Bikpela Wok Bilong Autim Tok Long Wanpela Ples Bilong Planti Sip
ROTEDAM i stap long maus bilong wara Rain, klostu long Solwara Notsi, na planti sip i save go i kam long dispela wara—no gat narapela wara long Yurop i gat planti sip i save go i kam long en olsem. Olsem na biktaun Rotedam em i wanpela ples bilong planti sip, winim planti narapela biktaun olsem long olgeta hap. Ol sip bilong 500 samting kampani i save kam long Rotedam na ol dispela sip i save go long 800 narapela hap bilong graun. Tru tumas, em wanpela ples bilong ol sip bilong planti kantri.
Dispela taun bilong Netelan i stap 650 yia pinis, em i olsem rot bung bilong ol sip, na tu em i ples bung bilong ol man. Long olgeta de, long san na long nait, planti boskru bilong olgeta hap graun i kam long dispela taun. Na ol Witnes Bilong Jehova long Netelan i tingim ol dispela boskru. Olsem ol i mekim long ol narapela hap, ol Witnes long Netelan tu i wok long painim rot bilong autim nambawan gutpela tok long olgeta kain kain man, na ol boskru tu. Dispela tok em olsem: Klostu nau bai Kingdom bilong God i kamapim Paradais long graun.—Daniel 2:44; Luk 23:43; 1 Timoti 4:10.
“Narapela Kain Wok Misineri”
Sampela yia i go pinis, Sosaiti Was Taua long Netelan i singautim 6-pela painia, em ol i mekim wok autim tok long olgeta taim, long i go long ol sip long taun Rotedam na autim tok. Ol painia i amamas tru long mekim olsem. Ol i go long lain bilong bosim bris bambai ol i ken kisim save long ol sip i save sua long Rotedam, na ol i go lukim ol bris, na i no longtaim na ol i save olsem bai ol i gat bikpela wok long go long ol sip na autim tok.
Painia i bosim dispela wok bilong autim tok long ol sip, em Meinat, em i tok “i olsem mipela i mekim narapela kain wok misineri.” Wanem insait bilong dispela tok bilong em? Olsem: “Ol misineri i save go long ol longwe ples bilong autim tok long ol man, tasol mipela i no mekim olsem—ol man i save lusim ol longwe ples na i kam na mipela i autim tok long ol.” Na em i tok: “Tru tumas, mipela i autim tok long ol man bilong planti narapela kantri.” Wanpela buk (Rotterdam Europoort yiabuk bilong 1985) i tok, long 1983, em yia ol painia i kirap mekim dispela bikpela wok, inap 30,820 sip bilong 71 kantri i kam long taun Rotedam.
Ol painia, em ol boskru i givim nem long ol olsem “ol misineri bilong ol sip,” ol tu ol i bilong ol narapela narapela kantri. Giet na Pita wantaim meri bilong em Karin, ol i bilong Netelan; Daniel na Meinat i kam long Indonesia; na Solomon em i wanpela Itiopia. Ol i bilong hap bilong Yurop na Esia na Afrika na ol inap autim tok long 8-pela tok ples. Dispela i helpim ol long winim wanpela samting i givim hatwok long ol long mekim dispela wok. Tasol i gat sampela samting moa i givim hatwok long ol na ol i mas winim.
“Misin Bilong Ol Wilwil”
Pita, bipo em wanpela boskru na em i gat 32 krismas, em i tok: “Man i no inap wokabaut nating long bris na kalap long sip; nogat. Em i mas i gat pas.” Ol i mas i gat pas bambai ol inap i go long bris na pas bilong kalap long sip samting. Pita i tok moa olsem: “I hatwok tru long kisim ol dispela pas, tasol taim mipela i kisim pinis ol 8-pela pas i gat ol piksa bilong mipela na ol mak samting long en, orait, nau mipela i redi long mekim gut wok.” I gat planti bris (longpela bilong olgeta wantaim em inap 23 mail) na mipela i brukim long 3-pela hap na makim tupela tupela painia bilong autim tok long olgeta wan wan hap.
