Autim Tok Long Ples i Narapela Kain

PLANTI man, taim ol i tingim kantri Ostrelia ol i save tingim ol animal olsem traipela sikau, koala, wombat, platipus, na wanpela traipela maunten ston ol i kolim Ers Rok, na longpela rip long solwara (Great Barrier Reef). Tasol planti man bilong Ostrelia yet i no bin lukim dispela traipela maunten ston o dispela rip, na ol i bin lukim ol dispela animal long ol banis animal tasol. Long wanem, klostu olgeta dispela 17 milion manmeri bilong Ostrelia ol i sindaun long ol 5-pela biktaun tru long hap bilong nambis.

Orait, yumi lusim nambis na yumi go insait olsem 200 kilomita samting. Long hap bilong nambis i gat ol gutpela bikbus na ol bikpela hap graun i gat gutpela gras bilong ol bulmakau. Tasol insait long Ostrelia, san i strong na graun i drai tru na i no gat ol bikpela diwai long bus​—⁠ol liklik pipia diwai na strongpela gras tasol inap kamap. Tasol i gat ol man i stap. Ol i gat ol bikpela hap graun inap sampela handet skwe kilomita na ol i lukautim ol bulmakau na sipsip. Sapos yumi go insait moa, bai yumi lukim ol bikpela ples wesan nating i hat nogut tru, na sampela man ol i bin i dai long ol dispela hap, long wanem, ol i no gat wara samting.

Gutnius i Kamap Long Dispela Hap

Ol i autim gutpela tok bilong Kingdom long dispela hap tu bilong Ostrelia, em kantri i stap daunbilo tru. Long olgeta yia planti tausen manmeri ol i harim na ol i bilip long tok promis bilong Jehova long kamapim nupela taim long graun. Long yia i go pinis, ol manmeri i autim tok bilong Kingdom long Ostrelia i winim 57,000, na dispela namba i klostu olsem dabol long namba bilong ol long tenpela yia i go pinis. Tru, planti bilong ol i save stap long hap bilong nambis, tasol gutnius i kamap tu long ol dispela hap insait tru long Ostrelia, na planti man i laik harim.

Tasol yumi laik save, olsem wanem ol i autim tok long dispela bikpela kantri i gat ol narapela narapela kain ples? Orait, yumi ken raun wantaim wanpela bilong ol 5-pela wasman distrik na meri bilong em taim ol i go lukim sampela kongrigesen i stap long ol longwe longwe hap insait long Ostrelia. Ol i save raun long hap bilong Westen Ostrelia, na bikpela hap bilong Kwinslan, na hap bilong Noten Teritori, em olgeta inap olsem 4 na hap milion skwe kilomita. Sapos yumi brukim kantri Yurop i go tupela hap (dispela hap bipo ol i kolim Soviet Yunion i no insait long en), orait klostu wanpela hap olgeta em inap olsem dispela bikpela hap em tupela marit i save raun long en.

Orait, yumi kirap long biktaun Pet long Westen Ostrelia, i gat olsem 1 milion manmeri long en, na nau i gat 49 kongrigesen bilong ol Witnes Bilong Jehova i stap. I gat ol kongrigesen bilong tok Inglis, Grik, Itali, Potyugal, Spen, na sampela grup bilong ol narapela narapela tok ples. Na i gat wanpela kongrigesen bilong ol Aborijini, em ol i autim tok long ol narapela Aborijini. Ol dispela lain i gat pasin daun na ol i laik harim gutpela tok bilong Kingdom. Tasol olsem wanem long ol hap i stap longwe long ol biktaun?

Yumi lusim Pet na yumi go long Pot Hetlan, i stap long hap bilong not inap 1,800 kilomita. Wanpela kibung sekit i laik kamap long dispela hap, na i gat 289 manmeri ol i kam bung, na planti bilong ol i gat longwe rot bilong i kam, olsem 200 i go inap 700 kilomita. Ol kongrigesen bilong ol i stap longwe long ol inap olsem 250 kilomita, na ol rot i gat planti ston, na planti taim sap bilong ol ston i save sutim taia bilong ka. Tripela kongrigesen long ol dispela hap ol i wokim pinis ol nupela Haus Kingdom bilong ol, em ol i sanapim hariap insait long sampela de tasol.

