Ol i Painim Narapela Kain Samting Long Bahama
OL AILAN Bahama i stap namel long Florida na Kuba. Long 1992 ol nius i stori long en, long wanem, long Oktoba 12, 1492, Kristofa Kolambas i bin kam sua long Bahama long taim em i go long Amerika 500 yia bipo.
Tasol sampela i no amamas long bikpela stori ol nius i mekim long Kolambas. Long wanpela kibung bilong ol loya blakskin, Jon Karu i givim tok long ol na em i tok, ‘Kolambas i bringim hevi long Bahama, long wanem, asua bilong em na bagarap i painim planti manmeri bilong ol ailan long solwara Karibian.’—The Nassau Guardian.
Long nau i gat 250,000 manmeri i stap long Bahama. Taim Kolambas i bin kam em i lukim ol lain blakskin bilong Bahama na em i tok, ol i gat gutpela strongpela skin na gutpela pes. Tasol ol dispela lain bilong nau i no inap save, ol i wanblut tru bilong ol dispela lain bilong bipo o nogat. Wanem samting i bin painim ol dispela man bilong bipo? Wanpela buk (A History of the Bahamas) i tok, ‘Namel long yia 1500 na 1520 ol Spen i bin kam kalabusim ol na karim ol i go, inap 20,000 samting, na ol i mas wok kalabus long ol Spen long Hispaniola bilong painim gol insait long graun.’
Long dispela taim wan wan man tasol i stap long Bahama. Bihain ol Inglan i kam, na sampela Amerika wantaim ol blakskin wokboi bilong ol, ol i ranawe long pait long Amerika. Ol man bilong nau long Bahama em ol tumbuna pikinini bilong ol dispela man.
Ol i Painim Narapela Kain Samting
Kolambas i bin ting em i olsem wanpela misineri, na em i tok, ‘God i makim mi bilong autim tok long nupela heven na nupela graun, na em i soim dispela nupela graun long mi.’ Tasol bihain ol samting i kamap i bagarapim ol Bahama. Dispela stretpela ‘nupela heven na nupela graun’ em samting God i bin tok promis long en, na i gat wanpela lain i narapela kain long Kolambas em ol i mas i kam bihain long taim bilong Kolambas na autim dispela tok long ol dispela ailan.—2 Pita 3:13.
Long 1926 Etwat Makensi wantaim meri bilong em i bin go long Bahama, na ol i no mekim olsem ol dispela narapela lain i bin mekim, nogat. Tupela i bilong Jameka na tupela i gat pasin daun, na ol i kam bilong painim ol man i gat gutpela bel na bai ol i ken givim gutpela samting long ol. Ol i bringim gutpela tok bilong Kingdom bilong God i kam long dispela hap. I no gat narapela man bipo em i bin mekim olsem. (Matyu 13:44; 24:14) Bihain tupela Jameka moa i kam, em Klarens Woltes na Resel Gregori. Long 1928 i gat 7-pela pablisa i bin kamap long Bahama, na inap 4-pela yia ol i wok strong long autim gutpela tok bilong Kingdom long ol Bahama.
Bihain E. P. Robets tu i kam, em i bilong Trinidad. Em i man bilong mekim gutpela pablik-tok, na em i bin mekim tok long ol haus bung na kamapim gut tok i tru bilong Baibel, na dispela i helpim planti man long lusim ol bilip giaman. Donal Oska Mari i bin harim wanpela tok olsem, na em i amamas tru long en, olsem na bihain em tu i kirap long mekim wok autim tok, na em i kamap strongpela pablisa na em i go pas long mekim dispela wok.
Donal Mari i beten long Jehova long salim sampela moa i kam bilong helpim ol long autim tok. Orait, long 1947 Sosaiti i salim Jos na Nansi Pota na tupela moa i kam bilong mekim wok misineri. Nansi i tok: “Mipela i tingim yet namba wan miting mipela i bin go long en long Bahama. Tenpela i stap, na Brata Mari em siaman, na em i beten na tenkyu long Jehova long salim mipela ol nupela misineri i kam; ol i bin wet inap longtaim long sampela i kam helpim ol, na Sosaiti i tok ol bai salim sampela, na nau ol i kam pinis. Mipela harim dispela beten, na mipela pilim olsem mipela i laik i stap olgeta long Bahama na no ken lusim.” Sista Pota i winim 45 yia long Bahama, na em i stap yet, maski man bilong em i dai pinis. Em i wok yet long bringim gutpela tok bilong Kingdom long ol manmeri bilong Bahama.
Bihain long 1947 sampela ol painia na pablisa i bin kam long bot long Bahama na autim tok, na dispela i strongim dispela wok. Kepten i mas stiaim gut bot, long wanem, long sampela hap em solwara i no daun, na as bilong bot inap pas long wesan samting. Em i mas wok long abrusim ol dispela hap, na taim bot i kam klostu pinis long nambis, sampela taim ol i mas kalap na wokabaut i kam antap long nambis na i go autim tok long ol man i stap long ol longwe hap bilong ol dispela ailan. Tasol wok bilong ol i bin kamapim gutpela samting.
Long Disemba 1950 presiden bilong Sosaiti Was Taua long dispela taim, em Nathan H. Knorr, wantaim kuskus bilong em, em Milton G. Henschel, ol i kam long Bahama. Knorr i givim tok long 312 man ol i pas insait long wanpela liklik rum. Sampela bikman i bin kam tu. Long dispela nait Brata Knorr i tokaut long Sosaiti i laik kamapim wanpela brens-ofis long Bahama.
