Ripot Long Wok Bilong Kingdom

Tok Bilong Baibel i Helpim Famili Long Pas Wantaim

LONG NAU, long planti hap, ol famili i no pas wantaim moa. Baibel i kolim samting famili i mas mekim na bai ol inap pas wantaim. Tingim tok bilong Jisas: “Man i . . . bihainim [tok bilong mi], em i olsem wanpela man i gat gutpela tingting, na em i wokim haus bilong en antap long ples ston.” (Matyu 7:24) Planti tausen famili long lain Witnes Bilong Jehova i bin bihainim dispela tok. Ol tok bilong Baibel i bin helpim ol long pas wantaim, na sampela moa i wok long kisim dispela gutpela pasin olsem stori hia i makim:

Daniel i stap long ami long Frans na wanpela taim pris bilong ami i tokim Daniel, gutpela sapos em i baim wanpela Baibel. Daniel i baim na em i kirap long kaunim long olgeta taim. Bihain ol i salim em i go long Tahiti. Sampela wanwok bilong Daniel long ami ol i bilong lotu Sevende na lotu Momon, na planti taim ol i toktok long lotu. Wanpela taim saiden-mesa i kisim Daniel i go sekanim meri bilong em, em wanpela Witnes Bilong Jehova. Long apinun olgeta, meri i bekim ol planti askim bilong Daniel, na helpim em long bung wantaim wanpela kongrigesen bilong ol Witnes long Tahiti. I no longtaim na Daniel i kirap long stadi long Baibel wantaim ol.

Papamama bilong Daniel long Frans i gutpela Katolik. Papa em i gat wok long helpim ol skulmanki, na em i bosim wok bilong lainim ol long lotu long wanpela skul Katolik. Daniel i laik bai papamama tu i save long ol gutpela tok em i lainim, olsem na isi isi em i raitim sampela tok bilong Baibel long ol pas em i salim long ol.

Pastaim mama i amamas, tasol bihain em i lukim nem Jehova long wanpela pas bilong pikinini na em i tingting planti. Sampela de bihain em i harim wanpela tok long redio i tok, ol Witnes Bilong Jehova i ‘lotu nogut.’ Olsem na em i raitim pas long Daniel na tokim em, em i mas lusim ol Witnes kwiktaim. Tasol Daniel i stadi i go na kamap strong. I no longtaim na em i stretim rot bilong lusim ami na i go bek long Frans.

Em i kam bek pinis long ples na long olgeta apinun em i toktok wantaim mama long ol tok bilong Baibel, sampela taim i go inap long biknait. Bihain mama i orait long go wantaim Daniel long Haus Kingdom. Em i amamas tru long namba wan miting em i go long en na em i kirap long stadi. Kwiktaim em i kamap strong na kisim baptais.

Papa bilong Daniel em i man bilong isi, tasol em i givim bel long ol wok bilong em na long lotu. Wanpela taim mama na Daniel i laik i go long kibung distrik na papa i kisim tupela i go long ka. Em Julai 14 na em i tingting long lukim mats bilong bikpela De Bastil long dispela taun. Em i wetim dispela, tasol em i laik save ol Witnes i mekim wanem long kibung, olsem na em i go insait long haus kibung. Em i lukim lain bilong Jehova i bihainim tok na sindaun gut, na em i pilim tru. Taim em i raun lukim ol dipatmen, olgeta i kolim em “brata.” Nau em i lusim tingting long mats bilong De Bastil na em i stap harim ol tok bilong kibung. Em i tok, em i laik stadi, na em i kisim kwik gutpela save long ol tok i tru bilong Baibel. Nau em i pilim olsem ol wok em i mekim i no stret. Olsem na taim em i gat 58 krismas, em i lusim wok bilong em. Nau tripela wantaim i dediket na baptais pinis na ol i wok wantaim long mekim wok bilong Jehova.

Tok i tru bilong Baibel i helpim famili bilong Daniel long pas wantaim. Na em inap helpim ol narapela famili tu long taim ol i kisim save long en na givim bel olgeta long bihainim.