Ol i Kisim Amamas Tru Long “Paradais”
PARADAIS! Taim ol man i tingim Hawaii, planti taim ol i tingim dispela tok ‘paradais’—na i gat as bilong dispela tingting, olsem: Long dispela hap i no kol o hat tumas, na skai i blupela, na i gat ol gutpela diwai na gutpela win, na gutpela wesan long nambis—em ol samting planti man i ting em samting bilong paradais.
Ol dispela samting i bin kirapim ol man long lusim ples bilong ol, olsem hap bilong Esia na Pasifik, na Not na Sentral na Saut Amerika, na Yurop, na ol ailan bilong Karibian, na ol i kam long Hawaii. Planti ol i kam i stap, long wanem, long olgeta mun i gat gutpela san. Sampela i kam bilong painim wok mani—na amamas. Olsem na ol man long dispela hap ol i bilong kain kain lain na skin, na pasin tumbuna na lotu bilong ol i narapela narapela.
Tasol i gat narapela samting em man i mas tingim. Pasin raskol, kisim ol drak, tromoi pipia na marasin nogut na bagarapim ples, na kain pasin olsem i save pulap long planti naispela hap long graun, na i wankain tu long Hawaii. Ol man i les na tingim ol yet tasol, na isi isi ol ailan bilong Hawaii i no stap naispela olsem bipo. Tru, planti man i laik i stap long paradais, tasol sampela i les long mekim wok bilong kamapim paradais long ol dispela ailan na sampela i no lukautim gut ol hap i stap paradais pinis. Tru, i mas i gat ol naispela plaua na diwai samting na gutpela san bilong kamapim paradais, tasol i mas i gat sampela samting moa.
Long dispela hap olsem paradais, i gat wanpela lain i stap, em ol i wok long i go bikpela moa na ol manmeri bilong en ol i stap amamas tru. Olgeta wan wan ol i bihainim ol tok i tru bilong Baibel na ol i bilip long tok promis bilong God olsem: “Mi wokim nupela skai na nupela graun. Na ol man bai i no inap tingim moa ol samting i bin kamap bipo.” Ol i amamas long wetim ol samting i kamap long bihain olsem aposel Pita i tok: “God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.” (Aisaia 65:17; 2 Pita 3:13) Ol dispela manmeri ol i husat? Olsem wanem ol i kisim save long ol dispela gutpela tok bilong Baibel? Wanem ol senis i bin kamap long i stap bilong ol?
Ol i No Pret Moa Long i Dai
Isabel na man bilong em, Jos, tumbuna bilong ol i bilong Filipin. Kirap long taim em i yangpela yet, Isabel i lain long lotu bilong papamama bilong em, em lotu Katolik, tasol no gat wanpela taim em i bin kaunim Baibel. Em i lainim tok olsem man i gat tewel na dispela tewel i no inap i dai. Dispela tok giaman i mekim wanem long em? Em i pret nogut tru long i dai—nogut taim ol i planim em, tewel i no inap lusim bokis na bai em i stap laip long bokis inap olgeta taim. Tasol long 1973, Isabel i kirap long stadi long Baibel wantaim ol Witnes Bilong Jehova. Taim em i lainim tok olsem man i no gat tewel na God bai kirapim bek ol man i dai pinis, em i amamas nogut tru—em i no pret moa. (Esekiel 18:4, 20; Jon 5:28, 29) Em i laikim tumas ol tok tru bilong Baibel em i lainim, olsem na em i kisim kwik save.
Olsem wanem long Jos? Em tu i lainim tok bilong Baibel, tasol em i gat tingting tasol long kamapim long ples klia olsem ol Witnes ol i man bilong giaman. Tasol em i no inap painim wanpela rong long ol tok em wantaim meri bilong em ol i lainim. Bihain liklik long ol i kirap long stadi, tok bilong blut i kamap. Inap long dispela taim, Jos i save laikim tumas ol kaikai ol i bin tanim wantaim blut. Tasol taim em i kisim save olsem Baibel i tambuim pasin bilong kaikai blut, orait, em i no kaikai moa. (Stat 9:3, 4; Wok Pris 17:10-12; Aposel 15:28, 29) Em i stadi yet long Baibel na em i amamas long save olsem em i painim pinis tok i tru. Nau Jos na Isabel na 4-pela pikinini bilong ol i save bihainim ol lo bilong God na ol i stap amamas tru.
