Ai Bilong Yumi i Mas “Gutpela” Bilong Mekim Wok Bilong Kingdom

BIPO Jemani i bruk na i kamap tupela kantri, olsem Is Jemani na Wes Jemani. Is Jemani i bikpela olsem Laibiria o provins Tenesi long Yunaitet Stets. Tupela Jemani i stap olsem inap 41 yia, na long Oktoba 3, 1990, Is na Wes Jemani i pas wantaim na i kamap wanpela kantri tasol na i kisim nem Federal Ripablik Bilong Jemani.

Taim tupela Jemani i kamap wanpela, planti senis i mas kamap. I no ol samting bilong politik o gavman tasol i mas senis. Tupela lain i gat narapela narapela pasin bilong ol. Dispela i mekim wanem long sindaun bilong ol man? Na olsem wanem long ol Witnes Bilong Jehova?

Paslain long Novemba 1989 olpela gavman bilong Is Jemani i bin bosim strong ol man inap 40 yia, na long dispela taim i gat tambu i stap long ol Witnes Bilong Jehova, na gavman i bin mekim nogut long ol.a Taim gavman bilong Is Jemani i pinis, ol man i amamas, tasol amamas bilong ol i no stap longpela taim, long wanem, gutpela taim i no bin kamap olsem ol i bin ting bai kamap. Nau gavman i gat bikpela wok long mekim tupela lain i stap gut na wok gut wantaim.

Wanpela nius (Der Spiegel) i stori long “162 De Bilong Ol Samting i Bin Kamap Long Jemani,” na nius i tok, taim tupela kantri i kamap wanpela, ol man i pret long ol samting. Ol i ting bai ol i no gat wok mani, na pe bilong ol samting bai go antap, na ol i no gat pensen, na ol bai sot long haus. Ol haus long Is Jemani i laik bagarap, na long sampela rot klostu olgeta haus i bagarap na i no inap ol man i ken sindaun long en. Na tu, ol man i bin bagarapim graun na wara na win.

I gat ol Witnes Bilong Jehova long Is Jemani, olsem na yumi laik save, ol i stap olsem wanem na ol i mekim wanem long taim tupela kantri i pas wantaim na ol dispela hevi i bin kamap?

Ai i Mas Skelim Gut Ol Samting

Ol Witnes Bilong Jehova i no gat tingting long kamapim ol bikpela samting long dispela graun, nogat. Bilip bilong ol Witnes long hap bilong Is i wankain olsem ol Witnes long hap bilong Wes. Taim sindaun bilong ol i senis, dispela samting i no bagarapim bel bilong ol. Ai bilong ol i stap yet long ol samting bilong spirit, i no long ol samting bilong skin o bilong graun. Ol i tingting tasol long mekim wok bilong Jehova. Bilong wanem dispela kain tingting i bikpela samting tru?

Long wanem, “i no longtaim na bai [pasin bilong] dispela graun wantaim olgeta samting bilong en bai i pinis.” (1 Korin 7:31) Wanpela elda i tok, man i mas i gat strongpela bel na bai em inap autim tok long taim i gat tambu, na ol Witnes i bin tingim Jehova bai helpim ol, na ol i lain long mekim wok long Baibel. Na em i tok, “tasol nau tambu i pinis, na mipela i mas lukaut, nogut ol mani samting bilong graun i pulim mipela.”

Sampela man i ting, sapos yumi stap fri na ol samting long kantri i kamap gutpela, em i taim bilong kisim ol samting bilong skin. Na long dispela hap ol i bin sot long ol samting bilong skin inap longtaim, na nau ol i ting em i taim bilong ol long kisim ol dispela samting. Long ol taun na ples long Turinjia na Saksoni i no gat gutpela rot o haus, tasol ol man i gat televisen. Ol i ting, sapos ol i gat ol samting ai bilong ol i laikim, ol bai stap amamas. Dispela kain samting i olsem umben i kalabusim ol.

Jisas i tok, no ken tingim tumas ol hevi bilong graun, na “no ken bungim ol gutpela gutpela samting bilong yupela hia long dispela graun.” Na em i tok: “Ai em i lam bilong bodi. Sapos ai bilong yu i gutpela, orait lait bai i pulap long olgeta hap bodi bilong yu.” (Matyu 6:​19, 22) Sapos ai i “gutpela,” em i kisim piksa bilong ol samting na i givim long tingting. Na sapos Kristen i gat “gutpela” ai bilong spirit, bai ai bilong em i putim piksa bilong Kingdom bilong God i go long tingting, na maski lukluk long ol samting bilong graun. Dispela bai helpim em long i stap strong long ol samting bilong spirit.

Long taim olpela gavman i laik pinis, tupela marit long Swikau long Saksoni i laik kisim save long Baibel. Bisnis bilong ol i pulim bikpela hap taim bilong ol, tasol ol i tingim samting bilong spirit na ol i kam long ol miting. Ol i tok: “Bisnis i bikpela samting bilong mipela, tasol mipela pilim olsem mipela i mas tingim ol samting bilong spirit.” Em gutpela tingting bilong ol!

