Taim Bilong Painim God
PIKSA long dispela pes em bilong wanpela haus lotu bilong taun Atens long bipo i stap antap long wanpela maunten, na bipo em i as ples bilong lotuim planti god man na god meri. Maunten Areopagus i stap klostu na ol man i tok, bipo i gat wanpela kaunsil o kot i save bung long dispela hap. Long dispela hap, klostu 2,000 yia i go pinis, aposel Pol i sanap na mekim ol bikpela tok. Sampela tok bilong em i olsem:
“Long wanpela tumbuna tasol [God] i bin mekim olgeta lain manmeri i kamap. Na em i putim ol i stap long olgeta hap bilong graun. Em yet i bin makim taim bilong ol i ken i stap, na em i bin putim mak bilong graun bilong ol. God i laik bai ol manmeri i ken kam long em na save tru long em, olsem na em i putim ol i stap, bai ol i ken wok long painim em. Tasol em i no i stap longwe long yumi olgeta wan wan. ‘Yumi save kisim laip long em na em wanpela tasol i givim strong long yumi na yumi save wokabaut.’ ”—Aposel 17:26-28.
Sapos olgeta manmeri long olgeta hap i bin bihainim ol dispela tok bilong Pol, i stap bilong ol bai i narapela kain! Olsem: Sapos olgeta man i bilip olsem yumi olgeta i pikinini bilong wanpela man em Bikpela King Jehova i wokim na yumi wanpela lain tasol, orait, bai narapela i tingim gut narapela na pait na pasin bilong givim pen na hevi long narapela i no inap kamap.
Long nau, pasin bilong ol man long tingim lain bilong ol yet na bel nogut long ol man bilong narapela skin, dispela pasin i save brukim ol lain. Tasol tok bilong Pol i stret yet. Yumi olgeta i pikinini bilong dispela wanpela man em God i bin wokim. Yumi olgeta i olsem brata brata. Na i gat hap taim i stap yet bilong painim God na i go klostu long em.
Laspela hap bilong dispela tok bilong Pol i kamapim bikpela samting yumi mas tingim olsem: “[God] i makim pinis wanpela de bilong em bai i kotim ol manmeri. Na long stretpela pasin bilong en, em bai i skelim pasin bilong olgeta manmeri bilong graun. Na em i bin makim wanpela man bilong bosim dispela kot. Dispela man i bin dai na God i kirapim em bek long matmat. Olsem na yumi ken bilip tru long God i bin givim dispela wok long em.”
Kirap bek bilong Jisas em i samting tru, na Pol i tok, long dispela as yumi inap bilip olsem i gat wanpela de bilong kotim ol manmeri. Dispela de bai kamap long wanem taim? Pol i bin mekim dispela tok long Maunten Areopagus klostu 2,000 yia bipo, olsem na yumi save, dispela de i kam klostu nau. Tru tumas, ol samting i kamap bilong truim ol tok profet bilong Baibel i makim olsem dispela de i klostu pinis. Yumi mas tingim gut dispela samting! Yumi mas hariap na givim bel long painim God—no ken lusim taim—long wanem, Pol i tokim ol man bilong Atens olsem “nau [God] i tok strong long olgeta man long olgeta ples i mas tanim bel”!—Aposel 17:30, 31.