Ol Samting Ol i Salim i Kamapim Klia Sori Kristen

APOSEL Pita i tokim ol wanwok Kristen long ‘givim bel long ol manmeri bilong God.’ (1 Pita 2:17) Dispela bai pasim ol gut wantaim olsem ol brata brata tru, maski ol i bilong wanem hap o bilong wanem kain skin. Taim sampela Kristen bilong bipo i sot long ol samting, pasin bilong laikim tru ol brata i kirapim planti Kristen long givim mani samting long ol aposel bilong tilim i go long ol Kristen i sot. “Olgeta samting bilong ol i bilong olgeta wantaim.”​—⁠Aposel 2:​41-45; 4:⁠32.

Pasin bilong laikim tru ol brata i kamap ples klia long pinis bilong yia 1991, taim Lain Bilong Bosim Ol Witnes Bilong Jehova i tokim sampela brens bilong Sosaiti Was Taua long Westen Yurop long ol i ken salim kaikai na klos samting long ol brata i sot, em ol i stap long Isten Yurop na ol hap bilong Rasia. Orait, nau mipela i kamapim stori bilong sampela brens i bin helpim ol dispela brata.

Swiden

Long Disemba 5, 1991 Sosaiti i salim pas long olgeta 348 kongrigesen long Swiden. Taim ol i kisim pas, wantu ol i kirap mekim ol samting. Inap tupela o 3-pela de bihain, ol i salim namba wan trak olsem semitrela i go long Sen Pitasbek long Rasia, em ol i bin pulimapim 15 tan kaikai long en olsem plaua, gris, mit tin, drai susu, na ol narapela kaikai. Taim trak i kamap pinis, ol brata bilong dispela hap i rausim kaikai long trak na tilim dispela 750 mekpas kaikai i go long ol brata i sot long kaikai. Bihain tupela semitrela moa i karim kaikai i go long Rasia. Olgeta kaikai em brens long Swiden i salim, em inap olsem 51.5 tan.

Kwiktaim ol brata i bungim planti klos long ol Haus Kingdom. Planti Kristen i givim klos bilong ol yet na sampela i baim ol nupela klos bilong salim i go. Wanpela brata i baim 5-pela trasis na kolsiot bilong poromanim ol dispela trasis. Man bilong lukautim stua i kirap nogut taim em i harim stori bilong samting brata i laik mekim long ol dispela klos, olsem na em yet i givim nating 5-pela trasis na 5-pela kolsiot moa long em. Na wanpela brata i baim sampela soken, na ol laplap bilong pasim long nek. Em i tokim man bilong lukautim stua long samting em i laik mekim long ol dispela klos, olsem na man i givim 30 trasis na 30 kolsiot long em na i tok, em i ken givim liklik mani tasol, inap long pe bilong tupela trasis na tupela kolsiot. Na narapela man bilong lukautim stua i givim nating 100 su long ol.

Ol i kisim ol samting i go long brens-ofis bilong skelim na pulimapim long ol katon na putim long trak. Ol klos i pulap tru long haus brens, inap long pulimapim long 40 semitrela! Ol brata sista i wok strong inap sampela wik long skelim klos bilong manmeri pikinini, na pulimapim long ol katon. Ol i putim long 15 semitrela na salim i go long Rasia na Yukren na Estonia, na ol i kamap gut long ol dispela hap.

Wanpela brata i draivim wanpela trak bilong Sosaiti 8-pela taim i go i kam long Rasia, na em i tok: “Taim mipela i kamap long ol dispela hap, ol brata i amamas tru na ol i holim mipela na kis long mipela, na maski ol i sot tru long ol samting, ol i lukautim mipela, na ol i stap olsem gutpela piksa long pasin Kristen long givim samting long narapela man.”

Finlan

Finlan i gat bikpela hevi long mani, olsem wok mani i sot na planti man i no gat wok, tasol ol brata long Finlan, em ol inap olsem 18,000, ol i givim bel tru long helpim ol brata long Rasia. Ol i pulimapim olsem 58 tan kaikai long ol katon na salim i go long Sen Pitasbek, Estonia, Latvia, Lituenia, Kaliningrat. Na ol liklik hap long ol dispela trak i stap nating, ol i putim ol klos long en, inap long 12 kubik mita. Na ol i salim 25 ka na liklik bas i go long ol bilong mekim wok bilong Kingdom.

