‘Wara Bilong Laip’ i Kamap Long Verd
MINISTA bilong lo na kot long gavman bilong Ripablik bilong Kep Verd, em i tok: “Ol Witnes Bilong Jehova i bin kamkamap long Kep Verd long 1958 na ol i bin bihainim pasin bilong lotu bilong ol i kam inap long nau, na planti manmeri i save long dispela samting.” Em i mekim dispela tok long tupela Witnes em ol i bin singautim tupela i kam long ofis bilong em. Na em i tok moa olsem: “Mipela laik tok sori, long wanem mipela i no bin hariap na tok orait long ol Witnes na bai ol inap rejistaim lotu bilong ol long hap bilong mipela.”
Dispela man i bin bung wantaim dispela tupela Witnes long Novemba 30, 1990, na ol Witnes long Kep Verd bai ol i no lusim tingting hariap long ol samting i bin kamap long dispela taim. Kirap long dispela taim, gavman i orait long ol Witnes na ol i rejista long gavman. Dispela tupela Witnes ol i pilim tru ol samting i bin kamap. Wanpela bilong ol em Luis Andrade. Long 1958 em i bin painim sampela buk bilong Baibel em Sosaiti Was Taua i bin wokim. Taim em i kaunim pinis olgeta tok bilong ol dispela buk, em i save em i painim pinis tok i tru. Bel bilong em i kirapim em long tokim Francisco Tavares, em wanpela poroman bilong em bilong bipo yet, long olgeta samting em i bin kisim save long en. Inap sampela yia bihain long dispela, tupela wantaim i wok long kisim ol wara bilong tok i tru—tupela i wok long kaunim ol tok bilong Wastaua na Kirap!, em ol i bin kisim long rot bilong sabskripsen. Tenpela yia bihain, olsem long yia 1968, tupela i kisim baptais taim wasman sekit i go long hap bilong Kep Verd long namba wan taim.
Brata Andrade na Brata Tavares ol i save ol i mas insait long wanpela bikpela wok, em wok bilong tokim ol man: “Kam na kisim wara bilong givim laip, em i olsem presen bilong God.” (Kamapim Tok Hait 22:17) Maski ol i mas autim tok long ol man i stap longwe longwe o i hatwok long autim tok long dispela hap, tasol ol i redi long mekim olsem bambai ol inap mekim dispela wok. Kep Verd i gat 10-pela bikpela ailan na sampela liklik ailan, em ol i stap long hap bilong Solwara Atlantik. Ol i stap longwe long ples Daka, long Senegal, inap olsem 560 kilomita, olsem long hap bilong wes. Insait bilong dispela tok Kep Verd, em “Grinpela Poin.” Pastaim ol i bin givim dispela nem long wanpela poin long hap bilong Afrika. Tasol ol dispela ailan i no grinpela, long wanem liklik ren tasol i save pundaun long dispela hap, na graun i drai, olsem na ol 350,000 manmeri long dispela hap ol i save hatwok tru long painim kaikai long dispela hap.
Insait long 30 yia i go pinis, sampela misineri na painia salim ol i bin wok strong long dispela hap bilong helpim ol manmeri long kisim dispela wara bilong givim laip. Wanem samting i bin kamap long dispela hatwok bilong ol? Long dispela taim, wanpela wasman sekit bilong hap bilong Potyugal em i bin i go lukim ol kongrigesen long hap bilong Kep Verd. Em bai stori long ol samting i bin kamap.
Ol Manmeri Bilong Sau Visente i Harim “Gutpela Tok Ples”
Namba wan hap mipela kamap long en long Kep Verd, em biktaun Poto Grande long ailan Sau Visente. Mipela sindaun long ka na lusim ples balus na i go long taun, na mipela lukim ol maunten ston em wesan i karamapim ol. Long hap bilong Not Afrika, ol ples i gat gutpela graun nau ol i wok long kamap ples wesan, na dispela samting i wok long kamap long ol ailan bilong Kep Verd tu! Kirap long mun Disemba i go inap long mun Februeri, strongpela hatpela win bilong hap bilong Sahara i kam long ol dispela ailan, na dispela win i karim ol wesan na das i kam kapsaitim long ol dispela ailan. Sampela taim das i pulap long ol klaut, olsem na balus i no inap raun antap. Taim dispela win nogut i kam, em i kukim ol gras samting.
