Ripot Long Wok Bilong Kingdom

Ol i Senisim Pasin Bilong Ol

ATING yu bin lukim ol i toktok wantaim ol man long haus na long rot, o yu bin lukim ol i go long ol miting Kristen long Haus Kingdom bilong ol. Mipela i stori long ol yangpela Witnes Bilong Jehova ol i save mekim gut skin na bilas gut. Ating yu ting ol i Witnes long wanem papamama bilong ol i bin lainim ol olsem. Tru planti ol i Witnes long dispela as, tasol sampela, nogat​—⁠taim ol i no Witnes yet pasin na tingting bilong ol i narapela kain olgeta. Ol manmeri em piksa bilong ol i stap long pes bihain, bipo ol i save bung wantaim ol lain i mekim pasin raskol na kisim drak long olgeta de. Wanem samting i mekim na ol i senisim pasin bilong ol? Bai yumi stori long sampela yangpela ol i senisim pinis pasin bilong ol, em ol i bilong wanpela taun long Nowe.

As Bilong Dispela Senis

Taim tupela Witnes i autim tok long Anet (Annette) long haus bilong em, em i gat 19 krismas. Em i tingim bek dispela taim bipo na em i tok: “Planti taim ol man i tokim mi, mi no ken toktok wantaim ol Witnes Bilong Jehova. Tasol mi laik save long ol, olsem na mi singautim ol i kam insait.” Taim em i gat 11-pela krismas em i kirap long kisim ol drak, na inap 3-pela o 4-pela taim samting em i bin brukim haus na stil na em i bin stilim ol ka.

Em i laikim tru gutpela tok bilong Kingdom. Taim em i gat 5-pela krismas, mama bilong em i dai, olsem na tok bilong kirap bek i strongim gut bel bilong em. Long dispela as em i orait long ol Witnes i stadi wantaim em long Baibel na em i kirap long kam long ol miting long Haus Kingdom. Em i tokim boipren bilong em na ol narapela tu long ol samting em i bin lainim. Olsem wanem? Ol i laik harim? Nogat​—⁠ol i no laik harim. Ol i tokim Anet, ol Witnes i bin giamanim em. Tasol sampela, em pastaim ol i birua long tok bilong em, bihain ol i kirap long stadi long Baibel.

Orait, nau yumi ken stori long wanpela yangpela man i gat 20 krismas, nem bilong em Espen. Boipren bilong Anet i tokim em long tok bilong Kingdom na wantu em i laik stadi long Baibel. Tasol kot i bin makim em bilong kalabus inap 4-pela mun, long wanem, long pasin hait em i bin wok long kisim ol drak i kam long ol narapela hap, na em tu em i bin brukim haus na stil olsem Anet i bin mekim. Na tu, em i save smok tabak na spakbrus na kisim ol narapela drak. Wanem samting i kirapim kain man olsem long stadi long Baibel? Espen i save, i stap bilong em i no gat as bilong en, na em i tok: “Mi laikim ol tok promis bilong Baibel long ol samting i mas kamap bihain, na dispela i mekim na nau i stap bilong mi i gat as bilong en. Olsem na mi kirap stadi long Baibel bambai mi inap save, ol samting ol i bin tokim mi long en em tok i tru o nogat.”

Sampela Moa i Laik Stadi Long Baibel

Long dispela taim tu, narapela yangpela man bilong dispela lain em i harim tok bilong Kingdom, na em tu i kirap long stadi na kam long ol miting. Bihain narapela yangpela bilong ol i mekim olsem, na i no longtaim na narapela gen i kirap stadi long Baibel na em i wok long kamap strong long ol samting bilong spirit. Orait, nau narapela yangpela i lukim ol pren bilong em i lusim ol pasin nogut bilong ol na i no longtaim na em tu i gat laik long stadi long Baibel.

Nau wanpela yangpela man bilong pilaim musik, nem bilong em Gilbet (Gilbert), em i kirap stadi long Baibel. Papamama bilong em i bin kisim sik kensa na ol i dai pinis, olsem na tok bilong kirap bek i mekim gut bel bilong em. (Jon 5:​28, 29) Em i save kisim spakbrus na mekim pasin pamuk samting, na em i gat tingting long kisim biknem olsem man bilong pilaim musik. Tasol em i wok long kamap strong long ol samting bilong spirit na i no longtaim na em i gat laik long kamap wanpela Witnes Bilong Jehova. Bihain liklik brata bilong Espen i kirap long kisim save long Baibel na bung wantaim ol Witnes.

Tok i Tru Bilong Baibel i Senisim Pasin

Bikpela senis i bin kamap long ol dispela yangpela em pastaim ol i no bilas gut na kom gut, na ol i kisim drak, na stil, na mekim ol narapela pasin nogut. Anet em i wanpela pablisa i autim tok bilong Kingdom, na klostu wanpela yia pinis em i bin mekim wok painia. Espen na Gilbet i bin mekim wok painia haptaim, na tu, ol i holim wok olsem wokman insait long kongrigesen. Tupela i marit insait long kongrigesen Kristen. Fopela moa bilong dispela lain bipo, nau ol i givim bel long autim tok bilong Kingdom!

Olsem wanem long dispela 4-pela mun em kot i makim bilong Espen i mas kalabus? Em i senisim pasin bilong em, olsem na kot i makim em bilong wok inap 80 aua wantaim ol man bilong ples na mekim sampela wok i bilong helpim ol man. Polis na ol narapela i orait long em i ken inapim ol dispela aua long mekim wok long Haus Kingdom bilong ol Witnes Bilong Jehova long hap bilong em. Polis i amamas tru long dispela samting.

Tru tumas, long olgeta hap bilong graun planti yangpela i mekim pasin raskol. Tasol tok i tru bilong Baibel i bin bekim ol bikpela askim bilong ol na helpim ol long save long ol samting i mas kamap bihain. Olsem na ol i lusim pinis pasin bilong mekim wok raskol na kisim drak, na nau ol i bilas gut. Ol i senisim pasin bilong ol na nau ol i wankain stret olsem ol dispela yangpela yumi stori pinis long ol​—⁠ol i mekim gut skin na ol i save autim tok bilong Jehova. Ol i laik helpim ol narapela long save long rot em Baibel i makim bilong stretim tru ol hevi i save painim planti yangpela long nau.​—⁠Lukim 1 Korin 6:​9-11.

[Piksa long pes 8]

Ol yangpela Nowe i laikim tok i tru