Wanpela Trupela Lotu Kristen Tasol—Em i Stap Tru
JISAS KRAIS i kamapim wanpela lotu, o kongrigesen, tasol. Dispela kongrigesen i bin stap olsem wanpela bodi spirit, olsem wanpela famili spirit. I olsem: God i bin bungim ol manmeri em i bin makim ol long rot bilong holi spirit bilong em—olgeta wantaim em God i lukim ol olsem ol “pikinini” bilong em.—Rom 8:16, 17; Galesia 3:26.
Jisas i bin skulim ol man olsem: God i bin mekim wok long wanpela rot tasol bilong stiaim ol man i go long tok i tru na long laip. Bilong kamapim klia dispela bikpela tok i tru, Jisas i tok piksa long dispela rot i go long laip i stap oltaim oltaim olsem wanpela rot tru tru. Em i tok: “Yupela i mas i go insait long liklik dua. Dua i go long ples bilong lus, em i bikpela, na rot i go long dispela ples em i op tumas na em i isi long bihainim. Na planti manmeri i save bihainim dispela rot. Tasol dua i go long ples bilong kisim laip, em i liklik tru, na rot i go long dispela ples em i hat tru long bihainim. Na wanpela wanpela manmeri tasol i save lukim na bihainim dispela rot.”—Matyu 7:13, 14; Jon 14:6; Aposel 4:11, 12.
Wanpela Kongrigesen i Stap Wanbel
Wanpela buk (The New Dictionary of Theology) i tok, dispela kongrigesen i bin i stap long taim bilong ol aposel, yumi no ken ting em i “wanpela lain i stap long olgeta hap bilong graun na ol i stretim gut ol wok bilong en, olsem nau yumi save tingim taim yumi toktok long lotu Katolik.” Bilong wanem yumi no ken ting olsem? Buk i tok: “As bilong dispela i olsem, Long dispela taim bipo i no gat wanpela lain i stap long olgeta hap bilong graun na i stretim gut ol wok bilong en na ol i wok gut wantaim.”
Yumi no inap sakim dispela tok olsem kongrigesen Kristen bilong pastaim i no wankain liklik olsem ol misin yumi save lukim long nau em ol i gat ol lo bilong bosim ol wok bilong ol. Tasol em i bin stretim gut ol wok bilong en. Ol wan wan kongrigesen i no mekim ol wok long tingting bilong ol yet, nogat. Olgeta i daun long tok bilong wanpela lain bilong bosim ol Kristen, em i stap long Jerusalem. Dispela lain—em ol aposel na hetman bilong kongrigesen long Jerusalem—ol i mekim wok bilong helpim olgeta kongrigesen wantaim long i stap wanbel olsem “wanpela bodi tasol” bilong Krais.—Efesus 4:4, 11-16; Aposel 15:22-31; 16:4, 5.
Wanem samting i bin kamap long dispela wanpela trupela kongrigesen? Yu ting em i bin kamap strongpela Misin Katolik? Olsem wanem? Em i bin wok long senis na i kamap olsem planti ol kain kain lain bilong lotu Talatala olsem yumi lukim long nau? O i gat narapela samting i kamap?
“Wit” na “Gras Nogut”
Bilong painim bekim bilong ol dispela askim, yumi mas skelim gut samting Jisas Krais yet i bin tok bai kamap. Ating bai yu kirap nogut long save, Jisas i save pinis olsem bihain ol man i no inap luksave long kongrigesen bilong em, na Jisas bai larim dispela samting i stap olsem i go inap planti handet yia.
Em i bungim kongrigesen bilong em wantaim “kingdom bilong heven” na em i tok: “Kingdom bilong heven em i olsem wanpela man i tromoi ol gutpela pikinini wit long gaden bilong en. Tasol taim ol manmeri i slip, birua bilong dispela man i kam, na em i tromoi ol pikinini bilong gras nogut namel long wit, na em i go. Bihain dispela wit i kamap na i laik karim kaikai, na ol i lukim gras nogut i stap wantaim. Orait na ol wokboi i go long papa bilong gaden na ol i tokim em olsem, ‘Bikman, mipela i ting yu bin tromoi ol gutpela pikinini wit tasol long gaden bilong yu. Olsem wanem na dispela gras nogut i kamap?’ Na em i tokim ol, ‘Wanpela birua i bin mekim dispela pasin.’ Na ol wokboi i askim em, ‘Yu laik bai mipela i go kamautim na bungim dispela gras nogut?’ Tasol em i tokim ol olsem, ‘Nogat. Nogut yupela i wok long kamautim gras nogut na yupela i kamautim wit wantaim. Mobeta yupela i larim tupela i kamap wantaim, inap long taim bilong kisim kaikai. Na long taim bilong kisim kaikai bai mi tokim ol man i mekim dispela wok olsem, “Yupela bungim gras nogut pastaim, na pasim long mekpas bilong kukim long paia. Tasol yupela bungim wit na putim i stap long haus kaikai bilong mi.” ’ ”—Matyu 13:24-30.
