Stap Amamas Oltaim Long Graun! long tok ples bilong ol yet. Em i namba wan samting Sosaiti Was Taua i wokim long tok ples Mahoria, na i no gat narapela buk samting long tok ples bilong ol. Ol i raitim ol tok long kain rait yumi save mekim wok long en, na aninit long en ol i raitim tu long rait bilong ol Arap. Taim ol pikinini i go long skul, ol i lainim rait bilong ol Arap, tasol ol i no save long dispela tok ples. Ol inap kolim ol beten long tok ples Arap, na kaunim buk Koran long tok ples Arap; tasol ol i no save long dispela tok ol i kaunim. Tasol taim ol i kaunim dispela liklik buk i gat ol rait bilong Arap long tok ples bilong ol yet, ol i kirap nogut na pes bilong ol i lait, long wanem ol i save long ol tok ol i kaunim.

I no hatwok long tilim dispela liklik buk long ol manmeri. Mipela i wok long autim tok long wanpela meri long wanpela liklik ples long bus, na wanpela man i kam long mipela. Em i toktok strong long mipela long tok ples Mahoria. Mipela i ting em i kros na i no laik harim tok bilong mipela. Em i toktok strong i go na i wok long tromoi han tu wantaim. Bihain brata i tokim mi, dispela man i kros, na em i tok: “Yupela i save kam lukim mipela wanpela taim tasol long yia. Olsem wanem mipela inap tingim olgeta samting yupela i save tokim mipela long en? Yupela i mas i kam planti taim na tokim mipela long ol dispela samting.”

Tingting bilong dispela man i wankain long tingting bilong mipela. Long rot bilong tok bilong Kingdom, Jehova i wok long bungim ol gutpela samting bilong olgeta lain. Ol dispela ailan i stap longwe long ol narapela ailan, tasol ol manmeri bilong ol dispela ailan tu i strong long autim tok, na long dispela rot ol i wok wantaim ol narapela man bilong autim tok long olgeta hap bilong graun na litimapim nem bilong Man i bin wokim ol, Papa bilong ol long heven, em God Jehova.​—⁠Hagai 2:⁠7.

[Mep long pes 21]

(Bilong save ol dispela rait i stap we long pes, lukim buk o magasin.)

SESEL

SOLWARA INDIA

KOMOROS

MAYOT

MADAGASKA

MORISAS

REYUNION

RODRIGES

[Piksa long pes 23]

Hap bilong Pralin, long Be Sen An

[Piksa long pes 24]

Wanpela “teksi” long La Deg, long Sesel

[Piksa long pes 25]