Ripot Long Wok Bilong Kingdom
Em i Lainim Tok Bilong Baibel na Bihainim Maus Bilong Bel
KING Devit bilong Israel i beten askim Jehova long helpim em, em i tok: “Mi save mekim stretpela pasin. Yu ken marimari long mi na kisim bek mi.” (Song 26:11) God Jehova i mekim gut long Devit, long wanem, em i mekim stretpela pasin. God i mekim gut long Jisas tu, long wanem, em i bihainim laik bilong Em. Na Em i mekim gut long wanpela yangpela long Kalombia em i bin lainim tok bilong Baibel na bihainim maus bilong bel na em i strong long bihainim laik bilong God. Yangpela i stori olsem:
“Taim mi kirap long lainim Baibel wantaim ol Witnes Bilong Jehova, mi go long skul bilong misin Katolik. Tasol taim mi go long Misa, bel bilong mi i gat tok, olsem na mi go lukim het-tisa (em pris), na man bilong helpim ol skulmanki long hevi bilong ol, na wanpela gopas long lain bilong mi long skul, na bai ol i ken orait long mi no ken i go long Misa. Tasol sampela i laik subim mi long i go. Taim mi baptais na kamap Witnes pinis, bikpela hevi moa i painim mi. Papa bilong mi i tok, sapos ol i rausim mi long skul, em bai rausim mi long haus. Em i laik bai mi skul long yunivesiti na kisim bikpela wok.
“Het-tisa i mekim planti toksave olsem manki i no insait long ol samting bilong lotu Katolik em bai kisim strafe. Long taim bilong mekim namba wan Misa bilong yia, mi hait inap long em i pinis. Bihain mi givim buklet Skul na Ol Witnes Bilong Jehova long tisa (em pris) na mi tokim em, mi wanpela Witnes Bilong Jehova na mi no inap i go long Misa. Em i tok: ‘Gutpela yu painim narapela skul.’ Mi save, sapos ol i rausim mi long skul, papa bai rausim mi long haus. Tasol mi beten askim Jehova long helpim mi na mi wok yet long autim tok long ol wanskul.
“Taim bilong holide i kamap. Bihain mipela i go bek long skul na em i taim bilong mekim Misa gen. Het-tisa na ol narapela pris i wet ausait long haus lotu bilong harim ol manki i autim sin bilong ol. Mi pret nogut tru. Mi go insait na sindaun, tasol bel bilong mi i gat tok. Taim ol i kirap long mekim singsing, mi tingting olsem: ‘Olsem wanem na mi stap hia? Jehova em i God bilong mi. Mi no ken pret na lusim em. Mi no ken mekim em i bel hevi. Em i no ken lusim mi.’ Mi beten askim em long strongim mi na mi lusim haus lotu na i go lain wantaim ol narapela manki i wet long autim sin. Taim mi kamap pinis long het-tisa, mi tokim em: ‘Tisa, mi no kam bilong autim sin.’ Em i tok: ‘Mi save.’ Mi tok, maski ol i givim strafe long mi, mi no ken mekim Misa, long wanem, bel bilong mi i gat tok. Mi no inap sakim ol tok bilong Baibel mi bin lainim.
“Em i lukluk long mi, na lap na em i tok: ‘Mi laikim pasin bilong yu. Pasin bilong yupela olgeta Witnes i gutpela. Yupela i save tingim God pastaim na bihainim tok bilong em, maski wanem samting i painim yupela. Mekim yet. Yu mekim gutpela pasin. Mi laik bai olgeta Katolik i wok strong na givim bel tru long God olsem yupela i mekim. Yu no ken insait moa long ol pasin bilong lotu bilong mipela.’ Mi amamas tru! Mi strong long bihainim tok bilong maus bilong bel na Jehova i mekim gut long mi.
“Long de bihain, het-tisa i tokim ol sumatin: ‘Sampela lotu i winim yumi. Olsem wanem na yumi no wok strong na givim bel tru long God na laik tru long mekim wok bilong em, olsem ol i mekim? Em samting bilong bel bilong yumi.’
“Bihain ol i salim het-tisa i go wok long Rom, na nupela het-tisa i no wari long mi no save insait long lotu. Na papa i lusim mipela, olsem na i no gat samting i pasim rot bilong mi long mekim wok bilong God long olgeta de taim mi pinis long skul.”
Jehova i mekim gut long dispela yangpela i lainim tok bilong Baibel na bihainim maus bilong bel bilong em. Em bai mekim gut olsem long olgeta man i bihainim laik bilong em.—Sindaun 3:5, 6.