Ol i Autim Tok Long Ol Ples Long Spen

KRAIS JISAS i bin “wokabaut i go long rot bilong Jerusalem. Na em i go long ol taun na ples na skulim ol manmeri.” (Luk 13:22) Bilong mekim dispela wok bilong ol, Jisas wantaim ol disaipel i no autim tok long ol biktaun tasol, nogat. Ol i autim tok long “ol ples” tu​—⁠ol i no abrusim ol dispela planti liklik ples i stap nabaut.a

Ol Witnes Bilong Jehova long Spen i gat bikpela wok tru ol i mas mekim, wankain olsem bilong Jisas. I kam inap long 1970, i gat sampela bikpela hap tru em “kaikai i mau pinis long gaden” na i no gat wanpela i autim tok long ol dispela hap. (Matyu 9:​37, 38) Long planti handet ples long ol maunten long hap bilong not, em ples bilong ren, na long ol stretpela hap graun i drai, na long ol hap bilong nambis, ol man i no bin harim yet tok bilong Kingdom.

Olsem na ol Witnes long Spen i laik wok strong long bringim gutnius bilong Kingdom long ol dispela hap. Tasol olsem wanem na ol dispela lain i mas wet longtaim bilong harim tok bilong Kingdom? Na taim ol i harim pinis, ol i ting olsem wanem long en?

Gavman i Orait Long Ol

Taim bikpela pait bilong Spen i pinis long 1939, gavman i tambuim wok bilong ol Witnes Bilong Jehova. Kirap long 1951 i go inap 1969, ol Witnes i was gut na ol i autim tok long ol biktaun, long wanem, ol man i no luksave tumas long ol. Orait, taim gavman i pinisim tambu long 1970, i gat olsem 10,000 manmeri long Spen i autim tok bilong Kingdom. Klostu olgeta ol i sindaun long ol biktaun, tasol ol liklik ples long Spen ol tu i mas harim tok bilong Kingdom. Orait, husat bai mekim dispela bikpela wok?

Kirap long 1973 i go inap 1979 ol i stretim rot bilong autim gutnius long olgeta hap bilong Spen. Klostu olgeta mun namel long 1973 na 1979 ol i putim ol toksave long wanpela pepa bilong ol Witnes, Wok Kingdom Bilong Yumi, long ol ples long Spen ol i no bin autim tok yet long en. Em nau, planti famili ol i orait long i go sindaun long ol dispela hap na autim tok long ol man.

Yumi ken tingim stori bilong Rosendo na meri bilong em Luci. Ol i mekim wok painia salim (ol i save wok olgeta de long autim tok bilong Kingdom) na ol i go long wanpela liklik ples long hap not-wes bilong Spen, em ples bilong ol man bilong kisim pis. Bihain tupela i gat pikinini na ol i tingting long sindaun olgeta long dispela ples. Rosendo i tok: “I hatwok tru long painim wok mani na sampela taim mipela i sot tru, tasol mipela i wetim Jehova i helpim mipela na mipela i no bin lus olgeta long kaikai o long ples slip. Tasol gutpela samting i kamap long wok bilong mipela.” Taim ol i stap long dispela hap, ol i bin helpim wok bilong kamapim 4-pela kongrigesen long dispela hap bilong Spen.

Painim Man i Gat Gutpela Bel

Jisas i bin tokim ol disaipel, ol i mas i go long ol taun na ples na “painimaut gut” wanem ol man bilong dispela ples ol i gat gutpela bel. (Matyu 10:11) Long ol hap bilong bus long Spen, ol i mas wok strong tru bilong painim ol kain man olsem. Ángel em wanpela brata bilong Alikante, na em i pilim tru dispela samting. Em i autim tok pinis long sampela haus long ples Masias, na nau em i harim wanpela kakaruk i krai. Nau em i tingting: “Sapos i gat kakaruk i stap, i mas i gat wanpela haus i stap na mipela i no bin autim tok long en.” Em i wok long painim painim dispela haus, na bihain em i lukim wanpela liklik rot i bihainim kil bilong wanpela liklik maunten na bihain em i kamap long wanpela haus.