Na yumi ken tingim wanpela famili i stap long Plauen long Saksoni. Papa i gat bisnis long stretim ol hanwas, tasol taim gavman bilong Is Jemani i pinis ol i apim tru pe bilong haus em i wokim bisnis long en. Em i tok: “Mi kisim pinis tok i tru, na em i namba wan samting bilong mi.” Em i kisim narapela haus i no gutpela tumas tasol i no gat bikpela pe. Em nau, ai bilong dispela man i “gutpela” na em i givim bel long ol samting bilong spirit.

Tasol mani i bin pulim sampela. Wanpela elda Kristen i bin ting, nupela gavman i opim rot na bai em i ken kirapim wanpela bisnis. Em i mekim olsem, tasol wanpela wasman sekit i tokim em long was gut, nogut em i lusim wok bilong spirit. Tasol sori tumas, bisnis i pulim em olsem, na em i lusim wok elda. Bihain em i raitim pas na i tok: “Sapos sampela brata i laik kisim sampela wok bilong God insait long kongrigesen, nogut ol i kirapim bisnis bilong ol yet.” Tru, i no gat rong sapos Kristen i gat wanpela bisnis, tasol yumi no ken tingting tumas long mani na ol samting bilong dispela graun na bai dispela tingting i bosim yumi. Jisas i tok: “I no gat wanpela man inap i stap aninit long tupela bosman wantaim. . . . Yupela i no inap i stap aninit long God na long mani wantaim.” (Matyu 6:24) Wanpela man bilong raitim stori long Jemani, nem bilong em Goethe, em i tok: “Sapos samting i kalabusim man, tasol em i ting em i stap fri, em i stap kalabus tru.”

Sapos bikpela ren i kam daun na yu hatwok long putim ai i go long rot yu laik wokabaut long en, ating yu mas haitim ai liklik long han bilong yu na bai ai inap lukim rot tasol na ol narapela samting nogat. Long nau i gat planti samting i laik pulim tingting o ai bilong yumi, tasol sapos yumi wok strong yumi inap givim baksait long dispela ol samting na putim ai i stap long ol samting bilong spirit tasol. Ol Kristen i ken mekim wanem na bai ai bilong ol i “gutpela” bilong mekim wok bilong Kingdom?

Wok Bilong Kingdom i Go Bikpela

Ol Witnes long hap ol i bin kolim Is Jemani ol i wok strong moa long wok bilong Kingdom. Long tupela yia i go pinis, ol aua ol i lusim long mekim dispela wok i go bikpela inap 21 pesen. Na wok Baibel-stadi i go bikpela inap 34 pesen! Na nau i gat planti painia oltaim, winim tupela yia bipo inap 4-pela taim! Ol narapela man i toktok planti long ol hevi, tasol 23,000 Kristen bilong dispela hap ol i bin kolim Is Jemani ol i putim ai i go stret long wok bilong Kingdom, olsem na lain bilong ol i go bikpela tru.​—⁠Lukim Josua 6:⁠15.

Planti Witnes i stap long hap bilong saut, olsem na ol inap lukautim gut wok bilong Kingdom long dispela hap. Sampela taun i gat biknem long bipo, na nau ol Witnes i stap long ol dispela taun. Wanpela taun olsem em Meisen, klostu long Dresden, em i gat nem long wokim ol gutpela gutpela plet na kap simen. I gat 130 manmeri long dispela hap ol i save autim tok bilong Kingdom. Na bipo tupela man bilong rait i bin stap long taun Weima, em Goethe na Schiller, na i gat wanpela memorial bilong ol i stap. Na i gat 150 pablisa i stap long Weima, ol i autim gutnius long dispela hap.

Tasol long hap bilong not i narapela kain. I no gat planti pablisa i stap, na ol kongrigesen i stap longwe longwe. Na i no gat planti wok mani tu. Ol man i mas wok strong na wok ovataim na bai bos i no rausim ol. Wanpela brata i wok painia na em i tok: “Taim gavman i bin tambuim wok bilong ol Witnes, Jehova i mas lukautim ol long taim ol i autim tok, tasol i no hatwok long kisim wok mani. Tasol long nau ol samting i senis. Nau mipela i fri long autim tok, tasol Jehova i mas helpim mipela long painim wok mani.”

Na olsem wanem long ol pablisa? Ol i amamas long raun planti taim long autim tok? Ol i amamas. Wolfgang i tok: “Sapos pablisa i raun autim tok planti taim long wanpela hap tasol, em gutpela, long wanem, bihain ol man bai save gut long em na ol i no pret o sem long sanap na toktok wantaim em, maski sampela man i lukim ol. Long nau ol samting bilong lotu i no tambu olsem long bipo.” Ralf na Martina tu i gat wankain tingting. Ol i tok: “Mipela i amamas long raun autim tok planti taim long wanpela hap tasol. Mipela inap long save gut long ol man, na nau mipela i gat planti kain buk samting, na mipela i amamas tu long dispela.”

