Sapos Misin i Bruk​—⁠Em Inap i Stap Strong?

WANPELA buk i tok: “Olgeta man i bilip olsem Krais i kisim bek ol, ol i bilong Sios hia long graun. Maski ol misin i bruk long tupela lain, bilong Is na Wes, na maski ol misin Talatala i bruk long Misin Katolik​—⁠olgeta i wanpela Sios tasol.” (Christians in Communion) Man bilong raitim buk i ting, lotu Kristen em olgeta lotu i tok ol i bilip long Krais Jisas, maski ol i bruk bruk.

Ol dispela misin i bruk tru; ol bilip na lo bilong ol i narapela narapela na i pait. Wanpela man i tok: “Lotu Kristen bilong nau . . . i no gat strongpela lo; i no hatwok long insait long misin olsem i no hatwok long kalap long bas.” Olsem na yu ting ol misin i stap strong long spirit? Wanpela bisop Katolik (Basil Butler) i tok: “Lotu Kristen i bruk na i gat bikpela sik.” (The Church and Unity) Dispela sik i kamap olsem wanem? Em bai pinis?

“Man Bilong Sakim Lo”

Aposel Pol i tok, pasin bilong bruk nabaut bai kamap. Ol Kristen long Tesalonaika i ting taim bilong Krais i kam bek em i kamap pinis, na Pol i tokim ol: “Yupela i no ken larim wanpela man i giamanim yupela . . . Dispela De [bilong Jehova] i no inap kamap nating. Nogat. Pastaim planti man bai i bikhet na givim baksait long God. Na man bilong sakim lo bai i kamap ples klia.”​—⁠2 Tesalonaika 2:⁠3.

Dispela “man bilong sakim lo” i mekim na pasin bilong bikhet na givim baksait long God i kamap insait long lain Kristen. Husat dispela man? Em i no wanpela man tasol; em ol bikman bilong ol misin ol i kolim Kristen. Ol aposel i dai pinis, na bihain liklik dispela lain i litimapim ol yet i stap olsem ol bos bilong ol Kristen i lusim pinis tok i tru, em ol i bihainim ol bilip haiden na ol i ting yumi gat tewel, na ol i bilip long God Triwan samting. (Aposel 20:​29, 30; 2 Pita 2:​1-3) Dispela i olsem sik nogut i bagarapim bilip bilong ol; ol i bihainim ol tingting ol spirit nogut i as bilong en, na dispela i mekim na ol i bruk nabaut.​—⁠Galesia 5:​7-10.

Dispela sik i wok long kamap long taim bilong aposel Pol, em i tok: “Nau dispela pasin bilong sakim lo em i wok hait i stap. Em bai i hait i stap inap long taim dispela man i pasim rot bilong en, em bai i surik i go.” (2 Tesalonaika 2:⁠7) Taim ol aposel i stap yet, ol i pasim rot na pasin bilong givim baksait long God i no kamap bikpela; tasol taim ol i dai, nau dispela pasin i kamap bikpela, olsem sua nogut.​—⁠1 Timoti 4:​1-3; 2 Timoti 2:​16-18.

Wok bilong dispela “man bilong sakim lo” i kamap strong yet. Wanpela ripot bilong nau i stori long “wanpela misin i gat bikpela hevi long ol lo bilong pamuk na bilip bilong lotu,” na em i kamapim tok bilong wanpela bikman bilong Sios Bilong Inglan. Bikman i gat tok long misin, long wanem, ol i “no strong long ol pris i mas abrusim pasin pamuk. Na ol i makim ol man bilong pasin sodom i kamap pris. I olsem ol i tok, gutpela pasin em i nogut, na pasin nogut i gutpela.”​—⁠The Sunday Times Magazine, Landon, Novemba 22, 1992.

Wit na Gras Nogut

Krais Jisas yet i tok, inap liklik taim bai ol man i no inap lukim lotu Kristen tru long graun. Em i tok, taim em i kamapim lain Kristen em i olsem wanpela man i tromoi ol gutpela pikinini wit long gaden. Tasol “birua bilong dispela man i kam, na em i tromoi ol pikinini bilong gras nogut namel long wit.” Ol wokboi bilong em i laik kamautim gras nogut, tasol em i tok: “Nogat. Nogut yupela i wok long kamautim gras nogut na yupela i kamautim wit wantaim.” Ol i mas larim wit na gras nogut i kamap wantaim inap long wanem taim? Papa bilong gaden i tok: “Inap long taim bilong kisim kaikai.”​—⁠Matyu 13:​25, 29, 30.

Olsem na ol Kristen giaman i kamap wantaim ol Kristen tru inap long taim bilong “kisim kaikai,” em long taim bilong las de, na nau ol i tilim ol i stap tupela lain. (Matyu 28:20) Long rot bilong ol man i lusim bilip tru, Satan i kamapim lain Kristen giaman i bruk nabaut. (Matyu 13:​36-39) Na ol i kamapim lotu giaman i wankain liklik long lotu Kristen tru. (2 Korin 11:​3, 13-15; Kolosi 2:⁠8) Sios i bin stap long bipo i wok long bruk bruk na i hatwok long lukim husat ol i Kristen tru.