Lotu Kristen Tru i Kirapim Ol
Wanpela man Japan, em tu nem bilong em Jos, na meri bilong em Lilian, em meri Potyugal, tupela i gat 60 krismas samting. Mama i karim tupela long Hawaii na ol i kamap bikpela long dispela hap. Papamama bilong Jos ol i no lainim em long tok bilong God, olsem na em i no tingim tumas ol samting bilong lotu, tasol em i bilip olsem i gat God i stap. Tasol papamama bilong Lilian ol i lainim em long lotu bilong ol, em lotu Katolik.
Jos i no kaunim tumas ol tok bilong Baibel, tasol inap 30 yia samting em i bin kaunim nius Wastaua na nius Kirap! Long dispela rot em i kisim planti save long tok bilong Baibel. Tasol oltaim em i save smok na dring planti tumas, olsem na em i no kirap kwik long senisim pasin bilong em. Ol yia i kam i go na Jos i wok yet long kaunim ol nius, na wan wan taim em i go long ol miting Kristen long Haus Kingdom. Bilong wanem em i mekim olsem? Long wanem, olsem em i tok, “ol narapela lotu i giaman long bihainim lotu bilong ol,” na ol i orait long planti samting nogut em Baibel i no orait long en. Tasol em i save ol Witnes Bilong Jehova ol i narapela kain.
Lilian i strong long bihainim lotu bilong papamama, olsem na wanem samting i kirapim em long laikim tok i tru bilong Baibel? Olsem: Sista bilong em i singautim em long kam long sampela miting long Haus Kingdom. Lilian i tingim bek dispela taim bipo na em i tok: “Mi amamas long ol manmeri ol i stap olsem wanpela famili na ol i amamas na lap.” Em i lukim pasin bilong ol, olsem narapela i laikim tru narapela, na dispela i kirapim em long bilip olsem ol man bilong lain bilong Jehova ol i bihainim tok i tru. (Jon 13:34, 35) Em i orait long ol Witnes i stadi Baibel wantaim em, na bihain em i dediket long God Jehova. Inap 3-pela mun samting bihain long taim man bilong em i baptais, em tu i baptais.
Jos i lusim pinis pasin bilong smok na spak, na Lilian i tromoi pinis ol piksa bilong em bilong lotuim ol god giaman. Pasin bilong laikim tru narapela i pulap long bel bilong tupela na ol i wok long helpim ol narapela long lainim tok i tru—olsem 25 bubu bilong ol na 4-pela pikinini bilong ol dispela bubu. Lukim pes bilong Jos na Lilian na bai yu save, nau ol i stap amamas tru!
Kisim Pinis Bel Isi na Amamas
Patrik wantaim meri bilong em, Nina, ol i lusim Amerika i go stap long Hawaii. Patrik em i lapun liklik na em i bilong Aialan, na Nina em i wanpela Juda. Pastaim ol i bihainim pasin bilong kisim ol drak, na ol i traim kisim save long kain kain lotu, na ol i mekim pasin pamuk. Na tu, inap planti yia ol i insait long wanpela liklik lotu. Long rot bilong kisim ol drak na sindaun longtaim na tingting strong long wanpela samting, ol i wok strong long kisim bikpela save moa, na ol i gat tisa bilong lotu bilong ol yet. Bihain Patrik i les long pasin bilong ol wanlotu em ol i tok ol i kisim bikpela save pinis—narapela i bel nogut long narapela, na tok kros, na oltaim ol i pait long toktok. Em i lusim dispela lotu na go bek long Hawaii, long wanem, em i laik painim rot bilong i stap bel isi. Long dispela taim Patrik i no marit, Nina em i gelpren tasol bilong em, na Patrik i tokim em long kam lukim em long Hawaii. Bihain tupela i marit na sindaun long Hawaii.
