Taim Bilong Kisim Kaikai Bilong Gaden!
KIRAP long bipo na i kam inap nau, bilong wanem ol misin ol i kolim “Kristen” i no bin bihainim pasin Kristen? Planti man i gat dispela askim, tasol klostu 2,000 yia bipo Jisas i bin bekim dispela askim long wanpela tok piksa. Em i stori long “wanpela man i tromoi ol gutpela pikinini wit long gaden.” Bihain “birua bilong dispela man i kam, na em i tromoi ol pikinini bilong gras nogut namel long wit.” Orait, taim pikinini wit i kru, ol wokman i lukim gras nogut tu i kamap, na ol i laik kamautim. Tasol man i tok: “Larim tupela i kamap wantaim, inap long taim bilong kisim kaikai.” Long taim bilong kisim kaikai bilong gaden, ol bai bungim wit i go narapela na gras nogut i go narapela.—Matyu 13:24-30.
Jisas i kamapim as bilong dispela tok piksa na em i tok, em yet em dispela man i bin tromoi “ol gutpela pikinini wit” long gaden—em ol Kristen tru. Dispela birua em Satan, na em i bin tromoi “pikinini bilong gras nogut” namel long wit—em ol Kristen giaman i bin kam insait long kongrigesen. Jisas i larim ol Kristen tru na ol Kristen giaman i stap wantaim—inap long taim bilong kisim kaikai bilong gaden. Em nau, ol bai bungim ol Kristen tru i go narapela na ol Kristen giaman i go narapela.—Matyu 24:36-44.
Olsem na yumi no kirap nogut taim yumi save, inap planti handet yia pinis ol misin ol i kolim “Kristen” i bin mekim nogut long biknem bilong God taim ol i kisim ol bilip haiden, na ol i orait long pasin pamuk samting, na ol i helpim ol pait bilong dispela graun, na ol i bin kamapim kot bilong misin na bagarapim planti manmeri i no bihainim bilip bilong ol. Em nau, yumi inap luksave olsem dispela ol lain em ol gras nogut Satan i bin planim. Tasol yumi save kaunim stori bilong ol wan wan man ol i nolaik tru long brukim ol lo bilong Baibel na long dispela as ol i kisim kalabus o ol i dai, olsem na yumi save, gras nogut i no bin daunim gutpela pikinini wit olgeta.
Jisas i tok, taim bilong kisim kaikai em “las de bilong dispela graun.” Nau yumi stap long taim bilong las de, olsem na yumi save, nau em i taim bilong kisim kaikai bilong gaden! Olsem na yumi mas ting, wok bilong bungim ol Kristen tru i go narapela na ol Kristen giaman i go narapela, dispela wok tu i bin kamap. Long nau i mas i gat wanpela lain i stap, em ol inapim mak bilong Kristen tru olsem Jisas i bin kolim—ol i daun long Kingdom bilong God na autim tok bilong en, na ol i skulim ol man long ol lo bilong Baibel long stretpela pasin, na ol i sakim ol bilip haiden na skulim ol man long tok tru bilong Baibel, na ol i kamapim nem bilong God long ol man, na ol i no insait long ol pasin bilong dispela graun.—Matyu 6:33; 24:14; Jon 3:20; 8:32; 17:6, 16.
Mipela tok stret long yu—wanpela lain olsem ol i stap tru! Olsem wanem long yu? Yu laik mekim wok bilong God long pasin em i laikim? Sapos olsem, orait yu mas painim dispela lain na bai yu ken wok wantaim ol long mekim wok bilong God.