Sampela kaikai i kamap long wanpela kongrigesen long Slanti, long Sen Pitasbek, i gat 14 pablisa long en. Ol i raitim pas bilong tok tenkyu long kaikai. Pas i tok: “I gat 10-pela lapun sista i stap long kongrigesen bilong mipela. Planti bilong mipela ol i gat bikpela sik na ol i no inap sanap long lain na wet inap planti aua bilong kisim kaikai. Tasol nau long dispela taim nogut Papa long heven i save givim amamas long mipela. Mipela i mekim 43 Baibel-stadi wantaim ol man.” Taim wanpela sista long Sen Pitasbek i kisim mekpas kaikai bilong em, em i no opim kwik​—⁠em i krai i stap inap tupela aua na bihain em i opim.

Denmak

Long dispela liklik kantri inap 16,000 Witnes i pulimapim 64 tan kaikai long 4,200 katon, na 4,600 katon i gat ol gutpela klos long en, na 2,269 nupela su, na ol i salim long 19 trak i go long Yukren. Wanpela brata long Jemani i larim brens-ofis i mekim wok long 5-pela trak bilong em bilong karim ol samting i go long Yukren, na taim ol i kamap pinis em i givim ol dispela trak tu long ol brata long Yukren. Taim ol draiva i kam bek, wanpela i tok, ‘Ol brata long Yukren i mekim bikpela pasin sori long mipela​—⁠ol i givim kaikai long mipela, maski ol i sot, na dispela i strongim tru bilip bilong mipela.’

Ol draiva i mas lukaut gut long ol raskol i hait i stap long rot long ol hap bipo Rasia i bosim. Taim trak bilong ol brata long Denmak i no kamap yet long ol dispela hap, 5-pela trak bilong wanpela lain ol i laik karim kaikai i go long ol kantri i sot long kaikai, na taim ol i kamap long dispela hap, ol raskol i gat helikopta na masin-gan ol i pasim ol dispela trak. Ol i rausim ol draiva na kisim 5-pela trak wantaim kago, na ol draiva i sanap arere long rot. Tasol olgeta samting em brens bilong Denmak i salim, i kamap gut na ol brata i kisim. Ol dispela brata i givim pas long wanpela draiva. Pas i tok, “Yes ol gutpela brata sista long Denmak: Mipela kisim pinis ol samting yupela salim bilong helpim mipela. Jehova bai givim gutpela pe long yupela.”

Netelan

Brens long Netelan i bungim 52 tan kaikai na wokim 2,600 mekpas long en na salim i go long Yukren long 6-pela trak em ol brata long Jemani i laik givim long ol brata long hap bilong Is long mekim wok bilong Kingdom. Ol brata bilong Yukren i salim bikpela hap bilong dispela kaikai i go long Mosko na Saibiria na ol narapela hap em ol brata i sot long kaikai. Na tu, ol brata long Netelan i bungim planti klos na su, inap 736 kubik mita, na 11-pela trak i karim i go long Levov long Yukren, na wanpela ka i go wantaim ol.

Ol dispela trak i brukim Jemani na Polan, na long Yukren ol lain bilong kastom i givim tok orait long ol i ken i go, na long 3 klok moningtaim ol i kamap long Levov. Ol draiva i stori long dispela na i tok: “Taim mipela kamap pinis, i gat 140 brata i kam bilong rausim ol kago long trak. Taim ol i laik kirap mekim dispela wok, pastaim ol i beten long Jehova. Orait, taim ol i pinisim dispela wok, ol i bung gen na ol i beten na tok tenkyu long Jehova. Ol i lukautim gut mipela na givim kaikai long mipela, maski ol i sot, na bihain ol i bringim mipela i go long bikrot na ol i mekim beten, na bihain ol i lusim mipela.

“Mipela i gat longwe rot bilong i go bek long ples, na insait long ol dispela aua mipela tingim gutpela pasin bilong ol brata long Jemani na Polan, na ol brata long Levov tu, ol i bilip tru long Jehova na ol i save beten oltaim long em; ol i bin givim ples slip na kaikai long mipela, maski ol i sot tru; na ol i stap wanbel na pas gut wantaim, na ol i tenkyu tru long ol samting ol i kisim. Na mipela tingim ol brata sista long hap bilong mipela, ol i bin givim planti samting tru bilong helpim ol brata.”

