Ol i Givim Save Long Ol Man Long Namibia
DISPELA tok “Mi no save,” yu bin harim long hamas tok ples? Meri bilong ples Herero i pasim longpela klos bilong ol tumbuna na wanpela hat i olsem kom bilong meme samting, na em i tok, “hi nokutuva.” Pikinini meri bilong ples Kwanyama i lap na bekim tok, “ni udite ko.” Wanpela as ples bilong Ndonga i bekim tok, “kand uvite ko.” Wanpela wasman bilong meme i tok, “kapi na kusuva.”
Dispela 4-pela i tok olsem, “Mi no save.” Dispela i helpim yumi long save, taim ol Witnes Bilong Jehova long Namibia i laik autim tok long ol 1,370,000 manmeri i stap long dispela bikpela hap graun, olsem 824,000 skwea kilomita, ol i bin hatwok long toktok wantaim ol!
Tasol i no ol Herero na Nama tasol i gat tok ples bilong ol yet. Ol narapela man bilong Namibia olsem ol Ovambo, ol Kavango, ol Tswana, ol Kaprivian, ol Himba, ol Busman, ol Damara, ol tu i gat tok ples bilong ol yet. Tasol ol Witnes i bin holim ol buk bilong Baibel long tok Inglis na tok Afrikans tasol. Bilong helpim planti man moa long save long tok i tru, i mas i gat wok bilong tanim tok bilong Baibel. Inap planti yia bipo, dispela wok i kirap long Windhuk, em nambawan biktaun bilong kantri bipo ol i kolim Saut-Wes Afrika. Pastaim ol i mekim liklik wok tasol.
Dik (Dick) Waldron i tingim dispela taim bipo na em i tok: “Long Windhuk, lotu na polis i birua long wok autim tok bilong mipela.” Dik i bin winim Wastaua Baibel Skul Bilong Gileat, na long 1953 em i kam long dispela kantri wantaim meri bilong em, Korali (Coralie). “Ol i no larim mipela i go long ol hap ol blakskin i sindaun long en, na taim ol i lukim mipela i toktok wantaim ol blakskin, sampela taim ol i laik pasim mipela na bai mipela i no ken mekim. Bihain mipela i painim wanpela ples i gutpela bilong lainim ol man long tok bilong Baibel—em baret bilong Wara Gamans, em wara i drai pinis na i no gat wara moa long en! Em i no stap longwe long taun. Mipela mekim ol Baibel-stadi aninit long ol diwai akasia na ol man i no inap lukim mipela.”
Na tu, long dispela hap, em namba wan taim bilong tanim sampela buk samting bilong Was Taua i go long tok ples bilong ol Namibia. Ol i tanim sampela liklik nius i go long tok Kwanyama na buklet “Dispela Gutpela Tok Bilong Kingdom” i go long tok Nama. Brata Waldron i tingim dispela taim bipo, em wanpela man i laikim tok i tru i bin helpim ol long tanim tok bilong dispela buklet. Dispela tok “Adam i gutpela man olgeta” i hatwok long tanim i go long tok Nama. Olsem na dispela man i tok: “Raitim tasol, Adam i olsem wanpela pikinini bilong diwai (peach) i mau, na ol Nama bai save, Adam i gutpela man olgeta.” Long dispela rot wok bilong givim save long planti as ples bilong Namibia i kirap.—Lukim Daniel 11:33.
Wok i Go Bikpela Moa
Long 1970 samting, wok i go bikpela moa taim ol i tanim buk Tok i Tru i Bringim Man Long Laip Oltaim i go long tok Ndonga na tok Kwanyama. Planti Namibia long Ovambolan i save mekim tok long dispela tupela tok ples. Ovambolan i stap inap 700 kilomita samting long hap not bilong Windhuk. Long Ondangwa, em wanpela setelmen long Ovambolan, ol painia i kisim wanpela haus bilong ol. Wanpela taim long olgeta wik i gat bung bilong toktok long Baibel long rot bilong nius Wastaua. Bilong helpim ol man long dispela hap long kisim gut ol dispela tok, ol i makim ol painia salim long Ovambolan bilong mekim wok bilong tanim tok bilong stori bilong stadi long Wastaua tok Inglis i go long tok Ndonga na tok Kwanyama.
“Ofis” bilong mekim wok bilong tanim tok i stap long wanpela haus bilong putim ol ka, na long wanpela olpela masin mipela i wokim planti Wastaua, em mipela i tanim pinis tok long en. Mipela i hatwok, long wanem, mipela i no gat planti samting bilong helpim sindaun bilong mipela, na long taim bilong bikpela san i hat nogut tru (38°- 44°C.). Tasol maski long dispela hevi, mipela i mekim wok na long dispela liklik ofis mipela i tanim tok bilong ol nupela buklet i gat piksa, na buk Yu Inap i Stap Oltaim Long Paradais Long Graun.
Taim ol kongrigesen i wok long kamap long Ovambolan na long ol narapela hap long Namibia, planti manmeri i laik harim tok, olsem na mipela i mas i gat wanpela haus i bikpela liklik. Na tu, mipela i stap longwe liklik long ol narapela hap bilong dispela kantri na i hatwok long lukautim gut wok long ol dispela hap, olsem na mipela i ting i gutpela long kisim wanpela haus i stap olsem namel. Long dispela taim ol man i no birua long wok bilong autim tok bilong Kingdom olsem bipo. Olsem na mipela i kisim tok orait long wokim wanpela haus long wanpela bikpela hap graun, em wanpela Witnes Bilong Jehova i bin givim nating long mipela. I no longtaim na inap 40 manmeri long laik bilong ol yet ol i kam mekim wok, na long Disemba 1990 ol i wokim pinis ol ofis bilong tanim tok.
Ol ofis na rum long dispela nupela haus i gat planti samting bilong helpim wok bilong mipela, olsem na wok bilong givim save long ol man i kamap gutpela. Ol i wok yet long tanim ol nupela buk samting long tok Herero na tok Kwangali, na wanpela taim long olgeta mun ol i wokim Wastaua long kala kala na i gat tok ples long en, olsem tok Ndonga na tok Kwanyama. Dispela Wastaua i gat ol stori bilong stadi na sampela narapela stori. Dispela wok mipela i kirap long mekim long baret bilong Wara Gamans, pastaim em i liklik, tasol nau i kamap narapela kain.
Dispela tok “Mi no save,” nau mipela i no harim planti taim. Winim 600 Witnes Bilong Jehova long Namibia ol i tenkyu tru long Papa bilong ol long heven, na nau ol inap tok: “Sapos wanpela man i helpim narapela man long save long as bilong tok bilong yu, orait em i kisim lait long bel bilong en. Na dispela tok i givim tingting long man i no gat planti save.”—Song 119:130.
[Ol Piksa long pes 25]
Ol i autim gutpela tok bilong Kingdom long ol Herero
Ol i tanim tok bilong ol buk Kristen samting bilong helpim ol Namibia
Ol ofis bilong tanim tok long Namibia