Tasol olsem wanem ol inap helpim ol dispela boskru bilong planti kantri, em ol i gat kain kain tok ples? Tru ol painia i gat planti buk samting bilong Baibel long 30 tok ples na ol i karim inap tru long wilwil bilong ol, tasol planti taim i olsem ol i sot long ol buk. Solomon i gat 30 krismas na em i lap liklik na i tok: “Mipela i no save tru mipela i mas kisim ol buk long wanem wanem tok ples. Planti taim ol boskru i laik kisim ol buk long wanpela tok ples, tasol mipela i no kisim i kam ol buk long dispela tok ples, na ol i tok, i gat 3-pela aua samting tasol na bai sip i lusim bris i go.” Nogut ol i lus long kisim buk, olsem na wanpela painia bai hariap i go bek bilong kisim ol buk long tok ples bilong ol, na spit i kam bek givim long ol, na ol i amamas tru long kisim. Pita i tok: “Taim mipela i autim tok long narapela hap long bris, em longwe inap 3-pela aua long wilwil, orait dispela kain hevi i kamap gen na nau mipela i save, mipela i mas painim rot bilong kisim planti buk i kam long kain kain tok ples.”
Ol painia i kirap nogut taim sampela Witnes, em ol i stap long hap bilong dispela pasis, ol i givim ol painia tupela samting i olsem bokis i gat wil na ol i ken pulimapim ol buk long en na pasim long wilwil na pulim i go. Ol painia i kisim ol buk long olgeta tok ples ol inap kisim long en na pulimapim long tupela bokis hia, na kirap i go long bris. I no longtaim na ol man i no kirap nogut moa long lukim dispela tupela bokis em wilwil i pulim. Wanpela painia i tok, “Ol i kamap olsem mak bilong mipela. Taim man bilong opim get bilong bris i lukim mipela i kam, em i save opim get na tromoi han bilong orait long mipela i go insait, na em i singaut: ‘Misin bilong ol wilwil i kam!’ ” Na sampela taim man bilong was long get i lukim “misin bilong ol wilwil” i kam, na em i opim get na singaut olsem: “Tupela Polan na wanpela Saina!” Orait nau ol painia i save i gat tupela sip bilong Polan na wanpela bilong Saina i kam sua, na dispela i helpim ol long save long wanem ol tok ples stret ol i mas kisim ol buk long en i go long sip. Tasol narapela samting, em ol i mas i go long taim stret. Bilong wanem ol i mas mekim olsem?
Autim Tok i Stret Long Taim Stret
Taim ol boskru i malolo olsem long belo samting, long dispela taim tasol ol painia inap toktok wantaim ol. Tasol ol i no inap autim tok long man bilong kukim kaikai long kain taim olsem; em i no mekim wok long wankain taim olsem ol narapela boskru. Na ol inap toktok wantaim kepten na ol narapela ofisa long kain kain taim long san olgeta. Na tu, ol painia i kisim save olsem ol sip bilong Inglan i sua long Rotedam ol i bihainim klok bilong Inglan (em i narapela long klok bilong Netelan inap wanpela aua), olsem na taim ol boskru bilong Inglan i kaikai na malolo, ol boskru bilong ol narapela kantri i go bek long wok. Olsem na ol painia i autim tok long sip ol i mas i gat gutpela hanwas i makim stret ol klok.
Tasol olsem wanem? Ol boskru i laik toktok long Baibel long taim bilong malolo bilong ol? Giet, em i gat 31 krismas, em i tok: “Planti ol i laik harim tok bilong Kingdom, na ating as bilong dispela i olsem long ai bilong ol yet ol i bin lukim planti samting i kamapim long ples klia olsem ol gavman bilong graun i no inap kamapim gutaim.” Olsem: Sampela boskru i bin tokim Giet ol i go long Itiopia na ol i bin lusim planti wit rais samting long bris em bilong helpim ol lain i bagarap long hangre, tasol taim ol i kam bek gen bihain long sampela mun, ol i lukim dispela wit rais samting i hip i stap yet long bris; na nau em i sting pinis na ol rat i pulap na ol i kaikai. Giet i tok: “Nau mi save i gat wanem as na planti boskru i no bilip olsem ol gavman inap helpim ol man. Olsem na ol i laikim tru tok bilong Baibel i tok promis olsem bihain bai i gat wanpela gavman tasol i bosim olgeta manmeri.”