Swiselan

Bilong kirapim ripot bilong ol, brens long Swiselan i kamapim tok bilong Jems 2:​15, 16, i tok: “Sapos wanpela Kristen brata o susa, em i gat laplap nogut tasol, na em i no gat kaikai, na wanpela bilong yupela i tokim em olsem, ‘Yu ken i stap bel isi. Yu go putim laplap bilong hatim skin bilong yu, na yu go kisim kaikai na pulapim bel bilong yu,’ orait dispela tok bai i helpim em olsem wanem?” Na ripot i tok, “Mipela i tingim dispela hap tok bilong Baibel taim Lain Bilong Bosim Ol Witnes Bilong Jehova i askim mipela long helpim ol brata i sot.

“Wantu olgeta i kirap bungim ol samting! Insait long tupela de tasol, ol i bungim 12-pela tan kaikai na ol i wokim 600 mekpas long en na salim i go long Yukren long 3-pela trak ol i kisim long Jemani. Ol brata long Jemani i laik givim ol dispela trak long ol brata long Yukren bilong mekim wok autim tok long en. Taim mipela i kisim toksave olsem olgeta trak i kamap gut long Yukren, mipela i amamas tru. Ol kongrigesen i wok long bungim ol klos, na i no longtaim na ol katon na switkes na bek i pulap long haus brens! I gat ol klos bilong pikinini na ol liklik samting bilong pilai, em ol pikinini bilong Swiselan i givim long ol. Na ol i putim planti sokolat tu namel long ol klos.”

Tasol ol bai salim olsem wanem? Ripot i tok: “Brens long Frans i givim 4-pela bikpela trak semitrela na 4-pela draiva long mipela. Na mipela i mas salim wanpela trak bilong brens-ofis bilong mipela tu, na 4-pela moa bilong ol brata bilong dispela hap, long wanem, i gat planti samting tru bilong salim i go long Yukren, inap 72 tan.” Ol dispela trak i go wantaim na ol i kamap gut long Levov, na i gat olsem wan handet brata i wet long rausim ol samting long ol trak. Ol draiva i tok, maski ol i no save long tok ples bilong ol dispela brata, ol draiva i lukim pes bilong ol brata i lait na ol i save, ol brata i tenkyu tru long ol samting ol i kisim.

Ostria

Ol brata long Ostria i salim 48.5 tan kaikai na 5,114 katon klos na planti su tru i go long Levov na Usgorot long Yukren. Na ol i salim 7-pela tan kaikai na 1,418 katon klos na 465 su i go long Belgret, Mostar, Osiyek, Sarayevo, Sagrep, em ol i stap long hap bipo ol i kolim Yugoslavia. Ripot bilong brens i tok: “Mipela i pulimapim ol samting long 12-pela semitrela na ol i mas raun inap olsem 21,000 mail [34,000 km] bilong kamap long ol dispela hap. Bikpela hap bilong dispela wok, em wanpela brata wantaim pikinini man bilong em ol i mekim; tupela i gat bisnis long ol trak.”

Na ripot i stori moa olsem: “Mipela putim olgeta klos long Haus Kibung, na planti trak moa i wok long karim ol klos i kam, na bihain ol klos i pulap olgeta long Haus Kibung. Mipela i mas pasim ol brata na bai ol i no ken salim sampela moa, olsem Moses i bin mekim bipo. (Kisim Bek 36:⁠6) Na sampela man i no Witnes ol tu i givim sampela mani. Ol i tok, ol i save ol dispela lain i sot long ol samting ol bai kisim tru dispela mani samting. Na sampela kampani i givim nating ol katon long mipela bilong pulimapim ol samting long en.” Ol brata sista i mekim wok bilong skelim na pulimapim ol klos ol i gat kain kain krismas, kirap long 9-pela krismas tasol i go inap 80 krismas.

Na dispela ripot i tok, “Ol bikman bilong gavman long Ostria na long ol boda ol i helpim gut mipela na givim ol pepa long mipela bambai ol trak i ken karim ol samting i go na i no gat hatwok tumas.”

Itali

Long Rom ol i bungim 188 tan kaikai na salim long tupela bikpela lain trak, em ol i go brukim Ostria na Sekoslovakia na Polan na kamap long Rasia. Long ol wan wan lain trak i gat 6-pela draiva, wanpela mekenik, wanpela elektrisen, wanpela man bilong tanim tok, wanpela man bilong stretim ol pepa na bai gavman i orait long ol i kisim ol kago i go long narapela kantri, wanpela bilong kukim kaikai, wanpela dokta, wanpela man bilong go pas long ka, wanpela i draivim ka i gat haus.

