Ol Misineri Bilong Maikronisia

OL MISINERI bilong Maikronisia, maski narapela i stap longwe tru long narapela long ol ailan bilong Solwara Pasifik, wanpela taim long olgeta yia ol i stretim rot bilong bung wantaim olsem wanpela famili. Ol i save bung we? Ol i bung long wanpela hap em gavman i kolim Jehova Strit​—⁠brens-ofis bilong Guam i stap long dispela hap na lukautim ol dispela misineri.

Long Jun 1992, inap 56 misineri ol i kam long brens bambai ol inap i go long “Ol Man i Stap Olsem Lait” Kibung Distrik. Ol i amamas long toktok gen wantaim ol pren bilong pastaim na painim ol nupela pren, na tu, ol i amamas long sanap long lata bilong Haus Kingdom na kisim piksa, na bihain ol i sindaun na kaikai. Kaikai i stap long 3-pela longpela tebol. Long dispela yia Albet Sroda (Albert Schroeder) bilong Lain Bilong Bosim Ol Witnes i kam lukim ol.

Pasin bilong bung wantaim long Guam long olgeta yia, em tasol i rot bilong planti bilong ol dispela misineri ol inap lusim liklik ailan ol i stap long en. Ol ailan i liklik tru. Ailan Ibai bilong lain Ailan Masal em 32 hekta tasol. Wanpela haus misineri i stap long Ailan Majuro bilong lain Ailan Masal na wanpela i stap long Ailan Kiribati bilong lain Ailan Gilbet. Tupela ailan i longpela, na braitpela bilong ol i no winim wanpela kilomita, olsem na ol misineri i amamas long kam long Guam.

Long tingting bilong sampela man, wok bilong autim tok long wanpela naispela ailan i stap longwe long ol narapela hap i olsem gutpela tru, tasol wok autim tok long kain ailan olsem i gat hatwok bilong en na i no planti man inap mekim olsem. Inap 7-pela tasol bilong ol dispela 56 misineri i bin i go long Wastaua Baibel Skul Bilong Gileat. Planti ol i kam stret long as ples bilong ol, em Hawaii o Filipin, em bipo ol i mekim wok painia long en na skin i lain pinis long pasin bilong sindaun long ples hat.

Ol ailan bilong Maikronisia i stap klostu long hap bilong ekweta na i hat nogut tru, olsem na ol misineri ol i hatwok long autim tok long ol man. Na tu, olgeta wan wan ailan o lain ailan i gat tok ples bilong ol yet, olsem na ol misineri i kam nupela ating ol i mas wok inap planti yia long lainim gut ol nupela tok ples. Bilong helpim ol man long ol dispela ailan long kisim save long tok bilong Baibel, brens bilong Guam i save wokim ol buk na nius samting long 11-pela tok ples​—⁠nainpela i bilong Maikronisia tasol.

Sampela ailan i stap longwe tumas long ol narapela ailan, olsem na bot tasol em rot bilong i go long ol. Wanpela ailan olsem em Trak, na wanpela haus misineri i stap long en. No gat paua long dispela ailan​—⁠ol misineri i kisim paua long san tasol na em inap sampela aua tasol long olgeta wan wan de.

I gat 14 haus misineri long hap bilong Maikronisia. Sapos yumi bungim ol ailan bilong Maikronisia, graun bilong en i bikpela olsem Amerika (Yunaitet Stets). Ol manmeri i stap long dispela hap ol i winim 400,000, na i gat 1,000 pablisa i autim gutpela tok bilong Kingdom. Ol i bilong 20 kongrigesen na 3-pela grup i stap longwe long ol kongrigesen.

Ol Maikronisia ol i man bilong amamas na tok gude na mekim gutpela pasin long narapela, tasol planti ol i no kisim save long tok bilong Kingdom, long wanem, famili na lotu bilong ol i putim hevi long ol. Tru, wok bilong autim tok i go bikpela long dispela hap (ol dispela 1,000 pablisa ol i mekim olsem 2,000 Baibel-stadi), tasol sampela kongrigesen na grup ol i stap liklik yet. Olsem: I gat 5-pela pablisa tasol long Ailan Tinian, na 7-pela pablisa tasol long Ailan Nauru, na long ol ailan Yap na Kosria na Rota ol kongrigesen wan wan ol i no winim 40 pablisa. Tasol maski ol kongrigesen i no gat planti pablisa, sampela misineri ol i bin i stap long ples wok bilong ol winim 20 yia pinis. Ol 6-pela misineri long Ailan Belau, olgeta ol i bin i stap long dispela ailan inap 12-pela yia samting.

Tasol ol man i stap gut long wok bilong Jehova long dispela hap ol inap kisim planti gutpela samting. Long olgeta de ol inap lukim ol naispela samting Jehova i bin wokim. I gat planti nambis i no gat planti man i stap long en, na ol naispela rip em ol pis i gat kala kala i pulap long en. Ol manmeri i laik lukim ol dispela samting, olsem na ol i kam glas long solwara. Long olgeta apinun taim san i laik go daun, ol inap lukim ol gutpela kala bilong en long solwara.

Tasol gutpela samting tru ol dispela misineri i kisim, em ol inap mekim wok bilong Jehova long tokim ol man long ol gutpela samting Jehova i laik mekim bilong helpim ol man long bihain. Ol misineri i wok strong long mekim dispela wok, olsem na ol inapim tok bilong Aisaia 42⁠:12 i tok olsem: “Yupela ol manmeri i stap . . . longwe [long ol ailan], yupela olgeta i mas litimapim nem bilong Bikpela na givim biknem long em.”

[Mep/Piksa long pes 31]

(Bilong save ol dispela rait i stap we long pes, lukim buk o magasin)

Barigada, Guam

Santa Rita, Guam

Koror, Belau

Ailan Trak

Tarawa, Kiribati

Kosria

Ibai

Ailan Masal

Majuro

Kolonia, Pohnpei

Songsong, Rota

Saipan

Yap

MAIKRONISIA

MELANISIA

AILAN KAROLAIN

SOLWARA PASIFIK

FILIPIN

PAPUA NIUGINI

EKWETA

[Piksa]

Ol misineri i bung long Guam, long Jun 1992