Ol i Painim Gutpela Samting Tru Long Hong Kong
HONG KONG em i ples bilong painim planti mani long sotpela taim—sapos olgeta samting i wok gut. Pastaim dispela taun em Inglan i bosim i no gat planti bisnis, tasol insait long 40 yia i go pinis wok bisnis bilong en i kamap strong tru. Ol bisnisman long Esia na long olgeta hap bilong graun i save long dispela samting.
Takis long Hong Kong i liklik, olsem na planti bisnisman bilong ol narapela kantri i kam na givim wok long ol 6 milion manmeri bilong Hong Kong. Em i stap long gutpela hap bilong mekim wok bisnis, namel long Saina na ol hap bilong Esia na Pasifik na i go moa. Hong Kong i gat ol nupela samting bilong bringim kago long ol narapela hap na ol samting bilong salim kwik tok i go i kam, na planti holsel na stua i save gut long mekim wok bilong ol. Olsem na ol inap mekim kwik ol samting sapos ol bisnis bilong ol narapela hap bilong graun i laikim wanpela samting.
Wok bisnis bilong Hong Kong i kamap gutpela, olsem na ol manmeri i gat planti gutpela samting. Tasol olsem wanem? Mani kago i bin mekim ol man bilong Hong Kong i belgut na amamas? Nogat. Tasol sampela i bin painim gutpela samting, i winim mani kago.
Gutpela Samting Bilong Spirit
Wanpela man bilong Hong Kong i painim ol gutpela samting bilong spirit, em Alfred. Em i dairekta bilong wanpela intenesenel bisnis grup i gat hetkota long Inglan. Olsem planti ol narapela man long Hong Kong, em i laik kisim planti mani na haus bilong em yet na kaikai gut na stap amamas. I olsem em i winim pinis dispela mak, long wanem, em i gat gutpela wok na kisim bikpela pe. Tasol em i stap amamas? Em i tok: “Ol samting i painim mi i lainim mi olsem, mani tasol i no inap.” Olgeta taim em i tingting planti, sapos ol i pinisim em long wok, mani bilong em bai lukautim em inap long wanem taim? Taim em i wok tumas ol hevi i kamap insait long famili. Meri bilong em Emily, i bel hevi tru taim pikinini man bilong ol i dai. Em i tok: “Mi laik save em i stap we na bai mi ken mekim samting bilong helpim em.” Em i no inap mekim wanpela samting, olsem na em i bel hevi tru.
Papa bilong Justina i dai taim em i liklik yet. Tasol em i wok strong na em i winim skul long Yunivesiti Hong Kong. Long dispela rot em i kisim wok long gavman. Long tok ples Kanton ol i kolim dispela kain wok gum fan woon, olsem dis gol i gat rais long en—em gutpela wok na gutpela pe. Tasol Justina i no stap amamas na belgut. Planti taim em i tingting, bilong wanem yumi stap laip, na wanem samting bai painim yumi long bihain? Man bilong em, Francis, em tu i ting olsem i stap bilong yumi i no gat as bilong en na em i olsem wanpela wil nating tasol insait long bikpela masin.
Na Ricky em i bosim wanpela bisnis, na em i kisim planti mani, tasol em i lukim ol wanwok ol i paulim wok na narapela i laik winim narapela. Na hevi i kamap tu namel long em wantaim Wendy, em meri bilong em. Mani i no inap stretim ol dispela kain hevi. Wendy i bin ting, sapos yumi gat planti mani, na gutpela sindaun, na gavman i wok gut, yumi kisim pinis ol gutpela samting. Tasol sapos ol dispela samting i pinis? Na sapos dai i painim em? Wendy i tingting planti olsem. Em i pilim olsem i no gat as bilong i stap bilong em.
Na David tu. Em i kisim bikpela save long yunivesiti, na em i gat gutpela wok mani, na em i kisim bikpela pe, tasol ol dispela samting i no givim amamas long em, long wanem, em i bilip long evolusen na ol save bilong graun, na em i tingting long taim em i dai em bai pinis olgeta. Olsem na i no gat gutpela samting bilong bihain em i ken tingim na dispela i ken givim amamas long em. Em i pilim olsem ol mani kago bilong em i no helpim em long i stap belgut.
Alfred, Justina, Francis, Ricky, Wendy, David, Emily, ol i gat narapela narapela kain i stap bilong ol, na ol i bin kisim ol samting ol i ting em bai givim amamas long ol, tasol nogat. Ol i pilim ol dispela samting i olsem samting nating.
Kisim Planti Samting Long God
Alfred na Justina na ol narapela hia ol i kain olsem ol dispela maniman em Jisas i tok, ol i “hipim planti samting bilong ol yet, tasol ol i stap rabis long ai bilong God.” (Luk 12:21) Tasol ol i painim samting i gutpela tru, winim ol mani samting. Ol man i laik i stap amamas tru “ol i no ken bilip long ol dispela kain samting i save bagarap kwik. Nogat. Ol i mas bilip tru long God, em God i save givim yumi planti gutpela samting bilong mekim yumi i amamas.” Alfred na ol narapela hia, taim ol i bin kisim save long trupela God Jehova na ol i bilip long em, ol i kisim narapela kain amamas i gutpela moa. Nau yumi ken stori long ol.