Haus Kingdom Ol i Wokim Hariap

Wok bilong sanapim ol Haus Kingdom long ol dispela longwe hap i narapela kain tru long taim ol i wokim long ol biktaun! Klostu olgeta samting ol i mas kisim long biktaun Pet, em i longwe tru inap olsem 1,600 kilomita. Sampela handet brata sista i save kam longwe olsem bilong helpim wok bilong sanapim Haus Kingdom long ol dispela ples i hat nogut tru. Taim ol dispela handet handet brata sista i kam long ol dispela liklik ples, ol man bilong dispela hap i kirap nogut long dispela pasin bilong ol. Taim ol i sanapim wanpela Haus Kingdom long liklik taun Tom Prais, niuspepa bilong taun i kamapim bikpela stori bilong en long namba wan pes na i tok: ‘Mipela laik tok amamas long yupela ol wokman, long laik bilong yupela yet yupela i kam bilong wokim Haus Kingdom bilong ol Witnes Bilong Jehova insait long 3-pela de long dispela taun Tom Prais.’

Na i olsem planti manmeri bilong taun ol i laik helpim dispela wok. Bilong karim ol plang samting i kam, inap olsem 50 tan, pe bilong en i olsem 11,000 dola. Tasol wanpela man i gat trak em i tokim ol brata, ol i ken baim bensin tasol. Na ol man i gat bisnis long penim haus, ol i givim nating 100 lita pen. Na sampela bisnisman i gat ol bikpela masin bilong kamautim graun, ol i larim ol brata i mekim wok long en, no gat pe, na wanpela kampani i gat main ol i larim ol brata i mekim wok long wanpela masin krein, na ol tu i no singaut long pe. Ol brata i mas painim ples slip bilong 300 brata sista, na ol i tingting planti. Tasol ol manmeri bilong taun i helpim ol gut. Sampela i ring na tok ol i ken givim ples slip long sampela. Wanpela man i ring na tok, em bai go long wanpela hap na haus bai stap nating long Sarere Sande, tasol em i no ken lokim dua long baksait bilong haus. Em i tok: “Mi givim haus long yupela bilong slip long en inap long wok bilong yupela i pinis.”

Wanpela samting i kamap na bai yu lap long en. Sampela brata i mas go kisim wanpela trela bilong dispela sekit. Ol i bin kisim atres bilong haus em trela i stap long en. Tasol taim ol i kamap long haus ol i lukim wanpela toksave long dua bilong banis olsem: “Ol Man Bilong Lotu i No Ken Kam Insait.” Tasol ol i lukim wanpela trela i stap, em pipia i pulap long en. Olsem na ol i tokim meri bilong haus, ol i laik kisim trela. Ol i karim i go na taim ol i wok long rausim pipia long en, ol i save, em i no trela bilong sekit! Orait, papa bilong trela i kam bek long haus na meri i tokim em, ol Witnes i kisim trela bilong em. Tasol kwiktaim ol brata i bringim trela i kam bek long em, na ol i tok ol i bin popaia na kisim dispela trela. Bipo dispela man na meri bilong em i nolaik tru long ol Witnes, tasol nau ol brata i toktok gut wantaim tupela na ol i givim planti askim long ol brata long yumi ol Witnes na wok bilong yumi. Nau tupela i laik i kam lukim nupela Haus Kingdom.

Bilong autim tok long ol dispela hap, man i mas i stap strong na no ken les, long wanem, ol ples i stap longwe longwe. Wanpela sista painia na man bilong em ol i save kirap long Pot Hetlan na draiv i go long liklik taun Mabol Ba bilong i go lukim gen ol man i laik harim, na bilong mekim stadi Baibel long ol man; bilong i go na kam bek em 350 kilomita. Long Oktoba i go inap Mas, Mabol Ba em ples hat nogut tru, winim klostu olgeta ples long Ostrelia.