Ol i kisim kaikai long 7-pela kampani. Brens i tok: “Taim ol kampani i harim stori bilong samting mipela i laik mekim, sampela i laik helpim mipela. Ol i givim nating sampela handet kilogram pasta na rais na katon long mipela. Sampela i givim nating ol strongpela taia bilong trak, na sampela i laik givim mani.

“Ol brata long Itali i amamas long ol i gat rot long helpim ol brata i sot. Ol pikinini tu i laik givim mani bilong helpim ol. Wanpela manki i gat 5-pela krismas i salim liklik mani bambai ol i ken ‘baim wanpela traipela pis tin bilong ol brata long Rasia.’ Wanpela pikinini meri i bin winim bikpela mak long skul na ol lapun bubu i givim mani long em bilong baim wanpela presen bilong papamama bilong em. Pikinini i raitim pas na i tok, ‘Bihain mi kisim save olsem planti brata i no gat ol gutpela kaikai olsem mi save kaikai, olsem na mi ting mi mas givim dispela mani bilong helpim ol dispela brata, na i olsem mi givim gutpela presen long papamama.’ Olsem na em i putim dispela bikpela mani long bokis kontribusen. Em i tok, ‘bihain mi mas winim bikpela mak gen na bai mi inap salim sampela mani moa i go long ol.’ ” Bilong pinisim ripot, brens i tok, ol brata long Yukren i salim ol pas bilong tok tenkyu tru long ol gutpela gutpela samting ol brata long Itali i bin salim long ol, na brens i stori long ol gutpela samting i painim ol taim ol i redim na karim ol kaikai samting i go givim long ol brata long ol dispela hap, na brens i tok, ol dispela stori i strongim tru ol brata na mekim ol i pas gut wantaim.

Kaikai Bilong Planti Tausen

Namba wan kibung intenesenel bilong ol Witnes Bilong Jehova long Rasia i kamap long haus stediam long Kirov, Sen Pitasbek long Jun 28-30, 1992. Nem bilong kibung, em “Ol Man i Stap Olsem Lait,” na i gat bikpela lain tru i bung, winim 46,200, na ol i kam long 28 kantri. Dispela kibung i givim rot long ol brata long kamapim pasin sori bilong Kristen long ol “manmeri bilong God.”​—⁠1 Pita 2:17.

Ol brata long Denmak, Finlan, Swiden, na sampela hap moa bilong Westen Yurop ol i salim planti tan kaikai i kam long kibung na ol i tilim nating long planti tausen brata sista bilong Rasia, bilong kaikai long kibung. Taim kibung i pinis ol i givim wanpela mekpas kaikai long olgeta wan wan, bilong kaikai long rot taim ol i lusim kibung.

Tasol ol brata long Isten Yurop tu i givim ol samting​—⁠ol i givim gutpela tok long ol brata long Westen Yurop bilong kamapim sori Kristen na tenkyu bilong ol, na ol i kamapim stori bilong ol samting i bin painim planti tausen manmeri bilong lotuim Jehova taim ol i stap aninit long hatpela gavman na planti hevi i painim ol. Ol dispela stori i strongim tru bilip bilong ol brata bilong Westen Yurop. Tupela lain wantaim i pilim tru tok bilong Jisas, olsem: “Amamas bilong man i givim samting long ol arapela man, dispela i winim amamas bilong man i kisim samting bilong em yet.”​—⁠Aposel 20:⁠35.

[Sat/Piksa long pes 21]

1. Finlan i salim long Sen Pitasbek, Rasia; Talin na Tatu, Estonia; Riga, Latvia; Vilnius na Kaunas, Lituenia; Kaliningrat, Rasia; Petrosavodsk, Karelia

2. Netelan i salim long Levov, Yukren

3. Swiden i salim long Sen Pitasbek, Rasia; Levov, Yukren; Nevinomysk, Rasia

4. Denmak i salim long Sen Pitasbek, Rasia; Levov, Yukren

5. Ostria i salim long Levov, Yukren; Belgret, Mostar, Osiyek, Sarayevo, Sagrep (long hap bipo ol i kolim Yugoslavia)

6. Swiselan i salim long Levov, Yukren

7. Itali i salim long Levov, Yukren

[Ol Piksa long pes 23]

Ol katon klos long brens-ofis long Swiden

Ol i putim ol samting long ol trak

Ol kaikai long wanpela mekpas

Mit bilong pik em ol Denmak i salim

Elevenpela trak na wanpela ka i go wantaim

Ol mekpas na switkes long brens-ofis long Ostria

Ol i rausim ol samting long trak long Levov, Yukren