Wanpela man nem bilong em José na susa bilong em Dolores, em ol i gat 60 krismas samting, ol i sindaun long dispela haus. Ol i putim gut yau long tok bilong Baibel na kwiktaim ol i orait long stadi long Baibel. Tasol i hatwok long stadi wantaim tupela, long wanem, tupela i no save rit rait, na tupela i no save long tok Spen​—⁠tupela i save tasol long tok Valensia, na brata i mas tanim ol tok i go long dispela tok ples. Na tu, ol wanples i givim bikpela hevi long tupela. Tasol José na Dolores i wok long kamap strong na ol i go long ol miting, maski ol i mas wokabaut longwe long ples maunten. Bihain tupela i kisim baptais, na tupela i stap strong yet na mekim wok bilong Jehova.

Rosendo na Luci i tingim yet wanpela meri skin bilong em i dai, em i bin kisim tok i tru. Nem bilong em María. Em i stap long wanpela haus klostu long Moanya long hap not-wes bilong Spen, na i no gat narapela haus klostu. Long namba wan taim bilong em long toktok wantaim ol Witnes, em i no save long rit rait, na inap planti yia em i slip long bet tasol, long wanem, sik polio i bin kisim em taim em i pikinini yet. Haus bilong em i stap longwe long rot inap olsem tupela kilomita. Tasol em i amamas long stadi long Baibel, na i no longtaim na em i laik mekim wok bilong Jehova. Em i lain long rit rait, na kongrigesen i helpim em na em i kirap i go long ol miting. Ol brata i save karim em 200 mita samting i go long wanpela rot na ol i putim em gut long ka. Pastaim famili bilong em i laik pasim em, tasol em i wok long kamap strong na bihain em i kisim baptais. Ol dispela samting i strongim bel bilong em na em i lain long draivim wanpela ka i stret long em, na em i skul tu long sampela samting. Rosendo i tok, “Taim mi helpim ol kain manmeri olsem María, mi amamas long mekim, maski mi gat hatwok tru.”

Ol Man Bilong Kaunim Baibel Ol i Amamas Long Harim Gutnius

Long 1970 samting ol man bilong Spen inap kisim Baibel; em namba wan taim ol inap mekim olsem. Planti ol i baim Baibel, na sampela i kirap long kaunim. Pilar em i wanpela meri bilong Medina del Kampo, na taim ol Witnes i kam namba wan taim long taun bilong em long autim tok long 1973, em i kirap pinis long kaunim Baibel. Em i Katolik, olsem na em i no laik kisim buk o nius samting long ol Witnes. Tasol em i laik kisim save long ol tok bilong Baibel. Olsem na em i orait long ol i kam long haus bilong em long olgeta wik na bekim ol askim bilong em long ol tok bilong Baibel.

Wanpela sista painia i kam lukim Pilar na em i mekim wok long ol buk na nius samting bilong Sosaiti Was Taua bilong bekim ol planti askim bilong Pilar. Pilar i kirap nogut long ol save em i wok long kisim, olsem na sampela wik bihain em i orait long stadi long Baibel long rot bilong buk Tok i Tru i Bringim Man Long Laip Oltaim. Taim em i no pinisim yet stadi bilong em long dispela buk, em i kaunim pinis olgeta tok bilong Baibel, na em i save em i painim pinis tok i tru. Em i kamap namba wan Witnes long Medina del Kampo, nau i gat wanpela gutpela Haus Kingdom long en na wanpela kongrigesen i gat 63 manmeri bilong autim tok.

Ol Witnes long Spen i save painim yet ol man i pilim olsem ol i sot long ol samting bilong spirit na ol i save kaunim Baibel oltaim na bai ol i ken save long laik bilong God. (Matyu 5:⁠3) Pastaim Pepi em i wanpela Katolik na em i save skulim ol man long katekismo long Sumaia (hap not bilong Spen). Em i autim tok long wanpela ples na em i bungim pris i save lukautim dispela ples.

Pris i tokim em, “Pepi, yu lusim nating taim bilong yu. Long dispela liklik ples Itsiar, i gat tupela tasol i stap em ol i tingim ol samting bilong God​—⁠em tupela marit. Ol narapela i save go nating long lotu.”

Pepi i tokim em: “Sapos i gat tupela i save tingim ol samting bilong God, orait ol bai kamap Witnes Bilong Jehova.”

Pepi i wok long i go long ol haus na autim tok wantaim ol narapela Witnes inap long taim ol i pinisim olgeta haus long ples. Na tru tumas, long wanpela haus ol brata i painim dispela tupela marit em pris hia i bin toktok long en. Tupela i kaunim Baibel i stap tasol ol i no kisim gut tok bilong en. Tupela i amamas tru long stadi long Baibel, na tupela i wok long kamap strong hariap na ol i kisim baptais long Epril 1991.