Jisas i tok em i ‘man bilong tromoi pikinini wit long gaden.’ “Gutpela pikinini wit” i makim ol disaipel tru bilong em. “Birua” bilong em, em Satan. “Ol pikinini bilong gras nogut” i makim ol Kristen giaman i bin kam insait long kongrigesen Kristen bilong pastaim. Jisas i tok em bai larim “wit” na “gras nogut” i kamap wantaim i go inap long “taim bilong kisim kaikai,” em bai kamap long “las de bilong dispela graun.” (Matyu 13:37-43) Wanem mining bilong dispela samting?
Ol i Bagarapim Kongrigesen Kristen
Taim ol aposel i dai pinis, i no longtaim na ol tisa husat i bin tromoi lotu i tru na i stap insait long kongrigesen, ol i kirap bosim kongrigesen. Ol i “mekim tok giaman nabaut, bilong pulim ol manmeri bilong God i go bihainim ol.” (Aposel 20:29, 30) Olsem na planti Kristen “i lusim bilip bilong ol.” Ol i “givim baksait long tok tru na putim yau long ol kain kain stori nating.”—1 Timoti 4:1-3; 2 Timoti 4:3, 4.
Wanpela buk (The New Dictionary of Theology) i tok, i kam inap long 300 yia samting bihain long Krais, ‘lotu Kristen bilong Misin Katolik i kamap olsem lotu bilong Gavman Rom.’ Ol i bungim Misin wantaim Gavman na dispela i pait wantaim ol bilip bilong ol Kristen bilong pastaim. (Jon 17:16; Jems 4:4) Dispela buk i tok tu olsem, bihain olgeta lo na pasin bilong stretim wok bilong lotu, na planti as bilip bilong en, i senis tru, long wanem, ‘ol i bungim ol tok bilong Olpela Testamen wantaim ol bilip bilong Pleto na dispela i stiaim tingting bilong ol.’ Olsem Jisas Krais i tok profet, ol Kristen giaman i kamap strong na ol disaipel tru bilong em i no stap ples klia moa—i olsem ol i hait na ol man i no inap lukim ol.
Ol man i harim tok bilong Jisas ol i save pinis olsem i hatwok tru long luksave long wit tru na ol gras nogut, olsem wanpela kain gras i gat marasin nogut long en na taim em i wok long kamap, em i luk olsem wit. Olsem na tok piksa bilong Jisas i makim olsem inap sampela hap taim bai i hatwok long luksave long ol Kristen tru na ol Kristen giaman. Tasol i no olsem kongrigesen Kristen i no stap moa, nogat; long wanem, Jisas i tok promis olsem em bai wok long soim rot long ol brata spirit bilong em long “olgeta de, i go inap long dispela taim i pinis.” (Matyu 28:20) Jisas i tok, wit bai wok long kamap bikpela. Tru, insait long planti handet yia ol Kristen tru—ol wan wan o ol liklik lain—ating ol i bin wok strong long holimpas ol tok bilong Krais. Tasol ol i no stap ples klia olsem wanpela lain o oganaisesen tru. Na yumi save, ol i no stap olsem ol lotu i bin tromoi bilip tru na insait long planti handet yia ol i bin bagarapim na semim tru nem bilong Jisas Krais.—2 Pita 2:1, 2.
