Strong Bilong Jisas i Winim Ol Spirit Nogut

YU TINGIM yet i gat wanem as na wanpela ensel bilong God i kamap Satan?— Laik nogut bilong em olsem ol man i mas lotuim em i kirapim em long birua long God. Yu ting sampela narapela ensel i bihainim Satan?— Yes. Baibel i kolim ol olsem ‘ol ensel bilong Satan,’ o ol spirit nogut.—KTH 12:9.

Yu ting ol dispela ensel nogut, o spirit nogut, ol i bilip long God?— Baibel i tok ‘ol spirit nogut i bilip olsem God i stap.’ (Jems 2:19) Tasol long nau ol i pret, long wanem, ol i save olsem God bai givim strafe long ol long pasin nogut ol i bin mekim. Ol i bin mekim wanem ol pasin nogut?—

Baibel i tok ol dispela ensel i bin lusim ples tru bilong ol long heven na ol i kam daun long graun bilong stap olsem ol man. Ol i mekim olsem, long wanem, ol i laik slip wantaim ol naispela meri bilong graun. (Stat 6:​1, 2; Jut 6) Yu gat wanem save long pasin bilong man na meri i slip wantaim?—

Pasin bilong slip wantaim i makim olsem man na meri i pas wantaim long wanpela gutpela rot. Bihain, bebi inap kamap insait long bel bilong mama. Tasol i no stret long ol ensel i slip wantaim ol meri. God i laik bai man na meri i marit, ol tasol i ken slip wantaim. Olsem na sapos bebi i kamap, man na meri marit inap lukautim em.

Taim ol ensel i tanim i kamap man na ol i slip wantaim ol meri bilong graun, ol bebi bilong ol i kamap traipela tru. Ol i man nogut tru na ol i save mekim nogut long ol manmeri. Olsem na God i kamapim wanpela bikpela tait bilong bagarapim ol dispela traipela man na olgeta man nogut. Tasol em i tokim Noa long wokim wanpela sip na bai liklik lain man i mekim stretpela pasin ol i ken abrusim bagarap. Bikpela Tisa i tok samting i bin kamap long taim bilong Bikpela Tait em i bikpela samting long yumi mas tingim.—Stat 6:​3, 4, 13, 14; Luk 17:​26, 27.

Taim Bikpela Tait i kamap, yu save wanem samting i kamap long ol ensel nogut?— Ol i tanim i kamap spirit gen, na ol i go bek long heven. Tasol ol i no inap stap moa olsem ol ensel bilong God, olsem na ol i kamap ol ensel bilong Satan, o ol spirit nogut. Na wanem samting i kamap long ol pikinini bilong ol, ol dispela traipela man?— Ol i dai long Bikpela Tait. Na olgeta manmeri i sakim tok bilong God, ol tu i dai.

Bihain long Bikpela Tait na i kam inap long nau, God i no bin larim ol spirit nogut i tanim i kamap man gen, nogat. Tasol maski yumi no inap lukim ol, ol spirit nogut i wok yet long pulim ol man long mekim ol pasin i nogut tru. Ol i wok long kamapim planti hevi moa, winim olgeta taim bipo. Ol i mekim olsem, long wanem, God i bin rausim ol long heven na tromoi ol i kam daun long graun.

Yu save long as na yumi no inap lukim ol spirit nogut?— Yumi no inap lukim ol, long wanem, ol i spirit. Tasol yumi ken save olsem ol i stap laip. Baibel i tok Satan i ‘wok long giamanim ol manmeri long olgeta hap bilong graun,’ na ol spirit nogut i wok long helpim em.—KTH 12:​9, 12.

Yu ting Satan na ol spirit nogut bilong em inap giamanim yumi tu?— Yes, ol inap mekim sapos yumi no was gut. Tasol yumi no ken pret. Bikpela Tisa i tok: ‘Satan i no gat strong long mekim wanpela samting long mi.’ Sapos yumi stap klostu long God, em bai lukautim yumi na Satan na ol spirit nogut i no ken bagarapim yumi.—Jon 14:30.

