Kain Olsem Apel Gol

APEL​—⁠em wanpela gutpela kaikai i swit long maus, na em i gutpela samting long ai tu! Baibel i mekim wanpela tok piksa long dispela gutpela kaikai na i givim gutpela tingting long yumi. Em i tok: “Sapos man i autim klia tru wanpela gutpela tingting, orait tok bilong en i olsem gutpela piksa ol i wokim long gol na bilasim long silva.”​—⁠Sindaun 25:⁠11.

Ating dispela i toktok long samting ol i sapim o wokim, olsem plet silva ol i bilasim long ol pikinini bilong diwai ol i wokim long gol. Sampela ves paslain long ves 11 i toktok long king. Olsem na ating ves 11 i toktok long presen ol i givim long king, olsem ol bilas gol ol i wokim olsem apel na ol i putim long plet silva. (Sindaun 25:​4-6) Em gutpela presen tru!

Sapos yumi mekim o raitim gutpela tok, em i olsem ol dispela gutpela bilas gol ol i wokim olsem apel. Dispela i save strongim bel bilong ol man na helpim ol. Na ol tok God i kirapim ol man long raitim long Baibel ol i “olsem gutpela piksa ol i wokim long gol na bilasim long silva.”

Yumi tingim tru dispela gutpela savetok bilong King Solomon long Sindaun 25:11. Oltaim em i wok strong long “painim tok i swit long yau bilong ol man, na em i raitim gut ol dispela trupela tok.” (Saveman 12:10; Sindaun 25:⁠1) Na sampela handet yia bihain aposel Pol i tok: “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru.” (2 Timoti 3:16) Baibel i gat tok bilong skulim yumi, na i gat ol tok profet na tok piksa na ol trupela tok i winim olgeta tok bilong ol saveman bilong graun. Sapos yu kisim na bihainim tok bilong Baibel, bai yu kisim gutpela samting tru, na em i ken helpim yu long painim rot bilong i stap oltaim.​—⁠Sindaun 4:​7-9; Jon 17:⁠3.