Yu Ting i Gat Wanpela ‘Trupela Lotu’ Tasol i Stap?
“I GAT wanpela Krais tasol, na olsem tasol i gat wanpela bodi tasol bilong Krais, wanpela Meri tasol bilong Krais, ‘wanpela Lotu Katolik tasol bilong ol aposel.’ ”—Dominus Iesus.
Em tok bilong wanpela kadinal bilong Misin Katolik, em Joseph Ratzinger, em i kamapim bilip bilong lotu bilong em olsem i mas i gat wanpela trupela lotu tasol i stap. Em i tok, dispela lotu em “wanpela Lotu tasol bilong Krais, i stap insait long Misin Katolik.”
“Ol i No Olsem Misin Tru Tru”
Pop John Paul Namba 2 i strong long tokaut olsem dispela pepa Dominus Iesus ‘i no mekim sampela tok bilong daunim ol narapela lotu o tok bilas long ol,’ tasol ol bikman bilong lotu Talatala i kros long ol tok i stap long dispela pepa. Long wanpela kibung bilong lotu Presbitirian long Belfast, Noten Aialan, long Jun 2001, wanpela pasto i tok, dispela pepa em i wok bilong “wanpela strongpela lain insait long Misin Katolik . . . ol i pret stret long nupela tingting em Namba Tu Kibung Bilong Vatiken i kamapim, olsem Misin i no gat tok long ol narapela lotu.”
Robin Eames, em Bisop bilong Sios Bilong Aialan, i tok em bai bel hevi stret “sapos dispela pepa i kamapim bek tingting bilong Misin Katolik paslain long Namba Tu Kibung Bilong Vatiken.” Eames i toktok long wanpela tok bilong Vatiken olsem ol lotu i sakim sampela bilip bilong lotu Katolik “ol i no olsem Misin tru tru,” na em i tok: “Long tingting bilong mi, dispela i olsem tok bilas.”
Wanem samting i mekim na ol i kamapim dispela pepa Dominus Iesus? Ating Misin Katolik i tingting planti long sampela tingting i kamap, olsem i no gat wanpela tok i tru bilong lotu em i tru olgeta—em samting bilong ol wan wan man o lain long skelim. Wanpela nius (The Irish Times) i tok, “Kadinal Ratzinger i tingting planti tru long dispela nupela tingting—olsem narapela lotu i no winim narapela lotu.” I olsem dispela nupela tingting i kirapim em long mekim dispela tok olsem i gat wanpela trupela lotu tasol i stap.
Yu Bilong Wanem Lotu, Em i Bikpela Samting o Nogat?
Tru, dispela tingting olsem “i no gat wanpela tok i tru bilong lotu i tru olgeta,” o “narapela lotu i no winim narapela lotu,” sampela man i laikim dispela kain tingting, winim dispela tok olsem i gat wanpela trupela lotu tasol i stap. Ol i ting em i samting bilong man yet long skelim wanem lotu em bai insait long en. Ol i save tok, ‘Yu bilong wanem lotu, dispela i no bikpela samting.’
Ating sampela bai ting dispela tingting i gutpela—maski dispela tingting i mekim na ol lotu i bruk bruk na nau i gat ol kain kain lotu i kamap. Planti man i save tok, ‘Ol dispela kain kain lotu i soim olsem olgeta man i stap fri long makim wanem lotu ol i laikim.’ Tasol wanpela man bilong raitim buk, em Steve Bruce, em i tok, ‘dispela tingting olsem yumi mas orait long olgeta kain lotu, em i makim olsem ol i no tingting tumas long lotu.’—Buk A House Divided: Protestantism, Schism, and Secularization.
Orait wanem tingting i stret? Yu ting i gat wanpela trupela lotu tasol i stap? Dispela trupela lotu em Misin Katolik tasol? God i orait long ol narapela lotu? Ol dispela askim i insait long pasin bilong yumi long pas gut wantaim Man bilong wokim yumi, olsem na em i bikpela samting long yumi mas kisim tingting bilong em long dispela, a? Yumi ken mekim olsem wanem? Yumi ken lukim tok bilong God long Baibel. (Aposel 17:11; 2 Timoti 3:16, 17) Orait nau yumi ken skelim tok bilong Baibel long dispela tok olsem i gat wanpela trupela lotu tasol i stap.