Amamas Long Ol Buk

Ralf na Martina i amamas tru long wanpela buk (Life​—⁠How Did It Get Here? By Evolution or by Creation?) Sosaiti i bin kamapim. Planti man hia long hap ol i bin kolim Is Jemani ol i no bin bilip long God, na dispela buk i gutpela bilong stadi wantaim ol. Tupela i bin laik long kisim wanpela buk i gat wankain tok, tasol i no bikpela olsem dispela. Orait, nau Sosaiti i kamapim wanpela olsem long ‘Ol Man i Stap Olsem Lait’ Kibung Distrik long 1992 long Dresden, em wanpela buklet, Tru God i Save Tingim Yumi? Nau tupela i amamas na i tok, “Jehova i bin harim beten bilong mipela.”

Planti man i ting ol buk bilong Sosaiti Was Taua i gutpela. Long Julai 1992 wanpela savemeri bilong skulim ol man em i bin tok, ol dispela buk i gutpela samting na em i amamas long en. Em i kisim ol tok long en bilong skulim ol man. Long Janueri 1992 tupela Witnes long Rostok i go long haus bilong wanpela meri na givim buk long em, em buk Yu Inap i Stap Oltaim Long Paradais Long Graun. Meri i raitim pas i go long brens-ofis long Jemani na i tok: “Mi bilong Misin Luteran, tasol mi ting ol Witnes Bilong Jehova i mekim gutpela wok. Ol i tok, ol man i no inap bosim gut sindaun bilong ol​—⁠God i mas bosim.”

Ol misin i no bin givim gutpela save long lain bilong ol long ol samting bilong spirit. Wanpela nius i gat nem (Die Zeit), em bilong Disemba 1991, em i tok, “ol man i bin litimapim nem bilong Misin Luteran na ol i bin ting em yet i kamapim gutaim na ol man i stap fri, tasol long nau ol i no amamas moa long en.” Wanpela bikman bilong Misin Luteran i tok: “Ol man i bin ting paradais bai kamap long rot bilong ol dispela nupela pasin bilong wok bisnis ol man i kamapim, tasol nau tingting bilong ol i paul.” Wanpela man bilong dispela misin long Magdebek i raitim pas long brens-ofis long Jemani na i tok: “Inap planti yia mi no bin bilip, na mi bin amamas long i stap olsem, tasol nau mi ting olsem liklik taim ol samting bilong graun bai bagarap, na klostu nau planti hevi bai painim ol man.”​—⁠2 Timoti 3:​1-5.

Ol i Wokim Planti Haus

Pastaim i tambu long wokim wanpela Haus Kingdom long hap ol i bin kolim Is Jemani, tasol long nau nogat, na ol brata i sot long ol Haus Kingdom, olsem na ol i kirap long wokim planti. Dispela i mekim, na kwiktaim bikpela senis i bin kamap long ol samting bilong trupela lotu.

Long Mas 1990 gavman i pinisim tambu i bin stap long ol Witnes Bilong Jehova, na sampela aua bihain ol brata i makim wanpela brata long givim tok long sampela Witnes, na dispela i namba wan taim em i bin holim maikrofon na mekim tok. Tupela yia hap bihain kongrigesen bilong em i dediketim wanpela nupela Haus Kingdom. Long pinis bilong yia 1992 i gat 7-pela Haus Kingdom ol i bin wokim, na 16 kongrigesen i save mekim miting long ol. Ol i wok long sanapim 30 Haus Kingdom moa na wanpela gutpela Haus Kibung.

Putim Ai Long Kingdom

Wanpela elda Kristen i tok: “Taim tupela Jemani i kamap wanpela kantri, planti man i no laik bilip moa long Baibel. Ol i givim bel long wanpela nupela gavman inap long kamapim gutaim na givim gutpela sindaun long ol.” Na yu ting gutaim i bin kamap? Elda i tok moa olsem: “Tupela yia i go pinis, na ol i senisim tingting bilong ol. Nau ol i save pinis, ol gavman bilong graun i no inap kamapim gutaim na stretpela pasin.”

Ol man i bin amamas long taim gavman komyunis i pinis long Is Jemani. Ol i ting gutaim nau bai kamap olsem i stap long hap bilong Wes. Tasol sori tumas, gutaim i no kamap. Maski wanem gavman nau i stap, ol Witnes Bilong Jehova i no tingting long ol dispela samting bilong graun. Ai bilong ol i stap tasol long Kingdom bilong God, nau i olsem bikpela sta i lait long antap. Sapos yumi bilip na wetim dispela, bihain yumi no inap bel hevi.​—⁠Rom 5:⁠5.

[Ol Futnot]

[Ol Piksa long pes 26]

I no gat tambu moa long ol Witnes long Jemani, olsem na ol i givim bel long wok bilong Kingdom