As Bilong Pasin Bilong No Ken Pret
“MIPELA harim wanpela kain krai na mipela sanap i stap. Tupela pisin i lusim liklik diwai long han kais na opim pul na ran i kam long mipela. Ol i pasim rot bai mipela i no krungutim tupela kiau bilong ol em mipela i no bin lukim long liklik hul long rot. Mipela laik i go klostu na kisim piksa bilong dispela tupela kiau i gat braunpela makmak, tasol tupela pisin hia i wok strong long rausim mipela. Mipela i kirap nogut long tupela i no pret liklik.”
Dispela samting i bin kamap taim 4-pela man i go klostu long kiau bilong wanpela kain pisin bilong Afrika (spotted dikkop). I gat narapela pisin (blacksmith plover) i moa liklik na tupela man i gat save long ol pisin i stori long en olsem: “Papamama pisin i save lukautim gut kiau na ol pikinini. Sapos wanpela animal i kam klostu, ol i strong long rausim em. Maski em i bikpela, ol i no pret—ol i flai i go antap na krai strong na sut i kam daun long em. Ol i rausim ol man tu olsem.”—Sinclair na Mendelsohn long buk Everyone’s Guide to South African Birds.
Sampela man i bin lukim bikpela elefan i wokabaut i kam klostu long kiau bilong dispela kain pisin. Elefan i no save kiau i stap na papamama pisin i kirap long rausim em na em i go bihainim narapela rot.
Pisin i kisim we dispela pasin i olsem ol i no pret? Man i bin wokim ol em i as bilong en. God Jehova i putim save long skin bilong ol dispela liklik pisin na taim wanpela bikpela animal i kam klostu, skin bilong pisin i kirapim em long mekim ol dispela samting bilong lukautim kiau o pikinini bilong en.
Dispela Inap Lainim Ol Kristen
Dispela inap lainim ol Kristen na helpim ol long sanap strong na i no pret, winim ol pisin. Ol i mas bihainim pasin bilong Bikman bilong ol, Krais Jisas, em i strong long bihainim ol lo bilong God na em i no pret liklik. (Hibru 12:1-3) Baibel i tok, ol man i pret na surik long mekim wok bilong God, ol bai lus. (Hibru 10:39; KTH 21:8) Tasol Jehova i save yumi no gutpela olgeta na sampela taim yumi pundaun na mekim rong o yumi pret na yumi no bihainim tru laik bilong em. (Song 103:12-14) Sapos man i pret na surik long mekim pasin i stret, em i mas mekim wanem?
Kristen i mas beten askim God long givim strong long em, na bai em inap sanap strong long traim na mekim yet wok bilong God. Baibel i tok promis olsem God bai strongim em: “Bikpela i save strongim ol man i no gat strong, na taim bun bilong ol i slek pinis, em i save mekim ol i stap strong. Strong bilong ol strongpela yangpela man i save slek na pinis. Tasol ol manmeri i bilip long Bikpela na i wetim em i helpim ol, ol bai i stap strong oltaim. Na bai ol i flai olsem ol tarangau. Bai ol i ran na ol i no inap sotwin, na bai ol i wokabaut na ol i no inap les.” (Aisaia 40:29-31) Planti sinman bilong graun i save dispela tok i stret. Ol i no gat strong, tasol “bihain ol i kisim strong.” (Hibru 11:34) Aposel Pol i gutpela piksa bilong dispela, em i tok: “Bikpela yet i bin sambai long mi na givim strong long mi. Olsem na mi autim gutnius inap tru.”—2 Timoti 4:17.
Ol nupela man i laik kamap disaipel bilong Krais Jisas ol tu inap kisim strong olsem. Tingim Henry, em i bilong Saut Afrika na em i lukautim mani bilong haus lotu na haus bilong em i stap klostu long haus bilong pasto. Henry i wok long painim tok i tru. Em i givim bel long lotu bilong em, tasol em i orait long ol Witnes Bilong Jehova i lainim em long Baibel, no gat pe. Bihain em i tok em i laik kamap wanpela Witnes na em i laik save long ol samting em i mas mekim. Ol i tokim em, em i mas lusim misin bilong em. (KTH 18:4) Pasto i stap klostu na em i gutpela pren bilong Henry, olsem na Henry i no laik raitim pas; em i laik i go lukim pasto na tokim em, em i laik lusim misin. Em i strongim bel na mekim olsem.
Pasto i kirap nogut tru. Bihain em i kisim siaman bilong lotu na sampela man moa bilong misin na ol i go lukim Henry. Ol i laik save bilong wanem em i laik lusim lotu bilong ol na insait long wanpela lotu ol i ting i no gat spirit bilong God. Henry i tok: “Pastaim mi pret long bekim tok long ol, long wanem, bipo ol i bosim mi strong. Tasol mi beten askim Jehova long helpim mi, na em i givim strong long mi na mi inap tokim ol olsem: ‘Long olgeta lotu bilong olgeta hap, wanem lotu i save kolim nem bilong God, em Jehova? Em lain Witnes Bilong Jehova, a? Orait, yu ting God bai larim ol i kisim nem bilong em na em i no givim spirit holi long ol tu?’ ” Ol dispela bikman bilong misin i no inap bekim tok. Henry i tenkyu long Jehova long gutpela save na bikpela strong em i save givim long lain bilong em. Nau Henry i no pret—em i wok wantaim ol Witnes Bilong Jehova long i go long ol haus na autim tok.
Tru tumas, bilong i stap Kristen tru, yumi mas strongim bel. Las de i kam klostu na planti samting moa bai traim bilip bilong yumi. Satan i laik mekim na bai ol wokboi bilong God i no stap gut long em, na bai ol i lus long kisim laip i stap oltaim. (Lukim Kampapim Tok Hait 2:10.) Tasol yumi no ken tru lusim Jehova. Maski yumi pret na pundaun liklik, Jehova inap helpim yumi long kamap strong gen. Oltaim wetim em i helpim yu na givim strong long yu bambai yu inap mekim yet wok bilong em. Yu mas save, Man bilong wokim ol dispela pisin i no save pret, em i as bilong pasin bilong no ken pret. Olsem na ol Kristen tru i ken strongim bel na tok olsem: “Bikpela i save helpim mi na mi no inap pret. Ol man i no inap mekim wanpela samting long mi.”—Hibru 13:6.