Tasol ol manmeri bilong dispela hap ol inap kisim planti wara bilong helpim ol long samting bilong spirit—ol i no sot liklik. I gat 167 pablisa bilong Kingdom long tupela kongrigesen bilong ol Witnes Bilong Jehova long Poto Grande, na ol i wok strong long helpim ol 47,000 manmeri bilong Ailan Sau Visente long kisim ol wara bilong givim laip, em tok i tru. Long taim bilong ol miting long Sarere Sande, inap olsem 400 manmeri i save kam long Haus Kingdom long ol miting i kamapim tok bilong Baibel.
Taim wasman sekit i go lukim dispela tupela kongrigesen, ol i wok long redim ol laspela samting bilong “Gutpela Tok Ples” Kibung Distrik em bai kamap long gutpela haus piksa long dispela biktaun. (Sefanaia 3:9) Sampela manmeri bilong ol ailan bilong Santo Antau na Sau Nikolau ol i kam long dispela kibung na ol i bung wantaim ol Witnes bilong Poto Grande, olsem na inap 756 ol i bung long dispela kibung. Inap 24 manmeri i bin kisim baptais. Long kibung, ol i mekim wanpela pilai tu i kamapim stori bilong Baibel, em ol Witnes i bin redim. Wanpela man i gat wok long lainim man i mekim pilai bilong piksa wokabaut, em i kam lukim dispela pilai na em i tok: “Mipela lain inap wanpela yia bilong wokim piksa, tasol mipela i hatwok yet long mekim. Lain bilong yupela i bin lain inap tupela mun tasol bilong mekim dispela pilai, na ol i mekim gut tru.” Kibung i pinis na nau mipela i mas i go long biktaun Praia, em nambawan biktaun bilong Ripablik Kep Verd, na em i stap long ailan Sau Tiago.
Wanpela Lain i Kamap Klin
Inap sampela yia pinis, planti manmeri bilong ol narapela ailan ol i kam long dispela nambawan biktaun bambai ol inap painim wok mani. Olsem na long arere bilong mak bilong dispela biktaun, yu inap lukim planti tausen haus bilong ol skwota. Ol dispela planti manmeri i mekim na wara i sot long dispela biktaun na i no gat ol gutpela toilet samting. Planti famili i lukautim meme na pik na kakaruk, bilong kisim liklik hap mani moa. Planti taim yu inap lukim ol dispela animal i wokabaut long ol rot. Dispela samting i mekim na planti sik i painim ol manmeri long dispela hap.
Maski ol i gat planti hevi olsem, tasol long nau i gat tupela strongpela kongrigesen long Praia, na i gat 130 pablisa long dispela tupela kongrigesen. Ol dispela Witnes i man bilong amamas, na ol i bin kisim save long ol tok bilong Baibel, na dispela samting i bin helpim ol. Ol brata bilong yumi wantaim pikinini bilong ol, ol i bin wok strong bambai ol inap i stap klin na i stap holi, na dispela samting i bin helpim ol na ol i no gat planti sik, na ol i stap gut long samting bilong skin na spirit. Ol i no gat planti samting bilong skin, tasol ol i gat planti samting bilong spirit.—Aisaia 48:17; 1 Pita 1:15, 16.
Taim mipela kamap long dispela hap, mipela lukim ol brata i wok strong long redim ol samting bilong kibung distrik bilong ol. Ol Witnes na sampela man em ol i laik harim tok, em ol i bilong ailan Sau Tiago na ol ailan bilong Sal na Fogo, ol i kam long dispela kibung, na Jehova i blesim dispela kibung na inap olsem 472 manmeri i bung. Olgeta i amamas tru, na pes bilong ol liklik pikinini tu i lait! Mipela sindaun namel long dispela lain i putim gut yau, na mipela i save, maski wanpela lain i liklik tasol, olsem dispela lain long bipo, yumi no ken bel hevi. (Sekaraia 4:10) Inap olsem 30 yia bipo, i gat tupela Witnes tasol i stap, tasol nau lain i go bikpela!