Sampela man i gat gutpela bel ol i kisim save long tok i tru taim ol yet i kaunim ol buk samting bilong Baibel em Sosaiti Was Taua i bin wokim. Ol Witnes long Almaden i autim tok long liklik taun Siruelas na ol i bungim wanpela meri na em i putim gut yau long tok bilong ol. I olsem em i gat laik tru long harim, olsem na ol i tok ol i laik stadi wantaim em long Baibel. Tasol em i tok wanpela lapun man i save skulim em long Baibel. Sampela manmeri moa long dispela hap ol tu i tok olsem. Nau tingting bilong ol brata i kirap, na ol i wok long askim ol man, dispela lapun man i save stap we. Ol i kisim atres bilong em na ol i go lukim em.

Ol i kirap nogut taim ol i harim olsem dispela man, nem bilong em Felipe, em i bin kisim wanpela buk long Madrit, Yu Inap i Stap Oltaim Long Paradais Long Graun. Taim em i kaunim pinis, em i save em i gat wok long autim gutnius long ol man long hap bilong em. Olsem na em i kirap mekim wok long dispela buk bilong skulim ol man long Baibel. Ol brata i stretim tok long stadi wantaim em. Wanpela meri em Felipe i bin stadi wantaim em, em tu i laik bai ol brata i stadi wantaim em. Felipe i gat 80 krismas na em i gat sik, tasol em i wok long kamap strong long tok i tru.

Ol i Senisim Tingting

Wanpela hevi bilong autim tok long sampela hap bilong bus, em ol man i strong long bihainim pasin na bilip bilong ol tumbuna, na planti man long ol dispela hap ol i save surik long ol “nupela lotu.” Sampela ol i pret long senisim lotu bilong ol, nogut ol wanples na famili i birua long ol. Tasol Tok bilong God i gat bikpela strong, na em inap helpim man long daunim ol dispela tingting na senisim pasin bilong em. Dispela samting i kamap long wanpela liklik ples bilong ol man bilong kisim pis, em Kangas de Moraso long hap not-wes bilong Spen.

Roberto i bilong dispela ples, na em i kirap wok boskru long sip taim em i gat 14 krismas, long wanem, em i laik bai em yet i bosim sindaun bilong em. Ol yangpela wanwok bilong em ol i save dring planti na kisim ol drak na bai ol i ken daunim bel hevi bilong ol long i stap planti mun samting long solwara. I no longtaim na Roberto tu i kamap man bilong dring na kisim drak.

Bihain Roberto i go bek long ples, tasol em i no inap lusim ol dispela pasin nogut bilong em, na em i no laik lusim tu. Bilong baim drak em i kirap long stil, na em i kalabus 6-pela taim. Taim em i gat 18 krismas, em i dring wain em i bin tanim wantaim sampela strongpela marasin bilong mekim man i stap bel isi, na klostu em i bagarap. Ol dokta i mekim na em i stap laip, tasol han lek bilong em i dai. Em i mas sindaun tasol long wilsia, tasol maski​—⁠em i no lusim drak. Em i lukim pasin bilong ol lotu na em i les long ol. Em i pilim olsem i gat wanpela samting tasol bilong mekim gut bel bilong em​—⁠em ol drak. Tasol tripela yia bihain ol Witnes Bilong Jehova i kam autim tok long em.

Pastaim Roberto i no bilip tumas long Baibel, tasol em i kisim save long ol tok profet i kamap tru pinis, na nau em i no gat tupela tingting moa. Na taim em i go long Haus Kingdom, ol i mekim gut long em na em i save, lotu i tru i save helpim ol man na i stap bilong ol i kamap gutpela. Insait long 9-pela mun Roberto i lusim ol drak na em i kisim baptais. Maski skin bilong em i dai, em i mekim wok painia inap 8-pela yia pinis, na em i stap elda long kongrigesen inap tupela yia pinis. Wanpela poroman bilong bipo, em Francisco, em i kirap nogut long Roberto i senisim tru pasin bilong em, olsem na em tu i kamap wanpela Witnes Bilong Jehova, na nau em i wanpela wokman bilong kongrigesen. Na ol wanples bilong em tu ol i lukim pasin bilong em i senis olgeta, na maski em i bin kalabus olgeta long drak, em i lusim pinis. Olsem na nau ol i lukim olsem wok bilong yumi i save helpim ol man. Wanpela yangpela man i save kisim drak oltaim na mama i kisim em i kam long Haus Kingdom, long wanem, em i laik bai ol Witnes i ken helpim em long lusim drak.