Yumi Go Long “Hap Antap”

Narapela taun yumi mas mekim kibung sekit long en em Dawin, em i stap long hap bilong not inap 2,500 kilomita. Wasman distrik na meri bilong em i no stap nating taim ol i draiv i go​—⁠ol i save stadi. Pastaim ol i kaunim teks, olsem wanpela ves bilong Baibel na stori bilong en. Bihain long en ol i harim ol tok bilong Baibel i stap long kaset. Tupela i senis senis long draivim ka, na ol i senis senis tu long kaunim Wastaua na Kirap! na bai narapela i ken harim.

Wanpela toksave long rot i tok, ol i mas lukaut long ol “tren bilong rot,” em ol traipela trak i gat 3-pela o 4-pela trela, na trak wantaim ol trela i longpela tru inap 55 mita. Olsem na ol ka i mas givim rot long ol dispela trak. Ol i save karim ol bulmakau na kago samting i go long ol liklik taun i stap longwe.

San i strong na graun i drai long olgeta taim. Sapos yu lukim, yu inap ting em i wanpela traipela ples matmat, long wanem, i gat planti haus bilong ol anis i sanap, na ol i lain gut olsem ol matmat. Ol dispela haus i gat narapela narapela kala, em kala bilong graun ol anis i bin wokim haus long en, na haus bilong ol i go antap olsem wanpela mita i go inap 2 na hap mita. Orait, nau tupela marit i brukim Wara Viktoria, na ol i lukim sampela toksave ol man i raitim. Wanpela i tok: “Lukaut: I Tambu Long Waswas. Ol Pukpuk i Save Kaikai Man Ol i Stap Long Ol Dispela Wara!” Olsem na tupela i senisim tingting na i no waswas long dispela wara!

Bihain tupela i kamkamap long “Hap Antap” bilong Ostrelia. Dawin em biktaun bilong en, na i gat tupela bikpela kongrigesen bilong ol Witnes. I gat ol man bilong kain kain tok ples na skin long Dawin, na dispela i kamap ples klia long kibung sekit. Wanpela em Charles, em i bilong Is Timor long Indonesia. Papamama i bilong Saina na ol i save lotuim ol tumbuna. Na em i bin insait tru long ol spot olsem judo na karate. Em i hatwok long lusim, long wanem, ol spirit nogut i insait long ol dispela kain wok. Tasol em i tingim tok bilong Jisas olsem “tok tru bai i mekim yupela i kamap fri,” olsem na em i wok strong na em i lusim ol dispela pasin i bin kalabusim em. (Jon 8:32) Em i tok, “Nau bel bilong mi i stap klin long ai bilong Jehova, na mi stap wokman bilong kongrigesen. Mi gat bikpela laik long i go long Skul Bilong Lainim Wok Bilong Lukautim Kongrigesen.”

Orait, nau yumi bungim Beverly, em i bilong Papua Niugini. Em i tok, “Pastaim mi pret long autim tok long ol waitskin, long wanem, tok Inglis i no tok ples bilong mi na mi hatwok long kisim gut sampela tok. Tasol Baibel i tok, yumi mas bilip long Jehova na bai yumi save em i gutpela tru. Olsem na mi kirap mekim wok painia oltaim long Janueri 1991. Namba wan Baibel-stadi bilong mi, nau em tu i mekim wok painia. Tupela pikinini meri bilong em i kam insait long tok i tru, na wanpela pikinini meri wantaim man bilong em ol tu i mekim wok painia.”