Paslain long taim mipela i lusim dispela ailan, mipela i go lukim tupela liklik grup i stap longwe liklik long biktaun—em ol i stap long Vila Asomada na Tarafal. I gat ol maunten long dispela ailan, na em i ples drai na i no gat planti kunai o diwai samting. Mipela lukim wan wan diwai na kaikai samting i wok long kamap—i gat planti diwai kokonas na banana na popo na mango samting. Mipela lukim dispela samting, na mipela tingim tok profet bilong Aisaia, em i tok bihain ol naispela plaua na diwai bai kamap long ples wesan nating. (Aisaia 35:1) Long nau tu, dispela tupela liklik lain Witnes i wok long givim ol gutpela kaikai na wara bilong spirit long planti tausen manmeri i stap long hap bilong ol, em ol i stap long hap i no gat planti samting bilong spirit.
Ol i Givim Bel Tru Long Mekim Wok Long Ailan Fogo
Bihain mipela i go long Ailan Fogo—insait bilong dispela nem em “paia.” Bipo ol maunten long dispela ailan i save pairap, olsem na ol i givim dispela nem long en. Wanpela maunten long dispela ailan, em Maunten Kano, em i save paia yet. Dispela maunten i go antap inap 2,800 mita. Inap planti yia bikpela ren i no bin pundaun long dispela ailan, na nau tasol bikpela ren i bin pundaun na mipela i kamap long en. Olgeta manmeri i amamas tru, na ol i wok strong long planim ol bin na tapiok samting bilong ol, long wanem em namba wan kaikai bilong ol.
Maski ol dispela manmeri i wok strong long gaden bilong ol, ol i redi long malolo liklik na kisim save long ol wara bilong tok i tru i stap long Baibel. I no gat planti ka na ol i bagarap liklik, tasol mipela i go bung wantaim tripela lain i laik harim tok. Inap olsem 42 pablisa i stap long dispela ailan, olsem na mipela i amamas tru long lukim 162 manmeri i kam bung long ol miting. Dispela samting i makim olsem ol dispela liklik lain brata sista ol i save givim bel tru long mekim wok autim tok. Long olgeta mun, olgeta wan wan i lusim olsem 15 aua long autim tok na helpim ol manmeri long kisim dispela wara bilong tok i tru na laip i go long ol 32,000 manmeri i stap long Ailan Fogo.
Gutpela Kaikai i Kamap Long Hap Bilong Ol Katolik
Mipela mas i go na lukim tu ol brata i stap long ailan Santo Antau na ailan Sau Nikolau. Olsem dispela nem i makim, inap sampela handet yia Misin Katolik i bin bosim ol samting ol manmeri bilong dispela tupela ailan i bin mekim. Misin Katolik em i namba wan lotu bilong ol manmeri bilong ailan Kep Verd, tasol planti manmeri ol i gat gutpela bel na ol i laik save long tok bilong Baibel, long wanem ol i laik kisim ol gutpela wara bilong tok i tru.
I gat tupela liklik kongrigesen long dispela ailan Santo Antau. Wanpela kongrigesen i stap long wanpela hap bilong ailan na narapela kongrigesen i stap long narapela hapsait bilong dispela ailan. Tasol ol 49 pablisa long dispela ailan ol i wok strong long autim tok long ol 44,000 manmeri ol i stap long dispela ailan. Inap olsem 512 manmeri i kam bilong harim wanpela tok bilong Baibel long kongrigesen Poto Novo, na dispela samting i kamapim long ples klia olsem ol 32 pablisa long dispela kongrigesen ol i gat bikpela wok tru bilong helpim ol manmeri bilong Santo Antau, em ol i kain olsem sipsip na ol i laik kisim wara bilong tok i tru.