Pikinini bilong Alfred tupela Emily i dai, na dispela i bagarapim bel bilong ol. Mani kago bilong ol i no inap pinisim hevi bilong ol. Ol i go lotu, tasol dispela i no mekim gut bel bilong ol. Orait, wanpela Witnes Bilong Jehova i kam long haus bilong ol na i askim ol: “Wanem gutpela samting bilong bihain na yumi ken tingim?” Alfred i tingim tok bilong lotu bilong em long go long heven o bikpaia. Witnes i soim tok bilong Baibel long em i tok, “ol man i dai pinis, ol i no inap save long wanpela samting,” tasol sapos God i tingim yet ol, ol bai kirap bek na i stap laip gen. (Saveman 9:5, 10; Jon 5:28, 29) Alfred i pilim dispela tok i gutpela, na pikinini bilong em i no gat pen samting, nogat; em i olsem slip tasol, na bihain em inap kirap bek na i stap gen wantaim tupela. Nau ol i amamas! Bihain tupela i orait long ol Witnes i ken stadi wantaim ol long tok bilong Baibel na ol i ken kisim ol dispela gutpela tok i stap long Baibel, i winim tru mani kago.
Justina i bin hevi long ol wanwok bilong em, ol i no laik helpim o lukautim ol man. Em i strongpela Katolik, tasol em i lukim pris i save smok na danis wankain olsem ol narapela man bilong graun, na em i tingting planti long dispela samting. Bihain em i bungim ol Witnes Bilong Jehova, na ol i givim tok bilong Baibel long em long ol samting em i laik save long en, na em i amamas long dispela. Pris i no bin tokim em long wanpela tok bilong Baibel. Pris i kamapim tingting bilong em tasol. Justina i bin go oltaim long lotu, na em i bin mekim wok bilong lotu inap 10-pela yia, tasol em i no bin kaunim Baibel inap 16 yia.
Ol Witnes i lainim Justina wantaim man bilong em Francis long tok bilong Baibel, na Francis i lukim ol Witnes i stap wanbel long bilip na long wok bilong ol. Nau em i bilip olsem God i stap, na em i trupela God, na em i bosim ol Witnes maski ol i bilong wanem kantri. Tupela i painim pinis gutpela samting tru na nau ol i amamas!
Ricky tupela Wendy i bin pilim olsem ol hevi bilong ol yet i wok long daunim ol na ol i mas mekim sampela samting, nogut dispela ol hevi i bagarapim ol. Bipo tupela i bin save long ol Witnes Bilong Jehova, na nau ol i pasim tok long kirap painim gen ol Witnes. Ol i wok strong long mekim olsem, na nau ol i painim rot bilong stretim ol hevi bilong ol, na ol i painim tu narapela gutpela samting tru olsem: nau ol i stap wanbel wantaim God tru, “em i as bilong pasin tru bilong amamas.”—1 Timoti 1:11.
I stap bilong David tu i bin senis long taim ol Witnes Bilong Jehova i stadi wantaim em. Pastaim em i orait long ol i kam toktok wantaim em na bai em i ken kamapim ol bilip kranki bilong ol. Tasol bihain em i kisim save long Baibel na i stret wantaim ol samting bilong saiens na ol stori bilong bipo. Nau em i save, tok i tru i stap long Baibel, na nau em i painim pinis gutpela samting em i ken givim bel long en. Em i amamas tru long gutpela senis i bin painim em!
Ol i Helpim Ol Narapela Long Painim Samting i Gutpela Tru
Planti milion man i stap long Hong Kong, na Alfred na Emily na Justina na Francis tu na ol narapela yumi bin stori long ol, na planti moa i painim pinis gutpela tok i tru bilong Baibel, na nau ol i bilip long God Jehova. Long 1992 inap 2,600 Witnes Bilong Jehova long Hong Kong i autim tok inap klostu 900,000 aua long ol man, na ol i mekim olsem 3,800 Baibel-stadi wantaim ol man. Tasol ol Hong Kong i save hariap hariap tumas, na ol i gat planti wok. Ol Witnes i raun long ol haus na autim tok, na ol i sanap long ol rot tu na mekim olsem. Na ol i go long ples wok bilong ol man tu na autim tok long ol, olsem ol ofis, na stua, na gaden, na ol man bilong kisim pis long solwara Saut Saina.
Tru tumas, Jisas i tok stret taim em i tok: “Planti kaikai tumas i mau pinis long gaden, tasol i no gat planti wokman i stap bilong kisim.” I olsem tasol long Hong Kong. (Matyu 9:37) Long olgeta 2,300 man, i gat wanpela Witnes i stap. I gat 2,600 pablisa i stap, na 600 i mekim wok painia na autim gutnius bilong Kingdom. Ol Witnes long Hong Kong na ol narapela hap ol i save, “Bikpela [Jehova] yet i givim yumi planti gutpela samting.” (Sindaun 10:22) Ol i wok strong long helpim planti man moa long Hong Kong long painim samting i gutpela tru.
[Mep long pes 23]
(Bilong save ol dispela rait i stap we long pes, lukim buk o magasin)
SOLWARA SAUT SAINA
SAINA
Hong Kong
Kilomita
15
15