Abraham Ol i Planim Em Hia, Tasol Em i Stap Laip Yet?
Inap planti handet yia, ol Juda na Muslim na Kristen i bin go long dispela ples.
Yu ken i go lukim long olpela taun Hebron, long hap saut bilong Jerusalem. Ol i kolim dispela samting Haram el-Khalil na Matmat Bilong Ol Tumbuna. Planti man i ting, ol i bin planim Abraham na Aisak na Jekop hia wantaim meri bilong ol, Sara na Rebeka na Lea.
Abraham i laikim tumas meri bilong em, Sara, na Baibel i tok, taim Sara i dai, Abraham i baim hul bilong ston na hap graun long Makpela, klostu long taun Hebron, na em i planim Sara long dispela hul. (Stat 23:2-20) Bihain ol i planim Abraham tu long dispela hul na sampela moa long lain bilong em. Planti handet yia bihain, King Herot i wokim gutpela haus long hap ol i ting hul i stap long en, na bihain ol narapela man i kam na bosim dispela hap ol i bihainim bilip bilong ol yet na ol i senisim na skruim haus i go bikpela.
Taim yu go insait, yu lukim 6-pela matmat i stap nating. Liklik piksa hia em matmat bilong Aisak, em pikinini bilong Abraham. Klostu long en i gat ol hul long plua, em bilong ol man i ken go insait long ol rum i stap aninit. Ol saveman i ting bun bilong ol man i dai pinis longtaim bipo i bin stap long ol dispela rum.
Olsem wanem long Abraham? Yumi no save, matmat bilong em i stap insait long graun hia o nogat, tasol yumi save tru em i dai pinis longtaim bipo, a? Planti man i go lukim dispela matmat, ol i save long dispela. Tasol wanpela profet i winim Abraham em i tok, i olsem Abraham i stap laip yet. Olsem wanem em i stap laip yet? Na dispela i mas mekim wanem long bilip bilong yu?
Plis, kaunim stori long dispela nius (pes 3) nem bilong en: “Ol Famili Bilong Yu i Dai Pinis—Ol i Stap We?” Em i stori long tok dispela bikpela profet i mekim olsem Abraham i stap laip yet. Dispela inap helpim tru yu yet wantaim famili bilong yu.