Sapos Misin i Bruk—Em i Bruk Tru?
WANPELA nius i tok: “Ol i olsem wanpela bikpela famili i stap long olpela haus na ol i kirap nogut taim banis i pundaun wantu, na i olsem long olgeta rum insait long haus i gat bikpela tok pait i kamap—ol lain i givim bel long Jisas na paitim kundu, ol i singaut bikmaus long ol Anglo-Katolik i man bilong mekim pasin sodom na ol i pasim gutpela blakpela klos slika.”—The Sunday Times, bilong Landon, Epril 11, 1993.
Dispela famili em Sios Bilong Inglan, na ol i tok pait long larim ol meri i kamap pris. Tok piksa bilong nius i makim Sios Bilong Inglan, tasol em inap makim olgeta misin. Ol hetman bilong Misin Otodoks na pop ol i no orait long ol meri i ken kamap pris. Wanpela ripot i tok, ol misin “i laik wanbel gen, tasol nau dispela i no inap kamap kwiktaim.”
Misin i Bruk Tru?
Long Matyu 7:21, Jisas i tok planti man bai kolim em Bikpela, tasol ol i no “bihainim laik bilong Papa.” Wanpela nius (Maclean’s) i tok: “Ol man i kaunim tok bilong Matyu na i laik kisim laip, bai ol i hatwok long save long laik tru bilong God, long wanem, ol Kristen na ol misin i gat narapela narapela tingting.” Ol i skelim tingting bilong ol Kanada na ripot i tok, “Ol Kristen long Kanada i gat kain kain bilip na pasin bilong lotu; ol misin i no wanbel, na ol misin wan wan i bruk moa yet.”
Dispela ripot i tok, bikpela hap lain (91 pesen) bilong ol Katolik i orait long ol meri i mekim samting bilong pasim bel, tasol misin i tambuim dispela pasin. Na planti tru (78 pesen) i ting, misin i mas orait long ol meri i ken kamap pris. Na planti (41 pesen) i ting, “sampela taim” i stret meri i ken rausim bel. Nius i tok, insait long ol narapela narapela misin ol i tok pait long “planti askim bilong lotu,” na long dispela as, strong bilong ol bikpela misin i wok long pinis.
Ol i Gat Tupela Lo
Ol i gat tupela lo, na tingting bilong ol long stretpela pasin ol i mas bihainim, em i bruk nabaut. Sampela i tok, ol i bihainim lo bilong Baibel, tasol sampela i sakim. Tupela meri bilong mekim pasin sodom i “marit” long haus lotu bilong Metropolitan Sios Bilong Toronto. Yu ting dispela i stret long laik bilong God? Tupela i ting em i stret. Tupela i tok: “Laik i stap namel long mitupela, em mipela i laik kamapim long ai bilong God na ol man.”
Wanpela niusman i gat askim long pasin bilong wanpela asbisop Katolik, em i no rausim ol pris ol man i kotim ol long mekim pasin sem long ol manki i wok long alta; em i salim ol i go tasol long narapela haus lotu na ol inap bagarapim sampela manki moa. Pris Andrew Greeley i ting planti pris (2,000 i go inap 4,000) ol i bin bagarapim inap olsem 100,000 manki, na misin i no stretim ol.
Sapos misin i bruk, ol manmeri tu bai bruk nabaut. Long ol kantri Bolkan, ol “Kristen” bilong lain Serbia na Kroesia i pait na ol i ting dispela pait “i stret” na Krais i helpim ol long pait. Planti man insait long pait ol i pasim kruse, na ol i tok, wanpela i save “holim kruse long maus taim pait i kamap strong.”
“Yupela i No Ken Bruk Nabaut”
Tru, Baibel i no kolim lo bilong olgeta samting; long sampela samting, Kristen i mas bihainim tok bilong maus bilong bel. Tasol ol i no ken bruk nabaut. Pol i tok klia olsem: “Yupela olgeta i mas wanbel long ol toktok [na pasin] yupela i mekim. Yupela i no ken bruk nabaut.”—1 Korin 1:10; Efesus 4:15, 16.
Yumi stap 2,000 yia bihain long taim Pol i raitim dispela tok, na sapos yumi skelim lotu ol i kolim “Kristen” long nau, bai yumi gat planti askim. Bilong wanem ol “Kristen” i bruk nabaut? Misin i bruk, em inap i stap strong? Bihain bai ol misin i wanbel? Tok i kamap bihain long dispela bai stori long ol dispela askim.
[Piksa long pes 3]
Ol pris i no laik ol meri i rausim bel, olsem na ol i mats
[Kredit Lain]
Cover and above: Eleftherios/Sipa Press