Pita i wanbel na em i tok: “Wanpela kepten bilong Jemani i bin tokim mi olsem, sapos mi bin autim tok long sip bilong em inap 10-pela yia i go pinis, ol boskru bai rausim mi long sip, tasol nau ol samting long graun i wok long senis senis, na dispela i kirapim ol long laikim ol tok bilong Baibel i stret long dispela taim nau.” Wanpela man bilong kukim kaikai long sip bilong ol Koria em i tok, long taim bilong pait bilong Iran na Irak em i wok long wanpela bikpela sip, na taim sip i stap long Solwara bilong Persia, wanpela roket i sutim sip na sip i paia. Em i pasim tok pinis long bel olsem, sapos em i abrusim bagarap, em bai wok long painim God. Em i abrusim bagarap. Bihain, taim ol painia i bungim em long Rotedam, em i tokim ol em i laik kisim olgeta buk samting long tok Koria ol inap kisim i kam long em.
Planti sip i anka long pasis inap sampela de. Olsem na ol painia inap i go bek tupela o 3-pela taim samting bilong toktok moa wantaim ol boskru long tok bilong Baibel long taim ol i pinis wok. Tasol taim ensin bilong sip i bagarap, sip i inap anka i stap 3-pela wik. Wanpela painia i lap na tok: “Dispela i no gutpela bilong helpim wok bilong kampani, tasol em gutpela bilong helpim wok bilong mipela.” Ol painia i wok long toktok wantaim ol boskru long ol tok bilong Baibel, na tu ol i stretim rot bilong soim sampela piksa-slait bilong Sosaiti long ol (em Baibel—Em Bilong Ol Manmeri Bilong Dispela Taim Nau) long rum kaikai bilong ol. Long Rotedam, i gat planti liklik grup bilong ol Witnes bilong narapela narapela tok ples, na sampela boskru i kam long miting bilong ol. Ol i mekim olsem inap long taim sip i laik lusim bris. Orait nau ol i mas pasim Baibel, na lusim ol baklain i pasim sip long bris na sip i lusim bris i go—tasol ol painia i no lusim tingting long dispela sip.
Ol Stori Bilong Boskru i Strongim Bel
Long ol nius na long kompyuta bilong lain bilong bosim bris, i gat lista bilong nem bilong ol sip i kam long Rotedam, na dispela i helpim ol painia long save long wanem de ol sip ol i bin autim tok long en bai kam na wanem de ol bai lusim Rotedam. Taim wanpela bilong ol dispela sip i kam sua gen, ol painia i laik hariap i go bilong lukim ol boskru gen na bai ol i ken save long ol samting i bin kamap long taim sip i go raun. Ol stori bilong ol boskru i strongim tru bel bilong ol!
Wanpela boskru, taim sip bilong em i lusim Rotedam i go, em i givim sampela buk, em Yu Inap i Stap Oltaim Long Paradais Long Graun, long 5-pela wanwok bilong em, na ol 6-pela wantaim ol i stadi long Baibel. Na tu long kaset em i putim tok bilong wanpela sapta i stori long famili, na olgeta boskru i harim dispela tok long rum kaikai bilong ol. Wanpela boskru bilong narapela sip i bin go long wanpela Haus Kingdom long taun Antwep klostu long Rotedam. Taim em i go bek long sip, long banis bilong rum kaikai em i putim wanpela hap laplap i gat bikpela rait long en olsem: “Haus Kingdom bilong ol Witnes Bilong Jehova.” Nau em i singautim ol boskru i kam long miting em i laik mekim bilong lainim tok bilong Baibel. Taim em i no rausim yet dispela laplap, em i singautim ol boskru i kam long miting long wik antap. Orait, long wik antap, dispela laplap i stap gen na ol boskru tu ol i stap.