Em i bikpela samting long yumi mas save long ol samting nogut ol spirit nogut i laik pulim yumi long mekim. Olsem na tingim dispela samting. Ol spirit nogut i bin mekim wanem ol pasin nogut taim ol i kam long graun?— Paslain long Bikpela Tait, ol i bin slip wantaim ol meri, em samting i no stret long ol ensel i mekim. Long nau ol spirit nogut i save amamas taim ol man i no bihainim lo bilong God long pasin bilong slip wantaim. Mi laik askim yu, Husat tasol inap slip wantaim?— Yu tok stret, ol manmeri i marit.

Long nau sampela yangpela pikinini man na pikinini meri ol i save slip wantaim, tasol i no stret long ol i mekim olsem. Baibel i soim olsem God yet i bin wokim sem bilong man na meri. Jehova i wokim ol dispela hap bilong bodi bilong ol marit tasol inap amamas long en. Ol spirit nogut i save amamas taim ol man i mekim ol pasin Jehova i tambuim. Olsem: Ol spirit nogut i save amamas taim wanpela pikinini man na pikinini meri i pilai long sem bilong narapela narapela. Yumi no laik amamasim ol spirit nogut, a?—

I gat narapela samting tu em ol spirit nogut i save laikim tasol Jehova i nolaik tru long en. Yu save em wanem samting?— Pasin bilong kros pait. (Sindaun 3:31) Kros pait i makim pasin bilong mekim nogut tru long narapela na bagarapim ol. Tingim, em dispela pasin ol traipela man, ol pikinini bilong ol spirit nogut, ol i bin mekim.

Ol spirit nogut i save amamas tu long pretim ol man. Sampela taim ol i giaman olsem ol i manmeri i dai pinis. Ol inap makim nek bilong ol. Long dispela rot, ol spirit nogut i save giamanim planti man long ting olsem ol daiman i stap laip na ol inap toktok wantaim ol man. Yes, ol spirit nogut i save kirapim ol man long bilip long tewel.

Olsem na yumi mas was i stap na bai Satan na ol spirit nogut i no ken giamanim yumi. Baibel i tok lukaut olsem: ‘Satan i save traim long senisim pasin bilong em na kamap olsem gutpela ensel, na ol wokman bilong em tu i save mekim olsem.’ (2 Korin 11:​14, 15) Tasol tru tru, ol spirit nogut ol i lain nogut. Orait yumi ken stori long olsem wanem ol inap traim long pulim yumi long kamap olsem ol.

Yu ting long wanem rot ol man i save kisim planti save long pasin bilong kros pait, pasin pamuk, na ol spirit na tewel?— Em long rot bilong lukluk long sampela kain program bilong televisen na muvi, ol kompiuta na vidio gem, na sampela stori buk, a? Taim yumi mekim ol dispela samting, dispela bai helpim yumi long i go klostu moa long God o long Satan na ol spirit nogut bilong em? Yu ting wanem?—

Yu ting husat i laik bai yumi putim yau na lukluk long ol stori nogut?— Yes, em Satan na ol spirit nogut bilong em. Olsem na yu na mi i mas mekim wanem?— Yumi mas ritim, harim, na lukluk long ol samting i gutpela bilong helpim yumi long mekim wok bilong Jehova. Yu inap tingim sampela gutpela samting yumi inap mekim?—

Sapos yumi mekim ol gutpela samting, i no gat as long yumi pret long ol spirit nogut. Jisas i gat bikpela strong moa, winim ol spirit nogut, na ol i pret long em. Wanpela taim ol spirit nogut i bin singaut na tokim Jisas olsem: “Ating yu kam bilong bagarapim mipela?” (Mak 1:24) Yumi bai amamas taim de i kamap bilong Jisas i bagarapim Satan na ol spirit nogut, a?— Long nau yet, yumi ken bilip tru olsem Jisas bai lukautim yumi na ol spirit nogut i no ken bagarapim yumi sapos yumi stap klostu long em na Papa bilong em long heven.