Inap sampela yia i go pinis, wanpela sista painia bilong Potyugal em i mekim Baibel-stadi wantaim wanpela famili long Sau Nikolau long rot bilong pas. Na long 1978, narapela painia i stap long Potyugal, em i go bek long as ples bilong em long ailan Sau Nikolau, bambai em inap autim tok long ol 15,000 manmeri i stap long dispela ailan. Taim em i mekim namba wan miting long dispela ailan, wanpela man tasol i stap—em yet tasol! Tasol God Jehova i tingim strongpela beten dispela brata i bin mekim long dispela miting. Taim mipela i go long dispela hap, 48 pablisa bilong 3-pela kongrigesen bilong dispela hap ol i amamas tru long lukim inap olsem 335 manmeri i kam long ol miting.
Taim mipela i go long dispela ailan, mipela kamapim namba wan kibung sekit bilong ol. Bos bilong wanpela haus piksa i orait long mipela i mekim wok long dispela haus piksa, no gat pe. Bos bilong taun i orait long mipela i mekim wok long masin bikmaus bilong ol, na ol i helpim ol manmeri long i kam long dispela kibung, no gat pe. Wanpela kongrigesen i gat 19 pablisa i lukautim wok bilong painim ples slip bilong ol 100 manmeri i kam long dispela kibung, na ol i redim kaikai bilong ol 208 ol i kam bung. Long olgeta de ol brata i gat hatwok long painim liklik mani bilong lukautim famili bilong ol, tasol ol i bin givim sampela mani long Sosaiti bilong helpim wok bilong sanapim ol Haus Kingdom.
Ol manmeri bilong dispela hap ol i save long gutpela pasin bilong ol Witnes Bilong Jehova, na bos bilong planti kampani ol i painim ol Witnes bilong i kam wok long kampani bilong ol. Olsem: Wanpela bos bilong wanpela kampani bilong salim bensin long ol man em i tokim wanpela Witnes long kam wok, long wanem em i laikim wanpela man i bihainim gutpela pasin na i no save stil. Dispela brata i holim pinis wanpela wok mani, olsem na em i tok em bai painim narapela man bilong mekim dispela wok. Bos bilong dispela kampani i tok: “Mi laikim wanpela Witnes i baptais pinis—narapela man nogat!” Tupela mun bihain em i tokim brata bilong yumi, olsem: “Ol Witnes Bilong Jehova tasol ol i mekim gutpela pasin na ol i no save stil!”
Laspela Hap Mipela i Go Long En, Em Ailan Sal
Laspela hap mipela i go long en long dispela raun bilong mipela, em long ailan Sal. Insait bilong dispela nem Sal, em “sol,” na dispela i helpim yumi long save long namba wan wok bisnis long dispela ailan. Kongrigesen long dispela ailan i liklik—i gat 22 pablisa tasol, tasol ol i wok strong long helpim ol 6,500 manmeri bilong dispela hap long kisim save long tok bilong Kingdom. Mipela amamas tru long autim tok long ol manmeri bilong dispela ailan, long wanem, klostu olgeta haus mipela i go long en ol i singautim mipela i go insait na mipela sindaun toktok wantaim sampela bilong famili.
Ailan Sal em i laspela hap mipela i go long en. Mipela i amamas tru long wok wantaim ol gutpela wokboi bilong Jehova long hap bilong Kep Verd! I gat 531 pablisa bilong Kingdom long ol dispela ailan, na mipela save dispela lain bai i go bikpela, long wanem inap olsem 2,567 manmeri i bin bung long taim bilong Memorial bilong 1991 bilong tingim i dai bilong Krais. Ol Witnes long ol dispela ailan ol i no gat planti samting bilong skin, tasol ol i gat planti gutpela samting bilong spirit. Na ol i amamas tru, long wanem, ol gutpela wara bilong tok i tru i kamap planti long ol dispela ailan, na dispela samting i litimapim nem bilong Jehova!
[Mep long pes 24]
(Bilong save ol dispela rait i stap we long pes, lukim buk o magasin.)
KEP VERD
SANTO ANTAU
SAU VISENTE
SAU NIKOLAU
SANTA LUSIA
SAL
BOA VISTA
MAIO
SAU TIAGO
FOGO
BRAVA
Praia
Solwara Atlantik