Ol Goahiro i Amamas Long Harim

LAPUN meri i sindaun aninit long traipela diwai na em i pasim longpela blakpela klos. Long ai bilong mipela em i narapela kain, na tok ples bilong em tu i narapela kain. Em i amamas na em i tok: “Yupela i mas kam bek gen.” Em i makim long han olgeta 50 wanlain bilong em i sindaun klostu long em, na em i tok: “Mipela olgeta i laik bai yupela kam bek gen. Kam long olgeta wik!”

Dispela lain ol i husat? Bilong wanem ol i laik tru bai mipela i go bek gen, maski ol i no bin bungim mipela bipo? Orait, nau mipela i laik stori long taim mipela i bin i go lukim ol Goahiro i stap long Poin La Gwahira long hap not-is long Kolombia, na long hap klostu, em hap not-wes bilong kantri Veneswela.

Tingting Mipela Kisim Pastaim

Mipela lusim nambawan biktaun bilong Veneswela, em Karakas, na pastaim mipela draiv i go long taun Marakaibo. Mipela draiv i go insait long taun na mipela lukim tripela yangpela meri i wokabaut long rot, em ol i pasim longpela klos i gat gutpela kala kala. Pes bilong ol i narapela kain long ol narapela lain bilong Veneswela​—⁠bun klostu long ai i bikpela, olsem na pes i gutpela, na skin i braunpela, na gras i blakpela na i malumalum olsem bilong ol masta. Mipela lukim pasin bilong ol long wokabaut long lek i gutpela. Mipela i laik save long dispela lain, long wanem, em namba wan taim mipela bin lukim sampela Goahiro.

Long de mipela i makim bilong i go long Poin La Gwahira, san i lait gut na i no gat win. Long moningtaim tru, taim san i no strong yet, mipela 50 manmeri i kalap long bas; mipela i amamas tru mipela inap insait long bikpela wok bilong kisim tok bilong Baibel i go long ol longwe hap bilong bus hia long Veneswela. Mipela laik i go long taun Paragwatson, long boda bilong Veneswela na Kolombia.

Mipela lusim taun Marakaibo, na rot i go namel long planti liklik taun na ples, em olgeta wan wan i gat ples maket, na sampela man i maketim slipas na longpela klos i gat kala kala, ol i kolim manta. Olgeta liklik ples i gat klinpela ples klia long namel, na haus lotu ol i penim long gutpela kala i no strong tumas​—⁠dispela olgeta i gutpela long lukim. Pes bilong olgeta manmeri i kain olsem bilong ol as ples bilong Not na Saut Amerika. Long ai bilong mipela, pes bilong ol i narapela kain, tasol mipela i no ken lusim tingting olsem ol i sampela as ples bilong Veneswela.

Painim Ol Haus

Mipela kamap pinis long hap mipela i laik go long en. Draiva i putim bas i go sanap long arere bilong rot klostu long wanpela liklik banis aninit long wanpela diwai em han bilong en i op tru. Long narapela hapsait bilong banis, skul bilong dispela liklik ples i stap, tasol skul i no op, long wanem, em Sande.

Mipela bruk long tupela lain na i go long narapela narapela hap bilong painim ol haus. Mipela laik singautim olgeta manmeri i kam harim wanpela tok long Baibel, em bai kamap long tok ples Goahiro long 3 klok long apinun long banis bilong skul. Wanpela meri bilong lain Goahiro i poromanim mipela, nem bilong em Evelinda. Mipela i ting, sapos ol Goahiro i lukim em i kam wantaim mipela, bai ol i moa amamas long harim tok bilong mipela, long wanem, mipela i no save liklik long tok Goahiro; mipela i save long tok Spen tasol.

Mipela lusim ples i go na mipela mas wokabaut longwe bilong painim ol haus; ol i no stap klostu klostu. Mipela wokabaut long longpela rot i go stret tasol namel long bikbus i stap arere arere long rot. Wanpela manki i gat olsem 10-pela krismas, em i kirap wokabaut wantaim mipela long rot. Em i lukluk strong long mipela; em i laik save, mipela i husat. Evelinda i lap na long tok Goahiro em i tokim dispela manki long wok mipela kam bilong mekim. Nem bilong em Omar, na taim mipela singautim em pinis long i kam harim tok long apinun, em i lusim mipela i go.

