Pasin i Stret o Ol i Mas Laikim Yu—Wanem Samting i Stiaim Yu?
NORIHITO i stap long gret 6 long skul na em i insait long wanpela pilai spot. Wantu wanpela traim i painim em. Olgeta sumatin i mas mekim wanpela samting bilong litimapim kantri. Olsem wanem? Em i mas bung wantaim ol wanskul long mekim dispela samting?
Norihito i bin kisim save long Baibel olsem i no stret long mekim wanpela pasin bilong lotuim narapela god—yumi mas lotuim Jehova tasol. (Kisim Bek 20:4, 5; Matyu 4:10) Na em i save, ol Kristen i no ken insait long ol wok politik bilong dispela graun. (Daniel 3:1-30; Jon 17:16) Olsem na maski ol wanskul i laik kirapim em long mekim dispela pasin, em i strongim bel na sanap strong. Sapos kain samting olsem i painim yu, bai yu mekim wanem?
Laik Long Bihainim Ol Man
Baibel i makim olsem God i bin wokim ol man bambai ol i ken bung wantaim na amamas long mekim ol samting wantaim. Na yumi gat laik long bung wantaim ol wankrismas bilong yumi na ol i orait long yumi. Dispela samting i mekim na yumi stap belgut na stap wanbel wantaim ol man.—Stat 2:18; Song 133:1; 1 Pita 3:8.
Dispela laik long i stap wankain olsem ol narapela em i kamap ples klia long pasin bilong sampela lain long nau tu. Taim ol pikinini Japan i liklik yet, ol i lain long bihainim pasin bilong ol Japan. Wanpela bikpela wok bilong ol em ol i mas bihainim pasin bilong ples. Wanpela man (Edwin Reischauer) bipo em i save go long Japan olsem ambasado bilong Amerika, em i tok: “Ol Japan i save laik long bung wantaim na mekim ol wok samting, winim ol lain bilong Wes.” Na em i tok, planti lain bilong Wes ol i laik giaman na mekim olsem ol yet i tingim wanem pasin ol i laik bihainim. Tasol ol Japan i orait tasol long bihainim pasin bilong ples long bilas na pasin na i stap bilong ol, na ol i bihainim tingting bilong ol wanples.” Tasol i no ol Japan tasol i laik bihainim pasin bilong lain bilong ol. Dispela laik i stap long olgeta lain.
Ol i Strong Long Yumi Mekim
Tru i gutpela sapos yumi stap wanbel wantaim ol narapela man, tasol yumi mas was gut, nogut yumi bihainim nating ol pasin ol man i save laikim. Bilong wanem yumi mas was gut? Long wanem, ol samting ol man i save laikim, planti taim dispela i no stret long laik bilong God. Baibel i tok: “Dispela graun olgeta em i stap aninit long strong bilong Satan.” (1 Jon 5:19) Satan i mekim wok long kain kain rot bilong pulim ol man na kirapim ol long lusim God—olsem long laikim tumas mani kago, pasin pamuk samting, bel nogut long ol narapela lain o skin, bel nogut long narapela lotu, litimapim kantri, na kain pasin olsem. Sapos man i bihainim ol kain pasin olsem, em i sakim God Jehova na laik bilong Em. Olsem na Baibel i tok strong long ol Kristen olsem: “Yupela i no ken wokabaut wankain olsem ol man bilong dispela graun.”—Rom 12:2.
Ol man i laik subim ol Kristen long bihainim pasin na tingting bilong ol. Dispela traim i painim moa yet ol yangpela. Ol i gat laik long i stap wankain olsem ol wanskul long ol bilas na long pasin bilong ol. Olsem na ol yangpela Kristen i mas strongim bel tru na bai ol i ken tokaut long ol wanskul, i gat wanem as na ol i no insait long sampela pilai o amamas samting bilong ol. Sapos ol i pret na ol i no tokaut, ol inap bagarap long ol samting bilong spirit.—Sindaun 24:1, 19, 20.
Na i gat wankain traim i painim ol manmeri i bikpela pinis taim ol i stap long ples wok. Ating ol wanwok i laik bai ol i insait long ol bung samting i kamap taim ol i wok pinis long apinun o long sampela bikpela de bilong ol. Sapos Kristen i no laik insait long en, ating ol wanwok bai ting olsem em i no laikim ol na i no laik wok gut wantaim ol, na ating sampela hevi bai painim em long ples wok. Na sampela Kristen i ting ol i mas wok ovataim, long wanem, ol narapela wanwok i mekim na i olsem ol tu i mas mekim. Tasol sapos ol i bihainim dispela pasin bilong ol wanwok, dispela inap nogutim ol, na tu, ol i no gat taim bilong mekim ol narapela wok ol i mas mekim.—1 Korin 15:33; 1 Timoti 6:6-8.
Na ol kain traim olsem i save painim Kristen long ol narapela taim tu. Wanpela mama Kristen i tok, wanpela taim pikinini bilong em i bikhet, tasol em i no bin stretim pikinini, long wanem, sampela mama moa i stap na nogut ol i no orait long dispela samting em i mekim.—Sindaun 29:15, 17.