Painim Tok i Tru Long Baibel

Planti manmeri long hap bilong bus ol i save laikim tumas tok i tru bilong Baibel, na sampela taim dispela i semim ol man i gat bikpela save bilong graun. (1 Korin 1:​26, 27) Adelina, em i gat 50 krismas samting, em i wanpela meri olsem. Bipo em i givim bel tru long lotu bilong em, em lotu Katolik. Long olgeta moningtaim em i save brukim skru na beten, na em i kolim kolim Beten Bilong Bikpela na beten bilong litimapim nem bilong Maria. Long wanpela de em i mekim beten long nem bilong wanpela “santuman” na long narapela de em i mekim long narapela “santuman.” Em i ting, sapos em i mekim olsem, orait wanpela bai harim beten bilong em.

Taim Adelina i kirap stadi long Baibel, em i givim bel long dispela nupela bilip em i kisim, wankain olsem em i bin mekim long olpela lotu bilong em. Maski em i meri bilong sem, dispela i no pasim em. Tru, taim em wantaim man bilong em i go long Haus Kingdom long namba wan taim, tupela i sem long i go insait, na ol i sanap ausait inap tenpela minit. Tasol bihain ol i strongim bel na i go insait, na Adelina i putim gut yau long ol tok bilong miting. Wanpela taim em i kisim save olsem Krais bai stap King inap wan tausen yia. Em i pilim tru dispela tok, na taim em i go bek long haus em i laik kaunim sampela tok moa bilong dispela long Baibel bilong em. Tasol em na man bilong em tu i no inap painim long Baibel​—⁠ol i ting em i stap long hap bilong Kamapim Tok Hait. Olsem na long dispela nait stret Adelina i kirap kaunim hap bilong Kamapim Tok Hait na em i kaunim i go na klostu long tulait em i kamap long sapta 20 na em i lukim dispela tok.

Long narapela taim Adelina i kisim save olsem taim tupela marit i laik beten wantaim, man yet i mas mekim. Man bilong em i orait long mekim, tasol em i no save em bai mekim wanem tok insait long beten. Orait, long dispela nait Adelina i kirap long lukim Baibel bilong painim sampela tok bilong beten. Em i mekim mekim, na klostu tulait em i kirapim man bilong em na em i tok em i painim pinis sampela tok bilong beten long Matyu sapta 6. Orait, nau man bilong em i kaunim ol dispela tok bilong Jisas long beten, na bihain em i mekim beten. Nau tupela i Witnes Bilong Jehova.

Ol i Kisim Planti Kaikai Long Gaden

Ol wokman bilong Jehova i autim tok long ol hap bilong bus inap 25 yia, olsem na gutnius i go long olgeta hap bilong Spen. Olsem long Esia long taim bilong ol aposel, long nau tu ‘tok bilong Jehova i go nabaut long olgeta hap bilong dispela kantri.’ (Aposel 13:49) Olsem na planti tausen manmeri bilong ol liklik ples i givim bel long tok bilong Baibel.

Bilong autim tok long hap bilong bus long Spen na ol narapela hap tu, ol Witnes i mas taitim bun na daunim sampela laik bilong ol yet. Tasol God i laik ‘kisim bek olgeta kain man,’ olsem na ol i amamas long raun na painim ol man i laik harim tok bilong Baibel. (1 Timoti 2:⁠4) Ol dispela stori i kamapim klia olsem Jehova i blesim tru ol man i wok strong long autim tok long ol liklik ples long Spen.

[Ol Futnot]

[Mep long pes 23]

(Bilong save ol dispela rait i stap we long pes, lukim buk o magasin)

FRANS

POTYUGAL

SPEN

OL AILAN BALEARIK

OL AILAN KANERI

[Piksa Kredit Lain long pes 24]

Vilac, Lérida

[Piksa Kredit Lain long pes 24]

Puebla de Sanabria, Zamora

[Piksa Kredit Lain long pes 25]

Casarabonela, Málaga

[Piksa Kredit Lain long pes 25]

Sinués, Huesca

[Piksa Kredit Lain long pes 26]

Lekeitio, Vizcaya