Baibel i Tok Wanem?

Ol Spirit Nogut Ol i Husat?

OL MASALAI, tambaran, na tewel, em ol spirit em ol man bilong kain kain lotu i bilip long en na ting olsem ol i save nogutim man, helpim man, o mekim tupela samting wantaim. Na sampela man i no save bilip long ol spirit​—⁠ol i ting em i wanpela stori nating bilong ol tumbuna o samting long tingting bilong ol man tasol. Tasol Baibel i tok wanem?

Baibel i tok Man Bilong Wokim olgeta samting, em yet i wanpela Spirit, na ol namba wan samting em i bin wokim, em ol spirit olsem ol ensel. (Jon 4:24; Hibru 1:​13, 14) Na Baibel i tok tu long ol spirit nogut. (1 Korin 10:​20, 21; Jems 2:19) Tasol Baibel i no tok God i bin wokim ol spirit nogut. Orait ol i husat, na ol i bin kamap olsem wanem?

“Sampela Ensel i Bin Mekim Sin”

Taim God i wokim ol spirit, em i wokim ol i stap fri long makim rot ol i laik bihainim, ol inap makim olsem ol bai mekim gutpela pasin o pasin nogut. Tasol sori tru, taim God i wokim ol man, sampela ensel​—⁠em yumi no save ol i hamas​—⁠ol i laik mekim pasin nogut na bikhet long God.

Namba wan spirit i bin bikhet long God, em i kamap Satan. Jisas Krais i tok: “Em i no bihainim pasin i tru.” (Jon 8:44) Wanem samting i bin kirapim Satan long bikhet long God? Em i kirap long mangalim lotu em olgeta man i mas givim long God wanpela tasol, na bilong inapim dispela laik, em i mekim em yet i kamap wanpela god. Long dispela rot em i mekim em yet i kamap “Satan,” mining bilong en i olsem “birua.” Sampela handet yia bihain, paslain long Bikpela Tait long taim bilong Noa, sampela ensel moa i bihainim Satan, na ol i lusim ples bilong ol long heven na tanim i kamap man na stap long graun. (Stat 6:​1-4; Jems 1:​13-15) Taim Bikpela Tait i kamap, ol dispela “ensel i bin mekim sin” ol i go bek long ples bilong ol spirit. (2 Pita 2:4; Stat 7:​17-24) Bihain, ol i kisim nem olsem ol spirit nogut.​—⁠Lo 32:17; Mak 1:⁠34.

Orait nau ol dispela bikhet ensel, ol i no gat wankain sindaun olsem ol i gat paslain long taim ol i bikhet long God. Jut 6 i tok: “Ol dispela ensel ol i no laik i stap gut long dispela wok God i bin givim ol, na ol i lusim ples bilong ol. Olsem na Bikpela i pasim ol long ol sen i save stap oltaim oltaim, na em i kalabusim ol i stap long dispela ples i tudak nogut tru. Ol i wetim De bilong bikpela kot bilong God.” Em nau, God i no larim ol dispela spirit nogut i holim ol gutpela wok long heven olsem bipo​—⁠i olsem em i kalabusim ol i stap long “ples i tudak nogut tru,” na ol i no inap kisim lait i kam long God, nogat tru.

“Giamanim Olgeta Manmeri Bilong Graun”

Tru, i luk olsem God i bin pasim rot bilong ol spirit nogut long tanim i kamap man gen, tasol ol i gat bikpela strong yet na ol inap stiaim tingting na i stap bilong ol man. Tru tumas, Satan wantaim ol spirit nogut bilong em ol i wok long “giamanim olgeta manmeri bilong graun.” (KTH 12:9; 16:14) Ol i mekim olsem wanem? Wanpela bikpela rot, em long rot bilong ol ‘tok bilong ol spirit nogut.’ (1 Timoti 4:⁠1) Ol dispela tok giaman, em planti bilong ol em ol tok bilong ol lotu, i pasim tingting bilong planti milion manmeri na ol i no save gut long God. (2 Korin 4:⁠4) Tingim sampela eksampel:

