Husat i Bilip Olsem Ol Spirit Nogut i Stap?
YU BILIP olsem ol spirit nogut inap mekim sampela samting long yu? Planti man bai tok, nogat. Ol i bilip olsem God i stap, tasol ol i no bilip liklik olsem ol spirit nogut i stap.
Long hap bilong Wes planti man i no bilip olsem ol spirit i stap. Wanpela as bilong dispela, em ol lotu ol i kolim Kristen ol i skulim ol man olsem graun i stap namel tru long ol sta, na em i stap namel long heven na wanpela ples daunbilo i gat bikpaia long en. Ol i tok, ol ensel i save stap long gutpela ples long heven, tasol ol spirit nogut i bosim ol wok bilong bikpaia.
Taim ol saveman i wok long kisim save bilong saiens, nau ol man i sakim ol dispela tok kranki long graun i stap namel tru long ol sta, olsem na planti man i no bilip moa long ol spirit. Wanpela buk (The New Encyclopædia Britannica) i tok: ‘Long yia 1550 samting, Kopenikus, em wanpela saveman bilong ol sta, em i kamapim save olsem graun i no stap namel tru long ol sta—em yet i wanpela sta, olsem planet, na em i stap insait long wanpela lain sta tasol, na i gat planti lain sta moa i stap, i olsem i no gat pinis bilong en. Orait, taim ol i kisim pinis dispela save, ol i ting i no stret sapos yumi bilip yet olsem ol ensel na ol spirit nogut i stap.’
Tru sampela man i no bilip long ol spirit nogut, tasol planti ol i bilip. Ol spirit nogut i bikpela samting long planti lotu bilong bipo na nau. Ol i bilip olsem ol spirit nogut i gat wok long paulim man na em i no tingim moa ol samting bilong God, na ol i kamapim ol bikpela bagarap olsem pait na hangre na guria samting, na ol i givim sik long man na sik bilong tingting tu, na ol i save mekim na man i dai.
Long ol lotu ol i kolim Kristen, na lotu Juda tu, nambawan bikpela spirit nogut em Satan, na ol lain Muslim i kolim em Iblis. Long lotu Soroastrian bilong Persia long bipo, ol i kolim Satan olsem Angra Mainyu. Long lotu Nostik bilong yia 100 na 200 samting, ol i ting Satan em i wanpela god i liklik tasol na em i bel nogut long God, na klostu olgeta man i bin lotu long em na ol i no save.
Na ol lotu long hap bilong Is ol i bilip long ol nambatu spirit nogut. Ol Hindu i bilip olsem ol spirit nogut i birua long ol god. Ol i tok, ol god i pret moa long ol raksasas, em ol i gat pes nogut tru na ol i save raun long ol ples matmat.
Ol Buda i ting ol spirit nogut i olsem wanpela strong i gat ol pasin olsem bilong man, na ol i save pasim rot na ol man i no inap kamap long Nevana (i makim olsem olgeta laik bilong man i pinis). Ol i tok, nambawan bilong ol spirit nogut em Mara, na em i gat tripela pikinini meri, em Rati, (Laik Bilong Bel), na Raga (Amamas), na Tanha (I No Stap Isi).
Ol Saina i save mekim wok long paia na sutlam na ol i save kukim paura bilong sakim ol kuei, em ol spirit nogut. Ol lotu bilong Japan i tok i gat kain kain spirit nogut, na wanpela kain em tengu, em i save go insait long man na ol pris i mas rausim.
Na long sampela lotu bilong Esia na Afrika na ol ailan bilong solwara Pasifik na Not na Sentral na Saut Amerika, ol i bilip olsem ol spirit inap helpim o bagarapim man. Ol man i givim biknem long ol na bai bagarap i no ken painim ol, na ol dispela spirit i ken helpim ol.
Na planti man i save laikim marila na ol narapela wok bilong ol spirit nogut, na yumi save pinis, dispela pasin bilong bilip long ol spirit nogut em i kirap long bipo yet na i kisim planti lain. Tasol yu ting i stret yumi ken bilip olsem ol spirit nogut i stap? Baibel i tok ol i stap. Tasol sapos olsem, orait bilong wanem God i larim ol i mekim nogut long ol man?