“Man Bilong Sakim Lo Bai i Kamap Ples Klia”
Aposel Pol i tok profet long narapela samting tu bai makim dispela ol lotu giaman. Em i tok: “Yupela i no ken larim wanpela man i giamanim yupela long tok bilong en o long pasin em i mekim. Harim. Dispela De i no inap kamap nating. Nogat. Pastaim planti man bai i bikhet na givim baksait long God. Na man bilong sakim lo bai i kamap ples klia.” (2 Tesalonaika 2:2-4) Dispela “man bilong sakim lo” em lain pris pasto bilong ol lotu em ol i litimapim ol yet na stap olsem bos bilong kongrigesen ol i kolim Kristen.a
Dispela pasin bilong tromoi bilip i tru i bin kirap long taim bilong aposel Pol. Em i go bikpela hariap taim ol aposel i dai pinis na ol i no inap pasim moa rot bilong en. Pol i tok, dispela lain bilong tromoi bilip i tru “bai i kamap ples klia long strong bilong Satan tasol. Na long pasin giaman bilong Satan em bai i mekim olgeta kain strongpela wok na ol kain kain giaman mirakel.” (2 Tesalonaika 2:6-12) Dispela tok i makim stret tru ol pasin na wok bilong planti bikman bilong lotu inap planti handet yia i kam inap long nau!
Bilong helpim tok bilong ol olsem Lotu Katolik em wanpela tasol i trupela lotu, ol bikman bilong Misin Katolik i tok ol bisop ‘i bin kisim wok aposel bilong ol long ol aposel tru bilong pastaim, olsem ol i bin kisim ples bilong ol aposel na taim narapela i dai, narapela i kisim ples bilong em, i go i go olsem.’ Tasol Baibel i no as bilong dispela tok, em ol i tok ol i bin kisim ples bilong ol aposel na mekim wok bilong ol. I no gat wanpela samting i makim olsem holi spirit bilong God i bin stiaim dispela lotu i bin kamap bihain long taim ol aposel bilong Jisas i dai pinis.—Rom 8:9; Galesia 5:19-21.
Na olsem wanem long ol narapela lotu i bin kamap taim sampela lain i bruk long Misin Katolik na kamapim pasin ol i kolim Wok Bilong Stretim Bek Lotu (The Reformation)? Yu ting ol i bin kirap bihainim pasin bilong kongrigesen Kristen bilong pastaim? Ol i bin kamapim bek kongrigesen Kristen tru tru olsem bilong pastaim? Tru, bihain long dispela taim planti ol man nating inap kisim Baibel long tok ples bilong ol yet. Tasol ol samting i bin kamap bipo i soim olsem ol dispela lotu i wok yet long skulim ol man long ol bilip giaman.b—Matyu 15:7-9.
Tasol tingim dispela: Jisas Krais i bin tok profet tru tru olsem dispela wanpela trupela kongrigesen bilong em bai kamap bek long wanpela taim em i kolim olsem “las de bilong dispela graun.” (Matyu 13:30, 39) Truim bilong ol tok profet bilong Baibel i soim yumi olsem nau yumi stap long dispela taim. (Matyu 24:3-35) Olsem na yumi wan wan i mas askim yumi yet olsem, ‘Dispela wanpela trupela lotu i stap we?’ Em i mas wok long kamap ples klia tru na yumi ken luksave long en.
Ating yu pilim olsem yu painim pinis dispela lotu, o kongrigesen. Tasol yu mas save tru tru, long wanem, dispela em i bikpela samting. Bilong wanem? Long wanem, i mas i gat wanpela trupela lotu tasol i stap, olsem long taim bilong ol aposel. Olsem wanem? Yu bin skelim lotu bilong yu, olsem em i save bihainim stret pasin bilong kongrigesen Kristen bilong taim bilong ol aposel na em i holimpas ol tok Jisas Krais i bin skulim ol man long en? I gutpela sapos nau yu ken skelim dispela samting, a? Ol Witnes Bilong Jehova bai amamas long helpim yu long mekim olsem.—Aposel 17:11.
[Ol Futnot]
a Bilong kisim sampela save moa olsem dispela “man bilong sakim lo” em i husat tru, lukim Wastaua, Oktoba 1, 1990, pes 10-15.
b Lukim sapta “The Reformation—The Search Took a New Turn” long buk Mankind’s Search for God, pes 306-328, em ol Witnes Bilong Jehova i wokim.
[Ol Piksa long pes 5]
Tok piksa bilong Jisas long wit na gras nogut i skulim yumi olsem wanem long trupela kongrigesen?
[Ol Piksa long pes 7]
Lotu bilong yu i save bihainim pasin bilong ol Kristen long taim bilong ol aposel long autim tok na stadi?