Na tu ol painia i kisim save olsem sampela boskru i no save putim ol buk bilong ol long sarang o kabot samting. Meinat i tok: “Taim mipela i go insait long rum slip bilong Aisak, em wanpela ofisa bilong Wes Afrika i gat wok long lukautim redio, mipela i hatwok long painim ples bilong sindaun. Ol magasin na buk samting, em Sosaiti i wokim, ol i stap nabaut nabaut—na ol i op i stap.” Na tu, Aisak i bin wokim wanpela lista i gat sampela askim bilong Baibel long en, na dispela i redi i stap, long wanem, em i bin wetim ol painia i kam lukim em gen.
Tasol sampela boskru i no inap wet long ol painia i kam bek lukim ol. Wanpela nait Giet i slip i stap na telefon bilong em i ring.
Giet i lusim slip na i kirap painim telefon na em i toktok isi long em yet olsem: “Man, husat i telefon?”
Em i holim telefon na em i harim nek bilong wanpela man em i lap na tok: “Alo, em pren bilong yu!”
Giet i wok long tingim em i husat.
Nek i tok gen: “Em pren bilong yu long sip.”
Giet i tok: “Tasol em 3 klok, em biknait yet!”
“Tru, tasol yu bin tokim mi, taim sip bilong mi i kamap gen long Rotedam yu laik bai mi telefon kwiktaim long yu. Orait, mi kam pinis!” Liklik taim na Giet i go lukim dispela pren i laikim Tok bilong God.
“Yu Mas Mekim Wok Long Planti Hap”
Sampela boskru i bin salim pas long ol painia i kamapim klia olsem ol i pilim tru ol tok bilong ol buk samting i stori long Baibel. Daunbilo em sampela tok bilong ol pas:
‘Mi kirap pinis long kaunim buk Yu Inap i Stap Oltaim Long Paradais Long Graun . . . Nau mi save long planti samting em bipo mi no save gut long en. Gutpela sapos sip bilong mipela i kam bek long Rotedam.’—Pas bilong Anjelo.
‘Mi kaunim pinis buk, na mi salim sampela askim long yu na bai yu ken bekim long ol pas bilong yu.’—Pas bilong Albeta.
‘Nau mi kaunim tok bilong Baibel long olgeta de. Mi amamas mi stap pren bilong yu. Mi painim pinis ol pren i stiaim mi i go long God, na dispela samting i winim tru ol narapela gutpela samting i bin painim mi.’—Pas bilong Niki.
Ol pas olsem i mekim gut bel bilong ol painia na kirapim ol long tingim tok bilong Baibel long Saveman 11:1, olsem: “Yu mas mekim wok long planti hap, na bihain bai yu kisim gutpela pe.” Ol i amamas tru taim ol i harim tok olsem sampela boskru i kirap pinis long mekim wok bilong Jehova.
Olsem Stanislaf, em wanpela boskru bilong Polan, em i amamas nogut tru long ol tok em i lainim long ol buk bilong Sosaiti. I no longtaim na em i kisim planti buk samting bilong Baibel, na taim sip i raun long solwara em i stadi gut long olgeta dispela buk. Meinat i tok, “Bihain em i salim pas na em i tok, em i kisim baptais pinis.”
Foket, em kepten bilong wanpela sip, em i harim tok bilong Kingdom long namba wan taim long Rotedam. Long olgeta tupela tupela mun em i kam i stap long Rotedam inap wanpela wik, na insait long dispela wik em i stadi long Baibel long olgeta de. Na taim em i laik i go raun gen, ol painia i givim wanpela lista long em i gat atres bilong ol Haus Kingdom long en, em ol i stap long dispela raun. Foket em i go long ol dispela Haus Kingdom na em i kirap nogut long gutpela tok amamas ol i mekim long em. I no longtaim na dispela kepten i kisim baptais na nau em i givim bel long mekim wok bilong Jehova.
