“God i Skulim Yumi” Kibung Bilong Itiopia—Em Taim Bilong Bikpela Amamas
I NO namba wan taim kibung distrik i bin kamap long Itiopia long taim ol Witnes Bilong Jehova i kamap fri, nogat; tasol em i wanpela gutpela kibung tru. Long Novemba 11, 1991, gavman i tekewe tambu long ol Witnes na nau em namba 3 taim ol i bung long haus stediam long biktaun Adis Ababa—bikpela bilong en i winim ol narapela stediam long Itiopia. Pastaim ol i no inap kisim dispela stediam long Sande, na i no gat narapela ples i bikpela inap long planti man i kam bung, olsem na ol i putim ol tok bilong kibung i go insait long 3-pela de tasol; Fonde i go inap Sarere, Janueri 13-15, 1994.
Long dispela 3-pela de, san i lait gut, na ol lain i kam bung ol i kisim gutpela save, olsem lait bilong spirit, long dispela kibung “God i Skulim Yumi.” Ol naispela plaua i raunim pletfom, na nem bilong kibung i stap ples klia long rait Amharik.
Tasol wanem samting i mekim na kibung hia i gutpela tru? I gat planti gutpela tok bilong kibung, na olgeta manmeri i kam bung ol i tingim bikpela lain brata bilong yumi i stap long olgeta hap, em narapela i laikim tru narapela, na ol i tingim wok bilong Kingdom i go bikpela na dispela i makim olsem God i bin mekim gut long lain bilong em. Inap 270 manmeri bilong 16 kantri, tupela bilong ol em Jibuti na Yemen, ol i kam bung. Winim 135 bilong dispela 270 ol i bin lusim taim bilong kol long hap bilong Yurop na Not Amerika na i kam. Tupela brata bilong Lain Bilong Bosim Ol Witnes Bilong Jehova, Lloyd Barry na Daniel Sydlik, ol tu i kam.
Ol Witnes Itiopia i lukautim gut ol brata i kam long kibung na laikim tru ol, na dispela i kamapim bikpela amamas, maski narapela i no save long tok ples bilong narapela. Taim ol i bungim ol, ol i no sekan tasol; narapela i holim narapela na kis, inap 6-pela taim! Planti brata i kam long kibung i bin kaunim stori bilong wok bilong Kingdom long Itiopia na ol i save, ol brata bilong ol long Itiopia ol i bin stap gut long God, maski ol birua i bin traim bilip bilong ol na putim ol long kalabus na mekim nogut long ol.a Tasol ol i kirap nogut long lukim planti yangpela i stap, pes bilong ol i lait na narapela i mekim gutpela pasin long narapela—long planti kantri long nau, ol yangpela i no save mekim gutpela pasin olsem. Planti sista Itiopia ol i pasim waitpela klos bilong ples i gat ol gutpela bilas long en, na dispela tu i helpim amamas bilong kibung.
Fraide em taim bilong baptais na dispela i kamapim bikpela amamas. Inap 530 nupela dediket i lain i stap; ol i gat 10-pela krismas i go inap 80 krismas. Ol man i kirap nogut long lukim bikpela lain olsem—long olgeta 7-pela 7-pela Witnes long Itiopia, i olsem wanpela i laik baptais. Dispela i kamapim klia olsem Jehova i bin blesim lain bilong em long dispela kantri! Aiwara bilong amamas i pundaun long planti i lukim dispela samting, na ol man i amamas long harim 40 bilong Itali i singsing gut tru taim dispela lain i kisim baptais. Planti ol i tingim tok profet bilong Aisaia 60:5: “Yu bai lukim dispela na pes bilong yu bai i lait moa yet. Na lewa bilong yu bai i kalap wantaim bikpela amamas.”
Ol Samting Bilong Kamapim Amamas
Long Fraide, sampela misineri bilong pastaim ol i stori long taim ol Witnes long Itiopia ol i liklik lain tru, na dispela tu i kamapim klia olsem Jehova i bin blesim wok bilong Kingdom long dispela kantri. Sampela i bin mekim wok misineri long dispela kantri long yia 1950 samting na sampela long 1970 samting. Winim 8,000 manmeri i harim Ray Casson, John Kamphuis, na Haywood Ward i stori long wok ol i bin mekim bilong lainim ol man long Baibel, kirap long Septemba 14, 1950, taim ol i kamap long Adis Ababa. Gavman bilong dispela taim i bin putim tok olsem ol i mas kamapim wanpela skul. Olsem na ol i kamapim wanpela skul namel long taun na ol i lainim ol man i bikpela pinis long kain kain samting. Tasol taim ol dispela misineri i no mekim dispela wok, ol i wok long skulim ol man long ol tok i kam long God. Ol i wok strong long lainim tok Amharik, em tok ples i gat 250 leta long en na i hatwok tru long lainim. Sikspela mun i lus, na nau ol inap mekim namba wan Baibel-stadi bilong ol. Foti-tri yia bihain, ol i bungim sampela man long rot em ol i tingim yet ol dispela skul-tisa bilong pastaim. Tasol long kibung ol i amamas long bung gen wantaim planti brata sista em bipo ol i bin stadi wantaim ol long Baibel na ol i kamap strong long bilip, na nau ol dispela brata sista i laik bai 3-pela brata hia i ken save long ol pikinini na bubu bilong spirit ol yet i bin kamapim.—1 Tesalonaika 2:19, 20.