Mipela lusim rot na bihainim wanpela liklik rot i no gat kolta na graun i malumalum liklik, long wanem, i no longtaim na bikpela ren i bin kam daun. Mipela kisim save olsem, ol dispela liklik rot em rot bilong ol man i hait na kisim kago i tambu i kam long Veneswela o i go long Kolombia. Smel bilong bikbus i pulap long win. Ples i hat nogut tru na tuhat i no pilai long skin bilong mipela, tasol mipela i amamas long wok i go yet. Na taim rot i lusim bikbus i kamap long bikpela ples klia​—⁠em ol Goahiro i save wokim haus bilong ol long kain ples olsem​—⁠em nau, mipela i no tingim moa ol dispela hevi bilong skin.

Mipela Bungim Ol Goahiro

Inap olsem 12-pela meme i gat gutpela waitpela na blakpela na braunpela makmak ol i slip i stap long ples kol aninit long ol diwai. Ol i stap isi na meknaisim maus olsem ol i kaikai. Wanpela meri i stap long wanpela kain umben bilong slip na malolo em i hangamap namel long tupela diwai. Meri i givim susu long pikinini na tupela liklik pikinini i pilai klostu. Dispela meri i stap ausait liklik long banis stik na waia i banisim wanpela haus morata ol i bin wokim long graun na kanda. Sampela haus moa i stap, ol i no gat banis. Wanpela em i haus kuk na i gat paia i stap long graun na sampela traipela sospen i stap long paia. Ol skin bilong meme i hangamap klostu bambai ol i ken drai.

Wanpela man i sanap long dua bilong banis na taim em i lukim mipela, em i ran i kam putim tupela sia bilong mipela i ken sindaun long en klostu long meri i slip long umben. Evelinda i tok gude long dispela man na meri long tok ples bilong tupela, na em i opim buklet Stap Amamas Oltaim Long Graun! na stori long tupela long gutpela samting Baibel i tok yumi ken wetim i kamap. Long dispela hap ol man i sindaun isi, olsem na mipela i save mipela i no ken stori long ol bikpela hevi i kamap long ol narapela hap o pasin raskol i go bikpela long ol biktaun. Wanpela Witnes long lain bilong mipela i bin tokim mipela, ol Goahiro i man bilong sem, olsem na taim mipela i kirap long toktok wantaim ol, mipela i mas mekim gutpela pasin pren bambai ol i ken save, mipela i laik tru long helpim ol. Dispela Witnes i bin stori olsem: “Pastaim mipela i save askim ol, famili i stap i orait, na olsem wanem long kaikai long gaden, na ren i bin kam daun o nogat. Em, pastaim mipela save toktok long kain samting olsem, na nau rot i op bilong mipela i ken toktok wantaim ol long Kingdom bilong God na helpim ol long save, klostu nau bai Jehova i pinisim olgeta hevi na rausim Satan, em ol i save pret tru long Satan.”

Evelinda i stori i stap na tupela i amamas long harim na ol i wanbel long tok bilong em. I no longtaim na narapela meri wantaim sampela pikinini i kam bung wantaim mipela. Mipela save pinis, lo bilong ol Goahiro i orait long man i maritim planti meri. Olsem na mipela i ting olsem: ‘Ating dispela meri tu em meri bilong dispela man.’ Na dispela i kirapim mipela long tingim Yeni (Yenny) em wanpela naispela meri Goahiro i gat 21 krismas na em i stap long taun Marakaibo. Wanpela Goahiro em i maniman em i laik maritim Yeni na em i tok long baim em long bikpela mani. Tasol papamama bilong Yeni, em tupela i no Witnes Bilong Jehova, i gat tupela tingting. Mama i orait long dispela man i maritim Yeni, tasol papa i tok, nogat. Dispela man i laik maritim Yeni em i marit pinis long sista bilong Yeni!

