“Dua Bilong Banis Bilong Taun”
WANPELA nius (Science, Jun 7, 1991) i tok: “Taim 40 pesen bilong ol pikinini long Yunaitet Stets i no kisim yet 18 krismas, papamama bilong ol bai katim marit bilong ol.” Em planti tru! Bilong wanem dispela samting i save kamap?
Edward M. Ginsburg em jas bilong kot bilong stretim ol samting bilong ol marit na famili, na em i tokim wanpela nius (The Boston Globe) olsem: ‘Ol manmeri i save bihainim laik bilong ol wan wan yet, maski long narapela, na ol marit i no tingim laik bilong poroman bilong ol—ol i tingting tasol long inapim laik bilong ol yet.’
Olsem na ol dispela marit i no stap wanbel. Kros pait i save kamap namel long tupela. Jas i tok, taim tupela i kot long katim marit bilong tupela, narapela i save tok, ‘Asua bilong narapela; mi yet mi no gat rong.’ Ol i laik winim kot na bai ol pren bilong ol i tok, ‘Yu win!’
Baibel i tok piksa long man i “pasim dua bilong banis bilong taun,” na i tok: “Sapos tupela man i tok pait na i no sekan, dispela bai i pasim rot bilong tupela na tupela i no inap kamap wanbel.” (Sindaun 18:19) Taim kros i kamap namel long tupela marit olsem, narapela i no laik harim tok bilong narapela o mekim pasin sori o senisim tingting bilong em, olsem ol man i save mekim taim ol birua i kam na ol i “pasim dua bilong banis bilong taun.”
Tasol i no olsem tupela i mas i stap olsem na ol i no inap stretim, nogat. Sapos tupela i harim tok bilong Pol, dispela bai strongim marit bilong tupela. Em i tok: “Yupela i mas mekim gutpela pasin long ol arapela Kristen na givim bel bilong yupela long ol. Yupela i mas lusim sin bilong ol.” (Efesus 4:32) Sampela taim i hatwok long mekim olsem, tasol sapos ol i katim marit dispela bai kamapim bikpela pen moa long man na meri na ol pikinini. Ol pikinini bai kisim nogut tru, na ol bai pilim dispela hevi inap long ol i bikpela pinis.
I gutpela sapos tupela i ken wok long strongim marit bilong ol, nogut ol i pasim “dua bilong banis bilong taun.” Ol i mas bihainim tok bilong Pol olsem: “Givim bel bilong yupela long ol arapela manmeri. Dispela pasin i winim tru olgeta arapela pasin.”—Kolosi 3:14.
[Piksa Kredit Lain long pes 32]
The Complete Encyclopedia of Illustration/J. G. Heck