Ol man i kam bung ol i putim gut yau long ol tok em ol misineri bilong pastaim i mekim, na ol i amamas na paitim han i go i go; ol i mekim olsem tu taim ol i harim ol ripot samting em ol Witnes bilong Briten, Kanada, Jemani, Israel, Itali, Kenya, Netelan, na Yunaitet Stets i kamapim. Dispela tu i kamapim klia olsem lain bilong Jehova ol i bikpela lain brata i stap long olgeta hap na narapela i laikim tru narapela. Tupela brata em God i makim ol, na ol i bilong Lain Bilong Bosim Ol Witnes Bilong Jehova, taim ol i mekim ol bikpela tok na givim bel long beten, ol brata sista i pilim tru. Taim ol yangpela i lukim pilai i kamapim stori bilong ol yangpela em ol i tingim Man bilong wokim ol, ol i ting ol dispela yangpela bilong pilai i olsem makim ol yet. Ol lain i kam bung ol i kisim ol nupela buk samting long tok Inglis, na ol i amamas long kisim 3-pela nupela buk na buklet long tok Amharik.b
Long taim bilong kisim kaikai samting, i gat rot bilong toktok wantaim planti ol narapela. Olsem: Long namba wan lain sia, wanpela lapun, Tulu Mekuria, i sindaun i stap wantaim stik bilong wokabaut; krismas bilong em i winim ol narapela pablisa long Itiopia. Long yia i go pinis, taim em i gat 113 krismas, em i kisim baptais na i kamap wanpela Witnes Bilong Jehova. Long dispela kibung em i amamas long lukim meri bilong em i gat 80 krismas i kisim baptais, na i kamap sista bilong em long spirit. Lapun hia i no lusim wanpela hap bilong kibung na dispela i bin strongim ol yangpela. Wanpela yangpela olsem, em Yohanes Gorems. Em i gat 16 krismas na em i skul yet, tasol inap 4-pela yia pinis em i bin mekim wok painia oltaim. Em wantaim sampela narapela painia, em ol i yangpela long Yohanes, ol i bin stretim gut wok bilong ol bambai ol i gat taim bilong autim tok long moningtaim taim ol i wokabaut i go long skul, na long belo samting na long taim skul i pinis long apinun.
Ol i Holimpas Bilip!
Planti handet brata sista long kibung ol i bin kalabus na kisim bikpela pen long taim bilong ol gavman bilong pastaim. Mandefro Yifru i tingting bek long taim em i bin stap 5-pela yia long kalabus, tasol nau em i amamas long mekim wok long nupela ofis ol Witnes i bin kamapim long Adis Ababa; ofis hia i lukautim wok bilong tanim tok na prinim ol samting na salim ol buk samting i go. Narapela yangpela man i wok wantaim em, em Zecarias Eshetu, na 8-pela yia bipo em i holimpas bilip bilong em long taim ol i kilim i dai papa bilong em. Papa i bin stap kalabus inap 3-pela yia, long wanem, em i no laik insait long pait. Zecarias, em wanpela bilong 5-pela pikinini, em i gat 10-pela krismas taim ol i putim papa bilong em long kalabus. Meswat Girma na susa bilong em, Yoalan, nau ol i gat 18 krismas samting na ol i stap yet long skul. Ol i save long papa bilong ol long ol piksa tasol, long wanem, taim ol i liklik yet ol man i bin kirap wantu tasol na kilim em i dai. Ol i mekim olsem, long wanem, em i no laik insait long wok politik samting. Em i stap gut long God, na dispela i bin strongim tupela na nau tupela i mekim wok painia oltaim, olsem papa i bin mekim inap long taim em i dai.
Narapela i bin holimpas bilip, em Tamirat Yadette; nau em i mekim wok painia salim long wanpela gutpela hap bilong Rift Valley. Em i no laik insait long wok politik samting, olsem na em i stap 3-pela yia long 7-pela narapela narapela kalabus. Sampela taim ol i pasim em long sen, na ol i paitim em nogut tru. Tasol taim em i stap kalabus, em i bin helpim inap olsem 12-pela man long bilip long Kingdom bilong God. Tesfu Temelso, nau em i mekim wok sekit, taim em i mekim wok painia salim ol i bin kalabusim em inap 17 taim. Ol i paitim em na ol mak bilong dispela i stap yet, tasol em i amamas long lukim sampela kongrigesen i stap long ol hap bipo em i autim tok long en. Planti brata sista bilong kongrigesen Akaki ol i bin kalabus na kisim bikpela pen, tasol kongrigesen i go bikpela, winim 100 pablisa. Ol i bin wokim namba wan Haus Kingdom bilong ol Witnes Bilong Jehova long Itiopia. Faipela Witnes i kam long kibung, ol i kam long taun Dese i stap 300 kilomita long hap not bilong nambawan biktaun. Klostu ol i bin kisim i dai, na ol i bin lukim wanpela brata long hap bilong ol em i dai long bikpela pen ol i bin givim long em. Wanpela bilong ol em Maseresha Kasa, em wanpela elda, na em i stori long samting i bin helpim em long stap strong inap 6-pela yia long kalabus, olsem: Em i no mekim long strong bilong em yet, nogat; em i bin bilip tru long Jehova na wetim Em i helpim em.—Rom 8:35-39; skelim wantaim Aposel 8:1.