Evelinda i stori pinis na nau dispela man i kisim wanpela buklet. Meri i sanap baksait long em i tok, em tu i laik kisim wanpela, na mipela i amamas long givim wanpela long em tu. Ol narapela Witnes i no wetim mipela​—⁠ol i lusim mipela i go. Olsem na mipela i singautim dispela famili i kam harim tok long apinun, na mipela hariap i go bihainim ol narapela, nogut mipela i lus long bus.

Wanpela Witnes long lain bilong mipela i stori long ol samting i bin painim em. Em i bungim wanpela man i slip long wanpela umben bilong malolo na dispela man i putim gut yau long tok bilong Witnes. Meri bilong dispela man i go kisim dring samting i kam​—⁠em i kisim tupela glas bilong wanpela kain dring (chicha) ol i wokim long kon ol i memeim. Brata hia i kisim na em i dring. Bihain poroman bilong em long wok autim tok, em Magaly, em wanpela meri bilong lain Goahiro, em i stori long olsem wanem ol i wokim dispela dring​—⁠sampela taim ol i memeim kon long tit long maus! Nau brata hia i tingting planti na Magaly i lap nogut tru.

Narapela man bilong lain Goahiro i pilim tru bikpela wok brata i mekim bilong kisim tok bilong Baibel i kam long haus bilong em, olsem na em i lusim umben bilong malolo na em i go pasim siot, na em yet i kisim brata i go long sampela haus i stap hait, em ol narapela brata i no bin lukim na ol i no bin autim tok long en.

Mipela brukim narapela ples klia em sampela brata sista i autim tok long ol bikpela manmeri i stap long en, na mipela i lukim sampela liklik pikinini i stap as nating na ol i sanap isi aninit long wanpela diwai. Bel bilong ol dispela pikinini i solap, na bihain mipela i kisim save long as bilong dispela sik, em olsem ol pikinini i no gat gutpela kaikai na i gat snek samting long bel. Long dispela hap planti man i no gat wara o paua long haus. Olsem na ol i no gat bokis ais, o fan, o lait.

Planti Ol i Kam

Moningtaim i pinis kwik, na mipela i wokabaut i go bek long bas bilong kisim liklik kaikai long belo. Mipela bin singautim planti i kam harim tok bilong Baibel long apinun, na mipela i wok long tingting: ‘Hamas bai ol i kam?’

Klostu 3 klok long apinun na mipela i ting mipela lain bilong bas tasol bai i stap na harim tok bilong brata bilong lain Goahiro em i bin redim wanpela tok bilong 45 minit long tok ples bilong ol Goahiro. Tasol nogat! Wanpela liklik famili i kam​—⁠ol i sem sem na i kam insait long banis bilong skul. Ating ol i kirap nogut long mipela i amamas tru long lukim ol. Tasol sampela minit bihain planti moa ol i kam, em sampela ol i bin wokabaut longwe na i kam. Famili i stap long ples klia i gat 12-pela meme, ol tu i kam! Meri i bin slip long umben, nau em i bilas gut; em i pasim longpela blakpela klos ol i kolim manta! Liklik Omar tu, em manki mipela bin toktok wantaim em long rot, em i kam, em yet. Sampela moa i kam sindaun long dispela wanpela bikpela hap simen i stap long banis bilong skul, na kwiktaim dispela “bang” i pulap. Draiva bilong bas i laik helpim mipela na em i kirap rausim ol sia long bas bilong ol manmeri i ken sindaun long en na harim tok.

Inap olsem 55 Goahiro i kam sindaun harim tok bilong Baibel em Eduardo i mekim. Tasol ol i no pasim maus olgeta. Sapos ol i wanbel wantaim wanpela tok, ol i tok, “Mmmm.” Taim em i toktok long pasin nogut bai pinis, dispela lapun meri yumi bin stori long em long kirap bilong stori, em i tok strong inap long olgeta i harim, olsem: “Tru ya, i gat planti pasin nogut i stap. Sampela man nogut i sindaun hia namel long yumi. Mi laik bai ol i mas harim gut dispela tok!” Eduardo i mekim gutpela tok isi na tenkyu long em na toktok i go yet.