Ol i Amamas Long Harim Tok
Ol manmeri bilong Bahama i amamas long harim tok bilong Kingdom, tasol i hatwok long painim sampela, long wanem, ol i no stap long biktaun Nasau tasol, nogat, ol stap long ol narapela ailan nabaut, olsem ailan Bikbahama na 15 ol narapela bikpela ailan na 700 ol liklik ailan.
Sampela ol Witnes long Bahama i save long ol dispela man i stap long ol dispela longwe hap, olsem na ol i go sindaun namel long ol long ol ples long dispela hap na bai ol i ken autim tok long ol dispela man. Ol i bin hatwok long mekim olsem, na ol i lusim gutpela sindaun bilong ol na bai ol inap i kam helpim ol man bilong dispela hap. Tasol maski dispela i bin putim sampela hevi long ol, ol i amamas long mekim, na hatwok bilong ol i bin kamapim gutpela wok.
Wanpela yangpela man wantaim meri bilong em i go sindaun long ailan Andros. Tupela i autim tok long ol haus, na wanpela de ol i bungim wanpela man bilong Haiti. I gat planti tausen man bilong Haiti i stap long Bahama. Dispela man i orait long tupela i stadi wantaim em long Baibel, na ol i kirapim stadi long em long dispela de stret long buk Yu Inap i Stap Oltaim Long Paradais Long Graun. Long apinun em i kam long miting, na bihain moa em i lusim smok, na em i wok long kamap strong hariap, na em i kirap long autim tok long ol man.
Long de em i laik kisim baptais em i kisim kaset em famili bilong em long Haiti i salim i kam. Ol i salim tok bilong ol long dispela kaset. Em i no bin harim sampela tok bilong ol inap 5-pela yia. Nau long kaset ol i tokim em ol i kamap Witnes Bilong Jehova, na susa bilong em i wanpela painia oltaim, na ol i tokim em long em i mas wok strong long painim ol Witnes na stadi wantaim ol long Baibel. Nau man i amamas tru. Long dispela de em i kisim baptais, na em i save tru, samting em i mekim i stret.
Ol Witnes long Bahama ol i amamas long kain samting olsem i kamap long hap bilong ol. Planti ol i laik kamap painia na autim tok bilong Kingdom long ol man long olgeta taim. Ol i mekim olsem, na nau lain Witnes i go bikpela long Bahama. Long 1988 i gat 1,000 manmeri long Bahama i autim tok bilong Kingdom, na long nau i gat 19 kongrigesen i stap, na inap olsem 1,300 pablisa i autim gutpela tok bilong Kingdom long ol man. Long ol bikpela ailan i gat ol Witnes i stap.
Redi Long Bihain
Long nau ol Witnes i kamap planti, na lain bilong ol i go bikpela, olsem na ol i hatwok long painim wanpela haus i bikpela inap long ol i ken mekim kibung distrik long en long olgeta yia. Long bipo ol i mekim wanpela long wanpela ailan, na ol i mekim narapela long narapela ailan. Ol i planti tumas, olsem na i no gat wanpela haus i bikpela inap long ol i ken mekim wanpela kibung tasol na bai olgeta i ken bung wantaim. Olsem na ol i kirap long wokim wanpela Haus Kibung na haus brens wantaim. Ol i kirap mekim olsem long Disemba 1989. Planti handet wokman i wok long dispela, na ol i givim bel na ‘wok strong long mekim, na i no olsem ol i mekim wok bilong ol man. Nogat. Ol i mekim wok bilong Jehova.’—Kolosi 3:23.
Bikpela kibung bilong ol i kamap long Februeri 8 na 9, 1992, long dispela nupela Haus Kibung, na ol i dediketim dispela Haus Kibung wantaim nupela haus brens. Ol brata i amamas long kam. San i no hat tumas, na liklik ren i bin kam daun long nait paslain long dispela. Inap 2,714 man i bung na harim John E. Barr bilong Lain Bilong Bosim Ol Witnes Bilong Jehova, em i mekim tok bilong dediket, as tok em “Singsing Bilong Gavman Bilong God i Go Bikpela.”
Ol i amamas na tenkyu long Papa God Jehova long heven, em yet i mekim na ol i kisim dispela bikpela amamas long bung wantaim. Kibung i kirapim bel bilong ol, na ol i laik wok strong yet long lainim ol narapela man long ol samting bilong spirit na helpim wok bilong Jehova long i go bikpela moa, olsem nupela haus brens na Haus Kibung tu bai mekim.
Sampela man bilong graun i tok, Kolambas i bin bringim gutpela samting long Bahama, tasol sampela man i tok nogat. Tasol ol Witnes Bilong Jehova long Bahama ol i stap wanbel na ol i amamas long Jehova i salim ol painia i kam long Bahama long givim tok bilong Kingdom long ol man. Ol i daunim laik bilong ol na ol i lusim gutpela sindaun bilong ol yet long narapela kantri na ol i no pret long kam long dispela nupela hap na bringim gutpela tok bilong Kingdom long ol Bahama ol i gat laik long painim tok i tru na bai ol i ken kisim ol dispela gutpela samting bilong spirit i winim tru olgeta narapela samting.
[Mep/Ol Piksa long pes 24, 25]
Bikbahama
Abako
Andros
Nu Providens
Nasau
Ilutara
Ailan Ket
Bikeksuma
Ram Kei
San Salvador
Ailan Long
Ailan Kruket
Ailan Aklins
Mayaguana
Liklik Inagua
Bikinagua
SOLWARA KARIBIAN
FLORIDA
KUBA
[Ol Piksa]
Ol i autim tok long maket
Ol i kam bilong autim tok
Nupela haus brens i stap antap long maunten na Haus Kibung i stap daunbilo