Long nau tu sampela narapela ol i bin stap gut long God long taim bilong traim. Wanpela bikpela lain Witnes bilong narapela kantri klostu ol i bin kam long kibung. Ol Witnes long dispela kantri ol i no save insait long wok politik samting, olsem na ol i no inap singautim ol polis i helpim ol, na ol man i no laik givim pepa bilong marit long ol, na pepa bilong i go raun long ol narapela hap, na ol dokta long haus sik i no laik givim marasin samting long ol, na ol man i no laik givim wok mani long ol. Taim pait i stap klostu long taun Mesewa, long arere bilong solwara Retsi, wanpela kongrigesen i gat 39 brata sista long en, ol pikinini tu, ol i stap inap 4-pela mun aninit long wanpela bris long ples wesan nating bambai ol inap abrusim bagarap taim lain bilong gavman bilong pastaim i tromoi bom long haus bilong ol. Ol i stap long bikpela san na ol i sot long kaikai samting, tasol long olgeta de ol i toktok wantaim long teks bilong de, na mekim ol miting, na dispela i bin givim bikpela strong long ol na i helpim ol long pas gut wantaim Jehova na ol yet. Misin Otodoks i kirapim sampela lain long mekim pasin birua long tupela sista painia salim, em ol i mekim wok bilong ol klostu long as bilong wara Blu Nail, tasol tupela hia i bin sanap strong na autim tok yet, na long dispela kibung ol i lukim sampela Baibel-stadi bilong ol i kisim baptais.
Wanpela brata i stori long taim em i bin mekim wok long ples nating Ogaden, klostu long Somalia. No gat narapela Witnes i stap long dispela hap, olsem na bilong helpim em yet long i stap strong long ol samting bilong spirit, em i bin autim tok, na mekim ol miting wantaim ol man i laik harim tok, ol dokta tu. Ol tok God i skulim yumi long en i bin helpim ol dispela man na nau ol i lainim ol narapela man long ol dispela tok. Narapela Witnes i holimpas bilip, em wanpela painia salim long Adis Ababa. Long 1992, ol pris Otodoks i kirapim ol lain long paitim em nogut tru na klostu em i laik dai. Tasol gutpela tru, em i orait bek na em i autim tok yet long dispela teritori. Pes bilong em i lait; em i no bel nogut long dispela samting i bin painim em. Em, wantaim ol narapela i bin winim ol traim, na ol nupela man tu, ol i bin amamas long kisim ol gutpela samting long dispela “God i Skulim Yumi” Kibung.
Olgeta samting bilong kibung i ran gut, olsem na ol man i kam long kibung ol i ting ol man i mekim wok long kibung ol i bin mekim dispela kain wok inap planti yia pinis. Tasol wok bilong ol i bin kamap gutpela hariap insait long tupela yia tasol. Dispela 3-pela de kibung i pinis hariap tumas. Inap 9,556 i bung long Sarere. Televisen, redio, na nius ol i bin stori gut long kibung. Olgeta man i save, Jehova i bin helpim gut lain bilong em long kisim planti gutpela samting bilong spirit. Sampela tausen manmeri i no Witnes, ol tu i kam long kibung, na tok God i skulim yumi long en i wok long helpim ol. I gat planti wok ol Witnes Bilong Jehova i ken mekim long dispela kantri i gat 50 milion manmeri i stap long en, na kibung i bin strongim bel bilong olgeta manmeri i gat strongpela tingting long mekim gutpela wok long dispela liklik taim i stap yet, na long helpim ol man i gat gutpela bel na bai tok God i skulim yumi long en i ken helpim ol tu.
[Ol Futnot]
a Lukim 1992 Yearbook bilong ol Witnes Bilong Jehova, em Sosaiti Wastaua bilong Nu Yok i bin wokim.
b Buk Rot Bilong i Stap Amamas Taim Yu Yangpela Yet; Rot Bilong Kamapim Amamas Insait Long Famili; buklet Ol Witnes Bilong Jehova Ol i Wanbel na Mekim Wok Bilong God Long Olgeta Hap.
[Ol Piksa long pes 23]
Adis Ababa, Janueri 13-15, 1994
[Ol Piksa long pes 24]
Sampela painia long Adis Ababa (han sut); ol i stap gut long God na ol i putim ol long kalabus (daunbilo); Witnes i gat 113 krismas, wantaim meri bilong em