Taim tok i pinis, wanpela brata long lain bilong mipela i kisim piksa. Ol Goahiro i amamas long dispela, na ol i laik save, brata i laik bai ol i holim buklet bilong ol i go antap, em buklet Stap Amamas, taim em i kisim narapela piksa. Nau, isi isi sampela i lusim mipela i go, tasol inap 25 samting ol i stap na lukim mipela i kalap long bas. Ol i strong long mipela i mas kam lukim ol gen na mipela i tok promis long mekim. Ol i sanap long rot na tromoi han i go i go inap long ol i no inap lukim bas moa.

Mipela lusim ol, tasol mipela i amamas mipela bin insait long dispela gutpela wok bilong kisim gutpela tok bilong Kingdom bilong God i go long ol dispela manmeri. Planti bilong ol, em namba wan taim ol i bin harim dispela tok. Kwiktaim ol Witnes long Marakaibo i kirap long toktok long ol bai go lukim gen ol dispela manmeri. Olsem wanem? Ol i bin i go?

Ol i Go Bek na Gutpela Samting i Kamap

Ol brata i go bek tupela wik bihain. Ol i tilim planti buk na nius bilong Baibel long ol dispela manmeri, na mekim ol gobek, na kirapim ol Baibel-stadi. Na inap olsem 79 Goahiro i kam bung bilong harim namba 2 pablik-tok. Long dispela taim, ol brata i tokim ol dispela manmeri, ol i no inap kam tupela wik bihain, long wanem, i gat kibung sekit, olsem na ol bai kam gen 3-pela wik bihain. Ol Goahiro i tingting planti, na wanpela i tok, “Nogut mipela i dai pastaim!” Ol i laik save, kibung sekit em wanem samting. Ol i harim stori bilong en na ol i ting, kibung em gutpela samting tru, olsem na ol tu i laik i kam! Ol brata i stretim rot na inap olsem 34 i bin kam long dispela kibung long Marakaibo, na ol brata long kibung i save long tok Goahiro ol i helpim dispela lain long save long ol tok i kamap long tok Spen.

Jehova i laik bai “olgeta manmeri . . . i ken save long as bilong tok tru.” (1 Timoti 2:​3, 4) Olsem na yumi amamas tru long ol Goahiro bilong Poin La Gwahira i laik save long tok i tru na ol i amamas long harim!

[Blok long pes 26]

Tok i Tru Bilong Baibel i Helpim Ol

Tupela yangpela meri Goahiro, em Airis na Margarita, i amamas long lukim buklet Stap Amamas Oltaim Long Graun! Tasol tupela i gat hevi​—⁠tupela i no save long kaunim buk. Wanpela meri Witnes i go lukim tupela na em i tokim tupela em bai lainim ol long kaunim buk. Em i mekim wok long liklik buk Lain Long Rit na Rait. I no longtaim na tupela inap raitim na kolim stret nem Jehova, na tupela i amamas tru.

Ol i lain i go na ol i amamas tru long kisim save long gutpela samting bai kamap long bihain, em Baibel i tok promis long en. Ol i laikim tru tok promis olsem olgeta manmeri bai stap fri tru. Tupela i tok: “I stap bilong ol yangpela long dispela hap i no gutpela. Taim mipela i yangpela yet ol i subim mipela long marit, na oltaim mipela i mas was gut, long wanem, planti man i save bagarapim ol yangpela meri.”

Tupela i amamas tru long i go long kibung long Marakaibo. Bel bilong tupela i amamas, olsem na pes bilong tupela i lait, na i lait moa yet long taim bilong mekim singsing. Taim Witnes i go bilong stadi wantaim tupela, tupela i save redi i stap na wet long dua bilong haus, na tupela i no bin lusim wanpela pablik-tok i kamap long ples bilong ol. Tupela i kisim save long God Jehova na laik bilong em na tupela i pilim olsem dispela i bin helpim ol tru.