Maik em i wanpela ofisa long Nevi bilong Inglan, na bipo em i bin toktok wantaim ol Witnes na taim em i raun long solwara em i stadi long Baibel. Wanpela taim, sip bilong em i anka long Rotedam, na em i kalap long wilwil bilong em na i go long Haus Kingdom. Em i pilim tru gutpela pasin bilong ol manmeri em i lukim long Haus Kingdom, em narapela i laikim tru narapela na ol i stap wanbel, na em i tokim ol Witnes em i pasim tok pinis long bel bilong em olsem em bai pinis long mekim wok long nevi. Sapos em i wok 4-pela yia moa em bai kisim bikpela winmani, tasol em i bihainim dispela tok bilong em na bihain em i kisim baptais.
Meinat i tok: “Maik, na Stanislaf, na Foket, na ol narapela, i givim bel tru long mekim wok bilong Jehova, na dispela i kirapim mipela long mekim yet dispela wok bilong i go long ol sip bilong painim ol boskru i wankain olsem ol.”
Yu Inap Insait Long Dispela Wok?
Ol dispela 6-pela “misineri bilong sip,” ol i tingting bek long 10-pela yia samting ol i bin mekim dispela wok bilong autim tok long ol sip, na ol i wanbel long tok olsem: “Em bikpela wok long autim tok long ol sip, tasol gutpela samting i kamap long en.” Meinat i tok, “Olgeta de, taim mipela i pinis long autim tok na kikim wilwil i go bek long haus, mipela i pilim olsem sampela bilong ol dispela boskru i bin wetim mipela i kam autim tok long ol.”
Olsem wanem? Sapos yu stap long ples bilong planti sip, ating i gat sampela boskru i wetim yu long i go autim tok long ol? Ating ol elda long kongrigesen bilong yu i ken stretim rot bilong yu ken insait long dispela wok; em i hatwok, tasol em i karim gutpela kaikai.
[Blok long pes 20]
AUTIM TOK LONG OL KANTRI I GAT TAMBU
I no longtaim i go pinis na insait long wanpela yia, winim 2,500 sip bilong ol kantri i gat tambu long wok bilong ol Witnes Bilong Jehova, ol i kam anka long Rotedam. Nau ol painia i save, i gat rot bilong tok bilong Baibel i ken go kamap long ol dispela kantri tu.
Long namba wan taim ol i go long wanpela sip bilong ol Esia, ol painia i tilim olgeta 23 buk ol i kisim i kam, na sampela boskru i bel hevi, long wanem, ol i no kisim wanpela buk. Wanpela manki i wok long haus kuk long narapela sip bilong ol Esia em i pret liklik. Em i kisim wanpela buk long painia, tasol bihain em i karamapim pepa long en na raitim wanpela atres long en na bekim long dispela painia. Painia i save, manki i pret, nogut em i kisim buk i go na ol man i mekim nogut long em. Long dispela de stret em i salim buk i go long dispela atres long Esia, long rot bilong pos ofis.
Long wanpela sip i kam long Afrika, wanpela boskru i holim lista bilong ol buk ol Witnes long kantri bilong em i laik kisim. Kirap long dispela taim, olgeta taim dispela boskru i go bek long ples, em i pulapim ol buk samting long switkes bilong em na kisim i go wantaim em. Wanpela painia i stadi Baibel wantaim boskru bilong narapela kantri long Afrika, tasol taim boskru i save olsem em inap kisim 3-pela buk tasol, em Rot Bilong Kamapim Amamas Insait Long Famili, em i bel hevi stret. Em i tok: “I no inap tru! Ol brata long ples i sot long 1,000 buk!” Tasol nogut hevi i painim dispela boskru, olsem na ol painia i kirapim em long kisim 20 tasol pastaim, na long ol wan wan taim bihain, em i ken kisim 20 buk moa olsem i go wantaim em.
Ol painia i pilim tru hevi bilong ol brata i stap long ol kantri i gat tambu. Olsem: Wanpela taim ol i harim tok olsem wanpela sip i kam em bilong wanpela kantri em gavman bilong dispela kantri i no laikim bilip bilong ol Witnes na gavman i mekim nogut tru long ol brata. Ol i bin pinisim planti Witnes long wok mani bilong ol, na tekewe graun bilong ol. Taim ol painia i kisim save olsem wanpela boskru long dispela sip em i wanpela Witnes, ol i go lukim kepten na askim em long givim orait long ol bilong salim sampela samting long sip bilong em i go long ol dispela brata i gat hevi. Kepten i orait long dispela na sampela de bihain, sip i karim 100 bikpela bek i go, em klos na su na ol narapela samting i pulap long en. Ol brata i salim i go long ol Witnes long dispela kantri.