Em taim bilong lusim Dawin, tasol pastaim yumi ken i go 250 kilomita na lukim Kakadu Nesenel-Pak, i gat ol kain kain pisin i stap. Nau yumi bungim Debbie, em wanpela tasol i save autim gutnius long dispela bikpela hap. Mipela i askim em, olsem wanem em inap i stap strong long spirit. Em i tok: “Mi save beten. . . . Na sampela skripsa bilong Baibel i save strongim bel bilong mi, olsem Aisaia 41:​10, em i tok: ‘Yupela i no ken pret, long wanem, mi God bilong yupela na mi stap wantaim yupela. Bai mi mekim yupela i kamap strong na bai mi helpim yupela. Bai mi was gut long yupela na long bikpela strong bilong mi bai mi daunim ol birua bilong yupela.’ ”

Nau yumi go long Jilkmingan, em i stap long hap saut bilong Dawin inap 450 kilomita, na yumi bungim wanpela liklik lain Aborijini. Inap planti yia ol man i tingim ol i olsem wanpela lain Witnes Bilong Jehova, long wanem, maski i no gat wanpela i baptais, planti bilong ol i save go oltaim long ol kibung. Dispela lain i gat nem long i stap klin long sindaun bilong ol. Tasol gutpela tru, nau sampela i sanap strong long tok i tru na ol i kisim baptais. Long ol Aborijini i stap long hap bilong bus, dispela lain i paslain long mekim olsem. Bilong lusim ol pasin tumbuna bilong lain bilong ol na ol samting bilong ol spirit nogut ol i save mekim, dispela lain bilong pasin daun ol i mas i gat strongpela bel na ol i mas bilip tru olsem spirit holi bilong Jehova bai helpim ol.

Yumi Go Long Alis Spring

Nau em taim bilong lusim “Hap Antap” na yumi go 1,600 kilomita na kamap long Alis Spring, klostu long dispela traipela maunten ston, Ers Rok. Kibung i kamap long Haus Kingdom bilong dispela hap na 130 manmeri bilong tupela kongrigesen ol i kam bung, na i gat masin bilong mekim kol haus na ol i ken sindaun gut na harim ol tok. Yumi lukim ol manmeri bilong kain kain skin​—⁠ol Polinisia, Waitskin, Aborijini​—⁠olgeta i amamas long bung wantaim ol narapela Kristen.

Orait, yumi lusim Alis Spring na yumi mekim laspela hap bilong dispela raun wantaim wasman distrik na meri bilong em. Yumi gat longwe rot, inap 2,000 kilomita, na yumi mas brukim dispela kantri na i go long hap not na is. Yumi gutbai long dispela ples insait tru long Ostrelia, na yumi go i go na bihain yumi kamap long ol gutpela bikbus bilong Kwinslan. Hia long not Kwinslan​—⁠em ples bilong traipela longpela rip​—⁠i gat planti kongrigesen na planti Witnes.

Tasol raun bilong yumi i no pinis yet​—⁠yumi mas mekim wanpela kibung moa. Yumi kisim balus long Kens​—⁠em wanpela biktaun bilong Kwinslan i gat nem, long wanem, em i stap klostu long dispela traipela rip (Great Barrier Reef)​—⁠na yumi go long hap bilong not tru long poin ol i kolim Kep Yok Peninsula, na yumi brukim solwara Tores Stret na yumi pundaun long Ailan Tesde. I gat wanpela liklik kongrigesen i stap, na i gat 23 pablisa tasol. Olsem na yumi amamas long lukim 63 i bung long dispela laspela kibung long raun bilong yumi!

Ating yu bin kisim amamas long raun wantaim mipela na lukim gutpela wok ol brata sista i mekim long dispela kantri i gat ol narapela narapela kain ples. Gutpela sapos bihain yu inap i kam lukim mipela long dispela narapela kain kantri i stap daunbilo tru, na yu ken bungim ol dispela brata sista ol i mekim gut wok bilong ol long autim tok long ol dispela ples i narapela kain.

[Mep/Piksa long pes 23]

(Bilong save ol dispela rait i stap we long pes, lukim buk o magasin)

Pot Hetlan

Kanbera

Tom Prais

Mabol Ba

Niuman

Dawin

Katerin

Alis Spring

Ers Rok

Ailan Tesde

Kens

Adelet

Melbon

Hobat

Sidni

Brisben

Pet

[Piksa long pes 24]

Pet, biktaun bilong Westen Ostrelia

[Piksa long pes 25]

Wok bilong autim tok long rot i kamapim gutpela samting