Taim Patrik tupela Nina i wok long painim bel isi na amamas, ol i no save bihain bai ol i kirap long stadi long Baibel wantaim ol Witnes Bilong Jehova. Nina i no bilip olsem i gat God i stap, tasol em i save olsem Baibel i bekim ol bikpela askim bilong em, olsem: I gat wanem as na pasin nogut i stap, na i gat wanem as na ol samting nogut i painim ol gutpela man? Inap 10-pela yia pinis Patrik i wok long painim tok i tru, na nau em tu i painim pinis. I no longtaim na ol samting Patrik tupela Nina i lainim long Baibel i kirapim tupela long senisim pasin bilong ol. Inap longtaim Patrik i bin wok strong long lusim pasin bilong smok, na bihain em i lusim. Klostu 10-pela yia pinis Patrik wantaim meri bilong em ol i bihainim klinpela stretpela pasin i stret wantaim lo bilong God. Bel bilong ol i stap klin na ol i stap bel isi na amamas.
Lusim Sampela Samting na Kisim Gutpela Pe
“Yupela i mas taitim bun tru, bilong i go insait long liklik dua. Mi tokim yupela, planti man bai i laik i go insait, tasol bai ol i no inap.” (Luk 13:24) Dispela tok bilong Jisas i kamapim klia olsem i hatwok long bihainim laik bilong God na ol lo bilong em. Ol man i laik mekim olsem, ol i mas wok strong, na tu, ol i mas redi long lusim sampela samting bilong ol yet. Ol dispela manmeri yumi stori pinis long ol, ol i bin mekim olsem. Tasol ol i kisim gutpela pe!
Olsem: Bipo Patrik na Nina i save kisim bikpela mani long wok bilong ol, tasol ol i senisim planti samting long i stap bilong ol bambai ol inap mekim wok bilong God long olgeta de. Ol i wok mani inap sampela de tasol bilong lukautim ol yet. Tasol ol i bilip olsem ol samting bilong spirit ol i kisim i winim ol samting bilong skin ol i lusim—na ol i stap amamas tru.
Jos tupela Lilian i lapun liklik, olsem na ol i hatwok liklik long senisim pasin bilong ol. Bilong i go long ol miting na autim tok ol i mas lusim bikpela hap taim na strong bilong ol. Tasol ol i amamas, long wanem, skin bilong ol i wok long i kamap gutpela na ol i no sik tumas olsem bipo, na ol i stap amamas.
Jos tupela Isabel i gat bikpela wok long lainim 4-pela pikinini bilong ol na helpim ol long bihainim rot i go long laip. Ol i wok strong na lusim bikpela hap taim bilong helpim ol pikinini long redi long i go long ol miting na kisim ol i go wantaim ol long wok autim tok. Ol i mekim mekim na i hatwok long ol, olsem na bihain ol i slek long mekim dispela wok. Tasol ol i harim wanpela tok “Redi Long Givim Skin Bilong Yu Bilong Helpim Narapela Man,” na dispela i kirapim ol long wok strong moa yet long wok bilong ‘stretim gut ol pikinini na lainim ol long tok bilong Jehova.’ Hatwok bilong ol i kamapim gutpela pe.—Efesus 6:4.
Ol naispela plaua na diwai samting, na gutpela san, na pasin bilong ol man long mekim isi isi ol samting, i no ol dispela i mekim na ol dispela man na meri na planti ol narapela ol i stap amamas tru. Nogat. Ol i mekim wok bilong God na bihainim ol lo bilong em long Baibel, na dispela i mekim na ol i stap amamas tru. (Saveman 12:13) Na tu, taim ol i tingting long gutaim ol inap kisim taim paradais i kamap bek long olgeta hap bilong graun, em nau, amamas tru i pulap long bel bilong ol.—Luk 23:43.
[Piksa long pes 25]
Jos na Isabel na ol pikinini bilong ol i save amamas long kaunim Baibel
[Piksa long pes 26]
Jos na Lilian i save amamas long mekim wok Kristen bilong autim tok
[Piksa long pes 27]
Patrik na Nina i stap bel isi long wok bilong Jehova