Maski Planti Man i Mekim
God i bin tokaut stret long lain Israel: “Sapos ol planti man i mekim pasin nogut, orait maski long bihainim pasin bilong ol. Na sapos planti man i sanap long kot na autim tok bilong paulim kot, orait maski long bihainim pasin bilong ol.” (Kisim Bek 23:2; lukim Rom 6:16.) Tasol bihain liklik long taim ol Israel i lusim Isip, wanpela taim Moses i no stap wantaim ol, na sampela i kirapim Aron na ol man long wokim bulmakau gol na lotu long en long “bikpela kaikai bilong givim biknem long Bikpela.” Ol manmeri i kaikai na dring na singsing na pilai nogut na mekim ofa long bulmakau gol. Olsem na Jehova i bagarapim 3,000 man ol i go pas long mekim dispela pasin nogut. Tasol Jehova i salim bikpela sik long ol narapela Israel, long wanem, ol i bihainim dispela bikpela lain long mekim pasin nogut.—Kisim Bek 32:1-35.
Na dispela pasin bilong bihainim bikpela lain, em i bin kamap long taim ol i laik kilim i dai Jisas. Ol bikpris i bel nogut long Jisas na ol i kirapim planti man long bihainim ol na singaut long kilim i dai Jisas. (Mak 15:11) Orait, long de Pentikos bihain long taim Jisas i kirap bek na i go antap, aposel Pita i tokaut long ol manmeri long bikpela rong ol i bin mekim. Dispela tok i “sutim tru bel bilong ol” na ol i pilim tru rong bilong ol long bihainim ol narapela man.—Aposel 2:36, 37.
Bihainim Ol Lo Bilong Baibel
Olsem ol dispela stori i makim, sapos yumi no tingting gut na yumi bihainim pasin ol man bilong graun i laikim, dispela inap kirapim yumi long mekim bikpela rong. Olsem na yumi mas bihainim tok bilong Baibel na larim ol lo bilong en i stiaim yumi! Jehova i tok: “Skai i stap antap tru long graun, olsem tasol ol pasin bilong mi na tingting bilong mi i winim tru ol pasin bilong yupela na tingting bilong yupela.” (Aisaia 55:9) Long ol samting bilong maritpasin, na long i stap olsem wanem wantaim ol man—na long olgeta narapela samting yumi mas skelim—planti taim samting i kamap ples klia olsem: Pasin bilong bihainim tingting bilong Jehova i winim tru pasin bilong bihainim tingting bilong ol man. Dispela inap mekim yumi i stap amamas na i stap gutpela long skin tu.
Yumi ken tingim stori bilong Kazuya. Em i bin stadi long Baibel inap longtaim liklik, tasol em i bihainim pasin bilong ol man long painim bikpela mani na kisim namba samting long wok mani bilong em. Olsem na em i strong long ol bos i amamas long em na em i laik bai ol wanwok tu i laikim em. Dispela i mekim na planti taim em i save raun na dring wantaim ol i go winim biknait. Em i kamap man bilong daunim ol man na belhat kwik na i no inap harim tingting bilong narapela man. I no longtaim na em i kisim sik strok, na hap bodi bilong em i dai. Em i slip long haus sik na em i tingting long ol tok em i bin lainim long Baibel, na em i tingting long i stap bilong em. Nau em i pasim tok long bel olsem em bai kirap bihainim ol tok em i bin lainim. Em i lusim wok bilong em i gat namba, na em i lusim ol poroman bilong em. Em i wok strong long kisim pasin Kristen na senisim tingting bilong em long mani kago samting. Sik bilong em i wok long pinis na em i kamap gutpela, na bihain em i givim skin bilong em olgeta long Jehova na kisim baptais.
Bilong bihainim tingting na pasin i narapela kain long ol man bilong graun, yumi mas save long ol lo i insait long dispela samting, na yumi mas bilip tru olsem ol dispela lo i stret. Samting i bin painim Masaru i kamapim klia dispela samting. Taim em i stap long gret 6 long skul, ol wanklas bilong em i laik makim em long kamap presiden long kaunsil bilong skul. Em i tok, long dispela taim em i no bin save gut long ol lo bilong Baibel long dispela samting, olsem na em i no inap tokaut gut long ol wanskul olsem i gat wanem as na em i no inap sanap long dispela eleksen bilong skul, em wanpela wok politik. Em i pret long ol man na em i no bin tokaut olsem em i wanpela Kristen. Olsem na em i putim het i go daun na em i krai na tok, “Mi no inap mekim dispela wok.”
Dispela hevi i painim em i kirapim em na em i laik save, bilong wanem ol Kristen i no insait long ol wok politik. (Lukim Jon 6:15.) Bihain, taim em i stap long haiskul, kain traim olsem i painim em gen. Tasol nau em inap kamapim gut bilip bilong em long tisa. Tisa i orait long tok bilong em, na sampela wanklas tu, na ol i askim em long dispela bilip bilong em, em Baibel i as bilong en.
Bihain Olgeta Man Bai Mekim Pasin i Stret
Taim Krais i bosim graun na nupela taim i kamap, olgeta man bai mekim pasin i stret. Tasol long nau yumi mas was gut, nogut yumi bihainim pasin ol man i save laikim. Pol i tok: “Ol dispela manmeri bilong bipo ol i sanap na raunim yumi i stap . . . na ol i soim yumi pasin bilong bilip. Olsem na yumi mas lusim olgeta kain samting i mekim yumi i no inap ran strong, na olgeta sin i save pas long yumi. Na yumi mas strongim bel na ran strong long dispela resis God i bin makim bilong yumi ran long en.”—Hibru 12:1.
Taim ol traim na hevi i painim yu, bai yu mekim wanem? Bai yu pret long ol man na yu mekim ol samting ol i laikim? O bai yu bihainim ol lo bilong God long Baibel? Sapos yu mekim olsem, dispela bai helpim yu nau, na bihain yu inap insait long dispela lain i “bilip tru na i no les kwik, na ol i kisim olgeta samting bipo God i tok long givim long ol pikinini bilong em.”—Hibru 6:12.