Tabak Wantaim Misin

LONG 115 yia samting bipo, Dokta Jon Kauan i raitim tok bilong wanpela buk (The Use of Tobacco vs. Purity, Chastity and Sound Health) na em i stori long ol pris na pasto i smok. Long nau ol saveman i kisim save olsem smok inap bagarapim skin bilong man, olsem na sapos man i laik mekim wok bilong God, gutpela em i save long tok bilong dispela buk. Long sapta 4 Dokta Kauan i tok:

‘Sapos tabak na smok i mekim nogut skin bilong man, i no stret long man i smok, long wanem, smok inap mekim nogut tu long ol liklik rop wailis olsem nev, na kru na tingting bilong man. Pasin man i mekim long ol samting bilong skin bilong em, dispela i makim wanem kain tingting na toktok na wok na pasin bilong em long ol narapela samting tu. Tabak na smok em samting i doti na i save paulim tingting bilong man, olsem na man i smok em bai hatwok long tingim ol gutpela stretpela samting. Sapos yumi tingim Krais Jisas, yumi save em i no inap smok. Em i skulim ol man long bihainim pasin i stret na i gutpela na i klinpela tru, na em i mekim pasin sori long ol man na helpim ol long ol gutpela samting tasol. Planti misin i kolim nem bilong Jisas, na ol pris pasto i tokim ol man long bihainim ol lo bilong Jisas, tasol planti ol pris pasto wantaim lain bilong ol i save smok na paulim laip bilong ol yet long dispela gras nogut, tabak. Yu ting ol wantaim lain bilong ol inap bihainim gutpela klinpela pasin bilong Krais? Nogat, a?

‘Sapos man i givim bel long kaikai na dring, na em i kaikai planti tumas na dring planti tumas, na em i man bilong smok, dispela man i narapela kain long man i bihainim pasin holi, a? Stretpela man i laik i stap longwe long man i mekim ol dotipela pasin nogut olsem smok samting. Klinpela man i no laik slip long rum i gat pipia i stap long en, na olsem tasol gutpela tingting i no ken stap insait long man i gat laik long ol samting nogut olsem smok. Sapos man i laikim ol gutpela klinpela samting bilong skin, em bai laikim ol gutpela klinpela samting bilong spirit tu. Tasol sapos man i laikim ol dotipela samting nogut bilong skin, em i no inap laikim ol gutpela samting bilong spirit. Sapos smok i kalabusim wanpela man, em i no inap mekim gutpela wok long ol samting bilong spirit. Tabak i save pait wantaim ol gutpela pasin bilong God na bilong spirit. Ating sampela tisa bilong lotu i save tok, tru smok em i samting nogut, tasol skin bilong ol i krai long smok, na ol i dai long kaikai smok o pulim long maus bilong ol. Tingting i tok, maski long smok, em samting nogut; tasol bel i tok, em i laikim tumas na em i mas kisim. Skin i ting em i swit moa. Em nau, smok i kalabusim pinis dispela man. Sapos man i wok long brukim wanpela lo bilong God long olgeta taim, tasol em i tok em i wanpela Kristen, bihain em bai i brukim ol narapela lo bilong God, a? Long ai bilong God dispela man em i man bilong giaman na man bilong sin na i no stret long em i stap tisa na skulim ol narapela man long bihainim stretpela pasin. Long pasin bilong em, em i soim rot nogut long ol man.’