Taim “Olgeta Maunten i No Kamap Yet”
“BIKPELA, yu olsem haus tru bilong mipela. . . . Oltaim oltaim yu stap God, long bipo na long bihain tu. Olgeta maunten i no kamap yet, na yu no bin wokim olgeta samting bilong graun yet, tasol yu stap.” (Song 90:1, 2) Dispela tok i stori long Man bilong wokim yumi em inap mekim gut bel bilong yumi ol man, long wanem, i olsem olgeta samting long nau i wok long senis senis!
Planti man i no gat wok, na strong bilong mani i wok long i go daun, olsem na planti man i tingting planti long i stap bilong ol long bihain. Pasin raskol na kisim drak i go bikpela moa na sampela biktaun i kamap olsem ples pait. Na pasin bilong sindaun olsem famili famili em i laik bagarap. Planti pikinini i gat papa o mama tasol bilong lukautim ol na dispela i givim bikpela wok long em na em wanpela i mas karim ol dispela hevi. Na planti famili i no sindaun gut—ol man i save paitim meri bilong ol, na papamama i save paitim nogut tru pikinini.
Husat bai soim rot long yumi ol man i stap long dispela taim nogut? Ol saveman bilong graun i bin kamapim planti tok ol i ting i gutpela bilong helpim ol man, tasol planti tok bilong ol i pait. Inap planti yia pinis long hap bilong Wes, Dokta Benjamin Spok i go pas long skulim ol man long pasin bilong lainim ol pikinini. Tasol bihain em i tokaut olsem dispela tok bilong em i kranki!
Gutpela yumi bilip long God em i olsem “haus tru” bilong yumi! Olgeta samting long nau i wok long senis, tasol God i no save senis—em i bilong “bipo na long bihain tu.” Em i tokim profet Malakai, olsem: “Mi no save senisim tingting bilong mi.” (Malakai 3:6) Olsem na yumi ken bilip tru long ol lo bilong God i stap long Baibel. Taim ol “maunten i no kamap yet,” God i stap, na gutpela tingting na save bilong em i as bilong olgeta tok bilong em. Dispela tok tasol inap soim gutpela rot long yumi na bai yumi stap amamas na i stap gutpela.
Olsem na gutpela sapos yu bilip long Baibel, em Tok bilong God. Wok long kisim save long em bambai gutpela tingting bilong God inap soim rot long yu. Bilip long ol tok yu lainim, na larim ol dispela tok i stap olsem lait bilong soim rot bilong laip long yu. (Song 119:105) Ol man i mekim olsem, ol tasol i ken i stap bel isi na no ken tingting planti long ol samting i laik kamap long bihain.