Ol Man i Askim . . .

Kein i Kisim We Meri Bilong Em?

▪ “Sapos Adam na Iv i gat tupela pikinini man tasol, em Kein na Abel, orait Kein i kisim we meri bilong em?” Tru, planti taim ol man i gat tupela tingting long Baibel ol i save kamapim dispela askim bilong trikim yumi, tasol Baibel i kamapim sampela tok bilong helpim yumi long kisim gutpela bekim long dispela askim.

Buk Stat sapta 3 na 4 i kamapim ol tok olsem: (1) Iv em i “tumbuna mama bilong olgeta manmeri.” (2) Sampela haptaim i lus namel long taim mama i karim Kein na taim Kein i mekim ofa em God i no orait long en. (3) Bihain long Kein i kisim strafe bilong em na kamap “tripman na raun raun,” em i pret long “ol man i bungim em” na kilim em i dai. (4) God i putim wanpela mak bilong lukautim Kein, nogut ol bratasusa o wanblut bilong em bai traim long kilim em i dai. (5) Bihain, Kein i slip wantaim meri bilong em long graun ol i kolim “Raun Nabaut.”​—Stat 3:20; 4:​3, 12, 14-17.

Taim yumi skelim ol samting i stap antap, yumi ken save olsem meri bilong Kein em i pikinini bilong Iv, na Baibel i no stori long wanem taim mama i karim em. Stat 5:4 na 5 i tok, insait long 930 yia em Adam i stap laip, “em i gat ol arapela pikinini man na meri tu.” Tru Baibel i no tokaut stret olsem meri bilong Kein em i pikinini meri bilong Iv. Tasol Baibel i stori long meri bilong Kein bihain long Kein i bin kisim strafe bilong em, na dispela i makim olsem bikpela haptaim i bin lus, olsem na ating em i tumbuna pikinini meri bilong Adam na Iv. Baibel The Amplified Old Testament i tok, meri bilong Kein em “wanpela bilong ol tumbuna pikinini bilong Adam.”

Wanpela saveman bilong Baibel husat i bin stap bihain long yia 1800, Adam Clarke, em i tok Kein i pret, olsem na God i bin putim wanpela mak bilong lukautim em, long wanem, long dispela taim i gat pinis sampela lain tumbuna pikinini bilong Adam​—ol i planti inap long “kamapim sampela hauslain.”

Sampela lain long nau i ting i no stret liklik olsem Kein i maritim wanpela susa bilong em o pikinini em brata o susa bilong em i bin kamapim. As bilong dispela tingting em ol pasin bilong ples i gat tambu long dispela pasin o ol man i pret olsem pikinini i kamap long kain rot bai i gat sampela bagarap long skin o kamap longlong samting. Long The Narrated Bible in Chronological Order, F. LaGard Smith i tok: “I luk olsem ol dispela pikinini bilong Adam i bin maritim brata o susa bilong ol yet, maski dispela pasin i no stret sapos ol lain manmeri i bin kamap bihain i mekim olsem.” Na tu, yumi save olsem long yia 1513 B.C.E. Moses i kisim lo em God i givim long lain Israel, na kirap long dispela taim tasol God i tambuim pasin bilong ol wanblut i slip wantaim.​—Wok Pris 18:​9, 17, 24.

Long nau, yumi stap planti tausen yia bihain long taim we tupela tumbuna bilong yumi i bin gutpela olgeta. Ol samting ol jin inap mekim long bodi bilong yumi long nau, ating dispela i no bin putim hevi long ol. Na tu, sampela wok painimaut long nau, olsem wanpela i stap long nius Journal of Genetic Counseling i stori olsem sapos tupela kasen brata na sista i kamapim pikinini, orait pikinini bilong ol bai i no gat planti bagarap bilong skin olsem ol man i bin ting long bipo. Yumi ken ting dispela samting i no wanpela hevi long taim bilong Adam o paslain long taim bilong Noa. Olsem na yumi ken ting olsem meri bilong Kein i wanpela wanblut bilong em.