Ol Nupela Lotu i Kamap

Wanpela buk i tok, long nau “ol nupela lotu i kamap, olsem ol lotu karismatik, na ol i tok, Jisas i kamap long ol man yet na ol i bilip.” (The Testing of the Churches​—⁠1932-1982) Sampela man i lukim ol dispela kain lotu na ol i tok, dispela i makim olsem ol man i kirap gen long tingting strong long God, na i no olsem ol i bruk bruk na kamapim ol nupela lotu. Kain samting olsem i bin kamap long Noten Aialan long yia 1850 samting. Ol man i ting, nau bai gutpela samting i kamap. Wanpela ripot i stori long ol pasto bilong Misin Presbitirian na Misin Weslian na ol Independen “i pas wantaim olsem lain brata,” na long olgeta de ol i harim nupela stori long man i bin “lukim samting olsem piksa, o lukim driman, o mirakel.”​—⁠Religious Revivals.

Planti ol i ting ol dispela narapela kain samting ol i lukim i makim olsem spirit bilong God i wok long givim nupela strong long sios bilong em. Wanpela man i tok: “Long ol dispela hap, sios bilong God i kamap strong gen.” Ol i tok, “gutpela taim tru bilong lotu” i kamap long Alsta [Noten Aialan], tasol dispela kain samting i no bin helpim ol misin long Alsta o long narapela hap long i stap wanbel.

Ol dispela man i save tok, long ol bikpela tok ol i stap wanbel. Tasol olgeta misin i save tok olsem. Ol i ting “ol samting ol i wanbel pinis long en i bikpela samting moa, winim ol samting i wok yet long brukim ol i stap narapela narapela lain.” (The Church and Unity) Ol misin i tok: “Bikpela samting i mekim na mipela wantaim olgeta narapela Kristen i pas wantaim, em olsem: Mipela i baptais long Krais.” (Christians in Communion) Tasol sapos ol i tok, i no bikpela samting ol i bruk bruk, long wanem, olgeta i bilip long Krais, i olsem yumi tok, sik kensa i no bikpela samting, sapos klok i strong.

Samting tru i kamap long rot bilong ol dispela nupela lotu i olsem: Ol i paulim ol man moa yet na sakim ol lo bilong God na sampela tisa i kirap na grisim ol man na ol i go bihainim ol. Tupela man i bin giamanim sampela tausen man olsem long nau, em Jim Jones na David Koresh. (Matyu 15:14) Wanpela pasto Baptis em i bikman long lain i wok long daunim ol blakskin (Ku Klux Klan). Bilong helpim wok bilong em long putim ol waitskin i stap antap, em i kirapim ol man long givim bel long lotu, na em i tok long dispela rot “bai ol i kisim strong long God na bai ol i kisim strongpela bel olsem bilong Man i bin dai long Golgota [Krais Jisas].”

Olsem wanem long ol mirakel na ol strongpela wok ol i mekim long nem bilong Jisas? Yu mas tingim strongpela tok bilong Jisas olsem em i no ken orait long ol man i kolim em “Bikpela, Bikpela,” em bai orait long ol man i “bihainim laik bilong Papa.” Planti man long nau ol i no save long nem bilong Papa, em Jehova. Jisas i toksave olsem sampela bai “rausim ol spirit nogut” na “wokim planti mirakel” long nem bilong em, tasol ol i “man bilong mekim pasin nogut.”​—⁠Matyu 7:​21-23.

“Yupela i Mas Lusim Dispela Ples”

Olsem wanem long ol misin long bihain? Sik bilong ol i no inap pinis. Olsem wanem? Yumi mas bihainim tok bilong bisop Katolik (Butler) em i tok, yumi mas “insait kwik long [misin] na helpim ol man insait long en, em ol i wok oltaim long ‘mekim i kamap klin’ ”? Nogat! Ol misin i bruk na ol i no inap stretim dispela hevi. (Mak 3:​24, 25) Ol i hap bilong olgeta lotu giaman, em Baibel i kolim Bikpela Babilon. (KTH 18:​2, 3) Bikpela Babilon i gat asua long blut na klostu nau bai God i bagarapim em.

Baibel i no tok, ol Kristen tru i mas stap insait long dispela oganaisesen nogut bilong lotu na wok long stretim ol samting bilong en. Nogat. Baibel i tok: “Yupela i mas lusim dispela ples na i kam ausait. Nogut yupela i poroman wantaim em long ol sin em i save mekim. Na nogut yupela bai i poroman wantaim em tu long taim em i kisim pe nogut bilong ol dispela sin. Em i hipim ol sin bilong en i kam antap inap long heven. Na God i tingim gut olgeta pasin nogut em i bin mekim.”​—⁠KTH 18:​4, 5.

Ol i mas “lusim” na i go we? Jisas i tok, long taim bilong kisim kaikai, ol Kristen tru bilong olgeta hap bai bung wantaim na i stap wanbel. Profet Maika tu i stori long dispela: “Bai mi bungim yupela gen olsem ol sipsip wasman i bringim i kam bek long banis.” (Maika 2:12) Dispela samting i kamap pinis o olsem wanem?

Em i kamap pinis! Long nau ol Kristen tru long olgeta hap i bung wantaim olsem bikpela lain brata. Ol i husat? Em kongrigesen Kristen bilong ol Witnes Bilong Jehova, ol i wok gut wantaim long autim tok bilong Kingdom long 231 kantri. Ol i sakim ol tok bilong ol misin i brukim ol man i stap narapela narapela lain, na ol i wok long lotuim God long pasin em yet i makim long Baibel.​—⁠Jon 8:​31, 32; 17:17.

Gutpela yu ken toktok wantaim ol. Sapos yu laik kisim sampela save moa long lain Witnes Bilong Jehova, yu ken painim ol long hap bilong yu, o raitim pas long atres i stret long yu long pes 2.

[Piksa long pes 7]

“God i tingim gut olgeta pasin nogut em i bin mekim”