Askim

God i toksave long Kein olsem ‘sin i redi long bagarapim’ em, olsem wanpela wel animal i redi long holim em na bagarapim em. (Stat 4:⁠7) Tasol long dispela taim paslain long Tait Wara ol animal i no inap bagarapim man. Ol i kaikai gras o ol lip bilong diwai samting. Olsem wanem long dispela?

Moses i bin raitim sampela ol hap bilong Baibel, na taim em i raitim stori bilong ol samting i bin kamap bipo, i olsem em i kolim sampela samting i no bin i stap long dispela taim, olsem ol animal i save bagarapim man samting.

Na i olsem tu long Stat 2:​10-14. Moses i stori long gaden Iden, na em i tok, wanpela wara i ran i go long hap “bilong kantri Asiria.” Tasol dispela nem “Asiria” ol i kisim long nem bilong Asur, pikinini bilong Siem, na em i bin kamap bihain long Tait Wara. (Stat 10:​8-11, 22; Esekiel 27:23; Maika 5:⁠6) Moses i bin tok “Asiria,” long wanem, long taim bilong Moses, ol man i save long kantri Asiria. Ol tok Moses i raitim i stret olgeta, long wanem, spirit bilong God i bin stiaim em.

Na yumi ken tingim stori i stap long Stat 3:24 i tok, taim Adam tupela Iv i raus long Iden, God “i putim wanpela bainat i gat paia i lait long en na i save tanim tanim” bilong pasim rot na ol i no ken go insait gen. Tasol olsem wanem long dispela tok, “bainat i gat paia long en na i save tanim tanim”? Ating God em i namba wan bilong wokim bainat, a?

Nogat. God em i Man bilong pasin sori. Adam tupela Iv i lukim wanpela samting i “tanim tanim.” Em wanem samting? Taim Moses i raitim stori bilong Stat em i kolim dispela samting olsem “bainat,” long wanem, long taim bilong Moses i gat ol bainat i stap na ol man i save mekim wok long en long taim bilong pait. (Stat 31:26; 34:26; 48:22; Kisim Bek 5:21; 17:13) Olsem na dispela tok bilong Moses long bainat em i helpim ol man long save long dispela samting i bin pasim rot bilong Adam tupela Iv. Na yumi save dispela tok bilong Moses i stret, long wanem, Jehova i bin putim long Baibel.​—⁠2 Timoti 3:⁠16.

Na olsem wanem long dispela tok hia long Stat 4:7? God i tokim Kein olsem: “Sapos yu mekim pasin nogut, orait sin bai i redi long bagarapim yu. Sin i gat bikpela laik tru bilong winim yu. Tasol yu mas strong na winim em.” I olsem wanpela wel animal olsem laion samting i laik holim Kein, a?

Tasol long taim Adam tupela Iv i stap long Iden, ol animal i bin stap gut wantaim tupela. Ol i no inap kaikai man o holim man. Ating sampela i bin stap klostu long tupela, na i gat sampela animal bilong bus ol i laik i stap longwe long ol man. (Stat 1:​25, 30; 2:19) Baibel i no tok, sampela animal i bin kaikai ol narapela animal o kaikai man. God i makim gras na sayor na kumu na ol lip na pikinini bilong diwai na ol samting bilong gaden em kaikai bilong animal wantaim man. (Stat 1:​29, 30; 7:​14-16) Ol samting i stap olsem tasol inap long Tait Wara, na bihain long en dispela samting i senis, olsem Stat 9:​2-5 i makim.

Orait, olsem wanem long dispela toksave God i givim long Kein, olsem yumi lukim long Stat 4:7? Long taim bilong Moses ol inap pilim gut olsem dispela tok i makim wanpela animal nogut i laik holim Kein na bagarapim em. Na yumi tu inap pilim gut dispela tok. Ating Moses i laik mekim kain tok em ol man bihain long Tait Wara ol i save mekim. Na maski Kein i no bin lukim wanpela animal nogut olsem, ating em inap pilim gut dispela toksave bilong God olsem sin i redi long bagarapim em, olsem wanpela animal nogut i laik bagarapim em.

Ol bikpela samting yumi mas tingim hia i olsem: God i bin mekim pasin sori long Kein na toksave long em na bai em i ken abrusim pasin nogut. Yumi mas daun long God na harim tok bilong em. No ken bel nogut long sampela man. Yumi mas givim yau long olgeta toksave God i bin putim long Baibel bilong helpim yumi.​—⁠Kisim Bek 18:20; Saveman 12:12; Esekiel 3:​17-21; 1 Korin 10:11; Hibru 12:11; Jems 1:​14, 15; Jut 7, 11.