[Blok long pes 21]
AUTIM TOK LONG OL SIP—TINGTING BILONG WANPELA MERI
Namel long ol dispela painia i gat wanpela meri tasol, em Karin. Karin i tok: “Pastaim mi pret liklik long go wantaim Pita, long wanem, mi bin harim stori olsem ol boskru i save spak na pait. Tasol ol i no olsem—klostu olgeta i bin mekim gutpela pasin long mipela. Olsem: Taim ol boskru i kisim save olsem mitupela Pita i marit, orait, planti taim ol i kamautim piksa bilong meri pikinini bilong ol na ol i stori long famili bilong ol. Long dispela rot mipela i bin tilim planti buk Rot Bilong Kamapim Amamas Insait Long Famili.”
Taim Pita i kisim meri bilong em Karin i go wantaim em long ol sip, dispela i opim rot bambai ol i ken i go lukim ol meri bilong ol boskru, na ol narapela meri em sampela i mekim wok nes long sip. Karin i tok: “Ol i sem liklik long toktok wantaim ol man em ol i no save long ol, tasol taim ol i lukim mi, orait nau ol i no sem long toktok.”
Wanem samting i givim bikpela hatwok long Karin long taim em i autim tok long ol sip? Karin i tok: “Em ol lata ol i wokim long baklain. Ol dispela lata i save seksek nabaut, olsem na mi pret nogut tru long go antap.” Olsem wanem? Em i winim dispela hevi? Em i tok: “Mi winim. Wanpela taim mi pret long go antap, na sampela boskru bilong Paragwei i lukim mi na ol i singaut olsem: ‘No ken pret. Yu inap mekim. Bilip tasol long God.’ ” Karin i lap na tok: “Ol i tok olsem na i no gat narapela rot—mi mas go antap.” Man bilong em i litimapim nem bilong meri bilong em na i tok: “Insait long 4-pela yia em i bin go antap long planti lata olsem, na nau em i lain pinis na em i go antap olsem wanpela boskru.”
Karin wantaim man bilong em Pita, tupela i skul long namba 89 klas bilong Skul Gileat long Amerika. Long Septemba 28, 1990, tupela i go long nupela ples wok bilong ol, em Ekwado, na long dispela kantri i gat wanpela taun em i ples bilong ol sip. Yumi save, ol i amamas long autim tok long dispela kantri.
[Blok long pes 22]
YU WANPELA BOSKRU?
Taim sip bilong yu i anka long wanpela biktaun em i ples bilong ol sip, yu laik go long wanpela miting bilong ol Witnes Bilong Jehova long tok Inglis? Sapos olsem, orait lukim lista daunbilo i gat atres bilong ol Haus Kingdom na taim bilong ol miting, na karim i go raun wantaim yu:
Hamburg, Schellingstr. 7-9; Sarere, 4:00 p.m.; telefon: 040-4208413
Hong Kong, 26 Leighton Road; Sande, 9:00 a.m.; telefon: 5774159
Le Havre, 65 rue de Trouville; Sande, 2.30 p.m.; telefon: 35 44 54 27
Marseilles, 5 Bis, rue Antoine Maille; Sande, 10:00 p.m.; telefon: 91 79 27 89
Naples, Castel Volturno (40 km north of Naples), Via Napoli, corner of Via Salerno, Parco Campania; Sande, 2:45 p.m.; telefon: 081/5097292
New York, 167 W. 107 Street; Sande, 4:00 p.m.; telefon: 212-662-8143
Rotterdam, Putsestraat 20; Sande, 10:00 a.m.; telefon: 010-41 65 653
Tokyo, 5-5-8 Mita, Minato-ku; Sande, 4:00 p.m.; telefon: 03-3453-0404
Vancouver, 1526 Robson Street; Sande, 10:00 a.m.; telefon: 604-689-9796