Stap Olsem Lait Namel Long Ol Man

PASIN NOGUT i pulap long graun na i bagarapim ol kantri na putim bikpela hevi long ol man, tasol ol Kristen tru i stap namel long ol dispela hevi, na ol i mas i stap olsem lait bilong helpim ol man na givim lait long ol. (Filipai 2:⁠15) Planti tausen bilong ol dispela Kristen tru ol i amamas long kamap painia na mekim olsem. Planti ol i bin mekim wok painia inap planti yia, na ol i amamas long lukim kain kain man i senisim pasin bilong ol na kamap disaipel tru bilong Krais Jisas.​—⁠Matyu 28:19.

Bilong strongim ol dispela painia na bai ol i ken stap gut long dispela wok bilong God na mekim gutpela wok tisa, ol Witnes Bilong Jehova i kamapim Skul Bilong Wok Painia. Em inap 10-pela de, na ol tok bilong Baibel i as bilong en. Em i bilong helpim ol painia long 3-pela samting, olsem: Stap gut long lo bilong Jehova na bihainim pasin bilong Krais Jisas; mekim pasin sori long ol narapela brata; kamapim lait bilong ol long ol man.

Skul Bilong Wok Painia Long Sentral Ripablik Bilong Afrika

Long Ogas 1991 inap 48 sumatin na tupela tisa i bung long biktaun Bangui long Sentral Ripablik Bilong Afrika, long wanem, wanpela samting i laik kamap long dispela hap na ol i laik insait long en, olsem na ol i kam bung na wokim wanpela skul. Ol i laik lain long mekim wok bilong ol. Wanem samting i narapela kain long dispela skul i kamap long Bangui?

Inap 21 sumatin i no lusim yet skul bilong gavman, tasol ol i save mekim wok painia oltaim tu, olsem wok painia long sampela taim, na go long skul long sampela taim. Ol i save autim tok na skulim ol man long taim ol i malolo long skul, na long Sarere Sande, na long ol narapela de long apinun.

Ol dispela yangpela i save, em i bikpela samting tru long mekim wok bilong Jehova long nau. (Saveman 12:1; lukim 1 Korin 7:29.) Papamama bilong 12-pela i no insait long tok i tru, na taim ol dispela yangpela i stap long haus bilong ol i no gat sampela bilong strongim ol. Tupela yangpela ol i brata brata, na taim tupela i kamap Witnes Bilong Jehova papa bilong ol i rausim ol, na tupela marit bilong kongrigesen i kisim ol na lukautim ol.

Tasol Mikei na Sulamit Kalep i no olsem. Tupela i painia, na ol tu i no pinis yet long skul, tasol papamama bilong ol i Witnes Bilong Jehova, na papa tu i insait long dispela Skul Bilong Wok Painia!

Na ol kongrigesen long Bangui i gat laik long helpim dispela skul, olsem na ol i orait long helpim skul long kaikai na ol samting bilong skin, olsem mani, na kakaruk, na suga, na rais, na tapiok.

Na sampela bilong ol kongrigesen i kam kukim kaikai bilong ol sumatin. Long dispela hap ol i save kukim kaikai ol i kolim ngunza. Ol i wokim long lip bilong tapiok, na wel bilong welpam, na anion, na galik, na pinatbata. Ol i kukim gut wantaim, tasol sampela i gat pasin bilong ol yet long kukim. Ol sumatin i laikim tru, na i no inap sampela i sakim.

Na skul i bin kamap long tupela taun moa long Sentral Ripablik Bilong Afrika, em taun Bwa na taun Bambari, na sapos yumi bungim ol sumatin bilong skul i bin kamap long Bangui wantaim ol sumatin bilong skul i bin kamap long Bwa na skul i bin kamap long Bambari, namba bilong ol sumatin i bin kam long ol dispela skul em inap 68. Long tupela yia i go pinis, lain painia long dispela kantri em i go bikpela. Long Janueri 1992 i gat 149 painia oltaim, na 17 painia salim, na 78 painia haptaim. Dispela samting i mekim na wok i kamap strong, olsem na i gat planti pablisa moa, na ol aua na gobek na Baibel-stadi tu. Taim i gat planti wokman, ol i save kamapim bikpela wok.​—⁠Aisaia 60:​21, 22; Matyu 9:​37, 38.

Yumi amamas long God Jehova i givim ol dispela samting long yumi, na yumi amamas tu long oganaisesen i putim ol dispela skul na bai em i helpim ol sumatin na tisa long stap olsem lait namel long ol man bilong dispela graun ol i stap long tudak.

[Piksa long pes 24]

I gat 21 sumatin bilong skul bilong wok painia ol i stap yet long skul bilong gavman

[Piksa long pes 25]

Tupela sumatin hia i kam insait long tok i tru, olsem na famili i rausim ol