● Ol i tok ol man i dai pinis ol i stap laip yet. Ol man i lukim ol samting i luk olsem man i dai pinis, na harim wanpela nek i toktok, na ol kain trik olsem, em ol rot ol spirit nogut i yusim bilong giamanim ol manmeri long bilip olsem ol man i stap laip yet, ol inap toktok wantaim ol man i dai pinis. Na tu, dispela pasin trik i strongim dispela tok giaman olsem taim bodi bilong man i dai, spirit bilong em i stap laip yet. Tasol Baibel i tok klia olsem: “Ol man i dai pinis, ol i no inap save long wanpela samting.” (Saveman 9:​4-6) Ol i go pinis long “ples bilong ol” man i dai pinis, olsem na ol i no inap litimapim nem bilong God.​—⁠Song 115:17.a

● Ol i no bihainim ol lo bilong stretpela pasin. Long 1 Jon 5:​19, Baibel i tok: “Dispela graun olgeta em i stap aninit long strong bilong Satan.” Long strong ol i holim, Satan wantaim ol spirit nogut bilong em ol i mekim wok long ol nius na TV samting bilong strongim dispela tingting olsem ol man i ken bihainim olgeta laik nogut bilong skin. (Efesus 2:​1-3) Olsem na olgeta kain pasin nogut, na ol pasin pamuk i gat sem i kamap bikpela tru long nau. Ol man i ting ol dispela pasin i orait tasol long mekim, na ol i ting ol lo bilong Baibel em samting bilong bipo, o ol i ting ol dispela lo i pasim tumas ol man.

● Ol i kirapim ol man long mekim wok bilong ol spirit nogut. Aposel Pol i bin bungim wanpela wokmeri i gat ‘wanpela spirit i save tokaut long ol samting bai kamap bihain,’ olsem na “ol bosman bilong dispela meri i save kisim planti mani long wok dispela meri i save mekim.” (Aposel 16:16) Pol i save long as bilong dispela strong meri i holim, olsem na em i no laik harim tok bilong em. Na tu, em i no laik mekim pasin God i no laikim, husat i tingim olgeta kain wok bilong ol spirit nogut​—⁠olsem pasin bilong lukluk long ol sta, na singautim ol spirit​—⁠em ol samting i nogut tru.​—⁠Lo 18:​10-12.

Lukautim Yu Yet Long Ol Spirit Nogut

Olsem wanem yu inap lukautim yu yet na bai ol spirit nogut i no ken bosim yu? Baibel i tok: “Yupela i mas daunim yupela yet na i stap aninit long God. Yupela i mas sakim Satan, na em bai i lusim yupela na ranawe.” (Jems 4:⁠7) Yumi bihainim dispela tok taim yumi bihainim tok bilong Baibel long wokabaut bilong yumi, em dispela wanpela buk holi i save kamapim long ples klia ol “trik na giaman” bilong Satan na ol spirit nogut bilong em. (Efesus 6:11; 2 Korin 2:11) Na Baibel i tokim yumi olsem ol spirit nogut wantaim olgeta man i birua long God, ol bai no stap oltaim. (Rom 16:20) Sindaun 2:21 i tok: “Ol gutpela stretpela man bai i stap gut oltaim long graun bilong yumi.”

[Futnot]

YU LAIK SAVE?

[Piksa long pes 19]

● Yu ting God i bin wokim ol spirit nogut?​—2 Pita 2:⁠4.

● Yu ting yu inap toktok wantaim ol man i dai pinis?​—Saveman 9:​4-6.

● Olsem wanem yu ken lukautim yu yet na bai ol spirit nogut i no ken bosim yu?​—Jems 4:⁠7.

[Piksa long pes 19]

Ol spirit nogut i laik pulim ol man long kain kain rot